1-2. Sambu na nki beto ke vukanaka na Nkinsi ya Kuyibuka Lufwa ya Yezu konso mvula?

 BAMVULA kiteso ya 2000 me luta, Yezu pesaka luzingu na yandi sambu na beto. Yo me pesaka beto dibaku ya kuzinga mvula na mvula. Na mpimpa ya nsuka ya luzingu ya Yezu awa na ntoto, yandi songaka balongoki na yandi na kuyibuka kimenga na yandi. Yandi songaka bo na kusala yo na nzila ya nkinsi mosi ya kukonda mindondo yina bo ta sadilaka dimpa mpi vinu.​—1 Bak. 11:23-26.

² Beto ke lemfukaka na nsiku yina ya Yezu sambu beto ke zolaka yandi mingi kibeni. (Yoa. 14:15) Konso mvula, na nsungi ya Kuyibuka Lufwa ya Yezu, beto ke monisaka ntonda sambu na kimenga ya Yezu. Beto ke salaka yo ntangu beto ke yindulaka mpi ke sambaka sambu na mambu yina lufwa na yandi ke tendula sambu na bantu. Beto ke vandaka mpi na kiese ya kulonga diaka mingi nsangu ya mbote mpi ya kubingisa bantu mingi kibeni na kuvukana ti beto na nkinsi yina ya mfunu mingi. Ya kieleka, beto ke salaka mpi yonso sambu na kubika ve nde ata kima mosi kukanga beto nzila ya kuvukana na Nkinsi ya Kuyibuka Lufwa ya Yezu.

3. Inki beto ta tadila na disolo yai?

³ Na disolo yai, beto ta tubila mitindu tatu yina bansadi ya Yehowa me salaka bikesa ya me fwana sambu na kuyibuka lufwa ya Yezu: (1) bo me salaka yonso sambu na kusala Nkinsi ya Kuyibuka Lufwa ya Yezu mutindu Yezu songaka bo na kusala yo, (2) bo salaka yonso sambu na kubingisa mpi bantu ya nkaka na kuvukana na nkinsi yango mpi (3) bo me salaka yonso sambu na kuvukana na Nkinsi ya Kuyibuka Lufwa ya Yezu ata yo vandaka mpasi na kusala yo.

4. Inki beto ke longukaka konso mvula na Nkinsi ya Kuyibuka Lufwa ya Yezu mpi sambu na nki beto fwete monisa kibeni ntonda sambu na mambu yina beto ke longukaka? (Luka 22:19, 20)

⁴ Konso mvula, na Nkinsi ya Kuyibuka Lufwa ya Yezu, beto ke landaka diskure ya me simbama na Biblia ya ke pesaka bamvutu ya pwelele na bangiufula mingi. Beto ke bakisaka sambu na nki bantu ke vandaka ti mfunu ya kimenga ya Yezu mpi mutindu lufwa ya muntu mosi futaka masumu ya bantu mingi. Bo ke yibusaka beto mpi nki dimpa mpi vinu ke monisa mpi banani fwete dia dimpa mpi kunwa vinu. (Tanga Luka 22:19, 20.) Diaka, beto ke yindulaka mambu ya mbote yina ta salama na bilumbu ke kwisa sambu na bantu yina kele ti kivuvu ya kuzinga mvula na mvula awa na ntoto. (Yez. 35:5, 6; 65:17, 21-23) Beto fwete monisa kibeni ntonda sambu na mambu yina. Bantu mingi ke zabaka yo ve mpi bo ke bakisaka ve valere ya kimenga ya Yezu. Bo ke yibukaka mpi ve lufwa ya Yezu na mutindu yina Yezu songaka balongoki na yandi na kusala yo. Sambu na nki?

