NA Mposo, Aprili 25, 2015, ntoto nikanaka ngolo kibeni na Népal; insi mosi na nordi ya Inde yina kele ti bangumba mingi. Ntoto nikanaka na kiteso ya bakilometre 80 na nordi-westi ya nto-mbanza, Kathmandu. Bantu kuluta 8 500 fwaka; yo kele kisumbula ya lugangu yina me fwaka bantu mingi kibeni na Népal. Banzo kuluta 500000 fwaka. Na Népal Bambangi ya Yehowa kele 2 200 mpi mingi na kati na bo vandaka kuzinga na kisika yina kisumbula salamaka. Diambu ya mawa kele nde Mbangi mosi ti bana na yandi zole fwaka.

Mbangi mosi, zina na yandi Michelle tubaka nde: “Ntoto nikanaka ntangu mabundu ya bisika yina ntoto nikanaka ngolo vandaka kusala balukutakanu ya Bukristu. Kana yo salamaka ntangu bampangi mingi vandaka na banzo, ntembe kele ve nde bampangi mingi zolaka kufwa.” Sambu na nki bantu yina vandaka na balukutakanu gulukaka? Kima sadisaka mingi kele mutindu bo tungaka Banzo ya Kimfumu.

Bubu yai na Népal, bo me kumaka kutunga Banzo ya Kimfumu na mutindu yina ke salaka nde yo bwa ve kana ntoto kunikana. Mpangi Man Bahadur, yina ke salaka kisalu ya kutunga Banzo ya Kimfumu tubaka nde: “Mbala mingi bantu vandaka kuyula beto sambu na nki beno ke salaka bafondasio ya ngolo sambu na banzo ya fioti. Ntangu yai beto ke mona mfunu na yo!” Na nima ya kunikana ya ntoto, bo pesaka nswa nde bantu kwisa kuvanda na Banzo ya Kimfumu. Ata ntoto nikanaka diaka mwa fioti na nima, Bambangi ya Yehowa mpi bantu yina ke zingaka pene-pene ti bo vandaka na lutaninu kuna.

Kukonda kusukinina, bankuluntu yantikaka kusosa bampangi ya dibundu yina monanaka ve. Mbangi mosi, zina na yandi Babita, tubaka nde: “Bankuluntu tulaka mambote ya dibundu na ntwala ya mambote na bo mosi. Beto waka kiese na kumona zola ya mutindu yina.” Kilumbu yina landaka na nima ya kunikana ya ntoto, bampangi tatu ya komite yina ke twadisaka kisalu ya Bambangi ya Yehowa na Népal kumosi ti bankengi ya nziunga, yantikaka kutala mabundu sambu na kuzaba bima yina bo kele na yo mfunu mpi kusadisa bankuluntu.

Bilumbu sambanu na nima ya kunikana ya ntoto, Mpangi Gary Breaux yina ke salaka na babiro ya nene ya Bambangi ya Yehowa na États-Unis, kwisaka na Népal ti nkento na yandi, Ruby. Mpangi Reuben, mpangi mosi ya komite yina beto tubilaka dezia, tubaka nde: “Sambu mavwanga vandaka na Kathmandu mpi mutindu ntoto vandaka kunikana fioti-fioti na nima ya kisumbula yina, beto ndimaka ve nde Mpangi Breaux ta kwisa. Kansi yandi vandaka ti lukanu ya kukwisa mpi yandi kwisaka! Bambangi ya insi yina sepelaka mingi na viziti na yandi.”

Mpangi Silas, yina ke salaka na biro ya Bambangi na Népal, tubaka nde: “Ntangu telefone kumaka kusala diaka, bampangi vandaka kubinga beto ntangu yonso! Bambangi ya Yehowa ya ntoto ya mvimba vandaka kudiyangisa sambu na beto. Ata bankaka vandaka kutuba bandinga yina beto vandaka kubakisa ve, beto bakisaka nde bo ke zolaka beto mpi bo kele na mpusa ya ngolo ya kusadisa beto.”

 Na nsungi ya bilumbu mingi na nima ya kunikana ya ntoto, Bambangi vandaka kunata madia na Banzo ya Kimfumu sambu na kudia ti bantu yina vandaka na nzala. Diaka, bo salaka komite sambu na kusadisa bantu yina mpasi bwilaka; ebuna ntangu fioti na nima, bima yantikaka kukwisa, yo vandaka kukatuka mingi-mingi na Bangladesh, na Inde, mpi na Japon. Na nima ya bilumbu, Bambangi ya Yehowa tanu ya minganga yina katukaka na Eropa, kwisaka mpi tulaka biro na bo na Nzo mosi ya Kimfumu. Bo yantikaka kisalu mbala mosi; bo vandaka kusansa bimbefo ya bantu yina kutanaka ti mpasi mpi bo vandaka kusadisa bo na kununga bampasi ya mawi yina bo lendaka kuvanda ti yo.

Nkento mosi, zina na yandi Uttara, tubaka mambu yai sambu na kumonisa mawi ya bantu mingi: “Ntoto nikanaka ngolo kibeni mpi yo vandaka kupesa boma. Kansi na nima, beto kudiwaka kibeni pene-pene ya bampangi na beto ya kimpeve.” Ya kieleka, kunikana ya ntoto lembisaka ve zola yina bansadi ya Yehowa ke vandaka ti yo sambu na yandi mpi bo na bo. Kansi, yo kumisaka zola yina ngolo.