1. Inki luswaswanu kele na kati ya bima yina beto kele na yo mfunu ti bima yina beto ke vandaka ti nzala na yo?

BIMA ya beto ke vandaka na yo mfunu sambu na kuzinga kele fioti mpamba. Mu mbandu, madia, bilele, mpi nzo. Kansi bima ya beto ke vandaka ti nzala na yo kele mingi. Bantu ya nkaka ke bakisaka ve nde bima mingi yina bo ke zolaka ke vandaka ve kibeni mfunu.

2. Inki bima bantu mingi ke zolaka?

² Muntu ya ke zingaka na insi yina mbongo kele mingi ve ti muntu ya kele na insi yina mbongo kele mingi, bo zole ke vandaka ve ti nzala ya bima ya mutindu mosi. Na bansi ya nkaka, bantu ke zolaka kuvanda ti telefone, moto, to lupangu. Na bansi ya nkaka diaka, bantu ke zolaka kuvanda ti bilele ya ntalu, nzo ya nene, to bakamio ya ntalu. Na konso kisika yina beto ke zinga, yo vanda beto kele na mbongo to ve, beto lenda yantika kuzola bima mingi yina kele mfunu ve to yina beto ta kuka ve kusumba.

3. Kuzola bima mingi ya kinsuni ke tendula inki?

³ Kuzola bima mingi ya kinsuni ke tendula kuyindula nde bima ya kinsuni kele na mbalu mingi kuluta kinduku na beto ti Nzambi. Muntu ya kele ti kikalulu yai ke sosaka kuzwa bima mingi kuluta yina yandi kele na yo mfunu mpenza. Ata bantu yina kele ve ti mbongo mingi to bayina ke sumbaka ve bima ya ntalu lenda bwa na mutambu yai. Bo lenda yambula kutula Kimfumu na kisika ya ntete na luzingu na bo.—Baebreo 13:5.

4. Inki mutindu Satana ke sadilaka “nzala ya meso”?

⁴ Satana ke zolaka beto yindula nde, sambu na kuvanda na kiese beto fwete vanda kaka ti bima mingi ya kinsuni. Yandi ke sadilaka nsi-ntoto na yandi mpi “nzala ya meso” sambu na kupusa beto na kuvanda ntangu yonso ti nzala ya bima mingi. (1 Yoane 2:15-17; Kuyantika 3:6; Bingana 27:20) Beto ke monaka mpi ke waka mbala na mbala bantu to bapiblisite ke pusa beto na kusumba bima ya mpa. Keti nge me sumbaka dezia kima kaka sambu yo vandaka kitoko to sambu nge monaka yo na piblisite? Kana mpidina, ziku nge bakisaka na nima nde nge vandaka mpenza ve na mfunu na yo. Kana beto ke sumba bima yina kele ve mfunu, beto ke kudipesa kaka mpasi. Yo lenda kanga beto nzila ya kusambila Yehowa. Mu mbandu, kudia beto ntangu ya kulonguka Biblia, kuyidika balukutakanu, kukwenda na balukutakanu, mpi kusamuna mbala na mbala. Yibuka mambu yai ya ntumwa Yoane tubaka: “Nsi-ntoto ke luta, nzala na yo mpi ke luta.”

5. Inki ke kuminaka bantu yina ke sosaka bima mingi?

⁵ Satana ke zolaka beto sadila ngolo na beto sambu na kusosa mbongo mpi bima mingi na kisika ya kusadila yo sambu na Yehowa. (Matayo 6:24) Kana beto ke sosa kaka kuzwa bima mingi, beto ta vanda ve ti luzingu ya mbote. Beto lenda kuma makasi-makasi to kukuma ti bamfuka mingi. Nkutu yo lenda sala nde beto kwikila diaka ve na Yehowa mpi na Kimfumu na yandi. (1 Timoteo 6:9, 10; Kusonga 3:17) Yezu tubaka nde, banzala ya bima ya kinsuni kele bonso bansende yina lenda kanga nkeni nzila ya kuyela mpi ya kubuta mbuma.—Marko 4:14, 18, 19.

6. Disolo ya Baruki ke longa beto nki?

⁶ Yindula fioti Baruki, sekretere ya profete Yeremia. Ntangu Baruki yantikaka ‘kusosa bima ya nene,’ Yehowa yibusaka yandi nde, kubika fioti bo ta fwa Yeruzalemi. Kansi Yehowa silaka Baruki nde yandi ta gulusa yandi. (Yeremia 45:1-5) Yo lombaka ve nde Baruki kusosa bima mingi, sambu Yehowa bakaka lukanu ya kufwa bima yonso. (Yeremia 20:5) Bubu yai nsi-ntoto ya Satana me kuma na nsuka. Yo yina, beto fwete sosa ve bima mingi ya kinsuni. Beto fwete yindula mpi ve nde na nima ya mpasi ya nene, beto ta vanda kaka ti bima yina beto kele na yo bubu yai, ata beto ke bakaka yo na mbalu.—Bingana 11:4; Matayo 24:21, 22; Luka 12:15.

