1. Na kel últimu noti ki Jizus pasa ku se disiplus, ki asuntu inportanti el pâpia ku es?

 NA KEL últimu noti ki Jizus pasa ku se disiplus, el pâpia sobri amor kuazi 30 bês. El fla se disiplus ma es debe ‘ama kunpanheru.’ (João 15:12, 17 ) Kel amor li ta ben sérba sima un marka, ki ta djudaba otus algen sabe ma es éra sigidoris verdaderu di Jizus. (João 13:34, 35) Kel amor ki Jizus pâpia di el, é más di ki sô un sentimentu. É un amor ki ta pô-u faze algun kuza pa djuda otus algen. Jizus fla: ‘Ningen ka ten amor más grandi di ki kel ki da se vida pa se amigus. Anhos é nhas amigu si nhos faze kel ki N ta manda nhos.’ — João 15:13, 14.

 2. (a) Kuzê ki ta mostra ken ki é povu di Deus oji? (b) Ki perguntas nu sta ben responde na es studu?

² Sérvus di Jeová oji é konxedu pa amor i union fórti ki es ten pa kunpanheru. (1 João 3:10, 11 ) Ka ta nporta nos é di ki país, tribu ô língua ki nu ta pâpia. Nu ta ama kunpanheru di verdadi. Pamodi ki kel amor li é txeu inportanti oji? Modi ki Jeová i Jizus ta mostra amor pa  nos? I modi ki nu pode mostra es amor ki ta anima i ta konsola otus? — 1 Cor. 8:1.

 3. Kuzê ki txeu algen sta ta faze pamodi prublémas di ténpu di fin?

³ Nu sta ta vive na ‘ténpu di fin’ i vida sta ‘xeiu di difikuldadi i tristéza’. (Sal. 90:10; 2 Tim. 3:1-5) Txeu algen sta ta sufri dimás, ki es tene gana di dizisti di vida. Piskiza ki fazedu ta mostra ma, más di 800 mil algen ta mata kabésa tudu anu. Si nu faze kónta, nu ta odja ma na kada 40 sugundu un algen ta mata kabésa. É tristi di sabe ma mésmu alguns irmon ki pasa pa kes prubléma, tanbê disidi tra ses vida.

 4. Ki sérvus fiel di Jeová xinti gana móre?

⁴ Na ténpu ki Bíblia skrebedu, alguns sérvu fiel di Jeová, xinti dizanimadu pamodi prubléma ki es staba ta pasa. Pur isu, alguns di es atxa ma éra midjór si es moreba. Pur izénplu, Jó staba txeu dizanimadu ki el fla: ‘Dja N sta fartu di nha vida, N ka krê vive más.’ (Jó 7:16; 14:13 ) Proféta Jonas tanbê fika diziludidu ku kuzas ki kontise na se diziginason ki el fla: ‘Gósi, ó Jeová, favor, tra-m nha vida, pamodi pa mi, é midjór N móre di ki N fika bibu.’ (Jonas 4:3 ) Tanbê proféta Elias xinti txeu dizanimadu ki el pidi Jeová pa dexa-l móre. El fla: ‘Dja sta bon! Gósi, ó Jeová, tra-m nha vida’. (1 Reis 19:4 ) Má Jeová ta daba txeu valor pa kada un di es i el krê pa es viveba. Envês di kondena-s pa kuza ki es staba ta xinti, Jeová djuda-s xinti vontadi di vive. El djuda-s ku amor pa es pode kontinuaba ta sirbi-l.

 5. Pamodi ki nos irmons meste nos amor?

⁵ Oji, txeu di nos irmons sta ta pasa pa situasons difísil i es meste di nos amor. Alguns ta fazedu trósa i ta pirsigidu. Otus ta kritikadu ô ses koléga di trabadju ta pâpia mal di es. Talvês otus sta kansadu i dizanimadu pamodi es ten ki trabadja txeu óra ô pa kunpri prazu di trabadju ki é txeu difísil. Inda ten kes ki ta lida ku prubléma difísil déntu di kaza. Talvês es é kazadu ku algen ki ka ta sirbi Jeová i ki ta sta sénpri ta kritika-s. Pamodi kes kuza li i otus prubléma, alguns ta xinti dizanimadu i es ta atxa ma es ka ten valor.

 6. Modi ki Jeová ta djuda se sérvus ku amor?

⁶ Jeová promete se sérvus ma el ta ama-s gósi i ma el ta kontinua ta ama-s. Imajina modi ki israelitas xinti kantu Jeová fla-s: ‘Bu pasa ta ten txeu valor pa nhas odju, bu dadu ónra i N ta ama-u. Ka bu ten medu, pamodi N sta ku bo.’ (Isa. 43:4, 5) Bu pode ten sertéza ma Jeová ta ama kada un di nos. a Bíblia ta promete: ‘Sima un ómi di géra balenti, el ta salva. Pamodi bo, el ta grita ku grandi alegria.’ — Sof. 3:16, 17.

