Na kilumbu ya 13 Septembri 2014 na kisika ya Bambangi ya Yehowa yina bo ke pesaka malongi ya kele na Patterson, na New York, bo pesaka Maplome ya Nzo-Nkanda ya Biblia ya 137 ya Gileadi. Nzo-nkanda yai ke longaka bambangi ya Yehowa yina kele dezia na eksperiansi mingi, sambu bo pesa kikesa na mabundu mpi na babiro ya bafiale yina bo ta tinda. Bawi kiteso ya 12333 landaka manaka yai, bawi ya nkaka landaka yo pana na Patterson, kansi bankaka na nzila ya video na Canada, na Jamaïque, na Porto Rico, mpi na États-Unis.

Samuel Herd, mpangi ya Nto-Kimvuka ya Bambangi ya Yehowa, muntu vandaka ntwadisi ya manaka yina. Na bangogo na yandi ya luyantiku, yandi monisaka mutindu bangindu ya Yehowa me luta bangindu na beto. (Yezaya 55:8, 9) Yandi songaka balongoki ya Gileadi nde ata bo me sala bangonda tanu sambu na kufulusa mabanza na bo ti bangindu ya Nzambi, bo me kwanza kaka na zulu-zulu, bo me zaba kaka “mwa ndambu ya bisalu ya [Nzambi].” (Yobi 26:14) Mpangi Herd tubaka diaka nde konso ntangu ya beto ke kutanaka sambu na kutubila bangindu ya Nzambi, beto ke bakilaka yo mambote mpi yo ke kiteso mosi ti manaka ya kupesa maplome.

“Mbuma ya Mpeve Kele . . . Ntima ya nda.” (Bagalatia 5:22) John Larson, mpangi mosi ya Komite ya Filiale ya États-Unis tubilaka mitindu zole ya mfunu, yina beto lenda monisa ntima ya nda, ya kele kitini ya mbuma ya mpeve ya Nzambi. Ya ntete, beto fwete vanda ntima-nda ntangu Yehowa ke longa beto mpi ke sadisa beto sambu beto tula misisa ngolo na lukwikilu. (1 Piere 5:10) Abrahami vandaka muntu yina pesaka mbandu ya mbote na yina me tala kuvanda-ntima nda ntangu Yehowa vandaka kulonga yandi mpi nsuka-nsuka Yehowa lungisaka balusilu yina Yandi silaka yandi.​—Baebreo 6:15.

Ya zole, beto mosi fwete vanda ntima-nda. Na nima ya kubaka malongi ya Gileadi, balongoki lenda kudiyangisa kuluta ndilu sambu na mikumba na bo. Kana bo me kwenda kisika yina bo me tinda bo kansi mambu kutambula ve mbote mbala mosi, bo lenda kudiyula nde: ‘Sambu na nki mu ke mona mpasi mutindu yai?’ Mpangi Larson sadilaka mbandu na yandi mosi sambu na kundimisa bo nde, bo lenda nunga bampasi kana bo kele bo mosi ntima-nda mpi ke landa kuvanda kikesa tii kuna Nzambi ta manisa kulonga bo.​—Baebreo 6:11, 12.

“Beno Bika nde Bantima na Beno Kuvanda Kaka ya Kudikulumusa mpi Yo Zinga Kimakulu!” Mpangi Anthony Morris ya Nto-Kimvuka salaka disolo na yandi yina simbamaka na Bankunga 22:26. Na kisina, bo lenda balula kitini na yo ya nsuka nde “bika ntima na nge kuzinga kimakulu.” Sambu na kubaka mambote yai, beto fwete vanda bantu ya kudikulumusa. Mpangi Morris tubilaka na siki-siki yonso nde Yehowa ta sadila beto ve kana beto kele ve bantu ya kudikulumusa. Konso muntu na kati na beto, yo vanda Bakristu yina me salaka bamvula mingi na dibundu, lenda mona nde kuvanda bonso Yezu Kristu kele diaka ve mfunu sambu na beto.​—2 Piere 1:9.

Masonuku ke pesa beto bambandu ya bantu yina monisaka kudikulumusa mpi bayina monisaka yo ve. Na lulendo yonso, Erode Agripa ndimaka mutindu bantu vandaka kuleba yandi mpi kupesa yandi lukumu yina yo lombaka nde bo pesa kaka na Nzambi, yo yina wanzio ya Nzambi fwaka yandi mpi “misopi diaka yandi.” (Bisalu 12:21-23) Kansi na kuswaswana na Piere, ntangu Yezu nganinaka yandi nde yandi “ke yindula ve bangindu ya Nzambi, kansi bangindu ya bantu” ata kima mosi ve ke monisa nde Piere bebisaka luse to waka makasi. (Matayo 16:21-23) Yandi ndimaka dilongi yina mpi kumaka mbandu ya mbote na yina me tala kudikulumusa.​—1 Piere 5:5.

