Milhons di Tistimunhas di Jeová djuntu ku otus konvidadu faze Komemorason di mórti di Jizus na térsa-fera, dia 4 di abril di 2023. Sikrê foi difísil pa un monti di algen, es konsigi sisti kel runion spesial.

Pur izénplu, na Ukránia milharis di algen sisti Komemorason sikrê ku mau ténpu i géra na alguns lugar. Dja ki situason ka staba suguru na un sidadi na lésti di Ukránia, kes ansion di la da kes irmon na kongregason un gravason di diskursu di Komemorason un simana antis. Alguns dia dipôs, kel sidadi fika sen internet i sen lus. Kel-li ka kontise pamodi géra má pamodi un tenpistadi fórti. Sikrê ku kel situason li, tudu algen na kongregason konsigi sisti diskursu di Komemorason ki dja es tinha gravadu, sikrê ka tinha lus i staba ku géra.

Un jóven di 15 anu na Kazakiston, ki txoma Violeta, lida ku opozison na família. Se avô, ki el ta vive ku el, faze-s txeu opozison duránti uns 20 anu. Txeu bês el ta tentaba inpidi-s di sisti runion i el ta distruíba ses publikason. Má pamodi el ta amaba se néta, poku-poku el kumesa ta pâpia sobri asuntus di Bíblia ku el. Violeta fika spantadu pamodi kel anu li se avô seta un studu di Bíblia i tanbê el sisti Komemorason!

Pa otus algen foi difísil sisti Komemorason pamodi es ta mora lonji. Na Timor Lésti, nos irmons sta ta faze 55 studu di Bíblia pa tilifóni pa pesoas ki ta mora na sidadi di Same i Suai. Kes dôs sidadi li ta fika lonji di kel kongregason más pértu. Irmons ten ki viaja txeu óra na móta pa txiga la. Pur isu, irmons faze planu pa fazedu Komemorason na kaza partikular na kada un di kes sidadi. Un ansion viaja duránti 4 óra pa el ba faze diskursu di Komemorason na sidadi di Same i 56 algen staba la ta sisti. Otu ansion viaja uns 7 óra pa txiga na Suai, i más di 50 algen sisti Komemorason.

Nos irmons na Ualpén, na Xili, tanbê tevi prubléma na atxa un lugar pa faze Komemorason. Pur isu, es pidi un algen ki ta trabadja na dipartamentu ki ta kuida di asuntus relijiozu pa djuda-s atxa un lugar dretu pa es faze Komemorason. Kes ansion di kongregason fika kontenti pamodi uns óra antis di Komemorason kumesa, kel algen ki ta trabadja na kel dipartamentu txoma-s pa oferese-s kantina di un skóla. Kel óra, kes irmon bira kel kantina na un lugar bunitu pa faze runion. Kel algen ki ta trabadja na dipartamentu ki ta kuida di asuntus relijiozu i prizidenti di kanbra seta konviti ki irmons faze-s pa sisti Komemorason. Kel prizidenti di kanbra fla: “N ta ilojia kes algen ki sta li ta sisti pa organizason i ruspetu ki es mostra. Ti mésmu kes kriansa konporta dretu. Nhos pode konta ku nos apoiu na futuru.”

Tanbê, nu fika kontenti di sabe ma na novenbru di 2022, nos óbra legalizadu na Mónaku. Dipôs di sisti Komemorason na un lugar bunitu ki lugadu, un konvidadu fla: “Kel sala li é própi bunitu, má kes algen ki sta li ta pô-l más bunitu inda.”

Ta da-nu koraji odja modi ki txeu algen konsigi vense kes prubléma li i otus dizafiu pa es pode obi ku kel órdi ki Kristu da di djunta pa nu “lenbra” di se mórti! — Lukas 22:19.