“Nge Kele Nkento ya Bifu ya Mbote”

Bangogo yai ya kusikisa bo songaka yo na mwana-nkento mosi ya Moabi. Yandi vandaka mufwidi, zina na yandi Ruti, bokilo ya nkento mosi ya Izraele, Noemi. Yandi zingaka na Izraele bamvula kiteso ya 3000 meluta, ntangu bazuzi vandaka kuyala, ebuna bantu yonso kuzabaka Ruti nde yandi vandaka nkento mosi ya bifu ya mbote. (Ruti 3:11) Inki kusalaka nde yandi kuma ti lukumu ya mutindu yai? Nani lenda baka mambote ya mbandu na yandi?

Sambu yandi vandaka ‘konso ntangu kaka na kisalu,’ Ruti vandaka kulutisa ntangu mingi na kusala na kikesa yonso kisalu ya kulokuta bambuma na bilanga. Bantu kumaka kusikisa yandi sambu na kikesa ya mutindu yai. Ata ntangu bantu vandaka kulomba na kusadisa yandi, yandi vandaka kulanda kaka na kusala na kikesa yonso, kuluta nkutu kiteso ya bantu vandaka kuyindula nde yandi tasala. Mpila ya kuyituka kele ve na kumona nde, yandi lungisaka mambu yina Biblia ketubaka sambu na nkento ya mefwana na kubaka lukumu, ya kikesa, ya mayele.​—Bingana 31:10-31; Ruti 2:7, 15-17.

Kima kusalaka nde Ruti kuvanda na lukumu ya mutindu yina kuvandaka bikalulu na yandi yai ya kimpeve: kudikulumusa, kuditambika mpi zola ya kwikama. Yandi yambulaka bibuti na yandi ti insi na yandi, ti kivuvu fyoti ya kuzwa lutaninu yina makwela lenda pesa, yandi kangamaka na Noemi. Dyaka, Ruti kumonisaka mpusa ya kusadila Yehowa, Nzambi ya bokilo na yandi. Sambu na kumonisa mpenza mfunu na yandi, disolo ya Biblia ketuba nde yandi vandaka ‘kusadisa [Noemi] mingi kuluta bana-babakala nsambwadi.’​—Ruti 1:16, 17; 2:11, 12; 4:15.

Ata Ruti kuvandaka nkento mosi ya lukumu na meso ya bantu sambu na bikalulu na yandi ya mbote, Nzambi kusikisaka yandi mingi dyaka sambu na bikalulu na yandi mpi yandi sakumunaka yandi na mpila yandi kumisaka yandi nkaka ya Yezu Kristu. (Matayo 1:5; 1 Piere 3:4) Ruti kele mbandu mosi ya mbote sambu na bankento yina kele Bakristu mpamba ve kansi mpi sambu na bantu yonso yina ketubaka nde bo kesambilaka Yehowa.