1-2. Inki ke salamaka mbala mingi kana bantu ke baka mbotika mpi nki beto ta tadila na disolo yai?

 KETI nge me monaka dezia kimvuka mosi ya bantu yina ke zola kubaka mbotika? Nge waka mutindu bo vandaka kupesa bamvutu na bangiufula zole yina bo ke yulaka bantu yina ke zola kubaka mbotika. Nge monaka mutindu bantu ya mabuta na bo mpi banduku na bo vandaka na kiese mingi kibeni. Ntangu bo basikaka na masa, nge waka bantu ke budila bo maboko mpi nge monaka mutindu bantu yina bakaka mbotika vandaka na kiese. Na ntoto ya mvimba, konso mposo bantu mingi ke kudipesaka na Yehowa mpi bo ke bakaka mbotika.

² Ebuna nge? Kana nge kele ti ngindu ya kubaka mbotika, nge kele muntu mosi ya mfunu mingi na nsi-ntoto yai sambu nge “ke sosa Yehowa.” (Nk. 14:1, 2) Disolo yai ke tadila nge, yo vanda nge kele leke to mununu. Kansi bampangi yina me bakaka dezia mbotika ke zolaka kukumisa ngolo lukanu na bo ya kulanda kusadila Yehowa mvula na mvula. Yo yina beto tadila beto yonso mambu tatu na kati ya mambu mingi yina beto lenda sala sambu na kulanda kusadila Yehowa.

3. Sambu na nki bansadi ya Yehowa ke zolaka kieleka mpi lunungu? (Nkunga 119:128, 163)

³ Yehowa songaka bansadi na yandi na ‘kuzola kieleka.’ (Zek. 8:19) Yezu songaka balongoki na yandi na kulanda mambu ya lunungu. (Mat. 5:6) Yo ke tendula nde konso muntu fwete vanda ti mpusa ya ngolo ya kusala mambu ya lunungu, ya mbote mpi ya bunkete na meso ya Nzambi. Keti nge ke zolaka kieleka mpi lunungu? Beto ke ndima nde nge ke zolaka yo. Nge ke mengaka luvunu mpi mambu yonso ya mbi. (Tanga Nkunga 119:128, 163.) Luvunu kele kikalulu ya Satana mfumu ya nsi-ntoto yai. (Yoa. 8:44; 12:31) Mosi na kati ya balukanu ya Satana kele ya kufingisa zina ya santu ya Yehowa Nzambi. Satana ke tubaka mambu mingi  ya luvunu sambu na Nzambi na beto banda ntangu yina bantu kolamaka na Edeni. Yandi pusaka bantu na kuyindula nde Yehowa kele Nzambi ya luvunu yina ke zolaka ve nde bantu kuzinga mbote. (Kuy. 3:1, 4, 5) Mambu ya luvunu yina Satana tubaka sambu na Yehowa ke pusaka bantu na kuyindudila Yehowa mambu ya mbi. Ntangu bantu ke buyaka ‘kuzola kieleka,’ Satana ke pusaka bo na kusala mambu ya kukonda lunungu mpi mambu ya mbi.​—Bar. 1:25-31.

4. Inki mutindu Yehowa ke monisaka nde yandi kele “Nzambi ya kieleka”? (Tala mpi kifwanisu ya ke wakana ti paragrafe yai.)

