Tistimunhas di Jeová ta preokupa txeu ku ses irmons i irmans. (1 Pedro 2:17) Txeu di nos ta xinti sima un irman di Kénia ki txoma Tanis. El fla: “N ta fika kontenti di sabe kuzê ki sta ta kontise ku nhas irmon i irmans ki N krê txeu na mundu interu.” Modi ki Tanis i milhons di otus Tistimunha di Jeová ta sabe di kuzê ki sta ta kontise? Désdi 2013, nu ta konsigi sabe kel-li através di kel párti Notísias na nos site, jw.org.

 Kel párti Notísias ten informasons di kunfiansa sobri Tistimunhas di Jeová, sima kes Bíblia ki ta lansadu, trabadju pa djuda óras ki kontise un dizastri na naturéza, prujétus di konstruson i otus kuza inportanti ki ta kontise. El ta da-nu informasons sobri nos irmons ku irmans ki sta prézu pamodi ses fé. Kel párti Notísias, tanbê ten spiriénsias ki ta inkoraja-nu ki ten aver ku kanpanhas di pregason i Komemorason di mórti di Jizus. Ken ki ta faze piskiza i modi ki kes notísia ta priparadu?

 É Skritóriu di informason pa públiku (OPI) ki é responsável pa kel párti Notísias. Kel dipartamentu li, ta fika na Sédi Mundial i ken ki é responsável pa el é Kumison di Kordenadoris di Grupu Enkaregadu di Óbra. Ten más di 100 irmon ku irman ki ta trabadja na OPI, i txeu di es ta kolabora di lonji. Es ta skrebe, es ta faze piskiza, es ta trabadja ku imaji i es ta traduzi. Otus ta pâpia ku autoridadis di govérnu, kes profesor i kes algen ki ta trabadja ku notísias. Ten más di 80 Dipartamentu di informason pa públiku (PID) na kes filial na mundu interu ki ta djuda OPI.

 Pa pripara un notísia, OPI ta trabadja djuntu ku kes PID. Óras ki kontise un kuza interesanti, nos irmons ta piskiza kel asuntu i es ta djunta informason di kunfiansa. Pa kel-li es pode faze entrivistas i pâpia ku kes spesialista. Dipôs di djunta tudu kes informason izatu, es ta skrebe kel notísia, es ta idita, es ta torna djobe, es ta poi fotus na el i es ta manda pa Kumison di Kordenadoris aprova.

 Kuzê ki nos irmons ta xinti sobri kel párti Notísias? Un irman na Filipinas ki txoma Xeril, fla: “N gosta di kumesa nha dia ta lé kes notísia sobri organizason di Jeová i se povu.”

 Txeu di kes algen ki ta lé nos site ta pâpia sobri diferénsa ki es ta odja entri kel párti Notísias na jw.org i kes otu notísia. Tatiana, di Kazakiston, fla: “N ta agradese pamodi N pode kunfia na notísias di jw.org. Es é di kunfiansa i verdaderu.” Un irman na Méxiku ki txoma Alma, fla: “Óras ki nu konpara kes kuza kasábi ki nu ta odja na notísias, kel párti Notísias na jw.org ta da algen koraji.”

 Kel párti Notísias é di kunfiansa i tanbê el ta bira nos fé más fórti. Bernard, di Kénia, fla: “Kel párti Notísias djuda-m odja irmons ku irmans na mundu interu sima nha família, ka ta inporta na undi es sta. N ta konsigi fla ses nómi i ses situason na nhas orason.” Un irman ki txoma Bibron, ki tanbê é di Kénia, fla: “Sénpri N ta fika kontenti di odja un notísia sobri un Bíblia ki lansadu na un otu língua! Kes notísia li ta lenbra-m ma Jeová ta trata tudu algen igual.”

 Ti mésmu notísias sobri irmons ki ta pasa pa pirsigison pode da-nu koraji. Jakline, di Kénia, fla: “Kantu N pensa na ses koraji, kel-li bira nha fé más fórti. Sénpri N ta tenta prende kuzê ki ta djuda-s aguenta firmi. I N odja ma kuzas sinplis, sima orason, studa Bíblia i ti kanta é inportanti pa nos irmons kontinua fórti.”

 Un irman di Kósta Rika ki txoma Biatris, ta da valor pa kes notísia sobri dizastris na naturéza. El fla: “Kel párti Notísias ta djuda-m odja modi ki nos organizason sta ta da irmons kes kuza ki es meste di un manera faxi, ben organizadu i ku amor. Pur isu, N ten sertéza ma kel-li é organizason di Jeová.”

 Nu ta agradese txeu pamodi nu ta resebe notísias atualizadu sobri nos irmons ku irmans na mundu interu! Kel-li sô ta kontise pamodi kes kontribuison ki ta fazedu pa trabadju na mundu interu. Txeu di kes kontribuison ta fazedu através di site donate.jw.org. Obrigadu pa kes kontribuison ki nhos ta faze di korason.