“Mono vandaka kuyindula ve ata fioti nde mono ta kuka kusadila Yehowa mbote-mbote.” Yina mutindu Gwen, yina katukaka na Angleterre, ke tendula mutindu yandi ke kudiwa na yina me tala kusala na Albanie, kisika mpusa kele mingi. a

 Gwen kele na kati ya Bambangi ya Yehowa mingi yina me kwendaka na Albanie sambu na kusadisa na kuvukisa “bima ya ntalu ya makanda yonso.” (Agai 2:7) Inki ke pusaka bo na kusala yo? Inki bansoba bo salaka sambu na kukwenda kuna? Mpi nki mambu ya mbote me sadisaka bo na kukanga ntima ata bo ke kutana ti bampasi?

 Bansamuni yonso yina me kwisaka kusadisa na Albanie kele ti kima kaka mosi ya ke pusaka bo na kusala yo: Bo ke zolaka Yehowa mpi bo ke zolaka kusadisa bantu na kuzaba yandi.

 Na ntwala ya kukwenda kuna, bo kumaka ntete kusala mingi kisalu ya kulonga, mpi yo sadisaka bo na kununga bampasi ya bantu ke kutanaka ti yo kana bo ke sala na insi ya nzenza. Gwen ke tuba nde: “Mono kumaka ntete kuvukana ti kimvuka mosi ya ndinga ya Albanie na bwala na beto. Na nima, mono kwendaka na lukutakanu mosi ya distrike na Albanie. Mono vutukaka kuna ntangu fioti na nima sambu na kuzaba ndinga yina mbote.”

 Ntangu Manuela vandaka ti bamvula 23, yandi kwendaka kuzinga na provense ya nkaka na bwala na bo Italie sambu na kusadisa dibundu mosi ya fioti. Yandi ke tuba nde: “Mono salaka bamvula iya kuna. Na nima, mono waka nde bo kele ti mfunu ya bansamuni mingi na Albanie. Yo yina, mono kudibongisaka na kusala bonso mupasudi-nzila kuna sambu na mwa bangonda.”

 Federica vandaka ti bamvula nsambwadi ntangu yandi waka rapore ya Albanie na lukutakanu mosi ya distrike. Yandi ke tuba nde: “Mpangi yina vandaka kupesa rapore yango tubaka nde bansamuni ya Albanie vandaka kuyantika kulonguka Biblia ti bantu mingi mpi nde bantu mingi ya ke sepelaka na kieleka ke kwisaka na balukutakanu. Mono yantikaka kusonga bibuti na mono nde mono ke zola kukwenda na Albanie. Bo yitukaka mingi, kansi papa tubaka nde: ‘Samba sambu na yo, mpi kana yo kele luzolo ya Yehowa, yandi ta wa nge.’ Bangonda fioti na nima, bo songaka dibuta na beto na kukwenda kusala na Albanie!” Bamvula mingi me lutaka, mpi Federica me kwelanaka sesepi ti Orges. Bo ke salaka kisalu ya ntangu yonso na Albanie.

 Na nima ya kubaka pension, Gianpiero kwendaka kuzinga na Albanie ti nkento na yandi Gloria. Yandi ke tuba nde: “Bana na beto ya babakala yelaka na Italie. Tatu na kati na bo me kwendaka kusala kisika mpusa kele mingi. Disolo ya Nzozulu ya Nkengi yina vandaka ti ntu-diambu ‘Pourriez-vous passer en Macédoine ?’ simbaka bantima na beto. Beto yindulaka beto yonso mutindu beto lenda sadila pension na mono sambu na kusala na Albanie.”

 Bantu ya ke kwendaka kusala kisika mpusa kele mingi fwete kudibongisa mbote-mbote na ntwala ya kukwenda mpi bo fwete sala bansoba ya me fwana. (Luka 14:28) Kuzwa mutindu ya kulungisa bampusa na bo, bo mosi kele na kati ya mambu yina bo fwete yidika na ntwala. Ntangu yandi vandaka ntete na Angleterre, Gwen, yina beto me tubila deja, kwendaka ntete ti yaya na yandi ya nkento sambu na kubumba mbongo. Sophia na Christopher, yina katukaka mpi na Angleterre, ke yibuka nde: “Beto tekaka kamio na beto mpi bima ya nkaka ya nzo. Beto vandaka kuyindula nde beto ta sala ata mvula mosi na Albanie.” Yo kele kiese sambu bo salaka bamvula mingi kuna.