⁴ Yehowa kele “Nzambi ya kieleka” mpi yandi ke longaka kieleka na bantu yina ke zolaka yandi. (Nk. 31:5) Ntangu yandi ke longaka bo kieleka, yandi ke sadisaka bo na kulanda ve mambu ya luvunu ya Satana. Yehowa ke longaka mpi bansadi na yandi na kuvanda bantu ya masonga mpi bantu ya lunungu. Yo ke salaka nde bantu kuzitisa bo mpi bo ke vandaka ti ngemba ya mabanza. (Bing. 13:5, 6) Keti yandi me salaka yo sambu na nge ntangu nge yantikaka kulonguka Biblia? Nge longukaka nde Yehowa ke salaka mambu ya mbote sambu na bantu yonso mpi sambu na nge. (Nk. 77:13) Yo yina nge ke zolaka kusala mambu yina ke sepedisaka Nzambi. (Mat. 6:33) Nge ke zolaka kuzabisa bantu ya nkaka kieleka mpi kumonisa nde mambu yina Satana ke tubaka sambu na Nzambi na beto Yehowa kele ya luvunu. Inki mutindu nge lenda sala yo?

5. Inki mutindu nge lenda nwanina kieleka mpi lunungu?

⁵ Mambu ya nge ke sala na luzingu fwete monisa bonso nge ke tuba nde: “Mono ke buyaka mambu ya luvunu ya Satana mpi mono ke nwaninaka kieleka. Mono ke zola nde Yehowa kuvanda Mfumu na mono mpi mono ke zola kusala mambu yina Yehowa ke tubaka nde yo kele mbote.” Inki mutindu nge lenda sala yo? Songa Yehowa na kisambu nde nge ke zola kusadila yandi mvula na mvula mpi baka mbotika sambu na kumonisa yo na meso ya bantu yonso. Kima yina ta pusa beto na kubaka mbotika kele kuzola mambu ya kieleka mpi ya lunungu.

6. Sambu na nki Nkunga 45:4 ke pusa nge na kuzola Yezu Kristu?

⁶ Sambu na nki nge ke zolaka Yezu Kristu? Tala bikuma ya mbote yina kele na Nkunga 45:4. (Tanga.) Yezu ke zolaka kieleka, kudikulumusa mpi lunungu. Kana nge ke zolaka kieleka mpi lunungu, yo ke monisa mpi nde nge ke zolaka Yezu Kristu. Yindula mutindu Yezu nwaninaka mambu ya kieleka mpi ya lunungu  ti kikesa yonso. (Yoa. 18:37) Ebuna nki mutindu Yezu ke monisaka nde yandi ke zolaka kudikulumusa?

7. Inki ke yitukisa nge na kudikulumusa ya Yezu?

⁷ Mambu yina Yezu salaka monisaka nde yandi ke zolaka kudikulumusa. Mu mbandu, yandi pesaka lukumu yonso na Tata na yandi kansi ve na yandi mosi. (Mar. 10:17, 18; Yoa. 5:19) Kudikulumusa ya Yezu ke pusa nge na kudiwa nki mutindu? Ya kieleka, yo ke pusa nge na kuzola Mwana ya Nzambi mpi na kulanda mbandu na yandi. Sambu na nki Yezu ke vandaka muntu ya kudikulumusa? Sambu yandi ke zolaka Tata na yandi mpi yandi ke landaka mbandu na yandi ya kudikulumusa. (Nk. 18:35; Baeb. 1:3) Keti nge ke zola ve kulanda mbandu ya Yezu yina monisaka bikalulu ya Yehowa na mutindu ya kukuka?

8. Sambu na nki beto ke zolaka nde Yezu kuvanda Ntotila na beto?

⁸ Beto ke zolaka nde Yezu kuvanda Ntotila na beto sambu yandi kele Mfumu ya kuluta mbote. Yehowa yandi mosi pesaka Mwana na yandi formasio mpi yandi tulaka yandi Mfumu. (Yez. 50:4, 5) Yindula mpi zola ya kuditambika yina Yezu monisaka. (Yoa. 13:1) Sambu Yezu kele Ntotila na nge, yo me fwana nde nge zola yandi mingi. Yandi monisaka nde bantu yina ke zolaka yandi kibeni, disongidila banduku na yandi ke salaka mambu yina yandi songaka bo na kusala sambu na kumonisa nde bo ke zolaka yandi. (Yoa. 14:15; 15:14, 15) Yo kele dibaku ya nene kibeni ya kuvanda nduku ya Mwana ya Yehowa.

