Inki Mambu Bantu Ke Tubaka na Yina Me Tala Kusamba Nzambi?
MARÍA ke tuba nde: “Kana mono ke samba, mono ke waka bonso Nzambi kele na lweka na mono, yandi me simba diboko na mono mpi ke twadisa mono ntangu mono me vila nzila.”
RAÚL ke tuba nde: “Nkento na mono belaka maladi ya kansere mpi na nima ya bamvula 13 yandi fwaka. Mono vandaka ve kuvila kusamba Nzambi konso kilumbu mpi mono vandaka kundima nde yandi vandaka kuwa kisambu na mono na ntangu ya mpasi mpi mono kudiwaka na ngemba.”
ARNE ke tuba nde: “Kisambu kele dikabu ya kitoko yina Nzambi me pesaka bantu.”
María, Raúl, Arne mpi bantu mingi ya nkaka ke ndimaka nde kisambu kele dikabu mosi ya mfunu mingi. Bo ke ndimaka nde na nzila ya kisambu, bo lenda solula ti Nzambi, bo lenda pesa yandi mersi mpi bo lenda lomba yandi lusadisu. Bo ke ndimaka kibeni nde mambu yai ya Biblia ke tubaka na yina me tala kusamba Nzambi kele ya kieleka. Yo ke tubaka nde: “Beto ke tulaka ntima sambu na yandi nde, konso kima yina beto ke lomba na kuwakana ti luzolo na yandi, yandi ke waka beto.”—1 Yoane 5:14.
Kansi bantu mingi ke ndimaka ve mambu yina Biblia ke tubaka sambu na kisambu. Steve ke tuba mutindu yandi kudiwaka na yina me tala kisambu nde: “Ntangu mono vandaka ti bamvula 17, banduku na mono tatu fwaka na ba-aksida zole ya kuswaswana. Mosi ya bakala fwaka na aksida ya kamio mpi bayina ya nkaka zole ya bankento fwaka na masa.” Inki Steve salaka? Yandi ke tuba nde: “Mono sambaka Nzambi sambu na kuzaba kikuma yina mambu yango salamaka. Kansi mono zwaka ve mvutu. Yo yina mono kudiyulaka nde ‘Inki kele mfunu ya kisambu?’” Bantu mingi me zwaka ve bamvutu na bisambu na bo, yo yina bo ke monaka ve mfunu ya kulanda kusamba.
Kele mpi ti bikuma ya nkaka yina ke salaka nde bantu ya nkaka kumona nde kisambu ke sadisaka bo ve. Bantu ya nkaka ke tubaka nde Nzambi ke zabaka dezia mambu yonso, yandi ke zabaka bima yina beto kele ti yo mfunu mpi bampasi na beto. Yo yina, yo kele ve mfunu nde beto songa yandi yo.
Bantu ya nkaka ke tubaka nde Nzambi ke waka ve bisambu na bo sambu na bifu yina bo salaka na bilumbu me luta. Jenny ke tuba nde: “Diambu ya mpasi mingi yina ke yangisaka mono kele nde, mono ke kudimonaka ve mfunu. Mono me salaka mambu yina ke yangisaka mono tii bubu, yo yina mono ke tubaka nde Nzambi lenda wa ve bisambu na mono.”
Inki mutindu nge ke tadilaka kisambu? Kana nge me vandaka dezia ti bangindu ya mutindu mosi to badute na yina me tala kisambu, nge lenda baka kikesa na bamvutu ya mbote yina Biblia ke pesa. Nge lenda tula ntima na mambu yina Biblia ke tubaka na yina me tala kisambu. * Yo lenda sadisa nge na kuzwa bamvutu na bangiufula yai:
-
Keti Nzambi ke waka kibeni bisambu na beto?
-
Sambu na nki Nzambi ke pesaka ve mvutu na bisambu ya nkaka?
-
Inki mutindu nge lenda samba sambu Nzambi kuwa bisambu na nge?
-
Inki mutindu kisambu lenda sadisa nge?
^ par. 9 Biblia kele ti bisambu ya bansadi mingi ya Nzambi ya ntangu ya ntama mpi ya Yezu Kristu. Masonuku ya Kiebreo yina bantu mingi ke bingaka nde Kuwakana ya Ntama kele ti bisambu kuluta 150.
Nge Lenda Sepela Mpi Ti
BANGIUFULA YINA BALEKE KE KUDIYULAKA
Sambu na Nki Mono Fwete Samba?
Keti kisambu ke sadisaka kaka na kudiwa mbote to yo kele mpenza mfunu?
