Kimununu Kukangaka Yandi Ve Nzila na Kulonguka

KSENIYA kubutukaka na mvu 1897. Nkento yai vandaka ti bana ya bankento tatu, mwana ya bakala mosi, mpi bantekolo 15, ebuna mizikulu 25. Na luzingu na yandi ya mvimba yandi salaka mambu yina bibuti na yandi kulongaka yandi na kusala. Ata yandi tinaka bitumba na repiblika ya Abkhazi, yina kele na katikati kwaku Mer Noire kwaku Caucasie, sambu na kwenda kuzinga na Moscou bonso refizie, yandi vandaka na luzingu mosi ya kyese, mingimingi sambu yandi vandaka kusamba na dibundu yina bankaka na yandi kubikilaka yandi.

Na mvu 1993, Meri, mwana ya Kseniya ya nkento kukumaka Mbangi ya Yehowa. Meri yantikaka kusonga Kseniya mambu yina metala Yehowa Nzambi mpi Biblia, kansi yandi vandaka kuzola ve kuwa. Kseniya kulembaka ve na kusonga mwana na yandi ya nkento nde, “Mono lenda kuka dyaka ve na kulonguka mambu ya mpa.”

Kansi, mwana na yandi Meri, ti Londa, nkento ya mutekolo na yandi, ti mizikulu na yandi Nana ti Zaza, yina kukumaka Bambangi ya Yehowa, kulembaka ve na kuzabisa yandi mambu yina Biblia ketuba. Kilumbu mosi ya nkokila na mvu 1999, bo tangilaka Kseniya verse mosi yina kusimbaka ntima na yandi. Yo vandaka ti bangogo ya kitoko yina Yezu kusongaka bantumwa na yandi ya kwikama ntangu yandi vandaka kusala Madya ya Nkokila ya Mfumu. (Luka 22:19, 20) Na nkokila yina, ata Kseniya kuvandaka ti bamvula 102, yandi bakaka desizio ya kuyantika kulonguka Biblia.

Kseniya ketuba nde: “Na nima ya kuzinga bamvula 102, mono bakisaka nsukansuka ntendula ya luzingu. Mono mebakisa ntangu yai nde katula kusadila Yehowa, Nzambi na beto ya mbote mpi ya zola, kele dyaka ve na kima yankaka ya meluta mbote. Mono kele kaka ti mayele mpi ti ngolo na nitu. Mono lenda tanga kukonda maneti mpi mono kevukanaka na kikesa yonso ti dibuta na mono.”

Na Novembri 5, 2000, Kseniya kubakaka mbotika. Yandi ketuba nde: “Ntangu yai mono mepesaka luzingu na mono na Yehowa sambu na kusadila yandi na zola yonso. Mono kekabulaka baperiodike ti batrakiti na ntangu mono kefongaka na kisika bisi ketelamaka penepene ya nzo na mono. Mbala mingi bampangi ya dibuta na mono kekwisaka kutala mono, ebuna mono kezabisaka bo na kyese yonso kyeleka ya metala Yehowa.”

Kseniya kekinga ntangu yina “nitu na yandi ta kuma diaka bonso ntangu yandi vandaka leki, yandi ta baka diaka ngolo.” (Yobi 33:25) Kana muntu ya melungisa bamvula nkama mosi kemona ve nde yandi mekuma mbuta mingi sambu na kulonguka ntendula ya luzingu na Biblia, inki nge lenda tuba sambu na nge?