Alvês bu ta atxa ma é difísil lenbra di kuzê ki bu studa? Di vês en kuandu kel-li ta kontise ku nos tudu. Kuzê ki bu pode faze? Pensa otu bês na kes pontu más inportanti.

Timenti bu ta studa, faze un pauza di vês en kuandu pa bu pensa na kes pontu prinsipal. É kel-li ki apóstlu Paulu insentiva irmons ku irmans pa faze timenti es ta studaba se karta. El fla: “Kel-li é kel pontu prinsipal”. (Ebr. 8:1) Di kel manera li, el djuda-s intende kuzê ki el krê flaba, i modi ki tudu kel ki el fla staba ligadu ku kunpanheru.

Bu pode tra un ténpu, talvês uns 10 minutu dipôs di studa pa bu midita na kes pontu prinsipal ki bu studa. Si bu ka konsigi lenbra dretu di kes pontu, djobe otu bês kes subtéma ô lé kes primeru frazi di kada parágrafu pa djuda-u lenbra. Si bu prende un kuza novu, tenta splika-l na bus própi palavra. Óras ki bu ta faze un rezumu di kes kuza ki bu prende, ta ser más fásil pa bu lenbra di es. Tanbê, bu pode intende midjór modi ki bu pode faze sima bu prende.