7. Inki beto ta tadila na baparagrafe ya ke landa mpi sambu na nki?

 ⁷ Ntangu yai, inki mutindu beto lenda lungisa bampusa na beto ti ya dibuta na beto, mpi kulanda kutula dikebi na mambu ya kuluta mfunu? Inki beto lenda sala sambu na kusosa ve bima mingi? Inki lenda sadisa beto na kudiyangisa mingi ve sambu na bima yina beto kele na yo mfunu? Na Disolo na Zulu ya Ngumba, Yezu longaka nde beto fwete kudiyangisa mingi ve. (Matayo 6:19-21) Bika beto tadila Matayo 6:25-34. Yo ta sadisa beto na kulanda kusosa Kimfumu kansi bima ya kinsuni ve.—Luka 12:31.

8, 9. (a) Sambu na nki beto fwete kudiyangisa mingi ve sambu na bima yina beto kele na yo mfunu? (b) Yezu zabaka nki sambu na bantu mpi bima yina bo kele na yo mfunu?

⁸ Tanga Matayo 6:25. Yezu zabaka mbote nde balongoki na yandi vandaka kudiyangisa sambu na kudia, kunwa mpi kulwata; yo yina na Disolo na Zulu ya Ngumba, yandi tubilaka bo nde: “Beno bika kudiyangisa sambu na luzingu na beno.” Lukanu ya Yezu vandaka ya kusadisa bo na kubakisa nde kudiyangisa mingi sambu na bima ya kinsuni kele mfunu ve. Yandi zabaka nde kana bo ke kudiyangisa mingi, ata sambu na bima yina bo kele na yo mfunu mpenza, bo lenda vila bima ya kuluta mfunu. Sambu Yezu zolaka balongoki na yandi mingi, yandi kebisaka bo mbala iya sambu na kigonsa ya kudiyangisa mingi.—Matayo 6:27, 28, 31, 34.

⁹ Kansi sambu na nki Yezu tubaka nde beto fwete kudiyangisa ve sambu na bima yina beto ta dia, ta nwa, mpi ta lwata? Keti beto kele ve ti mfunu ya madia mpi bilele? Ee, beto kele ti mfunu na yo! Nkutu yo kele mbi ve na kudiyangisa kana beto kele ve ti mbongo ya kusumba madia ti bilele. Yezu zabaka yo. Yandi zabaka bima yina bantu vandaka na yo mfunu. Yandi zabaka mpi nde “na bilumbu ya nsuka,” balongoki na yandi ta kutana ti bampasi mingi. (2 Timoteo 3:1) Ya kieleka, bantu mingi bubu yai kele ti bisalu ve mpi bima ke kuma kaka ntalu. Na bansi mingi, bantu kele bansukami mpenza, mpi bo kele ti madia mingi ve; bankaka nkutu kele ti madia ve. Kansi Yezu tubaka nde luzingu kele mfunu mingi kuluta madia, mpi nitu kele mfunu mingi kuluta bilele.

10. Inki mambu ya kuluta mfunu Yezu songaka balongoki ntangu yandi longaka bo mutindu ya kusamba?

¹⁰ Ntete, Yezu longaka balongoki na yandi nde ntangu bo ke samba, bo fwete lomba Tata na bo ya zulu bima yina bo kele na yo mfunu. Bo lenda samba nde: “Pesa beto bubu yai madia na beto sambu na kilumbu yai.” (Matayo 6:11) Kilumbu ya nkaka, yandi songaka bo na kusamba nde: “Pesa beto konso kilumbu madia na beto na kutadila banzala na beto ya konso kilumbu.” (Luka 11:3) Kansi yo ke tendula ve nde beto fwete kudibanzaka ntangu yonso sambu na bima yina beto kele na yo mfunu. Yo yina, Yezu songaka balongoki na yandi nde  kusamba sambu Kimfumu ya Nzambi kukwisa kele mfunu mingi kuluta kusamba sambu na bima yina bo vandaka na yo mfunu. (Matayo 6:10; Luka 11:2) Sambu na kusadisa balongoki na kudiyangisa diaka ve, Yezu pesaka bo kikesa; yandi yibusaka bo nde Yehowa ke pesaka bigangwa na yandi yonso bima yina bo kele na yo mfunu.

11, 12. Inki dilongi beto ke baka mutindu Yehowa ke sadisaka bandeke? (Tala kifwanisu ya luyantiku ya disolo.)

