1. Inki bantu vandaka kusala na ntwala ya kusolula ti ntotila ya Persia?

YINDULA nde nge ke zinga na Persia na ntangu ya ntama. Nge kele na mfunu ya kusonga ntotila diambu mosi, nge ke kwenda na Shushan, mbanza yina ntotila ke zingaka. Kansi nge ke zaba nde sambu nge solula ti ntotila, nge fwete lomba nswa. Kana nge solula ti ntotila kukonda nswa, bo lenda fwa nge.—Est. 4:11.

2. Inki ke monisa nde Yehowa ke zolaka nde beto kuma banduku na yandi?

² Beto ke tonda Yehowa mingi sambu yandi kele ve bonso ntotila ya Persia. Yehowa kele Mfumu ya Nene kuluta bamfumu yonso. Ata mpidina, beto lenda solula ti yandi konso ntangu yina beto me zola. Yandi ke zolaka nde beto solula ti yandi kukonda mpasi. Mu mbandu, ata Yehowa kele Ngangi ya Nene, Nkwa-Ngolo Yonso, Mfumu ya Kuluta Nene, yandi ke zolaka nde beto binga yandi “Tata.” (Mat. 6:9) Beto ke vandaka na kiese mingi mutindu Yehowa ke zolaka nde beto kuma banduku na yandi ya ngolo.

3. Sambu na nki yo me fwana nde beto binga Yehowa “Tata” mpi nki beto ta tubila na disolo yai?

³ Yo me fwana nde beto binga Yehowa “Tata” sambu yandi kele Nto ya luzingu. (Nk. 36:9) Beto fwete lemfukila yandi sambu yandi kele Tata na beto mpi beto ta baka balusakumunu mingi. (Baeb. 12:9) Mu mbandu, bantu ya nkaka ta baka luzingu ya mvula na mvula na zulu mpi bankaka awa na ntoto. Beto ke bakaka mpi mambote ya nkaka bubu yai. Na disolo yai, beto ta tubila mambu yina ke ndimisa beto nde Yehowa kele Tata ya zola mpi bikuma yina ke ndimisa beto nde na bilumbu ke kwisa, yandi  ta yambula beto ve ata fioti. Beto tadila ntete sambu na nki beto fwete ndima nde Tata na beto ya zulu ke zolaka beto mingi mpi yandi ke lungisaka bampusa na beto.

4. Sambu na nki bantu ya nkaka ke ndimaka ve nde Yehowa kele Tata na bo?

⁴ Keti nge ke ndimaka kibeni nde Nzambi kele Tata na nge? Bantu ya nkaka ke monaka nde bo kele mfunu ve na meso ya Yehowa. Bo ke ndimaka ve nde Nzambi Nkwa-Ngolo Yonso ke tudilaka bo dikebi. Kansi Tata na beto ya zola ke zolaka ve nde beto yindula mutindu yina. Yandi me pesaka beto luzingu mpi ke zolaka nde beto kuma banduku na yandi. Na nima ya kutubila kieleka yai, ntumwa Polo, songaka bantu ya Atene nde Yehowa “kele ntama ve ti konso muntu na kati na beto.” (Bis. 17:24-29) Nzambi ke zolaka nde konso muntu kusolula ti yandi mutindu mwana ke solulaka ti bibuti yina ke zolaka yandi mpi ke tudilaka yandi dikebi.

5. Disolo ya mpangi-nkento mosi ke longa beto nki?

⁵ Bantu ya nkaka ke ndimaka ve nde Yehowa kele Tata na bo sambu batata na bo mosi ke monisilaka bo ve zola to nkutu ke zolaka bo ve. Mpangi-nkento mosi ke tuba nde: “Tata na mono vandaka ntima-mbi. Ntangu mono yantikaka kulonguka Biblia, yo vandaka mpasi sambu mono solula ti Tata na mono ya zulu. Kansi mambu yonso sobaka ntangu mono zabaka Yehowa.” Keti nge ke yindulaka mpi mutindu yina? Kana mpidina, ndima nde nge mpi lenda bakisa nde Yehowa kele Tata ya kuluta mbote.

6. Mutindu Matayo 11:27 ke monisa yo, nki kele mutindu mosi yina Yehowa ke sadisaka beto na kundima nde yandi kele Tata na beto ya zola?

