Ten txeu próva pa nu kridita ma Migel, é nómi di Jizus la na Séu, antis di el ben vive na Téra i dipôs ki el subi pa Séu. a Alguns relijion ta txoma-l “Son Migel”. Bíblia ta fla ma Migel géra ku Satanás dipôs ki Muizés móre i el djuda un anju leba un mensaji pa proféta Daniel. (Daniel 10:13, 21; Judas 9) Migel siginifika “kenha ki é sima Deus?”. Migel ta vive di akordu ku kel nómi li pamodi el ta difende govérnu di Deus i el ta luta kóntra kes inimigu di Deus. — Daniel 12:1; Apocalipse 12:7.

 Nu ben odja pamodi ki nu pode fla ma Jizus é Migel, kel anju prinsipal.

•   Migel é ‘arkanju’. (Judas 9) Kel titlu ‘arkanju’ krê fla ‘anju prinsipal’. Kel palavra gregu ki traduzidu pa ‘arkanju’ ô ‘anju prinsipal’ ta parse sô dôs bês na Bíblia. I na kes dôs bês ki el ta parse, el sta ta pâpia di un algen sô. Kel-li ta da ideia ma é sô un anju ki ten kel titlu li. Un di kes testu ta fla ma Sinhor Jizus, ki dja sta resusitadu, ‘ta ben dixi di Séu ku vós di algen ki ta manda, ku vós di kel anju prinsipal’. (1 Tessalonicenses 4:​16) Jizus ten ‘vós di anju prinsipal’ pamodi el é kel arkanju, Migel.

•   Migel é xéfi di anjus. Bíblia ta fla ma ‘Migel ku se anjus géra kóntra dragon’, ki é Satanás. (Apocalipse 12:7) Migel ten txeu autoridadi na Séu. Nu sabe kel-li pamodi el ta txomadu ‘un di kes prínsipi más inportanti’ i ‘kel grandi prínsipi’. (Daniel 10:13, 21; 12:1) Kes titlu li ta mostra ma Migel é “xéfi di anjus”, sima un studiozu di Novu Testamentu, ki txoma David Aune, fla.

   Alén di Migel ten sô más un algen ki Bíblia ta fla ma ten autoridadi riba di anju. El ta fla ma ‘Sinhor Jizus ta ben parse désdi Séu, djuntu ku se anjus poderozu, ku lumi ta kema, óras ki el traze vingansa’. (2 Tessalonicenses 1:​7, 8; Mateus 16:27) Jizus ‘bai pa Séu; i anjus, autoridadis i puderis podu se baxu.’ (1 Pedro 3:​21, 22) Ka ta fazeba sentidu si Jizus ku Migel éra dôs algen diferenti, ki Deus da kel mésmu autoridadi, pa es ser dôs xéfi di kes anju fiel. Envês di kel-li ta faze más sentidu nu txiga konkluzon ma Jizus ku Migel é kel mésmu algen.

•   Migel ‘ta ben labanta’ duránti ‘un ténpu di frónta ki sima kel-la nunka ka kontise’. (Daniel 12:1) Na livru di Daniel, kel palavra ‘labanta’ txeu bês ta uzadu pa mostra ma un rei labanta pa faze un kuza inportanti. (Daniel 11:​2-4, 21) Jizus Kristu ki tanbê ta txomadu ‘Palavra di Deus’ i ‘Rei di Reis’ ta ben labanta pa faze un kuza inportanti. El ta ben kaba ku tudu kes inimigu di Deus i el ta ben proteje povu di Deus. (Apocalipse 19:11-​16) Jizus ta ben faze kel-li duránti un ténpu di ‘grandi tribulason, ki sima kel-la nunka ka kontiseba antis, désdi komésu di mundu’. — Mateus 24:21, 42.