Bíblia ta pâpia di kuzas ki ta kontise, situasons i atitudis ki ta mostra ma “fin di es mundu” sta ta txiga. (Mateus 24:3) Bíblia ta txoma kel ténpu li di “ténpu di fin” ô ‘fin di kel ténpu’. — 2 Timótiu 3:1; Daniel 8:19.

 Bíblia dja flaba txeu kuza ki ta ben kontiseba omésmu ténpu i ki ta ben sérba “sinal” di ténpu di fin. (Lukas 1:7) Odja alguns izénplu:

 Géra na mundu interu. Jizus dja flaba: “Nason ta ben labanta kóntra nason i reinu kóntra reinu.” (Mateus 24:7) Tanbê, Apokalipse 6:4 dja papiaba di un ómi montadu na un kabalu ki ta reprizentaba géra i ki ta ‘traba pas di téra’.

 Fómi. Jizus dja flaba: “Ta ben ten falta di kumida”. (Mateus 24:7) Livru di Apokalipse ta pâpia di un otu ómi montadu na kabalu ki ta reprizenta txeu fómi. — Apokalipse 6:5, 6.

 Txeu tremor di téra. Jizus dja flaba ma ta tinha “tremor di téra na un lugar tras di kel otu.” (Mateus 24:7; Lukas 21:11) Kes tremor di téra na mundu interu ta trazeba txeu sufrimentu i mórti di un manera ki nunka ka kontiseba antis.

 Duénsa. Di akordu ku Jizus, ta tinha txeu “duénsa” i ki ta spadjaba na mundu. — Lukas 21:11.

 Krimi. Enbóra dja ten txeu ténpu ki krimi ta izisti, Jizus dja flaba ma na ténpu di fin ‘maldadi ta biraba txeu.’ — Mateus 24:12.

 Straga téra. Apokalipse 11:18 dja flaba ma pesoas ta tentaba “kaba ku téra.” Es ta tentaba faze kel-li di txeu manera, ka sô ku kes kuza mariadu ki es ta faze, má tanbê es ta prujudikaba anbienti.

 Konportamentu di pesoas kada bês más piór. Na 2 Timótiu 3:1-4, Bíblia dja flaba ma maioria di algen ta sérba “ingratu, disleal, . . . ka ta krê konkorda ku otus, ta ser kaluniador, diskontroladu, runhu, ka ta ama kuzas dretu, traidoris, temozus, xeiu di orgulhu”. Kes konportamentu ta sérba tantu mariadu ki Bíblia ta fla ma ‘situason ta fikaba konplikadu i difísil di aguenta.’

 Família sen amizadi fórti pa kunpanheru. Na 2 Timótiu 3:2, 3, Bíblia dja flaba ma txeu algen ta fikaba “sen amor pa ningen”, ki ta inklui ses própi família. Tanbê fidjus ‘ka ta obiba ku pai ku mai’.

 Amor di pesoas pa Deus ta fria. Jizus dja flaba: “Amor di maioria di algen ta ben fria.” (Mateus 24:12) Jizus krê flaba ma amor di maioria di algen pa Deus ta ben friaba. Tanbê, 2 Timótiu 3:4 ta fla ma “envês di ama Deus es ta krê sô pasa sábi”.

 Pesoas ta finji ma es ta adora Deus. Na 2 Timótiu 3:5, Bíblia dja flaba ma pesoas ta ben flaba ma es ta adora Deus má es ka ta ruspetaba se leis di konportamentu.

 Ta intendedu kes profesia di Bíblia más dretu. Livru di Daniel dja flaba ma na ‘ténpu di fin’ txeu algen ta ben tinha más konhisimentu di verdadis di Bíblia, ki ta inklui intendeba dretu kes profesia di ténpu di fin. — Daniel 12:4, nóta di rodapé.

 Pregason ta fazedu na mundu interu. Jizus dja flaba: “Kes notísia sábi di Reinu ta ben pregadu na mundu interu.” — Mateus 24:14.

 Pesoas ka ta liga kes sinal i es ta faze trósa. Jizus dja flaba ma maioria di algen ka ta ligaba kes sinal ki ta mostra klaru ma fin sta ta txiga. (Mateus 24:37-39) Inda más piór, 2 Pedru 3:3, 4 ta fla ma txeu algen ta fazeba trósa i es ta fla ma kes sinal ka ta prova nada.

 Tudu kes profesia ta kunpri. Jizus fla ma na ténpu di fin tudu kes profesia, ka sô alguns ô kuazi tudu di es, ta kunpriba djuntu. — Mateus 24:33.

 Sin. Situason di mundu i kel kónta ki nu ta faze di akordu ku kel ki Bíblia dja flaba, ta mostra ma ténpu di fin kumesa na 1914, kel anu ki kontise Primeru Géra na Mundu. Pa bu intende modi ki situason na mundu ta prova ma nu sta ta vive na ténpu di fin, odja kel vídiu li:

 Na 1914, Reinu di Deus kumesa ta governa na séu i un di kes primeru kuza ki el faze é tra Satanás i se dimónis di séu i dexa-s faze kuzas ki ta afetaba sô téra. (Apokalipse 12:7-12) Nu pode odja ma Satanás sta ta influensia pesoas na ses konportamentu mariadu i na kes kuza ki es ta faze ki ta poi “situason ta fika konplikadu i difísil di aguenta” na ténpu di fin. — 2 Timótiu 3:1.

 Txeu algen sta sufri pamodi kel situason difísil li. Es ta preokupa pamodi pesoas ka sta konsigi da dretu ku kunpanheru más. Txeu di es ti ta atxa ma ku ténpu pesoas ta kaba ku kunpanheru.

 Ten otus algen ki sta sufri tanbê pamodi situason na mundu má es ten speransa pa futuru. Es ten serteza ma ka ta dura Reinu di Deus ta ben kaba ku kes prubléma ki sta na mundu. (Daniel 2:44; Apokalipse 21:3, 4) Es ta spera ku paxénxa pa Deus ben kunpri se promésas i es ta xinti txeu konsoladu ku kes palavra di Jizus: “Kenha ki aguenta firmi ti fin ta ser salvu.” — Mateus 24:13; Miqueias 7:7.