Na anu 1949 nha pai muda di Alimanha pa Austrália. El ba djobe trabadju na minas i na fábrikas ki ta produzi inerjia. El ba mora na un zóna fóra di sidadi, na stadu di Vitória. La el kaza ku nha mai, i N nase na anu 1953.

Alguns anu dipôs, nha mai kumesa ta studa Bíblia ku Tistimunhas di Jeová. Pur isu, N ta lenbra di obi stórias di Bíblia désdi pikinoti. Má, nha pai ka ta setaba ninhun tipu di relijion. El bira violéntu i mau, i nha mai tinha txeu medu di el. Má simé, el kontinua ta studa Bíblia sukundidu i el gostaba txeu di kel ki el staba ta prende. Óras ki nha pai ka staba na kaza, el ta flaba mi ku nha irman kes kuza ki el staba ta prende. El ta flaba nos ma na futuru Téra interu ta ben biraba un paraízu i modi ki nu pode sérba filís si nu sigiba kes kuza ki Bíblia ta fla. — Salmo 37:10, 29; Isaías 48:17.

Kantu N tinha 18 anu, N tevi ki sai di kaza pamodi nha pai éra violéntu. N ta kriditaba na kes kuza ki nha mai inxina-m di Bíblia, má N ka ta daba es txeu valor. Pur isu, N ka konsigi vive sima Bíblia ta inxina. N kumesa ta trabadja na eletrisidadi na minas di karvon. N kaza ku 20 anu, i três anu dipôs nos primeru fidju-fémia nase. Na kel ténpu, N pensa na kuzê ki éra más inportanti na nha vida. N sabia ma Bíblia pode djudaba nos família, pur isu N kumesa ta studa Bíblia ku Tistimunhas di Jeová. Má nha mudjer éra kóntra Tistimunhas di Jeová. Kantu N sisti un di ses runion, el pô-m pa N disidi ô N ta para di studa Bíblia ô N ta larga nha família. N xinti na un béku sen saída. Nton N para di studa Bíblia. Más tardi, N rapende di ka kontinua nha studu dja ki N staba ta faze kel ki éra dretu.

Un dia, nhas koléga di trabadju mostra-m kes imaji di pornografia. N ta fikaba ku gana di odja kes imaji, má omésmu ténpu es éra nojéntu. Kel-la ta poba mi ta xintiba txeu kulpadu. Pa kel ki N ta lenbraba di Bíblia, N tinha sertéza ma Deus ta kastigaba mi. Má, sima N ba ta odja kes imaji más txeu, N fika ku más gana di odja-s i dja N ka staba ta xinti kulpadu más. Ku ténpu, N bira visiadu na pornografia.

Duránti uns 20 anu, N ba ta afasta kada bês más txeu di kes kuza ki nha mai inxinaba mi. Kes kuza ki N staba ta odja pô-m ta konporta mariadu. Nha manera di pâpia fika suju i N fika ta konta piadas indisenti. N kumesa ta odja séksu di un otu manera. N staba kazadu, má N ta ranjaba otus mudjer. Un dia, N djobe na spedju i N pensa: ‘N ka gosta di bo.’ Envês di N xinti ruspetu pa nha kabésa, N fika ta dispreza nha kabésa.

Nha kazamentu kaba i nha vida fika stragadu. Nton, N abri nha korason pa Jeová. Dipôs di 20 anu, N kumesa ta studa Bíblia otu bês. Na kel ténpu, nha pai dja moreba i nha mai éra un Tistimunha di Jeová batizadu.

Tinha un diferénsa grandi entri nha manera di vive ku kel ki Bíblia ta inxina. Má di es bês N staba disididu na ten kel pas déntu mi ki Bíblia ta promete. N kumesa ta sforsa pa N ka uza palavras suju i pa N kontrola nha manera di ser. Tanbê, N disidi bandona konportamentu seksual mariadu, N para di djuga dinheru, di bebe dimás i di furta nha patron.

Nhas koléga di trabadju ka ta ntendeba pamodi ki N krê fazeba kes mudansa la. Duránti três anu, senpri es ta flaba mi pa N volta ta ser kel algen ki mi éra antis. I si N tinha un rekaída, sima mostra raiba ô fla algun palavron, es ta fikaba uma kontenti. Es ta flaba: “Aaa! Kel-li ki é nos Joe!” Fórti kes palavra li ta maguaba mi! Txeu bês N ta xintiba ma nunka N ka ta konsigi mudaba.

Nha lugar di trabadju staba xeiu di imajis di pornografia, na formatu dijital i inprimidu. Nhas koléga ta mandaba kes imaji mariadu através di ses konputador, ki éra kel ki N ta fazeba antis. N staba ta tenta skapa di kel vísiu li, má ta parseba ma es staba disididu na ka dexa-m libra di el. N pidi ajuda i nkorajamentu na nha instrutor di Bíblia. El obi-m ku paxénxa timenti N ta dizabafaba ku el. El uza testus di Bíblia pa mostra-m modi ki N podia libraba di kel vísiu. Tanbê, el insentiva-m pa N djobe ajuda di Jeová i faze orason manenti. — Salmo 119:37.

Un dia, N faze un runion ku nhas koléga di trabadju. Nu tinha dôs koléga ki éra visiadu na bebida i ki staba ta tenta dexa di bebe. Kantu tudu algen dja staba la, N fla-s pa es da kes dôs koléga un serveja. Tudu algen fika xatiadu i es fla: “Bu ka pode faze kel-la! Es sta luta kóntra ses vísiu!” Nton N responde: “Ami tanbê.” Dipôs di kel-la, es ntende nha luta kóntra pornografia i nunka más es ka fronta-m pa N ser kel algen ki mi éra antis.

Ku ténpu i ku txeu ajuda di Jeová, N konsigi vense nha luta kóntra pornografia. N batiza na anu 1999, i N fika txeu kontenti pamodi Jeová da-m otu xansi di ten un vida linpu i filís.

Gósi N ta ntende pamodi ki Jeová ta ôdia kes kuza ki N gostaba txeu. El é un Pai ki ta ama-nu i el krê protejeba mi di kes prubléma ki pornografia ta traze. Kes palavra ki sta na Provérbios 3:5, 6 é verdadi. El ta fla: ‘Kunfia na Jeová di tudu bu korason; ka bu kunfia na bu própi ntendimentu. Lenbra di el na tudu bus kaminhu, i el ta bira-u bus kaminhu rétu.’ Vive sima Bíblia ta fla ta proteje-m i ta djuda-m ser filís. — Salmo 1:1-3.

Antis, N ta disprezaba nha kabésa. Má gósi N ten pas i N ta xinti ruspetu pa nha kabésa. N ten un vida linpu i N ta konsigi xinti perdon i ajuda di Jeová. Na anu 2000, N kaza ku Karolin, un irman bunita ki ta ama Jeová tanbê. Na nos kaza ten pas. Nu ta xinti kontenti di faze párti di un família na mundu interu ki ta mostra amor i ki ten un vida linpu.