Balongoki ya nkaka ta kwenda kusala kisalu na Betele na filiale mosi ya Bambangi ya Yehowa, mpi Mpangi Morris kebisaka bo nde kana bo kele ve ti kudikulumusa, bo ta vanda na mawa na kisalu na bo. Kansi, yo lenda vanda mpasi sambu muntu kuzaba yandi mosi nde yandi me konda kudikulumusa. Sambu na kumonisa nde diambu yai kele kibeni kieleka, yandi tubaka nde bamvula mingi me luta bo pesaka nkuluntu mosi ndongisila nde yandi vandaka ve ti kudikulumusa, nkuluntu yina sonikilaka biro ya filiale nde: “Mono me zaba nde mono kele muntu ya kudikulumusa ya mingi.” Mpangi Morris siamisaka balongoki na kubuya kikalulu ya mutindu yina. Bo ta bikala ya kudikulumusa kana bo ke buya bangindu ya kuluta ndilu na yina metala kiyeka na bo, kansi bo ke ndima nde kiyeka ya kieleka mpenza kele na Yehowa Nzambi mpi Kristu Yezu.

“Nzambi Ke Pesaka Ve Mpeve Fioti.” (Yoane 3:34)

Michael Burnett, yina kele longi na Gileadi, yibusaka balongoki nde mpeve santu ta sadisa bo na kununga bampasi to baketi-keti yina bo ta kutana ti yo na kisalu na bo. Mpeve santu ya Nzambi sadisaka Besalele na kununga bampasi yina yandi kutanaka ti yo na kisalu na yandi ya kutunga nzo-tenta. (Kubasika 35:30-35) Mpeve santu kumisaka ve kaka ngolo makuki ya Besalele ya kusala kisalu kansi yo sadisaka yandi mpi na kulonga bankaka. Mpeve santu lenda sala mpi mutindu mosi sambu na bana ya nzo-nkanda ya Gileadi, mingi-mingi ntangu bo kelanda mbandu ya malongi yina kele na Masonuku, yina bo longukaka na nzo-nkanda.

Na bilumbu ya Besalele, bankento yina vandaka bantu ya Izraele vandaka mpi mfunu mingi sambu na kisalu ya kutunga nzo-tenta. (Kubasika 35:25, 26) Mutindu mosi mpi bampangi bankento na nzo-nkanda bo monisaka nde bo kele ‘bankento yina mezaba kisalu mbote mutindu bo vandaka kupesa babakala na bo maboko. Mpangi Burnett sukisaka na kupesaka ba longoki ndongisila: “Beno vanda na bukati-kati na yina metala makuki na beno na kudikulumusa yonso mpi beto vanda na mpeve ya bulemfu. Kana beno sala mutindu yina, Yehowa ta pesa beno mpeve na yandi kibeni.”

“Keti Nge Ta Kina ti Mono?” Mark Noumair, yina kele nsadisi na Komite Sambu na Kulonga, na disolo na yandi, yandi sadilaka mbandu ya Ntotila Davidi ntangu yandi bakaka sanduku ya kuwakana sambu na kunata yo na Yeruzalemi. (2 Samuele 6:12-14) Davidi kinaka na kudikulumusa yonso kumosi ti “bampika ya bankento ya bansadi na yandi” ntangu bo vandaka kutombula Sanduku. (2 Samuele 6:20-22) Bampika yina ya bankento ta vila ve ata fioti kilumbu yina Ntotila Davidi kinaka na bo kumosi. Ebuna mpangi Noumair siamisaka balongoki na ‘kukina ti bampika ya bankento.’ Yandi yulaka bo nde: “Keti bantu ta zaba beno bonso bantu yina kesadisaka bayina kele na mikumba fioti to kele na mikumba ve?. . . Keti beno ta pesa bankaka valere sambu na bikalulu na bo ya kimpeve?

Balongoki ya Gileadi ya me baka maplome ta landa mbandu ya Yehowa kana bo landa kumonisa zola ya kwikama na mutindu yai. (Nkunga 113:6, 7) Ata bantu ya nkaka yina ke zinga ti bo kele ve bantu ya kudikulumusa, balongoki fwete bika ve nde kukonda kukuka ya mutindu yai kuvanda na bupusi na luzingu na bo. “Beno kudimona bonso nde beno kele bantu ya kukonda mfunu,” Mpangi Noumair yikaka nde: “Beno sadila mameme ya Yehowa mambu mutindu Yandi ke sadilaka bo.”

