Beto lenda mona nde beto kele ve ti kima ya kusala ntangu nduku na beto mosi ke bela maladi ya kuniokwama na mabanza. Kansi beto lenda monisa nde beto ke zolaka yandi mpi kele ti nzala ya kusadisa yandi na kunwana ti maladi yina yandi ke bela. Inki mutindu?

“[Nge] fwete wa nswalu.”​—YAKOBO 1:19.

Mutindu ya kuluta mbote ya kusadisa nduku na nge kele ya kuwidikila yandi ntangu yandi ke tuba. Yo kele mfunu ve na kupesa yandi mvutu na mambu yonso yina yandi ke tuba. Monisa nde nge ke tula dikebi na mambu yina yandi ke tuba. Sosa kubakisa yandi mpi kuditula na kisika na yandi. Kuvila ve nde yandi lenda tuba mambu yina yandi kanaka ve kutuba mpi na nima yandi kudiyangisa sambu na yo.​—Yobi 6:2, 3.

‘Tuba na mutindu ya ke lembika.’​—1 BATESALONIKA 5:14.

Nduku na nge lenda kudiyangisa to kudimona kukonda mfunu. Kana nge ke monisa yandi nde nge ke kudiyangisaka sambu na yandi, nge ta pesa yandi kikesa mpi ta lembika yandi, ata nge ke zaba ve mpenza mambu ya kutuba.

“Nduku ya kieleka ke zolaka konso ntangu.”​—BINGANA 17:17.

Pesa yandi lusadisu yina yandi kele na yo mfunu. Na kisika ya kuyindula mutindu ya kusadisa yandi, yula yandi mosi mambu yina nge lenda sala. Kana nduku na nge ke kuka ve kusonga nge mambu yina yandi kele na yo mfunu, meka kusonga yandi  mambu ya beno lenda sala beno zole, mu mbandu kukwenda kutambula. To nge lenda sadisa yandi na kusala zandu, kutula bunkete to bisalu ya nkaka.​—Bagalatia 6:2.

“Vanda ntima-nda.”​—1 BATESALONIKA 5:14.

Bantangu ya nkaka nduku na nge lenda zola ve kutuba. Songa yandi nde nge ta vanda na kiese ya kuwidikila yandi ntangu yandi ta zola kutuba. Sambu nduku na nge ke bela, yandi lenda sala to kutuba mambu yina ta pesa nge mpasi. Yandi lenda zola diaka ve kusala mambu ya beno zolaka kusala ti yandi to yandi lenda kuma makasi-makasi. Vanda ntima-nda mpi kuditula na kisika na yandi ntangu nge ke sadisa yandi.​—Bingana 18:24.

“Mono ke salaka yonso sambu na kuvanda nduku yina yandi lenda tudila ntima. Ata mono lenda manisa ve bampasi na yandi, mono ke salaka bikesa sambu na kutula dikebi na mambu yina yandi ke tuba. Bantangu ya nkaka yandi ke vandaka kaka na mfunu nde muntu mosi kuwidikila yandi sambu yandi kudiwa mbote.”​—Mpangi-nkento Farrah, a yina nduku na yandi ya nkento ke belaka maladi yina ke salaka nde muntu kuwa ve nzala ya kudia mpi maladi ya kuniokwama na mabanza.

“Nduku na mono mosi ya nkento ke vandaka mawete mpi ke pesaka mono kikesa. Kilumbu mosi, yandi bingisaka mono na nzo na yandi sambu na kudia. Yandi monisilaka mono zola mpi yo vandaka ve mpasi nde mono songa yandi mutindu mono vandaka kudiwa. Yo pesaka mono kibeni kikesa!”​—Ha-eun, yina ke belaka maladi ya basusi.

“Kuvanda ntima-nda kele mfunu mingi. Kana nkento na mono kusala kima mosi yina me pesa mono makasi, mono ke yibukaka nde yo kele sambu na maladi na yandi kansi yandi me sala yo ve ti luzolo. Yo ke sadisaka mono na kukuma ve makasi-makasi mpi na kuditula na kisika na yandi.”​—Jacob, yina nkento na yandi ke belaka maladi ya kuniokwama na mabanza.

“Nkento na mono ke sadisaka mono mpenza mpi yandi ke pesaka mono kikesa. Kana basusi me lutila mono, yandi ke pusaka mono ve na kusala kima yina mono ke zola ve. Yo ke tendula nde bantangu ya nkaka yandi ke salaka ve mambu yina yandi ke zolaka kusala. Mono ke zolaka yandi mingi sambu yandi ke salaka bibansa mpi yandi ke vandaka ti kikalulu ya kukaba.”​—Enrico, yina ke belaka maladi ya basusi.