Mambu Yina Kimfumu ya Nzambi Tasala

“Kimfumu na nge kwisa, luzolo na nge kusalama awa na ntoto bonso na zulu.”​—MATAYO 6:10.

1. Inki mambu Kimfumu ya Nzambi tasala ntama mingi ve?

 NTANGU Yezu kulongaka balongoki na yandi na kusamba sambu na Kimfumu ya Nzambi, yandi zabaka nde ntangu yo takwisa yo tasukisa bamvula mingi ya bantu meyala kukonda lutwadisu ya Nzambi. Na ntangu yina, luzolo ya Nzambi vandaka kusalama mpenza ve na ntoto. (Nkunga 147:19, 20) Kansi na nima ya kutula Kimfumu na zulu, luzolo ya Nzambi tasalama bisika yonso. Ntangu ya kukatuka na luyalu ya bantu sambu na kukota na luyalu ya Kimfumu ya zulu ya Nzambi mekuma penepene kibeni.

2. Inki kima tasonga nde beto mekatuka na luyalu ya bantu sambu na kukota na luyalu ya Kimfumu?

² Yezu kubingaka ntangu yina tasonga nde beto mekatuka na luyalu ya bantu sambu na kukota na luyalu ya Kimfumu ya  Nzambi nde “mpasi mosi ya [nene, NW] yina me bwaka ntete ve katuka kuna ya Nzambi salaka bima yonso tii bubu yai. Ata mpasi ya nkaka ya mutindu yina ta vanda diaka ve.” (Matayo 24:21) Biblia ketuba ve ntangu yina tavanda nda nki mutindu, kansi bampasi yina tabwa na ntangu yina taluta bampasi yonso ya mebwaka dezia na inza. Na luyantiku ya mpasi ya nene, kima mosi tasalama yina tapesa bantu mingi ya kele na ntoto mpasi mingi na ntima: lufwa ya mabundu yonso ya luvunu. Bambangi ya Yehowa tawa ve ntima mpasi sambu bo ketubilaka yo dezia tuka ntama. (Kusonga 17:1, 15-17; 18:1-24) Mpasi ya nene tasuka na Armagedoni, ntangu Kimfumu ya Nzambi tafwa ngidika ya Satana yonso.​—Daniele 2:44; Kusonga 16:14, 16.

3. Inki mutindu Yeremia ketendula mambu yina tabwila bantu ya kukonda bulemfu?

³ Inki yo tatendula sambu na bantu “yina kuzaba Nzambi ve, bayina ke zola kulanda ve Nsangu ya Mbote” ya metala Kimfumu ya zulu yina kele na maboko ya Kristu? (2 Tesalonika 1:6-9) Mbikudulu ya Biblia kesonga beto nde: “‘Mpasi ta bwila konso bantu bonso mupepe ya ngolo me katuka ntama.’ Na kilumbu yango yina bamvumbi ya bantu yina ya Mfumu Nzambi ta fwa, bo ta panzana-panzana na bisika yonso na nsi-ntoto. Ata muntu ve ta dila bo to ta katula bo sambu na kuzika bo. Bo ta lala-lala na ntoto bonso kabine ya bankombo.”​—Yeremia 25:32, 33.

