Mvula ya ngolo kibeni nokaka mpi yo fulusaka banzadi ya Eropa ya Kati-Kati na Yuni 2013. Na Hongrie, Nzadi Danube ya mvimba kumaka ti masa mingi kibeni na kiteso yina yo me kumaka ntete ve.

Sambu yo vandaka kulomba kusala mambu nswalu-nswalu, Ministre ya ressources humaines ya Hongrie yulaka biro ya filiale ya Bambangi ya Yehowa kana bo lenda sadisa bo na kuditanina na mambu ya mbi yina mvula ya ngolo ke salaka. Yo yina, biro ya filiale lombaka mabundu yina kele na lweka ya Nzadi Danube na kuvukana na bisalu yina bamfumu ya bwala na bo yidikaka.

Mabundu mingi kibeni ndimaka dibanza yina. Na bilumbu yina landaka, Bambangi ya Yehowa kuluta 900 yina katukaka na mabundu 72 vukanaka na kisalu ya kukumisa ngolo balweka ya nzadi yina. Bo lombaka bo na kulwata ba makaro yina bo me sonika “Bambangi ya Yehowa,” mpi yina vandaka ti zina na bo mpi zina ya mbanza na bo.

Na mbanza mosi, mumonisi ya Croix-Rouge ya Hongrie tindaka nsangu yai na dibundu mosi: “Beto ke tonda beno mpi ke kumisa beno, sambu beno kele bambandu ya mbote kibeni ya bumosi mpi ya kuvanda ya kuyilama na kusadisa—mpi beno salaka nzietelo ya nda mingi! Mono ke tubilaka mbandu na beno ti kiese na bwala na beto!”

Ntwadisi ya kimvuka mosi ya kupesa lusadisu na nima ya kisumbula, yina kele muntu ya Parlema ya Hongrie, tindaka mukanda na biro ya filiale sambu na kupesa Bambangi mersi sambu na lusadisu ya mbote yina bo pesaka.