⁶ Mutindu mosi yina Yehowa ke sadisaka beto na kundima nde yandi kele Tata yina ke zolaka beto mingi kele mutindu yandi lombaka bantu na kusonika na Biblia mambu yina Yezu tubaka mpi salaka. (Tanga Matayo 11:27.) Yezu landaka mbandu ya Tata na yandi na mutindu ya kukuka yo yina yandi tubaka nde: “Muntu yina me mona mono me mona mpi Tata.” (Yoa. 14:9) Mbala mingi Yezu vandaka kumonisa nde Yehowa kele Tata. Na Baevanzile iya, Yezu bingaka Yehowa nde “Tata” mbala kiteso ya 165. Sambu na nki? Sambu yandi zolaka nde bantu kundima nde Yehowa kele Tata ya zola.—Yoa. 17:25, 26.

7. Inki dilongi beto ke baka na mutindu Yehowa vandaka kusadila Mwana na yandi mambu?

⁷ Beto tadila dilongi ya nkaka yina beto lenda baka na mutindu Yehowa vandaka kusadila Yezu, Mwana na yandi mambu. Ntangu yonso, Yehowa vandaka kuwa bisambu ya Yezu mpi yandi vandaka kupesa mvutu. (Yoa. 11:41, 42) Ata Yezu kutanaka ti bampasi, yandi vandaka kundima nde Tata na yandi ke zolaka yandi mpi vandaka kusadisa yandi.—Luka 22:42, 43.

8. Inki mutindu Yehowa lungisaka bampusa ya Yezu?

⁸ Yezu zabaka nde Tata na yandi muntu salaka yandi mpi ke taninaka yandi, yo yina yandi tubaka nde: “Mono ke zinga sambu na Tata.” (Yoa. 6:57) Yezu tudilaka Tata na yandi ntima ya mvimba mpi Yehowa pesaka yandi bima ya kinsuni yina yandi vandaka na yo mfunu sambu na kuzinga. Diambu ya kuluta mfunu kele nde Yehowa lungisaka bampusa ya Yezu ya kimpeve.—Mat. 4:4.

9. Inki mutindu Yehowa monisaka nde yandi ke zolaka Yezu mpi pesaka yandi bima yina yandi vandaka na yo mfunu?

⁹ Yehowa Tata ya zola, sadisaka Yezu na kubakisa nde yandi vandaka kutanina yandi. (Mat. 26:53; Yoa. 8:16) Yehowa taninaka ve Yezu na bampasi yonso kansi yandi sadisaka Yezu na kukanga ntima na bampasi. Yezu zabaka nde bampasi yonso yina yandi kutanaka ti yo vandaka sambu na ntangu fioti. (Baeb. 12:2) Yehowa monisaka nde yandi vandaka kuzola Yezu ntangu yandi vandaka kuwidikila Yezu, kupesa yandi bima yina yandi vandaka na yo mfunu,  kulonga yandi mpi kusadisa yandi. (Yoa. 5:20; 8:28) Beto tubila ntangu yai mutindu Tata na beto ya zulu ke pesaka beto mpi bima yina beto ke vandaka na yo mfunu.

10. Mutindu Nkunga 66:19, 20 ke monisa yo, nki mutindu Yehowa ke monisaka nde yandi ke zolaka beto?

¹⁰ Yehowa ke waka bisambu na beto. (Tanga Nkunga 66:19, 20.) Yandi ke zolaka nde beto samba yandi ntangu yonso. (1 Bate. 5:17) Beto lenda samba Nzambi konso ntangu mpi na konso kisika yina beto kele. Yandi ke vandaka ya kuyilama na kuwidikila beto mpi ntangu yonso yandi ke tulaka dikebi na bisambu na beto. Ntangu beto ke bakisaka nde Yehowa ke waka bisambu na beto, beto ke kudiwaka pene-pene na yandi. Muyimbi-bankunga tubaka nde: “Mono ke zolaka Yehowa, sambu yandi ke waka ndinga na mono.”—Nk. 116:1.

