Respósta di Bíblia

 Na kel diskursu txeu konxedu ki Jizus faze na monti, el fla: ‘Nhos ama nhos inimigus’. (Mateus 5:44; Lukas 6:27, 35) Kes palavra di Jizus li krê fla ma nu debe mostra amor pa kes ki ta odia-nu ô ki ta trata-nu ku injustisa.

 Jizus mostra amor pa se inimigus kantu el púrdua kes ki maltrata-l. (Lukas 23:33, 34) Kes kuza ki el inxina sobri ama nos inimigu sta di akordu ku kel ki sta na Skrituras Ebraiku, ki é más konxedu pa Velhu Testamentu. — Êxodo 23:4, 5; Provérbios 24:17; 25:21.

 “Nhos kontinua ta ama nhos inimigus i ta ora pa kes ki ta pirsigi nhos.” — Mateus 5:43, 44.

Na kel artigu li

•  Pamodi ki nu debe ama nos inimigus?

•  Kal ki é alguns manera di mostra amor pa nos inimigus?

•  Nu debe bai géra kóntra nos inimigus?

•  Ideias mariadu sobri mostra amor pa nos inimigus

•  Testus di Bíblia ki ta mostra ma nu debe ama nos inimigus

 Pamodi ki nu debe ama nos inimigus?

•   Deus é un bon izénplu. Deus “é bon ti pa kes ingratu i pa kes mau.” (Lukas 6:35) El “ta poi se sól ta sai pa algen mau”. — Mateus 5:45.

•   Amor pode poi nos inimigus ta muda. Bíblia ta fla-nu pa nu trata nos inimigus ku bondadi. Si nu faze asi, nu sta ‘ta djunta braza riba di se kabésa’. (Pro. 25:22) Kes palavra li sta ta pâpia di kel trabadju di poi lumi na kes pédra ki ta atxadu déntu di un mina, asi pa es pode tra kes metal di txeu valor ki ta sta na es. Di mésmu manera, si nu trata kes algen ki ta odia-nu ku bondadi, nu pode kaba ku ses raiba i pô-s ta mostra kes bon kualidadi ki es ten.

 Kal ki é alguns manera di mostra amor pa nos inimigus?

•   Nhos “faze kel ki é dretu pa kes ki ta ôdia nhos”. (Lukas 6:27) Bíblia ta fla: ‘Si bu inimigu tene fómi, da-l kumida; si el tene sedi, da-l algun kuza di bebe’. (Romanos 12:20) Bu pode atxa otus manera pa bu mostra amor pa un inimigu, si bu sigi kes palavra li, ki é konxedu pa Régra di oru: “Sima nhos krê pa otus algen faze nhos, nhos faze-s tanbê.” — Lukas 6:31.

•   Nhos “abênsua kes ki ta maldísua nhos”. (Lukas 6:28) Nu ta abênsua nos inimigu óras ki nu ta pâpia ku es ku bondadi i ruspetu, sikrê es insulta-nu. Bíblia ta fla-nu: ‘Ka nhos paga insultu ku insultu. Envês di kel-li, nhos paga ku un benson’. (1 Pedro 3:9) Kel konsedju li pode djuda-nu para di ôdia kunpanheru.

•   Nhos “ora pa kes ki ta insulta nhos.” (Lukas 6:28) Si un algen insulta nhos, ka nhos paga ‘mal ku mal’. (Romanos 12:17) Envês di kel-li, pidi Deus pa púrdua kel algen. (Lukas 23:34; Atos 7:59, 60) Envês di vinga, dexa Deus lida ku kel algen di akordu ku Se lei perfeitu di justisa. — Levítico 19:18; Romanos 12:19.

 “Nhos kontinua ta ama nhos inimigus, ta faze kel ki é dretu pa kes ki ta ôdia nhos, ta abênsua kes ki ta maldísua nhos, ta ora pa kes ki ta insulta nhos.” — Lukas 6:27, 28.

•   Ten ‘paxénxa i mostra bondadi’. (1 Coríntios 13:4) Na kel splikason txeu konxedu di amor ki apóstlu Paulu da, el uza un palavra ki ta pasa kel mésmu ideia di kel palavra gregu (a·gaʹpe) ki nu ta atxa tanbê na Mateus 5:44 i Lukas 6:27, 35. Nu ta mostra kel tipu di amor li ti mésmu pa nos inimigu óras ki nu ta mostra paxénxa i nu ta trata-s ku bondadi. Tanbê óras ki nu ka ta ser siumentu, orgulhozu ô mal idukadu.

 ‘Amor ten paxénxa i el é bon. Amor é ka siumentu. El ka ta ingaba, el é ka orgulhozu, el ka ta konporta sen ruspetu, el ka ta djobe sô ses interesi, el ka ta xatia faxi. El ka ta liga mal ki fazedu. El ka ta fika kontenti ku injustisa, má el ta fika kontenti ku verdadi. El ta suporta tudu kuza, el ta kridita na tudu kuza, el ta spéra tudu kuza, el ta aguenta firmi na tudu kuza. Amor nunka ka ta kaba.’ — 1 Coríntios 13:4-8.

 Nu debe bai géra kóntra nos inimigus?

 Nau, pamodi Jizus inxina se sigidoris ma es ka devia bai géra kóntra ses inimigus. Pur izénplu, kantu el fla-s ma Jiruzalen sta binha atakadu, el ka fla-s pa es fika i pa es luta, má el fla-s pa es fuji. (Lukas 21:20, 21) Jizus tanbê fla apóstlu Pedru: “Torna poi spada na se lugar, pamodi tudu kenha ki ta uza spada é spada ki ta mata-s.” (Mateus 26:52) Bíblia i Stória ta mostra ma sigidoris di Jizus na primeru séklu ka briga kóntra ses inimigus. a — 2 Timóteo 2:24.

 Ideias mariadu sobri mostra amor pa nos inimigus

 Ideia mariadu: Lei di Deus ta flaba ma israelitas debe odiaba ses inimigus.

 Ideia mariadu: Ama bus inimigu krê fla ma bu ta konkorda ku kuza mariadu ki es ta faze.

 Verdadi: Bíblia ta fla ma nu pode ama un algen sen konkorda ku kes kuza mariadu ki el ta faze. Pur izénplu, Jizus kondena violénsia, má el ora pa kes algen ki mata-l. (Lukas 23:34) Tanbê el ta odiaba kes kuza ki éra kóntra lei, ô pekadu, má el da se vida pa pekadoris. — Juan 3:16; Romanos 6:23.