Nsuka ya mambi

4. Sambu na nki Yehowa kele na kikuma ya mbote ya kusukisa ngidika yai ya mbi?

⁴ Bamvula mafunda mingi meluta dezia banda Yehowa Nzambi ketalaka kaka na meso mutindu mambi kesalamaka. Ntangu yai yonso mefwana sambu bantu ya masonga kumona nde luyalu ya bantu kesala mambi mingi. Mu mbandu, kana beto landa mutindu kimvuka mosi ya bantu kutubaka, na mvu-nkama ya 20 mpamba, bantu kuluta bamilio 150 kufwaka na bitumba, na mubulu ya kukolama na baluyalu, ti na kukonda kuwakana ya mutindu na mutindu yina vandaka kusalama na kati ya bansi mingi. Ntima ya mbi ya muntu kumonanaka mpenza pwelele na ntangu Mvita ya Zole ya Inza vandaka kusalama ntangu bantu kiteso ya bamilio 50 kufwaka. Mingi na kati ya bantu yina kufwaka na bakan ya konsatrasio ya Nazi. Kaka mutindu Biblia kutubaka yo dezia, na ntangu na beto ‘bantu ya mbi, mbi na bo ta kwisa mingi sambu bo ta kusaka bantu ya nkaka, bantu ya nkaka mpi ta kusaka bo.’ (2 Timoteo 3:1-5, 13) Bubu yai, mansoni, nku, mubulu, kufuta avoka, mpi kukonda kuzitisa bansiku ya Nzambi kesalama na kiteso mosi ya kuluta. Yo yina, Yehowa kele mpenza na kikuma ya mbote ya kusukisa ngidika yai.

5, 6. Tendula mambi yina vandaka kusalama na bwala Kana ya ntama.

⁵ Mambu ya kesalama bubu yai mefwanana ti mambu yina kusalamaka na bwala Kana kiteso ya bamvula 3 500 meluta. Biblia ketuba nde: “Bo ke salaka mambu ya mbi ti ya nsoni yina ya Mfumu Nzambi ke zolaka ve ata fioti. Bo ke yokaka nkutu ata bana na bo na zulu ya bamesa-kimenga na bo.” (Kulonga 12:31) Yehowa kuzabisaka dikanda ya Izraele nde: “Yandi ta kula bo sambu bo kele bantu ya mbi.” (Kulonga 9:5) Henry H. Halley, muntu mosi ya kelongukaka mambu yina melutaka ntama, kutubaka nde: “Lusambu ya Baale, ya Astarte, ti banzambi yankaka ya Kana vandaka mansoni yina bo vandaka kusala na kiteso mosi ya kuluta; batempelo na bo vandaka bisika ya kusala mambi mingi.”

⁶ Halley kumonisaka nde mambi na bo kulutaka mingi na mpila nde, na kisika mosi ya bo vandaka kusala mambi ya mutindu yina, bantu yina ketimunaka ntoto sambu na kusosa bima ya ntama “kuzwaka banzungu ya ntoto mingi yina vandaka na kati na yo ti mikwa ya bana yina bo vandaka kutambika na Baale.” Yandi tubaka nde: “Kisika yango yonso kukumaka mazyamu ya bana-fyoti. . . . Bantu ya Kana vandaka kusala mansoni yina bo vandaka kubaka bonso lusambu ntangu bo vandaka kusambila banzambi na bo mpi bo vandaka kufwa bana na bo ya ntete sambu na kupesa bo makabu ya bimenga na banzambi na bo yina mosi. Yo kemonana nde, na kiteso ya kuluta nene, ntoto ya Kana kukumaka bonso Sodome ti Gomore ya kufuluka mambu na insi ya mvimba. . . . Keti bantu ya mutindu yina ya vandaka kusala mambi na kiteso yina ti nku vandaka na nswa ya kuzinga dyaka ntangu mingi? . . . Bantu yina kutimunaka na mayumbu ya bambanza ya Kana vandaka kudiyula sambu na nki Nzambi kusukininaka na kufwa bo.”

 Bo tazinga na ntoto

7, 8. Inki mutindu Nzambi takatula mvindu na zulu ya ntoto yai?