 7. Modi ki amor di Jeová é sima amor di mai? (Odja dizenhu na komésu di studu.)

⁷ Ka ta nporta kal ki é prubléma ki  nu sta ta pasa, Jeová promete ma el ta da-nu forsa i ma el ta konsola-nu. El mostra kuzê ki el ta xinti pa nos kantu el fla: ‘Nhos ta ben karegadu na brasus, i nhos ta ninadu na ragás. Sima un mai ta konsola se fidju, N ta kontinua ta konsola nhos.’ (Isa. 66:12, 13) Pensa modi ki un mininu ta xinti óras ki se mai ta karega-l ô ta nina-l na ragás! Kel izénplu li ta mostra ma Jeová ta ama-nu txeu i el krê pa nu xinti protejedu. Bu pode ten sertéza ma Jeová ta ama-u i el ta da-u txeu valor. — Jer. 31:3.

8, 9. Modi ki amor di Jizus ta da-nu forsa?

⁸ Odja otu próva ma Jeová ta ama-nu. Bíblia ta fla: ‘Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ (João 3:16 ) Si Jizus da se vida pa nos, é pamodi el tanbê el ta ama-nu i se amor ta da-nu txeu forsa. Bíblia ta fla ma nen mésmu ‘tribulason ô frónta’ ka ta pode ‘sipara-nu di amor di Kristu.’ — Rom. 8:35, 38, 39.

⁹ Alvês nu ta pasa pa prublémas ki ta dexa-nu sen forsa i dizanimadu ô ki ta tra-nu alegria na nos sirvisu pa Jeová. Má óras ki nu lenbra di kel grandi amor ki Jizus ten pa nos, nu ta xinti forsa pa nu ka dizisti. (Lé 2 Coríntios 5:14, 15.) Amor di Jizus ta pô-nu ku vontadi di kontinua ta vive i ta sirbi Jeová. El ka ta dexa-nu dizisti sikrê ki nu sta ta sufri pamodi dizastri, pirsigison, diziluzon ô preokupason.

10, 11. Kenha ki debe nkoraja irmons? Splika.

¹⁰ Un manera ki Jeová ta djuda-nu é através di kongregason. Óras ki nu ta mostra amor pa nos irmons ku irmans, nu sta ta mostra ma nu ta ama Jeová. Nu ta faze tudu kel ki nu pode pa djuda nos irmons sabe ma es ten txeu valor i ma Jeová ta ama-s. (1 João 4:19-21 ) Apóstlu Polu  skrebe: ‘Nhos kontinua ta nkoraja i ta djuda kunpanheru, sima nhos sta ta faze.’ (1 Tes. 5:11) É ka sô ansions ki debe faze kel-li. Kada un di nos pode imita Jeová i Jizus na nkoraja nos irmons ku irmans. — Lé Romanos 15:1, 2.

¹¹ Alguns na kongregason ten depreson fórti ô txeu preokupason, pur isu es meste ajuda di dotor i di ramedi. (Luc. 5:31) Ansions i otus na kongregason sabe ma es é ka dotor, má es pode djuda i konsola kes ki sta ta sufri. Tudu algen na kongregason pode ‘konsola kes ki sta deprimidu, djuda kes fraku i ten paxénxa ku tudu algen.’ (1 Tes. 5:14) Nos tudu nu meste tenta ntende modi ki nos irmons sta xinti. Nu meste ten paxénxa ku es i pâpia di un manera ki ta konsola-s óras ki es sta dizanimadu. Bu ta tenta anima otus? Kuzê más ki bu pode faze pa bu konsola i nkoraja otus?

12. Da izénplu di un algen ki xinti nkorajadu ku amor ki kongregason mostra-l.

¹² Odja kuzê ki un irman na Europa fla: “Alvês N ta pensa na mata kabésa, má nha kongregason é un bon ajuda. El salva-m nha vida. Irmons ku irmans sénpri ta nkoraja-m i ta mostra-m amor. É sô alguns irmon ki sabe ma N ten depreson, má N ta xinti ma tudu es ta djuda-m. Un kazal di irmons, é sima nha pai ku nha mai. Es ta kuida di mi i es sta prontu pa djuda-m 24 óra pur dia.” É klaru ki nen tudu nos ka ta pode djuda di mésmu manera. Má kada un di nos pode faze nos midjór pa djuda nos irmons ku irmans. b

13. Kuzê ki nu meste faze pa nu anima otus?

¹³ Sta prontu pa obi. (Tia. 1:19) Nu ta mostra amor pa un irmon ki sta dizanimadu óras ki nu ta obi-l ku txeu atenson. Tenta imajina modi ki bu ta xintiba si bu staba na se lugar. Faze-l pergunta ku bondadi ki ta djuda-u ntende dretu modi ki el sta ta xinti. Dexa parse na bu róstu ma bu sta preokupadu ku el di verdadi. Asi, kel irmon ta xinti vontadi di fla-u tudu kuza ki el sta ta xinti. Ten paxénxa i ka bu korta-l konbérsu. Si bu obi-l ku paxénxa, bu ta konsigi ntende-l más midjór. Kel-li ta djuda kel irmon ten más kunfiansa na bo i é más faxi el obi kuzê ki bu krê fla-l. Óras ki otus repara ma nu ta preokupa ku es di verdadi, es ta xinti más animadu.