5. Na nima ya lufwa ya bantumwa ya Yezu, nki mutindu bantu yantikaka kuyibuka lufwa na yandi?

⁵ Ntangu bantumwa ya Yezu fwaka, Bakristu ya luvunu kotaka na dibundu ya Bukristu. (Mat. 13:24-27, 37-39) Bo vandaka kutuba “mambu ya nioka-nioka sambu na kubenda balongoki na kulanda bo.” (Bis. 20:29, 30) Mosi na kati ya mambu ya nioka-nioka yina bantu yina yantikaka kulonga vandaka nde Yezu pesaka ve nitu na yandi “mbala mosi mpamba sambu na kunata masumu ya bantu mingi” mutindu Biblia ke tubaka. Kansi, bo vandaka kulonga nde yandi fwete landa kupesa kimenga na yandi mbala na mbala. (Baeb. 9:27, 28) Bubu yai, bantu mingi ke ndimaka dilongi yina ya luvunu. Bo ke kwendaka na nzo-nzambi konso mposo, bantangu ya nkaka konso kilumbu sambu na kuyibuka kimenga ya Yezu yina dibundu ya katolika ke bingaka nde “Ogarisia.” b Na mabundu ya nkaka ya Kikristu, bo ke yibukaka ve lufwa ya Yezu mbala na mbala. Kansi bo ke bakisaka ve mbote-mbote ntendula ya kimenga ya Yezu. Bantu ya nkaka lenda kudiyula nde: ‘Keti lufwa ya Yezu ke tendula kibeni nde Nzambi me lolula masumu na mono?’ Sambu na nki bo ke kudiyulaka ngiufula yina? Sambu bo ke ndimaka mambu ya bantu yina ke tubaka nde Nzambi lenda lolula ve masumu na beto na nsadisa ya lufwa ya Yezu. Inki mutindu balongoki ya kieleka ya Yezu me sadisaka bantu na kubakisa ntendula ya kieleka ya lufwa ya Yezu mpi mutindu ya mbote ya kuyibuka lufwa na yandi?

6. Na 1872, nki balongoki ya Biblia bakisaka?

⁶ Na nsuka ya mvu-nkama ya 19, kimvuka mosi ya balongoki ya Biblia yina mpangi Charles Taze Russell vandaka kutwadisa yantikaka kulonguka mbote-mbote Masonuku. Bo vandaka ti mfunu ya kuzaba kieleka na yina me tala valere ya kimenga ya Yezu mpi mutindu bo fwete yibuka lufwa na yandi. Na 1872, bo bakisaka nde Yezu pesaka kimenga sambu na bantu yonso. Bo bumbaka ve mambu yina bo longukaka sambu na bo mosi. Bo zabisaka yo bantu ya nkaka na nzila ya mikanda, ya bamwangi-nsangu mpi ya bazulunalu. Kukonda kusukinina, sambu na kulanda mbandu ya Bakristu ya mvu-nkama ya ntete, bo yantikaka kuvukana kaka mbala mosi na mvula sambu na kuyibuka lufwa ya Yezu.

7. Inki mambote beto ke bakaka na bansosa yina balongoki ya Biblia salaka?

⁷ Bubu yai, beto ke bakaka mambote ya bansosa yina balongoki ya Biblia salaka bamvula mingi me luta. Inki mutindu? Yehowa me kangulaka beto meso mpi beto me bakisaka kieleka ya me tala kimenga ya Yezu mpi mambu yina yo ta sala sambu na beto mpi sambu na bantu yonso. (1 Yoa. 2:1, 2) Beto me longukaka mpi nde Biblia ke tubilaka  bivuvu zole sambu na bantu yina ke sepedisaka Nzambi. Bankaka ta baka luzingu ya mvula na mvula na zulu mpi bo ta vanda ti nitu yina ke fwaka ve. Bamilio ya bantu ta baka luzingu ya mvula na mvula awa na ntoto. Beto ke kwendaka pene-pene ya Yehowa ntangu beto ke bakisaka nde yandi ke zolaka beto mingi mpi nde beto ke bakaka mambote mingi ya kimenga ya Yezu. (1 Pie. 3:18; 1 Yoa. 4:9) Yo yina, na mbandu ya bampangi na beto ya kwikama ya ntangu ya ntama, beto ke bingisaka bantu na kuvukana ti beto sambu na kusala Nkinsi ya Kuyibuka Lufwa ya Yezu mutindu yandi songaka balongoki na yandi na kusala yo.

