Salomo, tata ya Rehoboami, vandaka ntotila ya Izraele bamvula 40. (1 Bantotila 11:42) Ntangu Salomo fwaka, Rehoboami katukaka na Yeruzalemi mpi kwendaka na Shekemi sambu na kukuma ntotila. (2 Bansangu 10:1) Keti yandi waka boma ya kukuma ntotila na nima ya Salomo? Salomo zabanaka sambu na mayele na yandi ya mingi. Ntangu fioti na nima, yo lombaka nde Rehoboami kumonisa mayele ya kufwana sambu na kuyidika diambu mosi ya mpasi.

Bantu ya Izraele vandaka kuniokwama mpi bo tindaka bantu na kusonga Rehoboami mambu yina bo zolaka nde yandi sala: “Tata na nge kumisaka vangu na beto kizitu. Kansi kana nge kumisa pete kisalu ya ngolo ya tata na nge mpi nge fiotuna kizitu ya vangu yina yandi tulaka na zulu na beto, beto ta sadila nge.”—2 Bansangu 10:3, 4.

Yo vandaka mpasi sambu Rehoboami kubaka lukanu. Sambu kana yandi ndima mambu yina bantu ke zola, yandi ti dibuta na yandi mpi bantu ya nkaka ya nzo na yandi ta vanda diaka ve ti bima mingi ya mbote yina bo vandaka ti yo. Kansi kana yandi buya mambu yina bantu ke zola, bo ta telemina luyalu na yandi. Inki Rehoboami salaka? Yandi solulaka ntete ti bambuta yina sadisaka tata na yandi. Bo songaka yandi na kundima mambu yina bantu ke zola. Kansi na nima Rehoboami solulaka ti bantu yina vandaka mvula mosi ti yandi, yandi bakaka lukanu ya kusadila bantu mambu na nku. Yandi songaka bo nde: “Mono ta kumisa vangu na beno kizitu mingi, mpi mono ta yika yo. Tata na mono pesaka beno ndola ti bafimbu, kansi mono ta sala yo ti bafimbu ya bansende.”—2 Bansangu 10:6-14.

Inki dilongi beto lenda baka? Bubu yai, beto kele ti bambuta mingi yina me sadilaka Yehowa bamvula mingi mpi bo lenda sadisa beto na kubaka balukanu ya mbote. Bika beto vanda mayele mpi beto wila bo.—Yobi 12:12.

Rehoboami vukisaka basoda na yandi sambu na kunwanisa makanda yina teleminaka luyalu na  yandi. Kansi Yehowa tindaka profete Shemaya na kuzabisa bo nde: “Beno fwete kwenda ve kunwana ti bampangi na beno bantu ya Izraele. Konso muntu fwete vutuka na nzo na yandi, sambu mono muntu me sala nde diambu yai kusalama.”—1 Bantotila 12:21-24. *

Keti yo vandaka pete sambu Rehoboami kulemfukila Yehowa? Inki mutindu bantu ta tadila ntotila yai ya mpa ya songaka bantu nde yandi ta pesa bo ndola “ti bafimbu ya bansende,” kansi ntangu yai yandi ta pesa bo diaka ve ndola? (Fwanisa ti 2 Bansangu 13:7.) Ata bantu lendaka kuyindula mambu ya mutindu na mutindu, ntotila ti basoda na yandi “lemfukilaka ndinga ya Yehowa mpi bo vutukaka na banzo na bo, mutindu Yehowa songaka bo.”

Inki dilongi beto lenda baka? Yo kele mfunu na kulemfukila Nzambi ntangu yonso, ata bantu ke seka beto. Nzambi ta landa kusakumuna beto kana beto ke lemfukila yandi.—Kulonga 28:2.

Keti Nzambi sakumunaka bulemfu ya Rehoboami? Rehoboami landaka kuyala dikanda ya Yuda mpi ya Benyamini mpi yandi tungaka bambanza ya mpa na makanda yai. Yandi kumisaka mpi bambanza ya nkaka “ngolo mingi kibeni.” (2 Bansangu 11:5-12) Kima ya ke benda dikebi kele nde, yandi zitisaka bansiku ya Yehowa kaka na ntangu fioti. Sambu kimfumu ya bikanda kumi kumaka kusambila biteki, bantu mingi ya makanda yai kwendaka na Yeruzalemi sambu na kupesa maboko na Rehoboami mpi na lusambu ya kieleka. (2 Bansangu 11:16, 17) Yo yina kimfumu ya Rehoboami kumaka ngolo sambu yandi lemfukilaka Yehowa.