⁷ Kaka mutindu Nzambi kukatulaka mvindu na Kana, yandi takatula mvindu yonso na ntoto ya mvimba mpi yandi tapesa yo na bantu yina kesalaka luzolo na yandi. “Bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.” (Bingana 2:21, 22) Ebuna muyimbi-bankunga ketuba nde: “Kubika fioti kaka bantu ya mbi ta vila . . . kansi bantu yina ke kudikulumusaka, bo ta zinga mbote na ngemba mpenza na ntoto.” (Nkunga 37:10, 11) Bo takatula mpi Satana, sambu yandi “kumona diaka mpila ve ya kukusa bantu tii kuna ya bamvula yina mile mosi [ta] luta.” (Kusonga 20:1-3) Ya kyeleka, “Nsi-ntoto ti bima yonso kele na yo ya bantu ke zolaka, yo ke mana, kansi muntu yina ke salaka mambu yina ya Nzambi ke zolaka, yandi ke zingaka mvula na mvula.”​—1 Yoane 2:17.

⁸ Ntangu yandi tubilaka na bunkufi kivuvu ya nene ya bantu yina kezola kuzinga na ntoto kele na yo, Yezu kutubaka nde: “Kiese na bantu yina kele pima, sambu bo ta baka ntoto yina ya Nzambi me silaka bo!” (Matayo 5:5) Yo fwete vanda nde yandi vandaka kutubila mambu yina kele na Nkunga 37:29, ya kutubaka dezia na ntwala nde: “Bantu ya mbote ta zinga na ngemba na ntoto  yina ya Mfumu Nzambi tubaka na kupesa bo; yo ta vanda ya bo tii kuna.” Yezu kuzabaka nde lukanu ya Yehowa vandaka nde bantu ya ntima ya mbote kuzinga kimakulu na paladisu na ntoto. Yehowa ketuba nde: “Na ngolo na mono mosi, mono salaka nsi-ntoto, bantu ti bambisi yonso; mono lenda pesa yo na konso muntu ya mono me zola.”​—Yeremia 27:5.

Inza ya mpa ya kitoko

9. Kimfumu ya Nzambi takumisa ntoto inza ya nki mutindu?

⁹ Na nima ya Armagedoni, Kimfumu ya Nzambi tatula “ntoto ya mpa” ya kitoko, kisika “lunungu tazingaka.” (2 Piere 3:13, NW) Yo tavanda dyambu mosi ya kyese sambu na bantu yina taguluka na Armagedoni na ntangu bo takatuka na bampasi ya ngidika ya bima yai ya mbi ya kemonisaka bantu mpasi! Yo tavanda kyese mingi na kukota na inza ya mpa yina tavanda na nsi ya luyalu ya Kimfumu ya zulu, ti balusakumunu mingi ya kitoko mpi kivuvu ya luzingu ya kukonda nsuka!​—Kusonga 7:9-17.

10. Inki mambu ya mbi tavanda dyaka ve na nsi ya luyalu ya Kimfumu?

¹⁰ Bantu tazinga dyaka ve na boma ya bitumba, ya mambu ya nku, ya nzala, ata nkutu ya bambisi ya makasi. “Mono ta wakana na [bantu na mono] kuwakana mosi ya ngemba, yina ta pesa bo luzingu ya mbote. Mono ta katula bambisi yonso ya makasi na ntoto. . . . Banti ta tula bambuma, bilanga ta basisa bima, ebuna konso muntu ta zinga na ngemba na ntoto na yandi.” “Bambele na bo ya bitumba bo [ta] kumisa yo bansengo, makonga na bo ta kuma bakupukupu. Bantu ta kwenda diaka ve na bitumba, bo ta yilama mpi diaka ve sambu na kunwana bitumba. Konso muntu ta zinga na ngemba na bilanga na yandi ya vinu ti ya bafige; ata muntu mosi ve ta kwisa kupesa yandi boma.”​—Ezekiele 34:25-28; Mishe 4:3, 4.