¹¹ Tanga Matayo 6:26. Beto fwete “tala mbote-mbote bandeke ya zulu.” Ata bandeke ke vandaka fioti kibeni, bo ke diaka mingi. Kana bandeke vandaka nene bonso bantu, bo zolaka kudia mingi kuluta bantu. Bandeke ke diaka bambuma, bankeni, banselele, mpi misopi. Kansi bo ke kunaka ve bima yina bo ke diaka. Yehowa ke pesaka bo bima yonso ya bo kele na yo mfunu. (Nkunga 147:9) Ata mpidina, yandi ke nataka ve madia tii na minoko na bo! Yandi ke yidikaka kaka madia, kansi bo mosi ke kwendaka kusosa yo.

¹² Yezu zabaka nde mutindu Tata na yandi ke pesaka bandeke madia, yandi ta pesa mpi bantu madia. ^[1] (Tala noti na nsuka ya disolo.) (1 Piere 5:6, 7) Bonso bandeke, beto fwete vanda ve bamolo. Beto fwete sosa madia na beto to mbongo ya kusumba yo. Yehowa ta sakumuna bikesa na beto. Kana beto me zwa ve mbongo to madia ya kufwana, yandi lenda sadisa beto na kuzwa yina beto kele na yo mfunu. Mu mbandu, bantu ya nkaka lenda kabila beto. Yehowa ke pesaka mpi bandeke kisika ya kulala. Yandi me pesaka bo mayele ya kutunga banzo na bo. Yandi me salaka mpi bima yina bandeke ke vandaka na yo mfunu sambu na kutunga banzo. Yehowa lenda sadisa beto mpi na kuzwa kisika ya mbote ya kuvanda ti dibuta na beto.

13. Inki ke monisa nde beto kele mfunu mingi kuluta bandeke?

¹³ Na nima ya kuyibusa balongoki nde Yehowa ke disaka bandeke, Yezu yulaka bo nde: ‘Keti beno kele ve mfunu mingi kuluta bandeke?’ (Fwanisa ti Luka 12:6, 7.) Ntangu Yezu tubaka mambu yai, ntembe kele ve nde yandi vandaka kuyindula mutindu yandi zolaka kupesa luzingu na yandi sambu na bantu. Ya masonga, Yezu fwaka ve sambu na bandeke to sambu na bambisi. Yandi fwaka sambu na beto, sambu beto baka luzingu ya mvula na mvula.—Matayo 20:28.

14. Muntu yina ke kudiyangisa ta kuka ve kusala nki?

¹⁴ Tanga Matayo 6:27. Yezu zolaka kutuba nki ntangu yandi tubaka nde beto lenda yika ve ata fioti nda ya luzingu na beto kana beto ke kudiyangisa? Yandi vandaka kumonisa nde beto ta kumisa ve luzingu na beto nda ata beto ke kudiyangisa sambu na bima yina beto kele na yo mfunu. Nkutu kana beto ke kudiyangisa mingi, beto lenda bela to kufwa.

15, 16. (a) Inki dilongi beto ke baka mutindu Yehowa ke lwatisaka bintuntu? (Tala kifwanisu ya luyantiku ya disolo.) (b) Inki bangiufula beto fwete kudiyula, mpi sambu na nki?

¹⁵ Tanga Matayo 6:28-30. Beto ke waka kiese mingi kana beto me lwata lele ya kitoko, mingi-mingi ntangu beto ke kwendaka kusamuna to na balukutakanu na beto. Keti yo ke tendula nde beto fwete “kudiyangisa sambu na bilele”? Yezu yibusaka diaka balongoki na yandi mutindu Yehowa ke sadisaka bigangwa na yandi. Yezu pesaka bo mbandu ya “bintuntu ya bilanga.” Ziku Yezu vandaka  kutubila bintuntu mingi ya mfinda ya kitoko. Ata kintuntu mosi ve ke tungaka lele na yo. Kansi yo ke vandaka kitoko kibeni, mpi Yezu tubaka nde ‘ata Salomo, na nkembo na yandi yonso, lwataka ve bonso bintuntu’!

¹⁶ Yindula ngiufula yai ya Yezu yulaka bo na nima: “Kana yai mutindu Nzambi ke lwatisaka matiti ya bilanga . . . , keti yandi ta lwatisa beno ve mingi kuluta, beno bantu ya kele na lukwikilu ya fioti?” Ee yandi ta lwatisa beto! Kansi yo lombaka nde balongoki ya Yezu kuvanda ti lukwikilu ya ngolo. (Matayo 8:26; 14:31; 16:8; 17:20) Yo lombaka mpi nde bo tudila Yehowa ntima nde yandi ta sadisa bo kibeni. Ebuna beto? Keti beto ke kwikilaka mpi nde Yehowa ta sadisa beto?

