1, 2. (a) Kal ki é diferénsa entri Jeová i umanus ki ten algun puder ô autoridadi? (b) Kuzê ki nu sta ben odja na kel studu li?

 TXEU algen ki ten puder ô ‘autoridadi’, gosta di manda na otus. (Mat. 20:25; Ecl. 8:9) Má Jeová nunka ka ta faze kel-li! Nbóra el é algen más poderozu na Séu ku Téra, el ta preokupa txeu ku nos ki é inperfetu. Jeová é un Deus bon i el ta preokupa ku kuzas ki nu ta xinti. El ta pensa na kuzas ki nu meste i nunka el ka ta pidi-nu un kuza ki nu ka ta konsigi faze. Pamodi el ‘ta lenbra ma nos é di téra.’ — Sal. 103:13, 14.

² Na Bíblia, nu ta atxa txeu izénplu ki ta mostra ma Jeová ta preokupa ku se sérvus. Nu ben odja três izénplu. Primeru, nu sta ben odja modi ki Deus djuda Samuel pâpia di un mensaji di julgamentu kóntra Eli, ki éra Saserdóti prinsipal, i tanbê kóntra se família. Sugundu, nu ta ben odja, modi ki Jeová mostra paxénxa na lida ku diskulpas di Muizes kantu el skodjedu pa ser líder di Israel. Tirseru, nu ta ben prende modi ki Jeová mostra ma el ta preokupaba ku israelitas  kantu el tra-s di Ijitu. Sima bu ta ba ta pensa na kes izénplu li, odja kuzê ki es ta inxina-u sobri Jeová i modi ki bu pode faze sima el.

 3. Un dia di noti, ki kuza stranhu kontise ku Samuel i kel-li ta pô-nu faze ki pergunta? (Odja dizenhu na komésu di studu.)

³ Samuel staba pikinoti kantu el kumesa ta sirbi na tabernákulu. (1 Sam. 3:1) Un dia di noti, dipôs ki Samuel ba deta, kontise un kuza stranhu. a (Lé 1 Samuel 3:2-10.) Samuel obi un vós ta txoma-l. El pensa ma éra Eli ki staba ta txoma-l, nton el kóre pa el i el fla: ‘Ale-m li; nhu txoma-m?’ Eli fla ma el ka txoma-l. Má kel vós txoma-l más dôs bês. Nton, Eli da kónta ma ken ki staba ta txoma Samuel, éra Jeová. Eli inxina Samuel modi ki el ta respondeba i Samuel obi ku el. Talvês bu ta pergunta: Pamodi ki Jeová ka fla Samuel désdi komésu ma éra el ki staba ta txoma-l? Bíblia ka ta fla. Má, pa manera ki kuzas kontise nu ta odja ma Jeová faze si pamodi el ta preokupaba ku Samuel. Modi?

4, 5. (a) Modi ki Samuel xinti ku kel diziginason ki Jeová da-l i modi ki kel situason rezolve na kel otu dia? (b) Kuzê ki kel-li ta inxina-nu sobri Jeová?

⁴ Lé 1 Samuel 3:11-18. Lei di Jeová ta flaba ma mininus devia ruspetaba un algen más grandi, prinsipalmenti si el éra un xéfi di tribu. (Êxo. 22:28; Lev. 19:32) Bu ta atxa ma éra faxi pa Samuel txiga na Eli i flaba el kel mensaji di julgamentu? Klaru ki nau! Bíblia ta fla ma Samuel staba ku ‘medu di konta Eli kel vizon’. Má, Deus dexa klaru pa Eli ma éra El ki staba ta txoma Samuel. Pur isu, Eli txoma Samuel i el fla-l: ‘Ka bu sukundi-m nada di kuzê ki El fla-u.’ Samuel obi ku el i el ‘konta-l tudu’.

⁵ Eli ka fika spantadu ku kel mensaji di Samuel. Antis di kel-li kontise, un ómi di Deus, dja flaba Eli un mensaji kuazi sima kel-li. (1 Sam. 2:27-36) Stória sobri Samuel ku Eli, ta mostra ma Jeová ten sabedoria i el ta preokupa ku kuzê ki se sérvus ta xinti.

 6. Kuzê ki nu pode prende na manera ki Deus djuda Samuel?

⁶ Si bo é jóven, kuza ki kontise ku Samuel pode djuda-u. El ta mostra ma Jeová ta ntende bus prubléma i el sabe modi ki bu sta ta xinti. Talvês bu ten txeu vergónha, i bu ta atxa difísil pâpia sobri Jeová ku kes algen más grandi ô ser diferenti di bus koléga di skóla. Má bu pode ten sertéza ma Jeová krê djuda-u. Fla-l na orason tudu ki bu sta ta xinti. (Sal. 62:8) Pensa na izénplus di jóvens ki sta na Bíblia sima Samuel. Pâpia ku otus irmon di kongregason. Pode ser kes di bu idadi ô kes más grandi ki bo, ki pasa pa mésmu prublémas ki bo. Es pode fla-u modi ki Jeová djuda-s na óra sértu i talvês di un manera ki nen es ka sta speraba.