11. Sambu na nki beto lenda tula ntima nde bamaladi ya beto kevandaka na yo na nitu tamana?

¹¹ Maladi, mawa, ti lufwa nkutu tavanda dyaka ve. “Ata muntu mosi ve . . . ta tuba diaka nde: ‘Mono ke bela.’ Nzambi ta wila beto mawa sambu na masumu na beto, yandi ta yindula yo diaka ve.” (Yezaya 33:24) “[Nzambi] ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila. . . . ‘Ntangu yai mono ke sala bima yonso ya  mpa!’” (Kusonga 21:4, 5) Ntangu yandi vandaka na ntoto, Yezu kumonisaka nde yandi takuka kusala mambu yina yonso na ngolo yina Nzambi kupesaka yandi. Na nsadisa ya mpeve santu, Yezu kutambulaka na bisika mingi sambu na kubelula bikata mpi bambefo.​—Matayo 15:30, 31.

12. Inki kivuvu beto kele na yo sambu na bafwa?

¹² Yezu kusalaka mambu mingi dyaka. Yandi tedimisaka bafwa. Inki bantu ya kudikulumusa kusalaka ntangu bo monaka mambu yina? Ntangu yandi futumunaka mwana-nkento mosi ya bamvula 12, bibuti na yandi “yitukaka ngolo ntangu bo monaka mambu yina.” (Marko 5:42) Yai vandaka mpi mbandu yankaka ya mambu yina Yezu tasala na ntoto ya mvimba na nsi ya kiyeka ya Kimfumu, na ntangu yina “bantu ya mbote ti bantu ya mbi ta telama na lufwa.” (Bisalu 24:15) Yindula kyese ya mingi yina nge tawa ntangu bafwa tavutuka dyaka na luzingu mpi kuzinga dyaka kisika mosi ti bampangi na bo! Ntembe kele ve nde kisalu ya kulonga tavanda mingi na nsi ya lutwadisu ya Kimfumu na mpila nde “Ntoto ta fuluka na mambu yai: kuzaba [Yehowa], mutindu nzadi-mungwa ke fulukaka na masa.”​—Yezaya 11:9.

Kimfumu ya Yehowa menunga

13. Inki mutindu luyalu ya Nzambi tamonisa nde yo meluta baluyalu yonso?

¹³ Na nsuka ya luyalu ya Kimfumu ya mvu funda, bantu takuma ti mabanza mpi nitu ya kukuka. Ntoto ya mvimba takuma masamba ya Edeni, disongidila paladisu. Ngemba, kyese, lutaninu, mpi kimvuka ya bantu yina tazolanaka takuma dyambu ya kyeleka. Katula luyalu ya Kimfumu, ata kima mosi ve mesalaka dezia mambu ya mutindu yai na luzingu ya bantu. Ebuna luswaswanu ya nene kibeni tamonana na kati ya baluyalu ya mpasi ya bantu yina kuyalaka bamvu-funda mingi yina kulutaka ti luyalu ya mbote ya Kimfumu ya zulu ya Nzambi yina tayala mvu-funda mosi! Luyalu ya Nzambi na nsadisa ya Kimfumu na yandi tamonisa mpenza nde yo meluta baluyalu yonso na mambu yonso. Nswa ya kuyala yina Nzambi kele na yo, to kimfumu na yandi, tanunga mpenza.

14. Inki mambu tabwila bankolami na nsuka ya bamvula funda?

¹⁴ Na nsuka ya bamvu-funda, Yehowa tapesa bantu ya kukuka nzila ya kusadila kimpwanza ya mabanza na bo sambu na kusonga nani bo kezola kusadila. Biblia kemonisa nde: “Bo ta basisa Satana na boloko na yandi.” Yandi tameka dyaka na kukusa bantu. Bantu mingi tapona kuzinga kukonda lutwadisu ya Nzambi. Sambu ‘mpasi kubwa dyaka ve mbala ya zole,’ Yehowa tafwa Satana, bademo na yandi, ti bantu yonso yina takolama na kimfumu ya Yehowa. Ata muntu mosi ve lenda tula ntembe nde bantu yina bo tafwa kimakulu na ntangu yina vandaka ve na ntangu ya kubalula ntima to bo kumaka kusala mambu sambu bo vandaka bantu ya kukonda kukuka. Ve, bo tavanda bantu ya kukuka bonso Adami ti Eva, bayina kuponaka na luzolo na bo mosi na kukolama na kiyeka ya lunungu ya Yehowa.​—Kusonga 20:7-10; Nahumi 1:9.

