1. Kuzê ki un kriston batizadu meste kontinua ta faze?

ABO é batizadu? Si bo é, kantu bu batiza bu mostra na frenti di otus algen ma bu ten fé na Jeová i ma bu krê sirbi-l djuntu ku se organizason. * Sima un kriston batizadu, bu meste kontinua ta bira bu fé na Jeová más fórti. I tanbê bu meste kontinua ta ten más kunfiansa ma Jeová sta uza se organizason oji.

2-3. Di ki manera Jeová sta orienta se organizason oji? Da izénplus.

² Oji, Jeová sta orienta se organizason di un manera ki ta mostra se manera di ser, se obijetivu i kuzê ki el ta atxa ma é dretu ô mariadu. Nu ben pâpia di três kualidadi di Jeová ki nu ta odja klaru na se organizason.

³ Primeru, Deus ta trata tudu algen igual. (Atos 10:34 ) Pamodi amor, Jeová da se Fidju pa ‘resgata tudu algen’. (1 Tim. 2:6; João 3:16 ) Jeová sta uza se povu pa prega notísias sábi pa tudu kes ki krê obi. Asi, el sta djuda-s ten fé na resgati pa es pode salva. Sugundu, Jeová é un Deus di órdi i di pas. (1 Cor. 14:33, 40) Pur isu, nu ta spéra ma kes ki ta adora-l ta sirbi-l djuntu sima un grupu organizadu i na pas. Tirseru, Jeová é kel ‘Grandiozu Instrutor’. (Isa. 30:20, 21) Pur isu, se organizason ta konsentra na inxina Bíblia na kongregason i na pregason. Modi ki Jeová mostra kes três kualidadi li na kongregason na ténpu di apóstlus? Modi ki povu di Jeová sta imita kes kualidadi li na  nos ténpu? I modi ki spritu santu pode djuda-u sirbi djuntu ku organizason di Jeová oji?

4. Sima sta na Atus 1:8, kuzê ki Jizus manda se sigidoris pa faze, i kuzê ki ta ben djudaba es?

⁴ Na ténpu di apóstlus. Jizus ta pregaba un mensaji di speransa pa tudu algen. (Luc. 4:43) I el manda se sigidoris pa kontinua ta faze kel trabadju ki el kumesa, i pa es daba tistimunhu “na tudu kantu di mundu.” (Lé Atus 1:8, Bíblia Na Prugrésu Di Traduson Pa Lingua Kabuverdianu, BPK ) Má é klaru ki kes disiplu ka ta konsigi fazeba es trabadju es sô. Es ta ben mesteba di spritu santu, ‘kel ajudador’ ki Jizus dja prometeba es. — João 14:26; Zac. 4:6.

5-6. Modi ki spritu santu djuda disiplus di Jizus?

⁵ Sigidoris di Jizus resebe spritu santu na Pentikósti di anu 33. Ku ajuda di kel spritu, lógu es kumesa ta prega, i na poku ténpu milharis di algen seta notísias sábi. (Atos 2:41; 4:4 ) Kantu kumesa pirsigison, kes disiplu ka dexa medu toma kónta di es, má es pidi ajuda di Jeová. Es ora: “Da bu sérvus tudu koraji pa fla Bu Palavra.” Nton, es fika xeiu di spritu santu i es kontinua ‘ta pâpia di Palavra di Déus ku koraji.’ — Atus 4:18-20, 29, 31, BPK.

⁶ Disiplus di Jizus tanbê pasa pa otus prubléma. Pur izénplu, tinha poku kópia di Skrituras. Tanbê, es ka tinha publikasons ki ta splikaba Skrituras sima nu ten gósi. I es tinha ki pregaba pa pesoas ki ta papiaba línguas diferenti. Sikrê ku tudu kes prubléma li, kes disiplu zelozu konsigi faze kel ki ta parseba inposível: déntu di uns 30 anu, dja es pregaba notísias sábi pa ‘tudu kriason baxu di séu’. — Col. 1:6, 23.

