Txeu algen ta faze kes pergunta li pamodi es sufri txeu i es ka sô krê atxa respósta, má tanbê es krê atxa konsolu. Otus algen ta atxa ma kel matansa di judeus na Europa é un di kes kuza más kruel ki ómis dja faze, i é pur isu ki es ta atxa difísil kridita na Deus.

 Stória inventadu: Nu ka debe pergunta pamodi ki Deus ka inpidi kel matansa na Europa.

 Verdadi: Algen ki ten txeu fé dja pergunta pamodi ki Deus ta dexa maldadi kontise. Pur izénplu, proféta Abakuki pergunta Deus: ‘Pamodi ki bu ta pô-m odja maldadi, pesoas ta abuza di puder, distruison, violénsia, géra i konfuzon?’ (Habacuque 1:3) Deus ka xatia ku Abakuki, envês di kel-li, el dexa kes pergunta ki el faze na Bíblia asi pa tudu algen pode le-s.

 Stória inventadu: Deus ka ta preokupa ku nos sufrimentu.

 Verdadi: Deus ta ôdia maldadi i sufrimentu ki el ta traze. (Provérbios 6:16-19) Na ténpu di Nué, Deus ‘xinti tristi na se korason’ pamodi violénsia ki toma kónta di Téra. (Génesis 6:5, 6) Di sertéza, Deus tanbê fika tristi kantu el odja kel matansa na Europa. — Malaquias 3:6.

 Stória inventadu: Kel matansa di judeus na Europa foi un manera ki Deus uza pa kastiga-s.

 Verdadi: É simé ki Deus dexa kes romanu distrui Jiruzalen na anu 70. (Mateus 23:37–24:2) Má désdi kel ténpu, Deus ka ta skodje ninhun país pa ser se povu abensuadu i nen pa el kastiga-l. Pa Deus ‘ka ten diferénsa entri judeu ku gregu’. — Romanos 10:12.

 Stória inventadu: Si ta izistiba un Deus ki ta ama-nu i ki é Tudu-Poderozu, el ta inpidiba kel matansa di judeus na Europa.

 Verdadi: Deus nunka ka ta poi sufrimentu kontise, má alvês el ka ta inpidi-l duránti un ténpu. — Tiago 1:13; 5:11.

 Deus ka inpidi kel matansa di judeus na Europa pa kel mésmu motivu ki el ka ta inpidi tudu kes otu sufrimentu ki algen ta pasa pa el, ki é pa responde alguns pergunta inportanti ki fazedu dja ten txeu ténpu. Bíblia ta mostra klaru ma é Diabu ki sta manda na mundu, é ka Deus. (Lucas 4:1, 2, 6; João 12:31) Odja dôs kuza inportanti ki Bíblia ta fla, ki ta djuda-nu ntende pamodi ki Deus ka inpidi kel matansa di judeus na Europa.

1.   Deus kria ómis ku liberdadi di skodje. Deus fla Adon ku Eva, ki éra kes primeru algen ki izistiba, kuzê ki el kria pa es fazeba, má el ka obriga-s obi ku el. Es disidi skodje di es pa es, kuzê ki é dretu i kuzê ki é mariadu. Kel mau disizon ki es toma, i tudu kes otu disizon sima kel-li ki ómis ten stadu ta toma désdi kel ténpu, traze txeu sufrimentu pa algen na Téra. (Génesis 2:17; 3:6; Romanos 5:12) É sima un livru a fla: “Kuazi tudu sufrimentu ki ten na mundu ta kontise pamodi nu ta uza nos liberdadi di skodje di manera mariadu.” Deus ka ta inpidi ómis di uza ses liberdadi di skodje, envês di kel-li, el da-s ténpu pa es odja si es ta konsigi ten un vida dretu sen el ô nau.

2.   Deus ta konsigi i el ta ben kaba ku tudu sufrimentu ki kel matansa di judeus na Europa traze. Deus promete ma el ta ben poi milhons di algen ki móre ta vive otu bês, i kel-li ta inklui judeus ki matadu na Europa. Tanbê el ta ben kaba ku tudu dór ki kes algen ki skapa di kel matansa ta xinti pamodi kes kuza orível ki es pasa pa el, i ki ti inda es ta lenbra. (Isaías 65:17; Atos 24:15) Amor ki Deus ten pa algen na Téra ta da-nu sertéza ma el ta ben kunpri kes promésa li. — João 3:16.

 Txeu algen ki skapa di kel matansa na Europa, konsigi kontinua ku un fé fórti i es atxa un obijetivu na vida pamodi es ntende motivu ki Deus ka ta inpidi maldadi i modi ki el ta ben kaba ku el.