7, 8. Modi ki Jeová mostra txeu preokupason ku Muizes?

⁷ Kantu Muizes tinha 80 anu, Jeová da-l un diziginason difísil. El tinha ki libertaba israelitas di Ijitu. (Êxo. 3:10) Di sertéza, kel-li éra un kuza ki Muizes ka sta speraba. El pasa uns 40 anu ta pastora animal na téra di Midian. Muizes  fla: ‘Ken ki é mi, pa N bai ti Faraó i tra israelitas di Ijitu?’ Pa djuda-l ten koraji Jeová fla-l: ‘N ta sta ku bo’. (Êxo. 3:11, 12) Tanbê Deus promete-l ma ‘ansions di Israel ta obiba se vós’. Má simé, Muizes fla-l: ‘Má imajina ki es ka obi ku mi’. (Êxo. 3:18; 4:1) Kel-li éra sima si Muizes ka sta kunfiaba na palavra di Jeová! Má Jeová kontinua ku paxénxa i el faze más un kuza. El da Muizes puder pa faze milagris. I Bíblia ta fla ma Muizes é kel primeru algen ki dadu puder pa faze milagri. — Êxo. 4:2-9, 21.

⁸ Muizes inda tenta ranja otu diskulpa. El fla ma el ka éra bon na pâpia. Nton Jeová fla: ‘N ta sta ku bo óras ki bu ta pâpia, i N ta inxina-u kuzê ki bu debe fla.’ Má kel-li konvense Muizes? Nau, pamodi el pidi Jeová pa manda otu algen. Na kel óra, Jeová fika xatiadu ku Muizes, i el tinha razon. Má simé, el mostra ma el ta preokupaba ku Muizes. El ntende kuzê ki el staba ta xinti i el skodje Aron pa ser porta-vós di Muizes. — Êxo. 4:10-16.

 9. Modi ki paxénxa i bondadi di Jeová djuda Muizes ser un bon líder?

⁹ Kuzê ki kel stória li ta inxina-nu sobri Jeová? Jeová é Deus más poderozu ki ten. El podia uzaba se puder pa poba Muizes medu i pa konvenseba el pa faze kel ki el manda-l. Má Jeová mostra paxénxa i el trata-l ku amor. Muizes éra umildi i Jeová promete ma sénpri el ta djudaba el. Má kel preokupason ki Jeová mostra pa Muizes da algun rezultadu? Klaru ki sin! Muizes bira un grandi líder. El sforsa pa mostra kel mésmu preokupason i bondadi pa otus algen, sima Jeová mostra-l. — Núm. 12:3.

10. Pamodi ki é bon nu imita manera di Jeová mostra preokupason pa otus?

¹⁰ Kuzê ki nu pode prende? Si bo é maridu, pai ô ansion na kongregason, bu ten algun autoridadi. Pur isu, é txeu inportanti bu imita Jeová i bu mostra  bondadi i paxénxa pa kes algen ki bu ta kuida di es. Mostra ma bu ta preokupa ku es. (Col. 3:19-21; 1 Ped. 5:1-3) Óras ki bu ta sforsa pa bu imita Jeová i Jizus, é más faxi un algen ben i pâpia ku bo. Asi bu ta konsigi nkoraja-s. (Mat. 11:28, 29) Bo tanbê bu pode bira un izénplu ki otus algen pode imita. — Heb. 13:7.

11, 12. Modi ki Jeová djuda israelitas xinti suguru kantu es sai di Ijitu?

¹¹ Kantu israelitas sai di Ijitu na anu 1513 antis di Jizus, pode ser ki es éra más di três milhon. Na meiu di tudu kes algen, staba mininu, algen grandi, algen duenti ô difisienti. Un grupu grandi sima kel-la, ta mesteba di un líder ki ta ntendeba es i ki ta kuidaba di es ku amor. Jeová uza Muizes pa faze kel-la. Asi, israelitas xinti suguru timenti es staba ta dexa kel úniku lugar ki es konxeba. — Sal. 78:52, 53.

¹² Kuzê ki Jeová faze pa se povu xinti suguru? Primeru, Jeová pô-s ta sai di Ijitu ‘organizadu sima trópa.’ (Êxo. 13:18) Kel manera organizadu djuda israelitas odja ma Jeová staba ta orienta-s. Tanbê duránti dia Jeová uza un ‘núven’ i di noti un ‘lus di lumi’ pa gia se povu. (Sal. 78:14) Kel-la éra un manera di Jeová flaba israelitas: “Ka nhos xinti medu. N ta gia i N ta proteje nhos.” Foi bon Jeová da-s kel sertéza pamodi situason ta ben konplikaba.