8. Inki bansadi ya Yehowa me salaka sambu na kubingisa bantu na Nkinsi ya Kuyibuka Lufwa ya Yezu? (Tala kifwanisu ya ke wakana ti paragrafe yai.)

⁸ Banda ntama, bansadi ya Yehowa ke bingisaka bantu na Nkinsi ya Kuyibuka Lufwa ya Yezu. Na luyantiku ya 1881, bo bingisaka bampangi na kuvukana na nzo mosi na Allegheny na Pennsylvanie sambu na kuyibuka lufwa ya Yezu. Na nima, konso dibundu kudisadilaka Nkinsi ya Kuyibuka Lufwa ya Yezu. Na mars 1940, bo songaka bansamuni nde bo lenda bingisa konso muntu yina ya teritware na bo ya me sepela na kukwisa na Nkinsi ya Kuyibuka Lufwa ya Yezu. Na 1960, Betele pesaka mabundu baemvitasio ya kuniema sambu na mbala ya ntete. Banda pana, bansadi ya Yehowa ke kabulaka bamilio ya baemvitasio ya Nkinsi ya Kuyibuka Lufwa ya Yezu. Sambu na nki beto ke salaka bantangu mingi mpi bikesa sambu na kubingisa bantu na Nkinsi ya Kuyibuka Lufwa ya Yezu?

9-10. Banani ke bakaka mambote ya bikesa yina beto ke salaka sambu na kubingisa bantu na Nkinsi ya Kuyibuka Lufwa ya Yezu? (Yoane 3:16)

⁹ Beto ke bingisaka bantu na Nkinsi ya Kuyibuka Lufwa ya Yezu sambu beto ke zolaka nde bayina me kwisa sambu na mbala ya ntete kulonguka  mambu yina Yehowa mpi Yezu me salaka sambu na beto yonso. (Tanga Yoane 3:16.) Beto ke ndimaka nde mambu yina bo ta mona mpi yina bo ta wa na Nkinsi ya Kuyibuka Lufwa ya Yezu ta pusa bo na kulonguka mambu mingi mpi na kukuma bansadi ya Yehowa. Bantu ya nkaka mpi ke bakaka mambote.

¹⁰ Beto ke bingisaka mpi bantu yina ke sadilaka diaka ve Yehowa. Beto ke salaka yo sambu na kuyibusa bo nde Nzambi ke zolaka bo kaka. Bantu mingi ke kwisaka mpi beto ke vandaka na kiese mingi ya kumona bo. Kuvukana na Nkinsi ya Kuyibuka Lufwa ya Yezu ke yibusaka bo kiese yina bo vandaka ti yo ntangu bo vandaka kusadila Yehowa. Beto tala mbandu ya mpangi Monica. c Na nsungi ya maladi ya coronavirus, yandi vutukilaka kulonga nsangu ya mbote. Na nima ya kuvukana na Nkinsi ya Kuyibuka Lufwa ya Yezu na 2021, yandi tubaka nde: “Nkinsi yai ya Kuyibuka Lufwa ya Yezu ke vandaka kibeni mfunu mingi sambu na mono. Na bamvula 20 yina mono salaka kukonda kulonga nsangu ya mbote, yina vandaka mbala na mono ya ntete ya kulonga bantu mpi ya kubingisa bo na Nkinsi ya Kuyibuka Lufwa ya Yezu. Mono salaka yonso sambu na kubingisa bantu sambu mono ke monisaka ntonda sambu na mambu yina Yehowa mpi Yezu me salaka sambu na mono.” (Nk. 103:1-4) Ata bantu kundima emvitasio na beto to ve, beto ke vandaka na kiese ya kubingisa bo na kukwisa na Nkinsi ya Kuyibuka Lufwa ya Yezu sambu beto ke zabaka nde Yehowa ke sepelaka ti bikesa yina beto ke salaka.