 Bansamuni ya nkaka ke salaka mwa bangonda na Albanie, ke vutukaka na insi na bo sambu na kusala kisalu mpi kubumba mbongo, mpi na nima bo ke kwendaka diaka na Albanie. Eliseo na Miriam salaka mutindu yina. Eliseo ke tuba nde: “Miriam me katukaka na kitini ya Italie yina ba touriste ke kwisaka mingi; kuna yo kele pete na kuzwa bisalu ya ntangu fioti. Beto vandaka kukwenda na kitini yina mpi kusala kisalu bangonda tatu na misipu; na nima, beto vandaka kusadila mbongo ya beto bumbaka sambu na kuzinga na Albanie bangonda uvwa ya me bikala. Beto salaka mutindu yai bamvula tanu.”

 Na nima ya kukwenda kisika mpusa kele mingi, bantu yai fwete yikana ti luzingu ya mpa, kansi bandongisila mpi mbandu ya Bambangi ya Yehowa ya kisika yina ke sadisaka bo na kununga mambu ya mpasi. Sophia, yina beto tubilaka deja, ke tuba nde: “Na nsungi ya hiver na Albanie, banzo ke vandaka madidi mingi kuluta mutindu yo ke vandaka na bwala na beto. Mono talaka mutindu bampangi-bankento ya Albanie ke lwataka mpi mono longukaka na kulwata mutindu ya nkaka.” Grzegorz ti nkento na yandi Sona, katukaka na Pologne mpi kwisaka kusadisa na bwala Prizren, na Kosovo. b Grzegorz ke tuba nde: “Bansamuni ya bwala yai kele mpenza ya kudikulumusa, ntima-mbote mpi ntima-nda! Bo ke sadisaka beto na kulonguka ndinga mpi mambu mingi ya nkaka. Mu mbandu, bo ke songaka beto ba boutique yina bo ke tekaka bima na ntalu ya mbote, mpi bo ke tendudilaka beto mutindu ya kusumba bima na zandu.”

 Bantu yina me kwendaka na bansi ya nkaka ke salaka kinduku ya ngolo ti Bambangi ya Yehowa ya bisika yina mpi bo ke zabaka luzingu ya bampangi yina. Sona ke tuba nde: “Mono me monaka mutindu zola ya Yehowa lenda soba luzingu ya bantu. Bampangi ke kumisaka lukwikilu na mono ngolo sambu mono ke monaka mutindu bo ke sobaka kibeni balukwikilu mpi luzingu na bo ntangu bo ke longukaka mambu ya me tala Yehowa. Na dibundu, beto vandaka kumona nde bampangi kele ti mfunu na beto, mpi beto monaka mutindu beto lenda sadisa bo. Beto ke salaka ti bampangi ya babakala mpi ya bankento yina me kumaka banduku na beto.” (Marko 10:29, 30) Gloria ke tuba nde: “Mono me zaba bampangi mingi ya bankento yina me kangaka ntima na mbangika ya ngolo ya bantu ya bwala na bo yina ke zolaka ve Bambangi ya Yehowa. Ntangu mono ke monaka mutindu bo ke zolaka Yehowa, yo ke simbaka mpenza ntima na mono.”

 Bantu ya ke salaka kisika mpusa kele mingi ke vandaka mpi ti dibaku ya kulonguka malongi ya mfunu yina bo lendaka ve kulonguka na bwala na bo. Mu mbandu, bo ke monaka nde kusala mambu ya mpasi sambu na kusadila Yehowa ke natilaka bo kiese. Stefano ke tendula yo na bangogo yai: “Na insi na beto, mono ke longaka nsangu mbala mingi na telefone, mpi ke salaka masolo ya nkufi. Kansi bantu ya Albanie ke zolaka kusolula masolo ya nda, mingi-mingi ntangu bo ke nwa mwa dikopa ya kafe. Sambu mono ke vandaka nsoni-nsoni, na luyantiku mono vandaka kukuka ve, mpi mono vandaka kuzaba ve nki mono ta tuba. Kansi na nima, mono longukaka kutudila bantu dikebi, ebuna sesepi mono ke sepelaka kusolula ti bo. Kisalu na mono ya kulonga ke pesa mono kiese mingi.”

