Nau. Bíblia ta mostra klaru ma Deus kria ómi i diferentis “tipu” di animal i planta. a (Génesis 1:12, 21, 25, 27; Apocalipse 4:11) Tanbê el ta fla ma tudu umanus é disendenti di Adon ku Eva, nos primeru pai ku mai. (Génesis 3:20; 4:1) Bíblia ka ta apoia kel ideia ma Deus uza ivoluson pa kria diferentis tipu di vida. Má Bíblia ka ta bai kóntra kel ideia ki sientistas ta fla ma ta izisti mudansas déntu di kada tipu di vida.

•  Deus uza ivoluson mê?

•  Ivoluson sta di akordu ku Bíblia?

•  Kapasidadi ki animal i planta ten di kustuma ku anbienti ki es sta, ta apoia ivoluson mê?

 Kes algen ki ta kridita ma Deus uza ivoluson pa kria diferentis tipu di vida, ta da txeu splikason diferenti sobri modi ki kel-li kontise. Un ensiklopédia b ta da kel ideia ma Deus ta skodje kes tipu di vida ki ten más kapasidadi pa kustuma i aguenta na anbienti ki es sta, asi pa el kontrola naturéza.

 Alguns algen ten kes ideia li:

•   Tudu tipu di vida ben di un mésmu kuza na pasadu.

•   Un tipu di vida pode muda el sô pa otu tipu di vida konpletamenti diferenti.

•   Di algun manera Deus é responsável pa tudu kes kuza li ki ta kontise.

 Kel ensinu ki ta fla ma Deus uza ivoluson pa kria diferentis tipu di vida ta da ideia ma kel ki sta skrebedu na Génesis sobri kriason ka é izatu. Má, Jizus pâpia di kel ki sta skrebedu na Génesis kómu un stória di kunfiansa. (Génesis 1:26, 27; 2:18-24; Mateus 19:4-6) Bíblia ta fla ma antis di Jizus ben Téra, el ta viveba na Séu i el djuda Deus kria ‘tudu kuza’. (João 1:3) Nton, kel ideia ma Deus uza ivoluson pa kria diferentis tipu di vida, ka sta di akordu ku Bíblia.

 Bíblia ka ta splika kantu mudansa ki pode kontise déntu di un tipu di vida. Tanbê el ka ta fla ma kes diferenti tipu di animal i planta ki Deus kria ka ta muda óras ki es ta reproduzi, ó óras ki es ta kustuma ku kel anbienti novu ki es ta vive. Nbóra alguns algen ta fla ma kel-li é un fórma di ivoluson, na verdadi kes mudansa li ka ta kria ninhun tipu di vida novu.