11. Inki mutindu Yehowa ke sakumunaka bikesa ya beto ke salaka sambu na kubingisa bantu na Nkinsi ya Kuyibuka Lufwa ya Yezu? (Agai 2:7)

¹¹ Yehowa ke sakumunaka bikesa ya beto ke salaka sambu na kubingisa bantu na Nkinsi ya Kuyibuka Lufwa ya Yezu. Na 2021, ata maladi ya coronavirus vandaka, bantu 21367603 vukanaka na Nkinsi ya Kuyibuka Lufwa ya Yezu. Ntalu ya Bambangi ya Yehowa ya ntoto ya mvimba ta kota na ntalu yina kiteso ya mbala zole ti ndambu. Ya kieleka, Yehowa ke tulaka ve dikebi na ntalu ya bantu. Kansi yandi ke tulaka dikebi na konso muntu yina me kwisa na Nkinsi ya Kuyibuka Lufwa ya Yezu. (Luka 15:7; 1 Tim. 2:3, 4) Beto ke ndima kibeni nde, ntangu beto ke bingisaka bantu, Yehowa ke sadisaka beto na kuzwa bantu ya ntima-masonga.​—Tanga Agai 2:7.

12. Inki lenda sala nde yo vanda mpasi sambu beto vukana na Nkinsi ya Kuyibuka Lufwa ya Yezu? (Tala kifwanisu ya ke wakana ti paragrafe yai.)

¹² Yezu tubaka nde na bilumbu ya nsuka, beto ta kutana ti bampasi ya mutindu na mutindu. Mu mbandu, bantu ya mabuta ta telemina beto, bantu ta niokula beto, bitumba, maladi mpi bampasi ya nkaka. (Mat. 10:36; Mar. 13:9; Luka 21:10, 11) Bantangu ya nkaka, mambu yina ke salaka nde yo vanda mpasi sambu beto vukana na Nkinsi ya Kuyibuka Lufwa ya Yezu. Inki bampangi ya nkaka me salaka sambu na kununga bampasi yina mpi nki mutindu Yehowa me sadisaka bo?

13. Inki mutindu Yehowa sadisaka mpangi Artem na kusala Nkinsi ya Kuyibuka Lufwa ya Yezu na boloko?

¹³ Kana beto kele na boloko. Bampangi na beto yina kele na boloko sambu na lukwikilu na bo ke salaka yonso yina bo lenda sala sambu na kuyibuka lufwa ya Yezu. Beto tadila mbandu ya mpangi Artem. Na 2020 na nsungi ya Nkinsi ya Kuyibuka Lufwa ya Yezu, yandi vandaka na boloko na shambre mosi ya bametre 17 mpi bo vandaka bantu tanu na kati. Ata yandi vandaka na boloko, yandi yidikaka mwa bima yina yandi lendaka kusadila bonso dimpa mpi vinu na Nkinsi ya Kuyibuka Lufwa ya Yezu mpi yandi yilamaka sambu na kudisadila diskure. Kansi bantu yina yandi vandaka ti bo vandaka kunwa makaya mpi kutuba mambu ya mbi. Inki yandi salaka? Yandi lombaka bo na kubika ntete kutuba mambu ya mbi mpi kunwa makaya kaka sambu na ngunga mosi. Mpangi Artem yitukaka sambu bo ndimaka nde bo ta nwa ve makaya mpi bo ta tuba ve mambu ya mbi ntangu  Nkinsi ya Kuyibuka Lufwa ya Yezu ke salama. Mpangi Artem ke tuba nde: “Mono lombaka bo na kusonga bo mambu ya me tala Nkinsi ya Kuyibuka Lufwa ya Yezu.” Ata bo tubaka nde bo ke zola ve kuwa mambu ya me tala Nkinsi ya Kuyibuka Lufwa ya Yezu, ntangu bo monaka mpangi Artem ke sala Nkinsi ya Kuyibuka Lufwa ya Yezu mpi ntangu bo waka mambu yina yandi vandaka kutuba, bo yulaka yandi mambu ya me tala yo.

