1-2. (a) Inki mutindu Yehowa vandaka kusolula ti bantu? (b) Inki beto ta longuka na disolo yai?

YEHOWA ke zolaka kusolula ti bantu. Na ntangu ya ntama, yandi sadilaka baprofete, bawanzio mpi Mwana na yandi, Yezu Kristu sambu na kuzabisa bantu mabanza na yandi. (Amo. 3:7; Bag. 3:19; Kus. 1:1) Bubu yai, yandi ke solulaka ti bantu na nzila ya Biblia, Ndinga na yandi. Yandi me pesaka beto Biblia sambu beto longuka mabanza na yandi mpi beto bakisa banzila na yandi.

² Ntangu Yezu vandaka na ntoto, Yehowa tubaka mbala tatu tuka na zulu. Beto tadila mambu yina Yehowa tubaka, malongi yina beto lenda baka na mambu yango mpi mutindu beto lenda bakila yo mambote.

3. Mutindu Marko 1:9-11 ke monisa yo, nki mambu Yehowa tubaka ntangu Yezu bakaka mbotika mpi bakieleka yai ke ndimisa beto nki?

³ Marko 1:9-11 ke monisa mbala ya ntete yina Yehowa tubaka tuka na zulu. (Tanga.) Yandi tubaka nde: “Nge kele Mwana na mono, ya mono ke zolaka mingi; mono me ndima nge.” Bangogo yai simbaka kibeni ntima ya Yezu ntangu Tata na yandi tubaka nde yandi ke zolaka Yezu mingi mpi ke tudilaka yandi ntima! Mambu yai ya Yehowa tubaka ke ndimisa beto bakieleka tatu ya mfunu sambu na Yezu. Ya ntete, Yezu kele Mwana na yandi. Ya zole, Yehowa ke zolaka Mwana na yandi. Ya tatu, Yehowa ke ndimaka Mwana na yandi. Beto tadila mbote-mbote konso kieleka.

4. Inki kinduku Nzambi salaka ti Yezu ntangu yandi bakaka mbotika?

⁴ “Nge kele Mwana na mono.” Na bangogo yai, Yehowa ke monisa nde Yezu, Mwana yina yandi ke zolaka mingi me sala  diaka kinduku ya ngolo ti yandi. Ntangu Yezu vandaka na zulu, yandi vandaka mwana ya kimpeve ya Nzambi. Ntangu yandi bakaka mbotika, Yehowa tulaka yandi mafuta na mpeve santu. Na ntangu yina, Nzambi monisaka nde Yezu, Mwana yina bo me tula mafuta kumaka ti kivuvu ya kuvutuka na zulu sambu na kukuma Ntotila mpi Nganga-Nzambi ya Nene yina Nzambi ponaka. (Luka 1:31-33; Baeb. 1:8, 9; 2:17) Yo yina, ntangu Yezu bakaka mbotika, Tata na yandi vandaka ti kikuma ya mbote ya kutuba nde: “Nge kele Mwana na mono.”—Luka 3:22.

5. Inki mutindu beto lenda zola mpi kupesa bantu ya nkaka kikesa bonso Yehowa?

⁵ “Nge kele Mwana . . . ya mono ke zolaka mingi.” Mutindu Yehowa ke zolaka mpi ke ndimaka beto ke longa beto na kusosa mabaku ya kupesa bampangi ya nkaka kikesa. (Yoa. 5:20) Beto ke waka kiese ntangu muntu mosi ya beto me sadisa ke zola beto mpi ke sikisa beto sambu na mambu ya mbote ya beto me sala. Mutindu mosi, bampangi mpi bantu ya dibuta na beto ke sepelaka nde beto zola bo mpi beto pesa bo kikesa. Ntangu beto ke sikisaka bampangi ya nkaka, beto ke kumisaka lukwikilu na bo ngolo mpi ke sadisaka bo na kusadila Yehowa na kwikama yonso. Mingi-mingi bibuti fwete pesa bana na bo kikesa. Kana bibuti ke sikisa bana na bo na masonga yonso mpi ke monisila bo zola, bo ta sadisa bana na bo na kuyela mbote.