7. Modi ki sérvus di Jeová na nos ténpu sabia kuzê ki Deus krê pa es fazeba, i kuzê ki es faze?

⁷ Na nos ténpu. Jeová sta kontinua ta orienta i ta da se povu forsa. Kel manera prinsipal ki Jeová ta orienta-nu, é através di Bíblia, ki skrebedu ku ajuda di spritu santu. Na Bíblia, nu ta lé sobri pregason ki Jizus faze i órdi ki el da pa nu kontinua ta faze kel trabadju ki el kumesa. (Mat. 28:19, 20) Na julhu di 1881, kel revista li flaba: “Nu ka txomadu, nen nu ka skodjedu ku spritu santu pa resebe ónra i pa djunta rikéza, má pa nu uza tudu kel ki nu ten pa prega kes notísia sábi.” Kel folhetu A Quem se Confia a Obra, ki publikadu na inglês na anu di 1919, ta flaba: “Ta parse ma trabadju é grandi dimás, má trabadju é di sinhor, i ku se forsa nu ta faze-l.” Pur isu, sima na ténpu di apóstlus, kes irmon di nos ténpu tinha koraji i es sforsa txeu pa faze ses trabadju. Es ta kunfiaba ma spritu santu ta djudaba es prega pa tudu tipu di algen. Anos tanbê, nu kontinua ku kel mésmu kunfiansa.

8-9. Kuzê ki organizason di Jeová ten stadu ta uza pa leba notísias sábi pa más algen?

⁸ Organizason di Jeová sénpri uza kes midjór feraménta ki ten pa spadja notísias sábi. Kes feraménta ta inklui publikasons inprimidu, “Fotodrama da Criação”, fonógrafu, karu di son, prugramas di rádiu, i gósi konputador i internet. Tanbê, organizason di Deus sta faze kel trabadju más grandi di traduson ki dja fazedu! Pamodi? Asi pa tudu tipu di algen pode obi notísias sábi na ses própi língua. Jeová ta trata tudu algen igual. I dja el flaba ma notísias sábi ta sérba pregadu na ‘tudu  nasons, tribus, línguas i povus.’ (Apo. 14:6, 7) El krê pa mensaji di Reinu txiga na tudu algen.

⁹ I kes algen ki é difísil nu pâpia ku es, talvês pamodi es ta mora na prédius ku txeu suguransa? Pa leba notísias sábi pa kes algen li, organizason di Jeová kumesa ta uza otus manera di da tistimunhu pa públiku. Pur izénplu, na anu 2001, Grupu Enkaregadu di Óbra aprova pa irmons na Fransa uza karinhus di publikason i otus manera di mostra nos publikason. Dipôs, irmons na otus lugar kumesa ta prega di kel manera la i es tevi bons rezultadu. Na anu 2011, sprimentadu un otu manera di prega na un di kes lugar ki ten más algen na sidadi di Nova York, na Mérka. Na kel primeru anu, es dexa 102.129 livru i 68.911 revista. I 4.701 algen pidi un studu di Bíblia! Nu ka ten dúvida ma spritu santu staba ta orienta tudu kel trabadju li. Pur isu, Grupu Enkaregadu di Óbra aprova pa irmons na mundu interu uza karinhus i otus manera di mostra nos publikason.

10. Kuzê ki nu pode faze pa midjora nos manera di prega i inxina?

¹⁰ Kuzê ki bu pode faze. Tra tudu pruvetu di kel trenamentu ki Jeová ta da-nu na runion. Prega sénpri djuntu ku bu grupu pa pregason. Na bu grupu, bu pode resebe ajuda ki bu meste pa midjora bu manera di prega i inxina. Tanbê izénplus di otus pode nkoraja-u. Ka bu dizisti di prega sikrê ku prubléma. Sima kel testu ki tradu téma di kel studu li ta fla, nu ta faze vontadi di Deus ka na nos própi forsa, má na forsa di spritu santu. (Zac. 4:6) Nu ten sertéza ma Deus ta da-nu se forsa pamodi nu sta faze se trabadju.