11. Inki mutindu Yehowa ke pesaka mvutu na bisambu na beto?

¹¹ Tata na beto ke pesaka mpi mvutu na bisambu na beto. Ntumwa Yoane ke ndimisa beto nde: “Konso kima yina beto ke lomba na kuwakana ti luzolo [ya Nzambi], yandi ke waka beto.” (1 Yoa. 5:14, 15) Ya kieleka, bantangu ya nkaka Yehowa lenda pesa ve mvutu na bisambu na beto mutindu beto vandaka kuvingila. Sambu yandi ke zabaka mambu yina kele mbote kibeni sambu na beto, bantangu ya nkaka yandi ke pesaka ve mvutu to yandi ke zolaka nde beto vingila.—2 Bak. 12:7-9.

12-13. Inki mutindu Tata na beto ya zulu ke pesaka beto bima yina beto ke vandaka na yo mfunu?

¹² Yehowa ke pesaka beto bima yina beto ke vandaka na yo mfunu. Yandi ke salaka mambu yina yandi ke lombaka batata yonso na kusala. (1 Tim. 5:8) Yandi ke pesaka bana na yandi bima ya kinsuni yina bo ke vandaka na yo mfunu. Yandi ke zolaka ve nde beto kudiyangisa sambu na madia, bilele mpi nzo. (Mat. 6:32, 33; 7:11) Yehowa, Tata ya zola me yidikaka mambu sambu na kulungisa bampusa na beto yonso na bilumbu ke kwisa.

¹³ Kima ya kuluta mfunu kele nde Yehowa ke lungisaka bampusa na beto ya kimpeve. Na Ndinga na yandi, Yehowa me monisaka kieleka na yina me tala yandi, lukanu na yandi, lukanu ya luzingu mpi mambu yina yandi ta sala na bilumbu ke kwisa. Ntangu beto yantikaka kulonguka kieleka, yandi tudilaka beto dikebi, mu mbandu yandi sadilaka bibuti na beto to bantu ya nkaka na kusadisa beto na kuzaba yandi. Yandi ke landaka kusadisa beto na nzila ya bankuluntu yina ke zolaka beto mpi bampangi ya nkaka ya kuyela na kimpeve. Diaka, Yehowa ke longaka beto na nzila ya balukutakanu. Mambu yai mpi mambu ya nkaka yina Yehowa ke salaka ke monisa nde yandi kele Tata yina ke tudilaka beto dikebi.—Nk. 32:8.

14. Sambu na nki Yehowa ke longaka beto mpi nki mutindu yandi ke salaka yo?

¹⁴ Yehowa ke longaka beto. Beto kele ve bonso Yezu yina vandaka muntu ya kukuka. Yo yina ntangu Tata ya zola ke longaka beto, yandi ke pesaka beto mpi ndola kana yo kele mfunu. Ndinga na yandi ke yibusa beto nde: “Yehowa ke pesaka ndola na bantu yina yandi ke zolaka.” (Baeb. 12:6, 7) Yehowa ke pesaka ndola na mitindu mingi. Mu mbandu, diambu mosi yina beto lenda tanga na Biblia to yina beto lenda wa na balukutakanu lenda soba mabanza na beto to mutindu na beto ya kusala mambu. To bankuluntu lenda sadisa beto. Na mitindu yonso yina Yehowa ke pesaka ndola, yandi ke salaka yo na zola yonso.—Yer. 30:11.

15. Inki mutindu Yehowa ke taninaka beto?

¹⁵ Yehowa ke sadisaka beto na bantangu ya mpasi. Kaka mutindu tata ya zola ke sadisaka bana na yandi na bantangu ya mpasi, Tata na beto ya zulu ke sadisaka beto mpi na bantangu  ya mpasi. Yandi ke sadilaka mpeve santu na yandi sambu yo tanina beto na mambu yina lenda bebisa kimpeve na beto. (Luka 11:13) Yehowa ke taninaka beto mpi ntangu beto ke kudiyangisaka. Mu mbandu, yandi me pesaka beto kivuvu ya kitoko sambu na bilumbu ke kwisa. Kivuvu yai ke sadisaka beto na kukanga ntima na bampasi. Yindula fioti, Tata na beto ya zola ta katula mambu yonso ya mbi yina ke pesaka beto mpasi. Bampasi yonso yina beto ke kutanaka ti yo bubu kele kaka sambu na ntangu fioti kansi mambote yina Yehowa ta pesa beto ta vanda mvula na mvula.—2 Bak. 4:16-18.