 Leah katukaka na États-Unis ti bakala na yandi William mpi bo kwendaka na Albanie. Leah ke tuba nde: “Kusala awa me longaka beto mitindu ya mpa ya kuyindula mpi ya kuzinga. Beto me longukaka mambu mingi ya me tala kuyamba banzenza, luzitu, mpi kinduku! Beto me longukaka mitindu ya mpa ya kulonga bantu, ya kuyindula na nsadisa ya Biblia, mpi ya kupesa bangindu na beto.” William ke tuba nde: “Bantu mingi ya ke kwendaka kutala Albanie ke sepelaka ti ba plage na yo ya kitoko. Mono ke sepelaka kukwenda kutambula na bangumba ya Albanie. Kansi mono ke zolaka insi yai mingi sambu na bantu na yo! Bantu ya babwala mingi ya teritware na beto me waka nsangu ya mbote kaka ya nkufi na ntangu ya bakampanie ya speciale. Ntangu beto kumaka kuna, bantangu ya nkaka beto vandaka kulutisa kilumbu ya mvimba na kusolula ti mwa mabuta.”

 Bantu ya ke kwendaka kisika mpusa kele mingi ke waka kiese mingi ntangu bo ke monaka bantu ke ndima nsangu ya mbote. (1 Batesalonika 2:19, 20) Laura, leke ya nkento ya me balaka ve yina me kwendaka na Albanie ke pesa mbandu mosi: “Mono salaka mwa fioti na bwala Fier. Na nima ya bamvula zole ti ndambu, bantu 120 lungisaka mambu ya bo ke lombaka nsangu na kubanda kulonga nsangu ya mbote! Mono longukaka ti bantu 16 na kati na bo!” Sandra, mpangi ya nkaka ya nkento, ke yibuka nde: “Mono longaka nkento mosi yina ke salaka na zandu. Yandi bakaka mbotika mpi vutukaka na bwala na yandi. Nsuka-nsuka, yandi yantikaka kulonguka Biblia ti bantu 15!”

 Bantu ya nkaka ya ke kwendaka na bisika mpusa kele mingi yina kwendaka na Albanie bamvula mingi me luta kele kaka kuna mpi bo ke sepela mingi ti kisalu na bo. Bantangu ya nkaka, bo ke yitukaka ntangu bo ke monaka mutindu kisalu na bo ke buta bambuma bamvula mingi na nima ya ntangu yina bo kunaka bambuma ya ntete. (Longi 11:6) Christopher, yina beto tubilaka deja, ke tuba nde: “Mono landaka bakala mosi yina mono yantikaka kulonguka ti yandi Biblia ntangu mono kwendaka na Albanie na mbala ya ntete. Mono waka kiese ntangu yandi tendudilaka mono na bunda masolo ya Biblia yina beto solulaka na luyantiku. Sesepi yai, yandi ti nkento na yandi me bakaka mbotika mpi ke sadilaka Yehowa.” Federica, yina beto tubilaka deja, ke tuba nde: “Na dibundu mosi, mpangi-nkento mosi kwisaka pene-pene na mono mpi yulaka mono kana mono ke zaba yandi diaka. Yandi songaka mono nde mono zabisaka yandi nsangu ya mbote bamvula uvwa me luta. Ntangu fioti na nima ya ntangu yina mono kwendaka na bwala ya nkaka, yandi yantikaka kulonguka Biblia mpi bakaka mbotika. Mono vandaka kuyindula nde kisalu ya beto salaka na bamvula ya ntete na Albanie butaka ve bambuma. Mono vandaka kudikusa!”

 Bampangi ya babakala mpi ya bankento yina me kwendaka na Albanie to na Kosovo ke pesaka ntonda ntangu bo ke monaka mutindu Yehowa me sakumunaka bikesa na bo mpi me pesaka bo luzingu ya kiese. Na nima ya kusala bamvula mingi na Albanie, Eliseo ke tubila luzingu na yandi na bunkufi na bangogo yai: “Beto bantu, beto ke kudikusaka kukonda mpasi mpi ke yindulaka nde luzingu na beto ta vanda na lutaninu kana beto ke tula ntima na bima yina nsi-ntoto yai ke monaka nde yo ke taninaka bantu. Kansi yo kele luvunu. Minsiku ya Yehowa ke sadisaka beto na kuvanda ti luzingu ya mbote mpi na lutaninu. Kisalu na mono na kisika yina mpusa kele mingi ke sadisaka mono na kuvila ve diambu yai. Mono ke monaka nde mono kele mfunu mpi bo ke sepelaka ti mono. Mono kele ti banduku ya kieleka pene-pene na mono yina ke sosaka kulungisa balukanu ya mutindu mosi ti mono.” Sandra ke ndima mambu yai, yandi ke tuba nde: “Ntangu mono kwendaka kisika mpusa kele mingi, mono bakisaka nde Yehowa me pesa mono dibaku ya kulungisa kima yina mono vandaka kuzola banda ntama, disongidila kuvanda misionere. Mono ke vandaka ve na mawa ata fioti sambu mono kwendaka na Albanie. Mono kele na kiese mingi kuluta.”