Tela beto disolo na nge ya bumwana.

Mono butukaka na Italie na 1943. Mono ti bampangi na mono ya babakala mpi ya bankento, beto yelaka na bwala mosi ya fioti. Kuna papa vandaka kusala bisalu ya bilanga mpi ya mabaya. Bibuti na beto sadisaka beto na kukuma bandimi ya mbote ya Katolika.

Inki pusaka nge na kukuma mumpe?

Ntangu mono vandaka mwana, mono vandaka kusepela kuwa mpila mimpe vandaka kulonga na eglize. Mono vandaka kusepela mingi ti mpila na bo ya kutuba mpi mambu yina bo vandaka kusala na eglize. Yo yina, mono kumaka ti nzala ya kukuma mumpe. Ntangu mono lungisaka bamvula 13, mama sonikisaka mono na ekole mosi (Internat) ya vandaka kupesa bana-babakala formasio sambu bo sala banzo-nkanda ya nene mpi bo kuma mimpe.

Keti beno longukaka mpi Biblia ntangu beno vandaka kubaka formasio?

Mpenza ve. Ntangu mono kumaka ti bamvula 15, longi na mono mosi pesaka mono kopi mosi ya baevanzile ya ke tubilaka masolo ya luzingu mpi kisalu ya Yezu. Mono tangaka mukanda yango mbala mingi. Ntangu mono kumaka ti bamvula 18, mono kwendaka kulonguka na ba-iniversite ya baepisikopo yina Papa yandi mosi vandaka kutwadisa. Mono longukaka Kilatini, Kigreki, istware, filozofi, pisikolozi mpi teolozi. Beto vandaka kuvutukila baverse ya Biblia ya beto kangaka na ntu mpi na Lumingu beto vandaka kulanda lutangu ya Biblia na bamisa. Ata mpidina, beto vandaka kulonguka mpenza ve Biblia.

Ntangu nge kumaka mfumu, keti nge vandaka mpi kulonga?

Mono vandaka kusala kisalu mingi-mingi ya kutwadisa mambu. Ata mpidina, mono vandaka mpi kulonga na baklase bansiku ya lukutakanu ya zole ya nene ya Vatican.

Sambu na nki nge vandaka diaka ve kutudila eglize ntima?

Mambu tatu vandaka kuyangisa mono. Eglize vandaka kudikotisa na politiki. Bo vandaka kukanga meso na mambu ya mbi yina mimpe mpi bandimi ya eglize vandaka kusala. Malongi ya nkaka ya Katolika vandaka ya luvunu. Mu mbandu, nki mpila Nzambi ya zola lendaka kupesa bantu ndola ya mvula na mvula na nima ya lufwa na bo? Diaka, keti Nzambi ke zolaka mpenza nde beto sadila shapele mpi beto vutukila mbala na mbala bisambu? *

Inki nge salaka?

Mono dilaka mpi sambaka Nzambi sambu yandi twadisa mono. Mono sumbaka mpi Biblia mosi (Bible de Jérusalem) ya Katolika yina katukaka kubasika na Italie mpi mu bandaka kutanga yo. Kilumbu mosi na Lumingu na nima ya Misa, ntangu mono vandaka kukatula mvwela na mono, bantu zole kwisaka na seminere. Bo songaka mono nde bo vandaka Bambangi ya Yehowa. Beto solulaka mambu ya Biblia ngunga mosi ti ndambu mpi mambu yina yo ke tubaka sambu na kuzaba dibundu ya kieleka.

Inki sepedisaka nge na bantu yina zole?

Mono sepelaka ti kundima na bo mpi mpila bo vandaka kuzwa kukonda mpasi baverse na Biblia ya Katolika. Na nima, Mario Mbangi ya Yehowa ya nkaka, kumaka kukwisa kutala mono. Yandi vandaka ntima-nda mpi muntu ya kutudila mpenza ntima sambu konso Mposo na suka, yo vanda mvula me noka to ntangu kele mingi, yandi vandaka kubula ngunga ya porte ya seminere na ngunga ya uvwa.

Mimpe ya nkaka vandaka kutadila yo nki mutindu?

Mono vandaka kusonga bo na kukwisa kulanda masolo na beto kansi bo yonso vandaka kubaka kulonguka ya Biblia na nsaka. Kansi mono, yo vandaka kusepedisa mono. Mono vandaka kulonguka mambu ya kitoko, mu mbandu sambu na nki Nzambi ke bikaka mambu ya mbi mpi bampasi. Mambu yai vandaka kuyangisa mono banda ntama.

Keti bamfumu na nge sosaka kubuyisa nge na kulonguka Biblia?

Na 1975, mono kwendaka mbala na mbala na Rome sambu na kusonga bamfumu na mono bangindu na mono. Bo sosaka kusoba bangindu na mono kansi ata muntu mosi ve sadilaka Biblia. Nsuka-nsuka, na Yanuari 9, 1976, mono sonikilaka bo nde mono kele diaka ve mundimi ya Katolika. Bilumbu zole na nima, mono katukaka na seminere. Mono bakaka train sambu na kukwenda na mbala ya ntete na lukutakanu ya Bambangi ya Yehowa. Yo vandaka lukutakanu mosi ya nene yina vukisaka mabundu mingi ya Bambangi ya Yehowa. Kuna, mambu yonso vandaka ve mpila mosi ti yina mono yikamaka kusala ntete! Konso Mbangi ya Yehowa vandaka kutanga baverse na Biblia ntangu bantu ya vandaka kulonga vandaka kutanga yo sambu na kutendula mambu mingi.

Bantu ya dibuta na nge salaka nki?

Bantu mingi ya dibuta na beto teleminaka mono ngolo mpenza. Ata mpidina, bo songaka mono nde mpangi na mono mosi ya bakala vandaka kulonguka Biblia ti Bambangi ya Yehowa na Lombardie na nordi ya Italie. Mono kwendaka kutala yandi mpi kuna, Bambangi ya Yehowa sosilaka mono kisalu mpi kisika ya kuvanda. Kaka na mvula yina, mono bakaka mbotika mpi kumaka Mbangi ya Yehowa.

Keti nge ke kudiyangisaka sambu na lukanu yai?

Ata fioti ve! Nkutu, mono ke kudiwaka mpenza pene-pene ya Nzambi sambu mambu ya mono me zabaka sambu na yandi ke katukaka na Biblia kansi ve na filozofi to na bansiku ya dibundu. Diaka, mono ke longaka bantu ya nkaka ti kundima mpi na masonga yonso.