Armagedoni Nsuka ya Mbi ya Inza?

ARMAGEDONI! Keti ngogo yai kepusaka nge na kuyindula lufwa ya bima yonso to kuzika ya luyalanganu? Na bitini mingi ya inza, bantu kesadilaka mingi kibeni ngogo “Armagedoni” na masolo ya konso kilumbu kuluta bangogo yankaka ya Biblia. Bantu kesadilaka mingi ngogo yai sambu na kutubila mambu ya mpasi yina kevingila bantu na bilumbu kekwisa. Televizio, bafilme, ti bavideo mefulusaka mabanza ya bantu ti bansonga ya kepesaka boma yina kemonisaka “Armagedoni” yina kekwisa. Bantu mekumisaka ngogo yai diswekamu mpi bo ketendulaka yo mbote ve. Ngogo Armagedoni mekatukaka na Biblia mpi bantu ketendulaka yo na mitindu mingi kibeni. Kansi, mingi na kati ya bantendula yango kewakanaka ve ti mambu yina Biblia kelongaka na yina metala Armagedoni.

Sambu Biblia kewakanisaka Armagedoni ti “nsuka ya ntoto,” keti nge tandima ve nde yo kele mfunu na kubakisa mbotembote ntendula ya ngogo yango? (Matayo 24:3) Mpi keti yo tavanda ve mbote na kutadila Ndinga ya Nzambi, yina kele mpenza nto ya kyeleka, sambu na kuzwa bamvutu ya metala ntendula ya Armagedoni mpi mambu yina yo tatendula sambu na nge mpi dibuta na nge?

Kutadila mambu na mutindu yai tamonisa nde na kisika ya kuvanda nsuka ya mbi ya inza, Armagedoni tanata luyantiku ya kyese sambu na bantu yina kezolaka kuzinga mpi kuvanda mbote na inza ya mpa ya lunungu. Nge tabakisa mbotembote kyeleka yai ya mfunu ya Masonuku kana nge tadila mutindu disolo yina kelanda tatubila ntendula ya kyeleka ya Armagedoni.

[Lupangu/Kifwanisu ya kele na lutiti 3]

NGE KEYINDULA NDE ARMAGEDONI KELE INKI?

• Lufwa na mvita ya nikleyere

• Kubeba ya ngolo ya mupepe mpi ya kisika ya bantu kezingaka

• Kututana ya mbwetete mosi ti ntoto

• Lufwa ya Nzambi tafwa bantu ya mbi