13, 14. (a) Modi ki Jeová mostra ma el ta preokupaba ku israelitas na Mar Burmedju? (b) Modi ki Jeová mostra ma el é más poderozu ki Faraó i se trópas?

¹³ Lé Êxodo 14:19-22. Imajina ma bu staba la djuntu ku israelitas. Na un ladu, staba trópas di Faraó i na kel otu ladu, staba Mar Burmedju. Bu ka ten undi bai. Dirapenti, Jeová faze un milagri. El poi kel núven ta bai fika tras di kanpamentu, entri nhos i kes genti di Ijitu. Kel núven, fika ta poi ladu di gentis di Ijitu tudu sukuru, má kanpamentu staba ku lus. Nton, bu odja Muizes ta stika mô pa riba di mar. Un béntu lésti abri un kaminhu grandi na meiu di mar ti kel otu ladu. Di un manera organizadu, abo, bu família i bus animal ta kumesa ta anda na meiu di mar, djuntu ku povu. Má lógu bu ta da kónta di un kuza stranhu: na meiu di mar ka sta lama i nen ka sta skorega. Txon sta séku i faxi di anda na el. Pur isu, mésmu kes algen ki ta anda divagar, konsigi txiga dretu i suguru na kel otu ladu di mar.

¹⁴ Lé Êxodo 14:23, 26-30. Timenti tudu kes kuza li sta ta kontise, kel Faraó tolu i orgulhozu, manda tudu se trópas pa bai nhos tras na meiu di mar. Más un bês bu ta odja Muizes ta labanta mô pa riba di mar i agu djunta na kunpanheru. Kel agu bafa Faraó i se trópas. Ninhun di es ka skapa! — Êxo. 15:8-10.

15. Kuzê ki kel stória li ta inxina-u sobri Jeová?

¹⁵ Na kel stória li nu odja ma Jeová é un Deus organizadu. Kel kualidadi li ta djuda-nu xinti suguru i protejedu. (1 Cor. 14:33) Tanbê, nu ta prende ma Jeová é sima un pastor ki ta ama se ovelhas. El sabe modi ki el ta kuida di se povu. É sima ki el ta brasa se povu ku amor pa proteje-s di ses inimigu. Sabe kel-li ta konsola-nu txeu, inda más gósi ki nu sta ta vive pértu di fin. — Prov. 1:33.

16. Pamodi ki é bon nu torna lenbra manera ki Jeová salva israelitas?

¹⁶ Oji tanbê Jeová ta kuida di se  povu. El ta djuda-s ten un amizadi fórti ku el i el ta proteje-s di ses inimigu. I el ta kontinua ta faze kel-li duránti grandi tribulason ki sta kuazi ta kontise. (Apo. 7:9, 10) Ka ta nporta si nos é jóven ô algen grandi, si nu ten bon saúdi ô si nos é difisienti. Povu di Jeová ka ta dexa medu toma kónta di es duránti grandi tribulason. b Má, es ta faze otu kuza. Es ta lenbra di kuzê ki Jizus fla: “Nhos sakédu na kanéla i nhos labanta kabésa pa riba, pamodi Deus ka ta dura ku ben salva nhos.” (Lúkas 21:28, BPK ) Mésmu óras ki Gogi ô grupu di nasons ku mutu más puder ki Faraó, ben ataka povu di Deus, es ta kontinua ta kúnfia na Jeová. (Eze. 38:2, 14-16) Pamodi? Pamodi es sabe ma Jeová ka muda. El ta torna mostra ma el é un Salvador ki ten puder i ma el ta preokupa ku se povu. — Isa. 26:3, 20.

17. (a) Pamodi ki é bon nu pensa na kes stória di Bíblia ki ta mostra modi ki Jeová kuida di se povu? (b) Kuzê ki nu sta ben odja na kel otu studu?

¹⁷ Na kel studu li, nu odja sô alguns izénplu ki ta mostra modi ki Jeová ta preokupa, ta gia i ta salva se povu. Óras ki bu ta pensa na es, tenta prende un kuza novu sobri manera di ser di Jeová i tenta djobe algun kuza ki nunka bu ka reparaba antis. Kes kuza ki bu prende pode fika na bu menti i na bu korason. I bu amor pa Jeová i bu fé na el ta fika kada bês más fórti. Na kel otu studu, nu sta ben prende modi ki nu pode imita Jeová na mostra preokupason ku otus. Nu sta ben odja modi ki nu pode faze kel-li na família, na kongregason i na pregason.