6. Sambu na nki beto fwete tudila Yezu Kristu ntima?

⁶ “Mono me ndima nge.” Bangogo yai ke monisa nde Yehowa tulaka ntima nde Yezu ta sala luzolo na yandi na kwikama yonso. Sambu Yehowa ke tudilaka Mwana na yandi ntima, beto mpi fwete tula ntima ya mvimba nde Yezu ta lungisa balusilu yonso ya Yehowa. (2 Bak. 1:20) Kana beto ke yindula mingi  mbandu ya Yezu, beto ta kumisa ngolo lukanu na beto ya kuzaba yandi mpi ya kulanda mbandu na yandi. Mutindu Yehowa ke tudilaka Yezu ntima, yandi ke tulaka mpi ntima nde bansadi na yandi ta landa mbandu ya Mwana na yandi.—1 Pie. 2:21.

7. Na kutadila Matayo 17:1-5, na nki dibaku Yehowa tubaka tuka na zulu mpi nki yandi tubaka?

⁷ Tanga Matayo 17:1-5. Mbala ya zole yina Yehowa tubaka tuka na zulu vandaka ntangu Yezu ‘kitukaka.’ Yezu lombaka Piere, Yakobo ti Yoane na kukwenda na zulu ya ngumba. Ntangu bo vandaka kuna, bo monaka mbona-meso mosi ya kuyituka. Luse mpi bilele ya Yezu yantikaka kusema. Bantu zole ya kifwani, Moize ti Eliya, yantikaka kutubila lufwa mpi lufutumuku ya Yezu. Ata bantumwa yina tatu “vandaka na mpongi ya ngolo,” bo monaka mbona-meso yai ya kuyituka ntangu bo telamaka. (Luka 9:29-32) Na nima, dituti fikaka bo mpi bo waka ndinga ya Nzambi na matuti. Mutindu Yehowa tubaka ntangu Yezu bakaka mbotika nde: “Yai Mwana na mono, ya mono ke zolaka mingi, yina mono me ndima” monisaka nde yandi ndimaka mpi zolaka Mwana na yandi. Kansi na mbala yai, Yehowa yikaka nde: “Beno wila yandi.”

8. Inki mutindu mbona-meso yina sadisaka Yezu mpi balongoki na yandi?

⁸ Mbona-meso monisaka nkembo ti kiyeka yina Yezu ta baka sambu na kuvanda Ntotila ya Kimfumu ya Nzambi. Ntembe kele ve nde yo pesaka Kristu kikesa mpi yo sadisaka yandi na kukanga ntima na bampasi mpi na lufwa ya mpasi yina vandaka na ntwala. Mbona-meso yina kumisaka mpi ngolo lukwikilu ya balongoki mpi sadisaka bo na kuyilama sambu na bampasi yina bo ta kutana ti yo mpi kisalu ya ngolo yina bo ta sala. Kiteso ya bamvula 30 na nima, ntumwa Piere tubilaka diaka mbona-meso yina mpi monisaka nde yandi vandaka kaka kuyibuka yo.—2 Pie. 1:16-18.

9. Inki ndongisila ya mfunu Yezu pesaka balongoki na yandi?

⁹ “Beno wila yandi.” Yehowa monisaka pwelele nde yandi ke zolaka nde beto wila mpi beto lemfukila Mwana na yandi. Inki Yezu tubaka ntangu yandi vandaka na ntoto? Yandi tubaka mambu mingi ya mfunu yina beto fwete sala. Mu mbandu, na zola yonso yandi longaka balongoki na yandi mutindu ya kulonga nsangu ya mbote mpi yibukisaka bo mbala na mbala na kukengila. (Mat. 24:42; 28:19, 20) Diaka, yandi siamisaka bo na kusala ngolo mpi na kuyambula ve. (Luka 13:24) Yezu monisaka mpi nde balongoki na yandi fwete zolana, kubikala na bumosi mpi kulemfuka na bansiku na yandi. (Yoa. 15:10, 12, 13) Ndongisila yai ya Yezu vandaka mfunu mingi kibeni! Tii bubu yai, yo kele kaka mfunu.

10-11. Inki mutindu beto lenda monisa nde beto ke widikilaka Yezu?