11. Modi ki grupu enkaregadu di óbra na ténpu di apóstlus trabadja unidu pa mante órdi na povu di Deus?

¹¹ Na ténpu di apóstlus. Grupu enkaregadu di óbra na Jiruzalen ta trabadjaba unidu pa mante órdi i pas na povu di Deus. (Atos 2:42 ) Pur izénplu, na anu 49 D.J., kantu kumesa kel prubléma  sobri sirkunsizon, spritu santu orienta grupu enkaregadu di óbra pa djobe kel asuntu. Si kongregason kontinuaba divididu pamodi kel prubléma, trabadju di pregason ta fikaba prujudikadu. Sikrê kes apóstlu i ansions éra judeu, es ka dexa tradison di judeus ô kes ki ta difendeba kes tradison influénsia ses disizon. Envês di kel-li, es djobe ajuda na Palavra di Deus i na spritu santu pa sabe kuzê ki es ta fazeba. (Atos 15:1, 2, 5-20, 28 ) Kal ki foi rezultadu? Jeová abênsua ses disizon. Asi, kongregason kontinua na pas i unidu, i es kontinua ta prega notísias sábi. — Atos 15:30, 31; 16:4, 5.

12. Kuzê ki ta mostra ma ten órdi i pas na organizason di Jeová oji?

¹² Na nos ténpu. Organizason di Jeová sénpri sforsa pa mante órdi i pas na Se povu. Revista Tori di Vijia di Sion i Mensajeru di Prezénsa di Kristu di 15 di novénbru di 1895, na inglês, tinha un artigu ku téma: “Faze kuzas dretu i na órdi”. Kel artigu tradu di 1 Coríntios 14:40 i el ta flaba: “Kes apóstlu tinha txeu kuza pa flaba kel primeru Igreja sobri órdi. . . I é inportanti nu kontinua ta sigi ku txeu kuidadu kes ‘kuza ki skrebedu antis, pa nos instruson’.” (Rom. 15:4) Oji tanbê, nu ta pode odja na organizason di Jeová kel mésmu dizeju di mante órdi i pas ki kes kriston na ténpu di apóstlus tinha. Pur izénplu, si bu ba sisti studu di Sentinéla na otu kongregason ô ti na otu país, bu ta odjaba modi ki studu ta fazedu i ki artigu ta studadu. Kel óra bu ta xintiba avontádi! É sô spritu santu di Deus ki ta pô-nu sta unidu di kel manera li! — Sof. 3:9, nóta di rodapé.

13. Ki perguntas Tiago 3:17 ta pô-nu ta faze pa nos kabésa?

¹³ Kuzê ki bu pode faze. Jeová krê pa se povu sforsa pa ‘mante unidu ku spritu, na kel ligason ki ta da pas.’ (Efé. 4:1-3) Nton pergunta bu kabésa: ‘N ta npenha pa pas i union na kongregason? N ta obi ku kes ki ta toma kónta di kongregason? Otus algen pode kunfia na mi, inda más si  N ten responsabilidadi na kongregason? N ta txiga na óra, N ta djuda i N sta prontu pa sirbi?’ (Lé Tiago 3:17.) Si bu odja ma bu pode midjora na algun di kes kuza li, faze orason ta pidi spritu santu. Sima bu ta ba ta dexa spritu santu muda bu manera di pensa i di aji, bus irmons ta ama-u inda más txeu i ta da-u más valor.