Ntangu kimfumu ya Rehoboami kumaka ngolo, yandi salaka diambu mosi ya mbi. Yandi zitisaka diaka ve nsiku ya Yehowa mpi kumaka kusambila banzambi ya luvunu. Sambu na nki? Keti mama na yandi yina vandaka muntu ya Amoni pusaka yandi na kuzitisa ve nsiku ya Nzambi? (1 Bantotila 14:21) Beto me zaba ve, kansi bantu landaka mbandu na yandi ya mbi. Yo yina Yehowa pesaka Shishaki, ntotila ya Ezipte nzila ya kubotula bambanza mingi ya kimfumu ya Yuda. Mambu yai salamaka ata Rehoboami kumisaka bambanza yango ngolo mingi!—1 Bantotila 14:22-24; 2 Bansangu 12:1-4.

Mambu kumaka diaka mbi mingi ntangu Shishaki ti basoda na yandi kwendaka kunwanisa Yeruzalemi, kisika Rehoboami vandaka kuyala. Yo yina, profete Shemaya zabisaka Rehoboami mpi bantu yina vandaka kusala ti yandi nsangu yai ya katukaka na Nzambi: “Beno me yambula mono, yo yina mono mpi me yambula beno na maboko ya Shishaki.” Keti Rehoboami ndimaka disipline ya Nzambi? Ee! Biblia ke tuba nde: “Bamfumu ya Izraele ti ntotila kudikulumusaka mpi tubaka nde: ‘Yehowa kele muntu ya lunungu.’” Yo yina, Yehowa gulusaka Rehoboami mpi bo fwaka diaka ve Yeruzalemi.—2 Bansangu 12:5-7, 12.

Na nima Rehoboami landaka kuyala na Yuda. Na ntwala nde Rehoboami kufwa, yandi pesaka bana na yandi makabu mingi, ziku sambu bo telemina ve Abiya, mpangi na bo yina ta yinga yandi. (2 Bansangu 11:21-23) Mpidina, Rehoboami salaka mambu na mayele yonso kuluta ntangu yandi vandaka toko.

Ata Rehoboami salaka mwa mambu ya mbote, Biblia ke tuba nde: “Yandi salaka mambu ya mbi” na luyalu na yandi. Sambu na nki? Sambu “yandi bakaka ve lukanu na ntima na yandi ya kusosa Yehowa.” Yo yina Yehowa sepelaka ve ti yandi.—2 Bansangu 12:14.

Luzingu ya Rehoboami ke longa beto nki? Yandi vandaka kulemfukila Nzambi bantangu ya nkaka. Diaka yandi sadilaka bansadi ya Yehowa mwa mambu ya mbote. Kansi yandi salaka ve kinduku ya ngolo ti Yehowa mpi yandi vandaka ve ti mpusa ya ngolo ya kusepedisa Yehowa. Yo yina, yandi yambulaka kusala mambu ya mbote mpi kumaka kusambila banzambi ya luvunu. Nge lenda kudiyula nde: ‘Ntangu Rehoboami ndimaka nde  Yehowa kusungika yandi, keti yandi waka kibeni mpasi sambu na bifu na yandi mpi zolaka kusepedisa Nzambi? To keti yo vandaka kaka sambu bantu songaka yandi nde yandi fwete sala mutindu yina?’ (2 Bansangu 11:3, 4; 12:6) Na nima, yandi salaka diaka mambu ya mbi. Yandi swaswanaka kibeni ti nkaka na yandi Davidi! Ya kieleka Davidi salaka masumu ya nene. Kansi yandi balulaka ntima na masonga yonso. Yandi zolaka Yehowa mpi lusambu ya kieleka luzingu na yandi ya mvimba.—1 Bantotila 14:8; Nkunga 51:1, 17; 63:1.

Disolo yai lenda longa beto mambu mingi. Yo kele mbote kana bantu ke lungisa bampusa ya kinsuni ya mabuta na bo mpi ke sadila bantu ya nkaka mambu ya mbote. Kansi sambu Yehowa kundima beto, beto fwete sambila yandi na mutindu yina ke sepedisaka yandi mpi kusala kinduku ya ngolo ti yandi.

Sambu na kusala yo, beto fwete zola Yehowa mingi mpenza. Mutindu beto ke yikaka bankuni sambu tiya kulanda kupela, kulonguka Ndinga ya Nzambi, kuyindula mingi mambu ya beto ke tanga mpi kusamba mbala na mbala ke kumisaka ngolo zola na beto sambu na Nzambi. (Nkunga 1:2; Baroma 12:12) Zola ya mutindu yai ta pusa beto na kusepedisa Yehowa na mambu yonso ya beto ke sala. Yo ta pusa beto mpi na kuwa mpasi kibeni ntangu beto me sala bifu mpi na kulomba Yehowa na kulolula beto. Mpidina, beto ta vanda ve bonso Rehoboami kansi beto ta bikala ya kwikama na lusambu ya kieleka.—Yude 20, 21.