¹⁰ Yezu tubaka nde: “Konso muntu yina kele na lweka ya kieleka ke waka ndinga na mono.” (Yoa. 18:37) Beto ke waka ndinga na yandi ntangu beto ‘ke landaka kukanga-ntima na mambu ya bantu ya nkaka mpi ke landaka kulolulana na ntima ya mvimba.’ (Bakol. 3:13; Luka 17:3, 4) Beto ke monisaka mpi nde beto ke wilaka yandi ntangu beto ke longaka nsangu ya mbote na kikesa yonso “na bantangu ya mbote mpi na bantangu ya mpasi.”—2 Tim. 4:2.

¹¹ Yezu tubaka nde: “Mameme na mono ke waka ndinga na mono.” (Yoa. 10:27) Balongoki ya Kristu ke monisaka nde bo ke wilaka Yezu ntangu bo ke tulaka dikebi na mambu yina yandi ke tubaka mpi ke sadilaka yo. Bo ke kudiyangisaka ve mingi sambu na “basusi ya  luzingu.” (Luka 21:34) Sambu na bo, bansiku ya Yezu ke bakaka kisika ya ntete, ata yo kele mpasi. Bampangi mingi ke kangaka ntima na bampasi ya ngolo bonso mbangika, kinsukami ya ngolo mpi bisumbula ya lugangu. Ata bo ke kutana ti bampasi yai yonso, bo ke bikalaka kaka ya kwikama na Yehowa. Yezu ke sila bo nde: “Muntu yina kele ti bansiku na mono mpi ke zitisaka yo, yandi muntu ke zolaka mono. Ebuna muntu yina ke zolaka mono, Tata na mono ta zola yandi.”—Yoa. 14:21.

12. Inki kele mutindu ya nkaka ya beto ke wilaka Yezu?

¹² Ntangu beto ke lemfukila bantu yina Yezu me ponaka sambu na kutwadisa beto, beto ke monisaka mpi nde beto ke wilaka yandi. (Baeb. 13:7, 17) Dibundu ya Yehowa me sala bansoba mingi na bamvula yai na mutindu ya kusadila bisadilu mpi bametode ya mpa na kisalu ya kusamuna. Bansoba ya nkaka me tadila lukutakanu ya kati-kati ya mposo, kisalu ya kutunga, ya kuyidika mpi ya kutanina Banzo ya Kimfumu. Beto ke monisaka kibeni ntonda na lutwadisu yai ya mbote mpi ya zola! Beto ke ndima nde Yehowa ta sakumuna bikesa na beto ya kuzitisa lutwadisu yina dibundu na yandi ke pesa.

13. Inki mambote beto ke bakaka ntangu beto ke wilaka Yezu?

¹³ Beto ke bakaka mambote ntangu beto ke waka mambu yonso yina Yezu longaka. Yezu silaka balongoki na yandi nde malongi na yandi ta pesa bo kikesa. Yandi tubaka nde: “Beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.” (Mat. 11:28-30) Baevanzile iya yina kele na Ndinga ya Nzambi ya ke tubila luzingu mpi kisalu ya Yezu ya kusamuna, ke pesa beto kikesa, ke kumisa kimpeve na beto ngolo mpi ke pesa beto mayele. (Nk. 19:7; 23:3) Yezu tubaka nde: “Kiese na bantu yina ke waka ndinga ya Nzambi mpi ke landaka yo!”—Luka 11:28.

14-15. (a) Na kutadila Yoane 12:27, 28 na nki dibaku Yehowa tubaka na mbala ya tatu tuka na zulu? (b) Inki mutindu bangogo ya Yehowa siamisaka mpi pesaka Yezu kikesa?

¹⁴ Tanga Yoane 12:27, 28. Evanzile ya Yoane ke tubila mbala ya tatu yina Yehowa tubaka tuka na zulu. Yezu vandaka na Yeruzalemi sambu na kuta nkinsi ya Paki bilumbu fioti na ntwala ya lufwa na yandi. Yandi tubaka nde: “Mono me kuma kisaka-saka.” Na nima yandi  sambaka nde: “Tata, pesa zina na nge nkembo.” Tata na yandi pesaka mvutu tuka na zulu nde: “Mono me pesaka yo nkembo mpi mono ta pesa yo diaka nkembo.”