9. Inki mutindu mbotika ya Bakristu ke wakana ti ya Kristu?

⁹ Mosi na kati ya bansiku yina Yezu pesaka kele nde balongoki na yandi fwete baka mbotika. (Mat. 28:19, 20) Yandi mosi pesaka bo mbandu. Mbotika na yandi kele ya kuswaswana ti ya balongoki na yandi na mutindu ya nkaka. (Tala lupangu “ Inki Mutindu Mbotika ya Yezu mpi ya Balongoki na Yandi Me Swaswana?”) Kansi na mutindu ya nkaka, yo ke wakana. Ntangu Yezu bakaka mbotika, yandi kudipesaka sambu na kusala luzolo ya Tata na yandi. (Baeb. 10:7) Ntangu balongoki ya Kristu ke bakaka mbotika, bo ke monisaka na meso ya bantu nde bo me kudipesa na Nzambi. Kansi bonso Yezu, mbotika na bo ke monisaka nde bo ta sala luzolo ya Yehowa luzingu na bo ya mvimba. Yo ke monisaka nde bo ke landa mbandu ya Mfumu na bo.

10. Sambu na nki zola sambu na Yezu fwete pusa nge na kubaka mbotika?

¹⁰ Nge ke ndimaka nde Yezu kele Mwana mosi kaka ya kubutuka ya Yehowa. Nge ke vandaka na kiese ya kuzaba nde yandi kele Ntotila yina Nzambi me tulaka sambu na kuyala beto. Nge me zaba nde Yezu kele muntu ya kudikulumusa mpi yandi ke landaka mbandu ya Tata na yandi na mutindu ya kukuka. Nge longukaka nde yandi disaka bantu yina vandaka na nzala, yandi pesaka bantu yina vandaka ya kulemba nitu kikesa mpi yandi belulaka bambefo. (Mat. 14:14-21) Nge me monaka mutindu yandi ke twadisaka dibundu na yandi bubu yai. (Mat. 23:10) Nge me zaba mpi nde yandi ta sala mambu mingi na bilumbu ke kwisa sambu yandi kele Ntotila ya Kimfumu ya Nzambi. Inki mutindu nge lenda monisa nde nge ke zolaka yandi? Kana nge ke landa mbandu na yandi. (Yoa. 14:21) Kima mosi ya mfunu yina nge lenda sala kele kudipesa na Yehowa mpi kubaka mbotika.

11. Inki kele kikuma ya kuluta mfunu ya ke pusaka beto na kubaka mbotika?

¹¹ Inki kele kikuma ya kuluta mfunu ya ke pusaka beto na kubaka mbotika? Yezu monisaka nsiku ya kuluta nene na kati ya bansiku ya Nzambi ntangu yandi tubaka nde: “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.” (Mar. 12:30) Keti nge ke zolaka Yehowa mutindu yina?

12. Sambu na nki nge ke zolaka Yehowa? (Tala mpi kifwanisu ya ke wakana ti paragrafe yai.)

 ¹² Beto kele ti bikuma mingi ya ke pusaka beto na kuzola Yehowa. Mu mbandu, nge me bakisaka nde yandi kele “nto ya luzingu” mpi nde yandi muntu ke pesaka “konso dikabu ya mbote mpi konso kado ya kukuka.” (Nk. 36:9; Yak. 1:17) Bima yonso ya mbote yina nge kele ti yo ke katukaka na Nzambi na beto ya zola yina ke kabaka.