17. Inki lenda bebisa kinduku na beto ti Yehowa?

¹⁷ Tanga Matayo 6:31, 32. Bantu yina me zaba ve Yehowa ke sosaka kaka mbongo mpi bima mingi ya kinsuni. Kansi kana beto landa bo, beto ta bebisa kinduku na beto ti Yehowa. Beto me zaba nde Yehowa kele Tata yina ke zolaka beto. Kana beto ke lemfukila yandi mpi ke tula Kimfumu na kisika ya ntete, yandi ta pesa beto bima yina beto kele na yo mfunu mpi bima mingi ya nkaka. Beto me zaba mpi nde kinduku ya mbote ti Yehowa ke pesaka kiese ya kieleka. Yo ke sadisaka beto mpi na kusepela kaka ti “madia mpi bilele” yina beto ke vandaka na yo mfunu.—1 Timoteo 6:6-8.

18. Yehowa me zaba nki sambu na konso muntu na kati na beto, mpi yandi ta sala nki?

¹⁸ Tanga Matayo 6:33. Kana beto ke tula Kimfumu na kisika ya ntete, Yehowa ta pesa beto bima yonso yina beto kele na yo mfunu. Mambu yai ya Yezu tubaka ke ndimisa yo: “Tata na beno yina kele na zulu me zaba nde beno kele na mfunu ya bima yai yonso.” Yehowa me zaba bima yina nge kele na yo mfunu, nkutu na ntwala nde nge mosi kuzaba yo. (Bafilipi 4:19) Yandi me zaba bilele yina nge ta vanda na yo mfunu na bilumbu ke kwisa. Yandi me zaba mpi madia yina nge ta vanda na yo mfunu. Yandi me zaba nde nge ti fami na nge, beno kele ti mfunu ya nzo. Yehowa ta sadisa nge na kuzwa bima yina nge kele na yo mfunu mpenza.

19. Sambu na nki beto fwete kudiyangisa ve sambu na bilumbu yina ke kwisa?

¹⁹ Tanga Matayo 6:34. Yezu songaka diaka balongoki na yandi nde: “Beno kudiyangisa ve.” Konso kilumbu, Yehowa ta pesa beto bima yina beto kele na yo mfunu. Yo yina, beto fwete kudiyangisa mingi ve sambu na bilumbu yina ke kwisa. Kana beto ke kudiyangisa, beto ta yantika kuditudila ntima mpi yo ta bebisa kinduku na beto ti Yehowa. Yo yina beto fwete tudila yandi ntima mpenza.—Bingana 3:5, 6; Bafilipi 4:6, 7.

20. (a) Inki lukanu nge lenda baka na kisalu ya Yehowa? (b) Inki nge lenda sala sambu na kuvanda ti luzingu ya kukonda mindondo?

²⁰ Yo ta vanda mbi kibeni kana beto ke lemba na kisalu ya Yehowa kaka sambu beto  me manisa ngolo yonso na kusosa bima mingi ya kinsuni! Kansi beto fwete kudipesa ya mvimba na kisalu ya Yehowa. Mu mbandu, keti nge lenda kwenda kusadisa dibundu mosi ya kele na mfunu ya bansamuni? Keti nge lenda kuma mupasudi-nzila? Kana nge kele dezia mupasudi-nzila, keti nge ke yindulaka mpi kukota Nzo-Nkanda ya Bansamuni ya Kimfumu? Keti nge lenda kwenda kupesa maboko bilumbu ya nkaka na Betele to na babiro ya Betele yina ke balulaka mikanda? Nge lenda sadila mpi ntangu na nge sambu na kupesa maboko na kisalu ya kutunga Banzo ya Kimfumu. Yindula mutindu ya kuyidika luzingu na nge sambu na kuzwa ntangu mpi ngolo mingi ya kusala mambu ya Kimfumu. Bandongisila ya nkaka kele na lupangu, “ Mutindu ya Kuvanda ti Luzingu ya Kukonda Mindondo.” Lomba Yehowa na kusadisa nge na kuzaba mambu yina nge fwete sala. Na nima, sala bansoba ya me fwana.

21. Inki ta sadisa nge na kukwenda pene-pene ya Yehowa?

 ²¹ Yezu longaka beto na kusosa ntete Kimfumu. Kana beto sala mpidina, beto ta kudiyangisa mingi ve sambu na bima yina beto kele na yo mfunu. Beto ke kwendaka pene-pene ya Yehowa sambu beto me zaba nde yandi ta sadisa beto. Beto ke salaka bikesa sambu na kudiyala, mpi beto ke sumbaka ve konso kima yina beto ke zolaka to yina nsi-ntoto ke songaka beto, ata beto kele ti mbongo ya kusumba yo. Kuvanda ti luzingu ya kukonda mindondo bubu yai, ta sadisa beto na kukangama kaka na Yehowa mpi na kusimba ngolo “luzingu ya kieleka” yina yandi me silaka beto.—1 Timoteo 6:19.