¹⁵ Yezu kumaka kisaka-saka sambu na mukumba ya nene yina yandi vandaka na yo ya kubikala ya kwikama na Yehowa. Yezu zabaka nde bo ta niokula yandi, ta bula yandi fimbu mpi nde yandi ta fwa lufwa ya mpasi. (Mat. 26:38) Diambu ya kuluta mfunu kele nde Yezu zolaka kupesa zina ya Tata na yandi nkembo. Bo fundaka Yezu nde yandi vandaka kuvweza mpi yandi kudiyangisaka nde lufwa na yandi kufingisa ve zina ya Nzambi. Ntembe kele ve nde bangogo ya Yehowa pesaka Yezu kikesa kibeni! Yandi ndimaka kibeni nde yandi ta pesa zina ya Yehowa nkembo. Yo fwete vanda nde bangogo ya Tata na yandi siamisaka Yezu mpi pesaka yandi kikesa ya kukanga ntima na mambu yina yandi ta kutana ti yo. Yo ke monana nde Yezu mpamba muntu bakisaka mambu yina Tata na yandi tubaka, ata mpidina Yehowa zolaka nde bo sonika yo sambu na beto.—Yoa. 12:29, 30.

16. Sambu na nki bantangu ya nkaka beto ke kudiyangisaka mutindu bantu ke fingisaka zina ya Nzambi?

¹⁶ Bonso Yezu, beto mpi fwete kudiyangisa mutindu bantu ke fingisaka zina ya Yehowa. Ziku bonso Yezu, bantu ke sadilaka beto mambu ya mbi to bambeni ke panzaka bansangu ya luvunu yina lenda yangisa beto. Bansangu yai lenda pesa beto mpasi sambu yo ke fingisa  zina ya Yehowa mpi dibundu na yandi. Kana yo salama, bangogo ya Yehowa ta pesa beto kikesa ya mingi. Beto fwete kudiyangisa ve kuluta ndilu. Beto lenda ndima nde “ngemba ya Nzambi yina me luta mayele yonso ya kubakisa mambu ta tanina bantima na [beto] mpi mabanza na [beto] na nzila ya Kristu Yezu.” (Bafil. 4:6, 7) Yehowa ta landa kupesa zina na yandi nkembo. Na nzila ya Kimfumu na yandi, yandi ta manisa bampasi yonso yina Satana ti nsi-ntoto yai me natilaka bansadi na yandi ya kwikama.—Nk. 94:22, 23; Yez. 65:17.

17. Na kuwakana ti Yezaya 30:21, nki mutindu Yehowa ke tubilaka beto bubu yai?

¹⁷ Yehowa ke landa kutubila beto bubu yai. (Tanga Yezaya 30:21.) Ya kieleka, beto ta wa ve ndinga ya Nzambi tuka na zulu. Kansi, yandi me pesaka beto bantuma na Biblia, Ndinga na yandi. Diaka, mpeve ya Yehowa ke sadisaka “kapita ya kwikama” na kulanda kupesa bansadi na yandi madia. (Luka 12:42) Beto ke bakaka madia yai ya kimpeve na nzila ya mikanda, ya Internet, ya bavideo mpi mikanda ya kuwidikila.

18. Inki mutindu bangogo ya Yehowa ke kumisa lukwikilu na nge ngolo mpi ke pesa nge kikesa?

¹⁸ Bika beto landa na kuyibuka bangogo yina Yehowa tubaka ntangu Mwana na yandi vandaka na ntoto. Bika nde bangogo ya Nzambi yina kele na Biblia kusadisa beto na kutula ntima nde Yehowa ke twadisaka mambu yonso mpi nde yandi ta manisa bampasi yonso yina Satana ti nsi-ntoto na yandi ya mbi me natilaka beto. Bika beto baka lukanu ya kuwidikila na dikebi yonso ndinga ya Yehowa. Kana beto sala yo, beto ta landa kukanga ntima na bampasi yonso yina beto ke kutana ti yo mpi bampasi yina lenda kumina beto. Biblia ke tuba nde: “Beno kele ti mfunu ya kukanga-ntima, sambu na nima ya kusala luzolo ya Nzambi, beno baka kulungana ya lusilu.”—Baeb. 10:36.