15. Kinduku ya nki mutindu bantu ya kwikama tasala ti Yehowa?

¹⁵ Kansi, yo kele pwelele nde bantu mingi mpenza tapona na kulanda kimfumu ya Yehowa. Sambu yandi tafwa bankolami yonso, bantu ya mbote tatelama na ntwala ya Yehowa sambu bo menunga kumekama ya nsuka na kwikama yonso. Na nima, Yehowa tandima bantu yai ya kwikama bonso bana na yandi ya babakala ti ya bankento. Ebuna, bo tazinga dyaka na kinduku yina Adami ti Eva kuvandaka na yo ti Nzambi na ntwala nde bo kolama. Na ntangu yina, Roma 8:21 talungana: “Nzambi ta katula [bantu na] kimpika yina ke nataka na lufwa, ebuna [bo] ta baka dipanda ya lukumu yina ya bana ya Nzambi ta baka.” Profete Yezaya kuzabisaka dezia na ntwala nde: “[Nzambi] ta sukisa lufwa kimakulu! Yandi ta katula mansanga na meso ya bantu yonso.”​—Yezaya 25:8.

Kivuvu ya luzingu ya kukonda nsuka

16. Sambu na nki yo kele mbi ve na kutula kivuvu na matabisi ya luzingu ya kukonda nsuka?

¹⁶ Yai kivuvu mosi ya kitoko kibeni ya kevingila bantu ya kwikama, kuzaba nde Nzambi tapesa bo bima mingi ya kimpeve ti ya kinsuni mvula na mvula! Yo yina muyimbi-bankunga ketuba nde: “Nge ke pesaka bo bima mingi mutindu kele nzala na bo.” (Nkunga 145:16) Yehowa kesyamisa bantu yina kele na ntoto na kutula kivuvu yai ya kuzinga na Paladisu na kati ya mambu  ya bo ketudilaka lukwikilu na yandi. Ata dyambu ya metala kimfumu na yandi kele mfunu mingi, Yehowa kelombaka ve bantu na kusadila yandi kaka mpamba kukonda kutula kivuvu ya kubaka matabisi. Na kati ya Biblia, kwikama na Nzambi ti kivuvu ya luzingu ya kukonda nsuka kekwendaka nzila mosi mpi yo kele na kati ya mambu ya mfunu yina Bakristu ketudilaka lukwikilu na Nzambi. “Konso muntu yina ke kwisaka na Nzambi yandi fweti kwikila nde Nzambi kele, mpi nde Nzambi ke pesaka matabisi na bantu yina ke sosaka yandi.”​—Baebreo 11:6.

17. Inki mutindu Yezu kumonisaka nde yo kele mbote nde kivuvu ya beto kele na yo kupesa beto kikesa?

¹⁷ Yezu kutubaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Awa yandi kangisaka kisika mosi kuzaba Nzambi mpi balukanu na yandi ti matabisi yina kuzaba yandi kepesaka. Mu mbandu, ntangu muntu ya mbi kulombaka Yezu nde yandi yindula yandi ntangu yandi takwisa na Kimfumu na yandi, Yezu kutubaka nde: “Nge ta vandaka ti mono na Paladiso.” (Luka 23:43) Yandi lombaka ve na muntu yina na kuvanda na lukwikilu ata yandi tabaka ve ata matabisi mosi. Yandi zabaka nde Yehowa kezolaka nde bansadi na yandi kuvanda ti kivuvu ya luzingu ya kukonda nsuka na paladisu na ntoto sambu yo pesa bo kikesa na ntangu bo kekutana na bampasi ya mutindu na mutindu na inza yai. Yo yina, kukinga na kubaka matabisi kele kima ya nene ya kesadisaka Bakristu na kukanga ntima.