14. Inki mutindu Bansadi ya Yehowa salaka Nkinsi ya Kuyibuka Lufwa ya Yezu na nsungi ya maladi ya coronavirus?

¹⁴ Coronavirus. Na nsungi ya maladi yina, bansadi ya Yehowa vandaka ve kuvukana kimuntu-kimuntu sambu na kusala Nkinsi ya Kuyibuka Lufwa ya Yezu. Kansi maladi yina kangaka bo ve nzila ya kusala yo. d Mabundu yina ke sadilaka Internet salaka Nkinsi ya Kuyibuka Lufwa ya Yezu na nzila ya video. Ebuna, nki bamilio ya bantu yina kele ve ti Internet salaka? Na bansi ya nkaka, bampangi yidikaka mambu sambu bantu kulanda diskure na Televizio to na radio. Diaka, Babetele salaka diskure ya bo kotisaka ndinga na bandinga kuluta 500 sambu ata bayina ke zingaka na bisika ya kuluta ntama kusala Nkinsi ya Kuyibuka Lufwa ya Yezu. Bampangi yidikaka mambu sambu na kupesa  bampangi ya bisika yina diskure yina bo kotisaka ndinga.

15. Mbandu ya Sue ke longa nge nki?

¹⁵ Ntangu bantu ya dibuta ke telemina beto. Sambu na bantu ya nkaka, yo ke vandaka mpasi kibeni sambu bo vukana na Nkinsi ya Kuyibuka Lufwa ya Yezu sambu bantu ya mabuta na bo ke teleminaka bo. Beto tala mbandu ya Sue, longoki mosi ya Biblia. Na 2021, kilumbu mosi na nsungi ya Nkinsi ya Kuyibuka Lufwa ya Yezu, Sue songaka mpangi yina vandaka kulonguka Biblia ti yandi nde, yandi ta kuka ve kuvukana na Nkinsi ya Kuyibuka Lufwa ya Yezu sambu bantu ya dibuta na yandi ke telemina yandi. Mpangi yina vandaka kulonguka Biblia ti yandi tangaka Luka 22:44. Na nima, yandi tendudilaka Sue nde kana beto ke kutana ti bampasi, beto fwete landa mbandu ya Yezu. Beto fwete samba Yehowa mpi kutudila yandi ntima ya mvimba. Kilumbu yina landaka, Sue yidikaka dimpa mpi vinu mpi yandi talaka Lusambu ya Suka na jw.org. Na nkokila na yo, ntangu yandi vandaka yandi mosi na shambre na yandi, yandi landaka Nkinsi ya Kuyibuka Lufwa ya Yezu na telefone. Na nima, Sue sonikilaka mpangi yina vandaka kulonguka ti yandi nde: “Mazono nge pesaka mono kikesa mingi kibeni. Mono salaka yonso sambu na kulanda Nkinsi ya Kuyibuka Lufwa ya Yezu mpi Yehowa sadisaka mono kibeni. Mono ke mona ve mpila ya kutendula kiese yina mono ke wa mpi mono me konda bangogo ya kupesa mersi.” Keti nge ke yindula nde Yehowa lenda sadisa nge mpi kana nge ke kutana ti diambu ya mutindu mosi ti Sue?

16. Sambu na nki beto ke ndima kibeni nde Yehowa ta sakumuna bikesa yina beto ta sala sambu na kuvukana na Nkinsi ya Kuyibuka Lufwa ya Yezu? (Baroma 8:31, 32)

¹⁶ Yehowa ke sepelaka mingi kibeni ti bikesa yina beto ke salaka sambu na kuyibuka lufwa ya Yezu. Beto ke ndima kibeni nde yandi ta sakumuna beto kana beto ke monisa kibeni ntonda sambu na mambu yina yandi me salaka sambu na beto. (Tanga Baroma 8:31, 32.) Beto fwete yibuka lufwa ya Yezu mvula yai mpi beto fwete sala mingi sambu na Yehowa na nsungi ya Nkinsi ya Kuyibuka Lufwa ya Yezu.