“Kuta Kimbangi na Konso Dibaku Yina Ke Monana.” William Samuelson yina kele ntwadisi ya Departema ya Banzo-Nkanda ya Bukristu tubilaka ntumwa Polo bonso muntu yina vandaka ya kuyilama na konso dibaku yina vandaka kumonana sambu na kulonga nsangu ya mbote. (Bisalu 17:17) Ebuna Mpangi Samuelson twadisaka disolo yina vandaka kumonisa bansonga ya eksperiansi yina balongoki kutanaka ti yo na kisalu ya kusamuna ntangu bo vandaka na Gileadi. Mu mbandu, bankwelani mosi kutanaka ti nkento mosi yina vandaka kuteka na zandu. Bo vingilaka tii ntangu misumbi vandaka diaka mingi ve mpi bo songaka nkento yina video Sambu na Nki Beto Fwete Longuka Biblia? Bo monisaka yandi site ya internet jw.org, kisika yina yandi lenda baka bansangu mingi na ndinga na yandi Laotian. Bankwelani yina vutukilaka nkento yina mpi yedisaka mpusa na yandi.

“Vanda Ntangu Yonso ya Kuyilama Sambu na Kisalu ya Kimfumu.” William Nonkes, yina ke salaka na Biro ya Ke Talaka Kisalu ya Bilanga ya filiale ya États-Unis yulaka na bangiufula na balongoki iya. Na kutadila ngindu ya Yezaya 6:8, bo yilamaka dezia bo mosi sambu na Kisalu ya Kimfumu, kansi nzo-nkanda yidikaka bo diaka sambu na kusala mingi kuluta. Mpangi nkento Snolia Maseko monisaka nde Gileadi sadisaka yandi na kumona bisika yina yandi lenda tomisa diaka na luzingu na yandi mingi-mingi na yina metadila mutindu ya mbote ya kusadila ntangu ata na nima ya kusala kisalu mingi na kilumbu. Yandi tubaka nde, “ Formasio yai me pusa bandilu na mono ntama na mambu yina mono vandaka kuyindula nde mono lenda sala.” Mpangi Dennis Nielsen longukaka mutindu mambu yina kele na Sefania 3:17 lenda sadisa yandi na kubuya kulemba nitu na kisalu na yandi ya kimfumu. Yandi ke tuba nde: “Kana mu ke na Kisalu ya Kimfumu mpi yo ke pesa ve mbutu ya nene, mono fwete yibuka nde Yehowa ke sepela na kiese, mono fwete sepela.”

“Beno Tala Mbote-Mbote Bandeke ya Zulu” (Matayo 6:26)

Stephen Lett ya Nto-Kimvuka salaka diskure ya kuluta mfunu ya manaka yina. Disolo na yandi simbamaka na dilongi ya Yezu nde beto fwete “ tala mbote-mbote,” bandeke, Mpangi Lett basisaka malongi mingi sambu na beto.​—Yobi 12:7.

Mu mbandu, kaka mutindu Yehowa ke disaka bandeke, yandi mpi ta disa beto. Beto kele bantu ya “nzo ya Nzambi,” mpi yandi ke ndimisa beto nde yandi ta lungisa “banzala ya bantu na yandi.” (1 Timoteo 3:15; 5:8) Ya kieleka, beto fwete sala dikabu na beto. Kaka mutindu bandeke ke sosaka madia yina Nzambi ke pesaka, beto mpi fwete “landa kusosa ntete Kimfumu” sambu nde yandi sakumuna beto.​—Matayo 6:33.

Mpangi Lett monisaka mpi nde bandeke mingi ke tulaka makelele ntangu bo ke kudimonaka na kigonsa. Mutindu mosi mpi beto ke kebisaka bankaka ntangu bo kele na kigonsa, mu mbandu, ntangu mpangi mosi “ke kwenda na nzila ya mbi na ntwala nde yandi bakisa yo.” (Bagalatia 6:1) Na nsadisa ya kisalu na beto ya kulonga, beto ke kebisaka bantu na yina metala “kilumbu ya Yehowa” yina me kuma pene-pene. (Sefania 1:14) Na mbandu ya nkaka, Mpangi Lett monisaka nde kaka mutindu bandeke yina ke tambulaka mingi, ke pumbukaka na zulu ya bangumba ya nda, beto lenda nunga bampasi ya ngolo na nsadisa ya lusadisu ya Yehowa.​—Matayo 17:20.

Bangogo ya Nsuka. Balongoki bakaka maplome na bo na nima, longoki mosi tangaka mukanda yina balongoki sonikaka sambu na kuvutula ndonda. Na bangogo na yandi ya nsuka, Mpangi Herd fwanisaka kutula mabanza ya Yehowa na ntima na beto na kana beto ke zola kukotisa munsonso na nzila ya train. Yo ke lombaka kubula marto mbala mingi sambu nde munsonso kukota mbote. Kiteso mosi mpi balongoki fwete landa kuyindula mambu ya bo me longuka na Gileadi, “yo ke bakaka ntangu mingi sambu na kukotisa yo na kati ya bantima na beno.” Mpangi Herd yikaka diaka nde, “Kana beno ke landa mabanza ya Nzambi, beno ta vandaka lusakumunu.”