Mambu yina takumina Kimfumu na nima

18, 19. Inki mambu takumina Ntotila ti Kimfumu na nsuka ya Luyalu ya Mvu-Funda?

¹⁸ Sambu Kimfumu kuvandaka luyalu yina Yehowa kusadilaka kaka sambu ntoto ti bantu na yo kukuma dyaka ya kukuka mpi kuvutuka na kinduku ti yandi, inki kisalu Ntotila Yezu Kristu ti bantotila mpi banganga-Nzambi 144000 tasala na nima ya Luyalu ya mvu-funda? “Ebuna na nima, nsuka ya mambu yonso ta kwisa ntangu Kristo ta sukisa [baluyalu] yonso yina ke na kiyeka ya mutindu na mutindu, ntangu yandi ta pesa Kimfumu na Tata Nzambi. Sambu Kristo fweti yala tii kuna ya Nzambi ta tula bambeni na yandi yonso na nsi ya makulu ya Kristo sambu yandi niata bo.”​—1 Korinto 15:24, 25.

¹⁹ Kana Kristu tavutula Kimfumu na Nzambi, inki mutindu beto fwete bakisa baverse yina ketubaka nde Kimfumu yango tavanda ya kimakulu? Mambu yina Kimfumu yango tasala tabikala kimakulu. Kristu tabaka lukumu ya kimakulu sambu na kisalu ya yandi salaka ya kunwanina kimfumu ya Nzambi. Kansi sambu masumu ti lufwa kele dyaka ve ata fyoti, mpi nde bantu mekatuka na kimpika, mambu yai tasonga nde mfunu ya Muntu yina kekatulaka bantu na kimpika tavanda dyaka ve. Luyalu ya Kimfumu ya Mvu-Funda tavanda mpi mesuka kimakulu; yo yina mfunu ya luyalu yina fwete vanda na kati ya Yehowa ti bantu ya bulemfu tavanda mpi dyaka ve. Ebuna, “Nzambi ta yalaka bima yonso mpenza.”​—1 Korinto 15:28.

20. Inki mutindu beto lenda zwa dibaku ya kumona mambu yina tasalama na bilumbu kekwisa sambu na Kristu ti bantu 144 000?

²⁰ Inki kisalu Kristu ti bantu yina ya yandi tayala na bo kumosi tasala kana Luyalu ya Mvu-Funda mesuka? Biblia ketuba ve ata kima na nima. Kansi, beto lenda tula ntima nde Yehowa tapesa bo bisalu mingi yankaka na kati ya lugangu na yandi. Bika beto yonso kukangama ngolo bubu yai na kimfumu ya Yehowa sambu yandi kupesa beto luzingu ya kukonda nsuka, na mpila nde na bilumbu kekwisa, beto vanda kaka na luzingu sambu beto mona mambu yina Yehowa meyidikaka sambu na Ntotila ti bantotila mpi banganga-Nzambi yina yandi tayala ti bo, mpi sambu na inza ya mvimba!

Mambu ya Kuvutukila

• Kubika fyoti nki luyalu tayinga baluyalu yankaka?

• Inki nkanu Nzambi tazengila bantu ya mbi ti bantu ya mbote?

• Inki mambu tasalama na inza ya mpa?

• Inki mutindu kimfumu ya Yehowa tamonisa mpenza nde yo menunga?

[Bangiufula ya disolo ya kulonguka]

[Kifwanisu ya kele na lutiti 15]

“Bantu ya mbote ti bantu ya mbi ta telama na lufwa”

[Kifwanisu ya kele na lutiti 16]

Bantu ya kwikama tazinga dyaka na kinduku ya mbote ti Yehowa