13. Sambu na nki kimenga ya Yezu kele kado ya kuluta mbote?

¹³ Kimenga ya Yezu kele kado ya kuluta mbote yina Yehowa me pesaka beto. Sambu na nki yo kele kado ya kuluta mbote? Yindula kinduku ya ngolo yina Yehowa ti Mwana na yandi ke vandaka ti yo. Yezu tubaka nde: “Tata ke zolaka mono” mpi “mono ke zolaka Tata.” (Yoa. 10:17; 14:31) Kinduku na bo yina kumaka ngolo kibeni bamvula mingi yina bo vandaka kuzinga kisika mosi. (Bing. 8:22, 23, 30) Yindula mpasi yina Nzambi waka ntangu yandi bikaka nde Mwana na yandi kumona mpasi mpi kufwa. Yehowa ke zolaka bantu mpi yandi ke zolaka nge mingi kibeni. Yo yina yandi ndimaka kupesa Mwana na yandi yina yandi ke zolaka mingi sambu yo sadisa nge mpi bantu ya nkaka na kuzinga mvula na mvula. (Yoa. 3:16; Bag. 2:20) Yo kele kikuma ya kuluta nene ya ke pusaka beto na kuzola Nzambi.

14. Inki kele lukanu ya kuluta mbote yina nge lenda kuditudila?

¹⁴ Zola na nge sambu na Yehowa me kumaka ngolo ntangu nge longukaka mambu mingi ya me tala yandi. Ya kieleka, nge ke zolaka kukwenda  pene-pene na yandi bubu yai mpi mvula na mvula. Mpi nge lenda sala yo. Na mawete yonso, yandi ke siamisaka beto na kusala mambu yina ta pesa yandi kiese. (Bing. 23:15, 16) Nge lenda sala yo na mambu yina nge ke tuba mpi yina nge ke sala. Mambu yina nge ke salaka na luzingu ta monisa kana nge ke zolaka kibeni Yehowa. (1 Yoa. 5:3) Yo kele lukanu ya mbote yina nge lenda kuditudila na luzingu na nge.

15. Inki mutindu nge lenda monisa nde nge ke zolaka Yehowa?

¹⁵ Inki mutindu nge lenda monisa nde nge ke zolaka Yehowa? Ya ntete, nge fwete sala kisambu sambu na kudipesa na Nzambi mosi kaka ya kieleka. (Nk. 40:8) Na nima, nge ta baka mbotika sambu na kumonisa yo na meso ya bantu. Mutindu beto me tubila yo na disolo yai, kilumbu na nge ya mbotika kele kilumbu ya kiese mpi ya mfunu mingi na luzingu na nge. Nge ke yantika luzingu ya mpa disongidila nge ke zinga sambu na Yehowa kansi ve sambu na nge mosi. (Bar. 14:8; 1 Pie. 4:1, 2) Yo kele lukanu mosi ya nene kansi yo ta sadisa nge na kuvanda ti luzingu ya kuluta mbote. Inki mutindu?

16. Nkunga 41:12 ke monisa nde Yehowa ta sala nki sambu na bantu yina ke sadilaka yandi?

¹⁶ Yehowa ke kabaka kuluta bantu yonso. Yandi ke pesaka beto bima mingi kuluta yina beto lenda pesa yandi. (Mar. 10:29, 30) Kana nge ke landa kusadila Yehowa, yandi ta sadisa nge na kuvanda ti luzingu ya mbote banda bubu yai na nsi-ntoto yai ya mbi. Kansi yo kele kaka luyantiku. Nge fwete landa kusadila Yehowa luzingu na nge ya mvimba. Nge lenda landa kusadila Tata na nge ya zola mvula na mvula. Nge ta kuma kuzola Tata na nge mingi; yandi mpi ta kuma kuzola nge mingi. Nge ta zinga mpi mvula na mvula mutindu yandi ke zingaka mvula na mvula.​—Tanga Nkunga 41:12.

