Kenha ki ta bai pa Séu?
Respósta di Bíblia
Deus skodje un nunbru sértu di se sérvus fiel ki ta resusitadu dipôs ki es móre pa bai vive na Séu. (1 Pedro 1:3, 4) Dipôs ki es skodjedu, es ten ki kontinua fiel i vive di un manera ki ta agrada Deus. Es meste faze kel-li asi pa Deus ka tra-s kel speransa di vive na Séu. — Efésios 5:5; Filipenses 3:12-14.
Kuzê ki kes algen ki ta bai pa Séu ta bai faze la?
Es ta bai ser rei i saserdóti duránti mil anu djuntu ku Jizus. (Apocalipse 5:9, 10; 20:6) Es ta bai faze párti di kes ‘séu novu’, ki é un govérnu ki sta na Séu i es ta ben governa kel ‘Téra novu’, ki é kes algen ki ta ben vive li na Téra. Kes ki ta bai governa na Séu ta ben djuda kes algen li na Téra ser perfetu sima Deus kria désdi komésu. — Isaías 65:17; 2 Pedro 3:13.
Kantu algen ki ta resusitadu pa bai vive na Séu?
Bíblia ta mostra ma 144 mil algen ta ser resusitadu pa bai vive na Séu. (Apocalipse 7:4) Na un vizon ki apóstlu Juan tevi i ki sta skrebedu na Apocalipse 14:1-3, el odja ‘Korderu sakédu na monti Sion, i djuntu ku el 144 mil’. Na kel vizon, kel ‘Korderu’ ta reprizenta Jizus dipôs ki el resusitadu. (João 1:29; 1 Pedro 1:19) I ‘monti Sion’ ta reprizenta kel grandi autoridadi di Jizus i di kes 144 mil ki ta bai governa ku el na Séu. — Salmo 2:6; Hebreus 12:22.
Kes sérvu di Deus li é kes ‘ki txomadu i ki skodjedu’ pa governa ku Jizus na Séu i es ta txomadu ‘ribanhu pikinoti’. (Apocalipse 17:14; Lucas 12:32) Kel-li ta mostra ma konparadu ku tudu kes otu ovelha di Jizus es é poku. — João 10:16.
Stórias inventadu sobri kenha ki ta bai pa Séu
Stória inventadu: Tudu algen dretu ta bai pa Séu.
Verdadi: Deus promete ma maioria di algen dretu ta ben vive na Téra pa tudu ténpu. — Salmo 37:11, 29, 34.
Jizus fla: ‘Ninhun ómi ka subi pa Séu’. (João 3:13) El mostra tanbê ma kes algen dretu ki móre antis di el, sima Abraon, Muizés, Jó i Davidi ka bai pa Séu. (Atos 2:29, 34) Envês di kel-li es tinha speransa di ser resusitadu pa ben vive na Téra. — Jó 14:13-15.
Bíblia ta txoma kel resureison pa vive na Séu di ‘primeru resureison’. (Apocalipse 20:6) Kel-li ta mostra ma ta ben ten otu resureison ki ta ben kontise li na Téra.
Bíblia ta inxina ma óras ki Reinu di Deus ben governa, ‘ka ta ten más mórti’. (Apocalipse 21:3, 4) Kel promésa li ta ben kunpri li na Téra, dja ki na Séu nunka ka tevi mórti.
Stória inventadu: É nos ki ta skodje si nu ta vive na Téra ô na Séu.
Verdadi: É Deus ki ta skodje ki sérvus fiel di sel ki el ta da ‘prémiu di xamada pa ba pa riba’, ki é kel speransa di vive na Séu. (Filipenses 3:14) Sikrê un algen ten gana di bai vive na Séu, é Deus ki ta skodje undi ki el ta bai vive. — Mateus 20:20-23.
Stória inventadu: Vive na Séu é más midjór di ki vive na Téra, i kes algen ki ta ben vive li na Téra ka ta merese bai pa Séu.
Verdadi: Deus ta txoma kes algen ki ta ben vive pa tudu ténpu na Téra ‘nha povu’, ‘kes ki N skodje’ i ‘kes ki Jeová ta abênsua.’ (Isaías 65:21-23) Kes algen li ta ben ten priviléjiu di kunpri vontadi di Deus pa algen na Téra, ki é ser perfetu i vive pa tudu ténpu na un paraízu na Téra. — Génesis 1:28; Salmo 115:16; Isaías 45:18.
Stória inventadu: Nunbru 144 mil ki Apocalipse ta pâpia di el é sô un reprizentason.
Verdadi: É verdadi ki Apocalipse ten txeu nunbru ki é sô un reprizentason, má alguns nunbru é rial. Pur izénplu, Apocalipse ta pâpia di ‘nómi di kes 12 apóstlu di Korderu.’ (Apocalipse 21:14) Odja alguns próva ki ta mostra ma nunbru 144 mil é rial.
Apocalipse 7:4 ta fla ma ‘nunbru di kes ki seladu [ô ki ta bai vive na Séu] é 144 mil’. Na kes versíklu más pa frenti, Bíblia ta pâpia di otu grupu di algen. Kes versíklu ta pâpia di ‘un monti di algen ki ninhun ómi ka ta konsigi kontaba’. Deus tanbê ta ben salva kel grupu ki ta faze párti di kes ‘monti di algen’. (Apocalipse 7:9, 10) Si kes 144 mil é ka un nunbru rial i el sta ta pâpia di tudu kes algen ki ta ben salva, nton ka ta fazeba sentidu pâpia di un grupu diferenti di algen ki ninhun ómi ka ta konsigi konta. a
Livru di Apocalipse tanbê ta fla ma kes 144 mil ‘kunpradu na mundu sima kes primeru frutu’. (Apocalipse 14:4) Kes palavra ‘primeru frutu’ ta da ideia ma es é un grupu pikinoti ki ta reprizenta un grupu más grandi. Kel grupu más pikinoti é kes ki ta bai pa Séu, i djuntu ku Jizus es ta ser governanti di kes algen li na Téra, ki ka é un nunbru sértu di algen. — Apocalipse 5:10.
a Profesor Robert Thomas ta konkorda ku kel ideia li pamodi el fla kel-li sobri Apocalipse 7:4: “Kes 144 mil é un nunbru sértu, má kel nunbru ki sta na Apocalipse 7:9 é ka un nunbru sértu. Si kes 144 mil é ka un nunbru rial, nton ninhun nunbru na livru di Apocalipse é ka rial.” — Revelation 1-7: An Exegetical Commentary, pájina 474.
Bu pode gosta di kes-li tanbê
ESSENTIAL BIBLE TEACHINGS
Kuzê ki é Reinu di Deus?
Na se trabadju di pregason, kuza ki más Jizus pâpia di el éra Reinu di Deus. Dja ten txeu ténpu ki se sigidoris ta ora pa kel Reinu ben.
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.