16. Inki salamaka ntangu Adami kolamaka na Tata ya zola?

¹⁶ Zola ya Yehowa ke monanaka na mambu yina yandi salaka ntangu Adami ti Eva kolamaka. Ntangu Adami kolamaka na Tata ya zulu, yandi kudikatulaka mpi katula bana na yandi na dibuta ya kiese ya Yehowa. (Bar. 5:12; 7:14) Kansi Yehowa salaka diambu mosi sambu na kusadisa bana ya Adami.

17. Inki Yehowa salaka kukonda kusukinina ntangu Adami kolamaka?

¹⁷ Yehowa pesaka Adami ndola kansi yandi silaka na kusadisa bana yina Adami ta buta. Kukonda kusukinina, Yehowa silaka na kuvutula bantu ya bulemfu na dibuta na yandi. (Kuy. 3:15; Bar. 8:20, 21) Yandi yidikaka mambu na nzila ya kimenga ya Yezu, Mwana yina yandi ke zolaka mingi. Yehowa monisaka nde yandi ke zolaka beto mingi mpenza ntangu yandi ndimaka nde Mwana na yandi kufwa sambu na beto.—Yoa. 3:16.

18. Sambu na nki beto ke ndima nde Yehowa ke zolaka nde beto vanda na dibuta na yandi ata beto me sala kifu?

¹⁸ Ata beto kele bantu ya kukonda kukuka, Yehowa ke zolaka nde beto vanda bantu ya dibuta na yandi mpi yandi ke monaka ve nde beto kele kizitu sambu na yandi. Beto lenda sala kifu to kuvila nzila na nsungi mosi buna, kansi Yehowa  ta yambula beto ve. Kingana ya Yezu ya mwana yina vilaka ke monisaka zola ya mingi yina Yehowa Tata ke vandaka na yo sambu na beto. (Luka 15:11-32) Tata yina Yezu tubilaka na kingana vandaka ti kivuvu nde mwana na yandi ta vutuka. Ntangu mwana yina vutukaka, tata na yandi yambaka yandi na kiese yonso. Kana beto me sala disumu mpi me balula ntima, beto fwete ndima nde Yehowa, Tata ya zola, ta yamba beto na zola yonso.

19. Inki mutindu Yehowa ta yidika mambu ya mbi yina disumu ya Adami me nataka?

¹⁹ Tata na beto ta yidika mambu yonso ya mbi yina disumu ya Adami me nataka. Ntangu Adami kolamaka, Yehowa bakaka lukanu ya kupona bantu 144 000 sambu na kuvanda bantotila mpi banganga-nzambi na zulu ti Mwana na yandi. Yezu mpi bantu yina ta yala ti yandi ta sadisa bantu ya bulemfu na kukuma bantu ya kukuka na nsi-ntoto ya mpa. Na nima ya kumekama ya nsuka, Nzambi ta pesa bantu luzingu ya mvula na mvula. Tata na beto ta vanda na kiese ya kumona mutindu ntoto ta fuluka ti bana na yandi ya kukuka. Yo ta vanda ntangu mosi ya kitoko mingi kibeni!

20. Inki mutindu Yehowa me monisaka nde yandi ke zolaka beto mingi mpi disolo ya ke landa ta tubila nki?

²⁰ Yehowa me monisaka nde yandi ke zolaka beto mingi. Yandi kele Tata ya kuluta mbote. Yandi ke waka bisambu na beto mpi ke pesaka beto bima ya kinsuni mpi ya kimpeve yina beto ke vandaka na yo mfunu. Yandi ke longaka beto mpi ke sadisaka beto. Yandi me bumbilaka beto mpi mambu mingi ya mbote na bilumbu ke kwisa. Beto ke waka kiese mingi na mutindu Tata na beto ke zolaka beto mpi ke pesaka beto bima yina beto ke vandaka na yo mfunu. Disolo ya ke landa ta tubila mambu yina beto bana na yandi lenda sala sambu na kumonisa ntonda na zola yina Tata na beto ke monisilaka beto.