Keti nge tangaka na dikebi yonso banimero ya Nzozulu ya Nkengi ya me katuka kubasika? Meka kupesa mvutu na bangiufula yai:

Inki mutindu bankengi ya nziunga mpi bankulutu fwete tadila bantuma yina dibundu ya Nzambi ke pesaka?

Bo fwete lemfuka nswalu. Bo fwete kudiyula nde: ‘Keti mono ke siamisaka bampangi na kuvanda ya kwikama na Yehowa? Keti mono ke lemfukaka nswalu na bantuma yina organizasio ya Nzambi ke pesaka?’—w16.11, lut. 11.

Inki ntangu Bakristu ya kieleka kumaka bampika ya Babilone ya nene?

Bo kumaka bampika ntangu fioti na nima ya lufwa ya bantumwa. Na ntangu yina, balongi ya luvunu basikaka. Mabundu mpi baluyalu pesaka mabundu ya luvunu maboko mpi bo sosaka kubuyisa Bakristu yina bo me tulaka mafuta na kusala mambu na bo ya lusambu. Kansi bamvula mingi na ntwala ya 1914, Bakristu yina bo me tulaka mafuta yantikaka kubasika na kimpika.—w16.11, balut. 23-25.

Sambu na nki kisalu ya Lefèvre d’Étaples vandaka mfunu mingi?

Na bamvu 1520, Lefèvre balulaka Biblia na Kifalansa sambu bantu mingi kutanga yo. Bantendula ya baverse ya Biblia yina Lefèvre pesaka vandaka ti bupusi ya ngolo na luzingu ya Martin Luther, William Tyndale, mpi John Calvin.—wp16.6, balut. 10-12.

Inki luswaswanu kele na kati ya “kutula mabanza na banzala ya nitu” mpi “kutula mabanza na mpeve”? (Bar. 8:6)

Muntu yina ke tulaka mabanza na banzala ya nitu ke kudipesaka na banzala na yandi ya nitu mpi na bampusa ya mbi ya nitu. Yandi ke tubilaka mingi mpi ke kumisaka mingi mambu ya kinsuni. Kansi muntu yina ke tulaka mabanza na mpeve ke tulaka dikebi mingi na mambu mpi bangindu ya Nzambi. Muntu ya mutindu yai ke bikaka nde mpeve santu kutwadisa yandi. Kutula mabanza na banzala ya nitu ke nataka na lufwa, kansi kutula mabanza na mpeve ke tendula luzingu mpi ngemba.—w16.12, balut. 15-17.

Inki nge lenda sala sambu na kulembika basusi?

Tula mambu ya kuluta mfunu na kisika ya ntete, vanda ti bukati-kati, bumba ntangu ya kupema konso kilumbu, sepela na bima yina Yehowa me gangaka, vanda ti kikalulu ya kusekisa bantu, salaka bangalasisi mbala na mbala mpi lalaka mingi.—w16.12, balut. 22-23.

Inki mutindu “Nzambi nataka Enoki kisika ya nkaka sambu yandi mona ve lufwa”? (Baeb. 11:5)

Yo ke monana nde na mawete yonso, Nzambi katulaka Enoki na luzingu mpi nataka yandi na lufwa sambu Enoki kuwa ve mpasi ya lufwa.—wp17.1, balut. 12-13.

Sambu na nki kuzitisa bandilu kele mfunu?

Kuzaba bandilu ke tendula kuzaba mambu yina beto lenda sala mpi yina beto ta kuka ve kusala. Beto fwete zaba nde mambu yina beto ke sala lenda pesa bantu ya nkaka kiese to mpasi mpi beto fwete kudimona ve mfunu mingi kuluta bantu ya nkaka.—w17.01, lut. 18.

Inki ke ndimisa beto nde Nzambi sadisaka nto-kimvuka na mvu-nkama ya ntete mpi nde yandi ke sadisa Nto-Kimvuka na bilumbu na beto?

Mpeve santu sadisaka nto-kimvuka na kubakisa bakieleka ya Biblia. Bawanzio sadisaka nto-kimvuka na kutwadisa kisalu ya kusamuna, mpi bampangi ya nto-kimvuka sadilaka Masonuku sambu na kutwadisa bampangi. Mambu yai ke salama mpi na Nto-Kimvuka bubu yai.—w17.02, balut. 26-28.

Inki ke pusaka beto na kubaka nkudulu na valere?

Mambu iya: Muntu yina pesaka yo, kikuma yina yandi pesaka yo, bibansa yina yandi salaka sambu na kupesa yo, mpi mpusa ya kieleka yina yo lungisaka. Beto fwete yindula mingi mambu yai.—wp17.2, balut. 4-5.

Keti beto lenda soba lukanu mosi yina beto bakaka?

Beto fwete lungisa mambu yina beto me tuba. Kansi, bantangu ya nkaka beto lenda tadila diaka lukanu ya beto bakaka. Ntangu bantu ya Ninive balulaka ntima, Nzambi sobaka lukanu yina yandi bakaka sambu na bo. Mambu ya nkaka ya luzingu lenda soba to beto lenda zaba mambu ya nkaka yina beto zabaka ve, yo lenda sala mpi nde beto soba lukanu yina beto bakaka.—w17.03, balut. 16-17.

Sambu na nki kutuba mambu ya mbi kele kigonsa?

Yo lenda basisa mavwanga to nkutu kubebisa kibeni mambu. Ata bo me sala beto mbi to ve, kutuba mambu ya mbi sambu na kulwadisa bantu ta yidika ve mambu.—w17.04, lut. 21.