14. Sima sta na Colossenses 1:9, 10, modi ki Jeová inxina se povu na ténpu di apóstlus?

¹⁴ Na ténpu di apóstlus. Jeová gosta txeu di inxina se povu. (Sal. 32:8) El ta odja-nu sima fidjus ki el krê txeu. Pur isu, el krê pa nu konxe-l, pa nu ama-l i pa nu vive pa tudu ténpu. Nunka kel-li ka ta kontiseba si el ka ta inxinaba nos. (João 17:3 ) Na ténpu di apóstlus, Jeová uza kongregason pa inxina se povu. (Lé Colossenses 1:9, 10.) Spritu santu, ki é kel ‘ajudador’ ki Jizus prometeba, tanbê djuda se disiplus. (João 14:16 ) Spritu santu djuda-s ntende Palavra di Deus más dretu i lenbra txeu kuza ki Jizus fla i faze, sima kes ki sta skrebedu na Ivanjélhu. Kel konhisimentu li poi fé di kes kriston na ténpu di apóstlus ta fika más fórti. I tanbê, ses amor pa Deus, pa se Fidju i pa kunpanheru fika más fórti.

15. Modi ki nu sta odja Jeová ta kunpri se promésa ki sta na Isaías 2:2, 3 ?

¹⁵ Na nos ténpu. Jeová dja flaba ma ‘na ténpu di fin’ pesoas di tudu nason ta binha pa se monti. Kel-li krê fla ma es ta ben djuntaba ku se adoradoris verdaderu pa prende sobri se kaminhus. (Lé Isaías 2:2, 3.) Oji, nu sta odja kel profesia li ta kunpri. Adorason verdaderu é mutu más midjór di ki kalker otu tipu di adorason falsu. I Jeová sta da se povu un monti informason ku bazi na Bíblia. (Isa. 25:6) El ta uza ‘skravu fiel i prudenti’ pa da-nu  tudu kel informason li i di maneras diferenti. Pur izénplu, nu pode lé artigus, obi diskursus i odja dizenhus animadu. (Mat. 24:45) Nu ta xinti sima Eliú, amigu di Jó, ki tinha bon motivu pa flaba: ‘Ki instrutor é sima [Deus]?’ — Jó 36:22.

16. Kuzê ki bu pode faze pa bu tra pruvetu di kes kuza ki Jeová ta uza pa inxina-nu?

¹⁶ Kuzê ki bu pode faze. Spritu santu ta djuda-u aplika na bu vida kuzê ki bu lé i ki bu studa na Palavra di Deus. Faze orason sima salmista ki fla: ‘Ó Jeová, inxina-m na bu kaminhu. N ta anda na bu verdadi. Da-m un korason konplétu pa N pode ruspeta bu nómi.’ (Sal. 86:11) Nton, kontinua ta lé i ta studa Bíblia i otus publikason ki Jeová ta da-nu através di se Palavra i di se organizason. É klaru ki bu obijetivu ka debe ser sô ten konhisimentu. Bu krê pa verdadi fika gravadu na bu korason i bu krê aplika-l na bu vida. Spritu santu di Jeová pode djuda-u faze kel-li. Tanbê, bu krê nkoraja bus irmons ku irmans. (Heb. 10:24, 25) Pamodi? Pamodi es é bu família. Faze orason ta pidi spritu santu pa djuda-u da komentárius di korason na runion i pa bu faze bu midjór óras ki bu ten un párti. Si bu faze kes kuza li, bu sta mostra Jeová ku se Fidju ma bu ta ama ses ‘ovelhas’ ki ten txeu valor pa es. — João 21:15-17.

17. Kuzê ki bu pode faze pa mostra ma bu ta apoia organizason di Jeová di manera lial?

¹⁷ Ka ta dura, úniku organizason ki ta ben fika na Téra é kel ki spritu santu di Deus sta ta orienta. Pur isu, trabadja ku zelu djuntu ku organizason di Jeová. Pâpia di notísias sábi ku tudu algen, pa mostra ma bu ta ama i trata tudu algen igual sima Jeová. Npenha pa ten union na kongregason, asi bu ta mostra ma bu ta ama órdi i pas sima Jeová. Tra pruvetu di tudu informasons ki nos Grandiozu Instrutor ta da-nu. Di kel manera li, bu ka ta ben xinti medu óras ki mundu di Satanás kaba. Má, bu ta ten koraji i bu ta ben sta na meiu di kes ki di manera lial ta sirbi Jeová i se organizason.