17. Inki kima nge lenda pesa Yehowa yina yandi kele ntete ve ti yo?

¹⁷ Kana nge me kudipesa na Yehowa mpi nge me baka mbotika, nge kele ti dibaku ya kupesa yandi kima mosi ya mfunu mingi. Yehowa me pesaka nge bima yonso ya mbote yina nge vandaka ntete ve ti yo mpi yandi me salaka nde nge lutisa bantangu ya mbote yina nge me lutisaka ntete ve. Nge mpi lenda pesa Muntu yina salaka zulu mpi ntoto kima mosi yina yandi kele  ntete ve ti yo disongidila, luzolo na nge ya kusadila yandi na mutindu ya mbote. (Yobi 1:8; 41:11; Bing. 27:11) Yo kele kima ya kuluta mfunu ya nge lenda sala na luzingu na nge. Ntembe kele ve nde zola na nge sambu na Yehowa kele kikuma ya kuluta mfunu ya fwete pusa nge na kubaka mbotika.

18. Inki bangiufula nge lenda kudiyula?

¹⁸ Inki mvutu nge ta pesa kana bo yula nge nde keti nge kele ya kuyilama na kubaka mbotika? Nge mpamba muntu me zaba mvutu. Kansi yo lenda vanda mbote kana nge mosi kudiyula nde: ‘Inki ke kanga mono nzila ya kubaka mbotika?’ (Bis. 8:36) Yibuka mambu tatu ya beto me tubila na disolo yai. Ya ntete, nge ke zolaka kieleka mpi lunungu. Kudiyula nde: ‘Keti mono ke vingilaka ntangu yina bantu yonso ta tubaka kieleka mpi ta salaka mambu ya lunungu?’ Ya zole, nge ke zolaka Yezu Kristu. Kudiyula nde: ‘Keti mono ke zolaka nde Mwana ya Nzambi kuvanda Ntotila na mono mpi keti mono ke zolaka kulanda mbandu na yandi?’ Ya tatu, nge ke zolaka Yehowa mpi yo kele diambu ya kuluta mfunu. Kudiyula nde: ‘Keti mono ke sadilaka Yehowa sambu na kupesa ntima na yandi kiese?’ Kana nge ke salaka mambu yina yonso, ebuna nki ke kanga nge nzila ya kubaka mbotika?​—Bis. 16:33.

19. Sambu na nki nge fwete vanda ve ti badute na kubaka mbotika? Pesa mbandu. (Yoane 4:34)

¹⁹ Kana nge ke yindula nde nge me fwana ve na kubaka mbotika, tadila mbandu yina Yezu pesaka. (Tanga Yoane 4:34.) Yezu fwanisaka kusala luzolo ya Tata na yandi ti madia. Sambu na nki? Madia ke vandaka mbote sambu na beto. Yezu zabaka nde mambu yonso ya Yehowa ke lombaka beto na kusala ke vandaka sambu na mambote na beto. Yehowa ke zolaka ve nde beto sala ata kima mosi yina ta natila beto bampasi. Keti Yehowa ke zolaka mpi nde nge baka mbotika? Ee. (Bis. 2:38) Yo yina nge fwete ndima mpi nde kana nge baka mbotika, yo ta natila nge mambote. Mutindu nge ke vandaka ve ti badute na kudia madia mosi ya mbote, nge fwete vanda mpi ve ti badute na kubaka mbotika.

20. Inki beto ta tubila na disolo ya ke landa?

²⁰ Sambu na nki bantu ya nkaka ke vandaka ti badute sambu na kubaka mbotika? Bantu mingi lenda tuba nde: “Mono kele ntete ve ya kuyilama.” Sambu lukanu ya kudipesa na Yehowa mpi ya kubaka mbotika kele lukanu ya kuluta mfunu na luzingu na nge. Yo yina yo ke lombaka kuyindula mbote-mbote, yo ke bakaka ntangu mpi yo ke lombaka bikesa mingi sambu nge vanda ya kuyilama na kubaka mbotika. Kansi kana nge kele ti nzala ya ngolo ya kubaka mbotika, nki nge lenda sala bubu yai sambu na kubaka yo? Beto ta baka mvutu na ngiufula yina na disolo ya ke landa.