14. Pamodi ki nu debe ivita julga otus?

¹⁴ Ka bu julga ningen. Si un algen ki sta dizanimadu repara ma bu sta ta julga-l, el ta xinti más piór inda. Tanbê ta fika más difísil di bu djuda-l. Bíblia ta fla: ‘Palavras ki ta fladu sen pensa é sima finka algen un spada, má língua di kes algen sábiu é un kura.’ (Prov. 12:18) Ninhun di nos ka ta krê mágua un algen dizanimadu, ku palavras duru. Má, si nu fla un  kuza sen pensa pa un algen ki sta dizanimadu, nu pode pô-l ta sufri más txeu. Si nu krê konsola otus algen ku amor, nu meste faze di tudu, pa nu ntende ses situason. — Mat. 7:12.

15. Ki bons ajuda nu pode uza pa konsola otus?

¹⁵ Uza Palavra di Deus pa konsola otus. (Lé Romanos 15:4, 5.) Bíblia ta ben di Deus ki ta djuda-nu aguenta firmi i ki ta konsola-nu. Pur isu, nu ta xinti konsoladu óras ki nu ta lé se Palavra. Tanbê nu ten Índice das Publicações da Torre de Vigia i Guia de Pesquisa para Testemunhas de Jeová. Kes publikason li ta djuda-nu atxa testus di Bíblia ki ta anima-nu i ta mostra-nu modi ki nu ta lida ku txeu tipu di prublémas. Nton, nu pode uza kes testu pa konsola nos irmons na fé.

16. Ki kualidadis ta djuda-nu nkoraja un algen ki sta dizanimadu?

¹⁶ Mostra bondadi. Kel kualidadi li é txeu inportanti óras ki nu ta nkoraja i djuda otus algen. Jeová é ‘Pai di mizerikórdia i Deus di tudu konsolu’ i el ten konpaxon. (Lé 2 Coríntios 1:3-6; Luc. 1:78; Rom. 15:13) Polu dexa un bon izénplu sobri kel-li, pamodi el imita Jeová. É pur isu ki el fla: ‘Nu bira mansu na nhos meiu, sima un mai ki ta kuida i ta da se fidju mama ku mimu. Nton, ku amor ki nu ten pa nhos, nu staba disididu ka sô na pâpia ku nhos di notísias sábi di Deus, má tanbê na da nhos tudu kel ki nu ten, pamodi nu pasa ta ama nhos txeu.’ (1 Tes. 2:7, 8) Óras ki nu ta imita bondadi di Jeová, nu pode ser un respósta di orason pa kes ki sta dizanimadu.

17. (a) Kuzê ki nu ka debe spéra di nos irmon? (b) Modi ki kel-li ta djuda-nu nkoraja-s?

¹⁷ Ka bu spéra pa bus irmon ser perfetu. Si bu spéra ma bus irmon ka ta fadja, bu ta fika diziludidu. (Ecl. 7:21, 22) Nu debe ser sima Jeová, ki sabe ma tudu algen ta fadja. Pur isu, nu meste ten paxénxa ku kunpanheru. (Efé. 4:2, 32) Nu ka debe poi nos irmons ta pensa, ma es ka sta konsigi faze ses midjór i nen konpara-s ku otus irmon. Envês di kel-li, nu krê nkoraja-s i fla-s kes kuza dretu ki es sta ta faze. Kel-li ta djuda-s, ta nkoraja-s i ta pô-s xinti alegria na ses sirvisu pa Jeová. — Gál. 6:4.

18. Pamodi ki nu krê djuda otus ku amor?

¹⁸ Kada sérvu di Jeová ten txeu valor pa el i pa Jizus ki da se vida pa nos. (Gál. 2:20) Nu ta ama nos irmons i nos irmans di korason i nu krê kuida di es ku amor. Pa nu konsigi djuda-s, nu meste ‘npenha pa kes kuza ki ta traze pas i pa kes kuza ki ta djuda kunpanheru.’ (Rom. 14:19) Ka ta dura, Paraízu ta ben i ningen más ka ta ten motivu pa xinti dizanimadu. Ka ta ten más duénsa, géra, mórti pamodi pekadu, pirsigison, prublémas na família i diziluzon. Na fin di mil anu, tudu algen ta bira perfetu. Kes ki mante firmi na kel últimu próva ta bira fidjus di Jeová i es ta ten ‘liberdadi ku glória di fidjus di Deus.’ (Rom. 8:21) Timenti kel ténpu ka txiga, nu kontinua ta djuda kunpanheru i ta mostra amor ki ta djuda!