N nase na anu 1948, na un vila pikinoti ki ta fika na Nijéria, na Áfrika. Duránti kel ténpu, nha tiu Moustapha, ki é irmon más pikinoti di nha pai i dipôs nha irmon más grandi, ki txoma Wahabi bira Tistimunhas di Jeová. Kantu N tinha 9 anu, nha pai móre. N fika tristi dimás. Wahabi fla-m ma N pode ben odja papa otu bês na resureison. Kel-la konsola-m txeu i motiva-m pa N kumesa ta studa Bíblia. N batiza na anu 1963. Nhas três otu irmon batiza tanbê.

Na anu 1965, N bai atxa Wilson, nha irmon más grandi, na sidadi di Lagos i N fika kontenti di sta djuntu ku otus pioneru fíksu di kongregason Igbobi. Ses alegria i ses zelu motiva-m i na janeru di anu 1968, N bira pioneru tanbê.

Un irmon ki ta sirbiba na Betel ki txomaba Albert Olugbebi, faze un runion spesial ku nos ki éra jóvens pa fla-nu ma staba ta mestedu pionerus spesial na nórti di Nijéria. N ta lenbra na irmon Albert fla di manera animadu: “Nhos é jóven i nhos pode uza nhos ténpu i nhos forsa pa Jeová. Tene txeu trabadju pa faze la!” N krê sérba sima Izaías  i bai pa kalker lugar ki Jeová krê pa N baba. Pur isu, N prenxe pitison pa ser pioneru spesial. — Isa. 6:8.

Na maiu di anu 1968, N diziginadu pa N ser pioneru spesial na sidadi di Kano, ki ta fika na nórti di Nijéria. Kel-li kontise duránti Géra Sivil ki é konxedu pa géra di Biafra (ki dura di anu 1967 ti anu 1970). Kel géra traze txeu sufrimentu i mórti na nórti di Nijéria i dipôs el spadja ti lésti di Nijéria. Un irmon tenta konvense-m pa N ka bai pa nórti di Nijéria pamodi el ka kreba pa N panhaba pankada. Má, N fla-l: “Obrigadu pa bu preokupason. Má si Jeová krê pa N sirbi-l na kel diziginason li, N ka ten dúvida ma el ta ba sta ku mi.”

Foi tristi odja kuzê ki kontise duránti géra na sidadi di Kano. Kel géra sivil distrui kel sidadi grandi. Duránti pregason, alvês nu ta odjaba korpu di pesoas ki móre duránti géra. Enbóra tinha alguns kongregason na Kano, maioria di irmons di la tevi ki fuji. Fika ménus ki 15 publikador la, má es staba ku medu i dizanimadu. Irmons ku irmans fika txeu kontenti kantu ki ami i más 5 pioneru spesial txiga la. Nu inkoraja-s i es xinti midjór. Nu djuda-s organiza runions i trabadju di pregason otu bês i es kumesa ta manda rilatórius i ta pidi filial publikasons.

Mi ku kes otu pioneru spesial, nu kumesa ta prende língua ausá. Txeu algen ta obiba nos óras ki nu ta pregaba mensajen di Reinu na ses língua. Má kes algen di kel relijion más grandi di sidadi, ka staba kontenti pamodi nu staba ta prega. Pur isu, nu tinha ki tomaba txeu kuidadu. Un bês, N staba mi ku un irmon i un ómi pirsigi-nu ku faka. Nu kóre más faxi di ki kel ki nu ta podeba i kel ómi ka konsigi pega-nu! Sikrê ku prigu, Jeová pô-nu ta ‘mora ku suguransa’ i nunbru di publikador kumesa ta omenta. (Sal. 4:8) Oji, na Kano ten más di 500 publikador ta sirbi na kes 11 kongregason ki ten la.

Más tardi, na agostu di anu 1968, dipôs ki N pasa alguns mês na sidadi di Kano, N mandadu pa Niamey, ki é kapital di Repúblika di Níjer, djuntu ku dôs otu pioneru spesial. Dipôs, nu diskubri ma Níjer, ki ta fika na Áfrika Osidental, é un di kes país más kenti di téra. Alén di lida ku kel kalor, nu tevi ki prende língua ofisial di kel país, ki é fransês. Sikrê ku kes prubléma li, nu kunfia na Jeová i nu kumesa ta prega na kapital djuntu ku alguns publikador ki ta moraba la. Na poku ténpu kuazi tudu algen na Niamey ki sabia lé resebe kel livru A Verdade Que Conduz a Vida Eterna. Pesoas ti ta paraba nos na rua pa pidi-nu un livru!

Lógu nu diskubri ma autoridadis ka gostaba di Tistimunhas di Jeová. Na julhu di anu 1969, nu djunta pa primeru bês na asenbleia na kel país i tinha uns 20 algen ta sisti. Má na kel primeru dia di asenbleia, pulísia bai i es para prugrama. Es leba kes pioneru spesial i kel enkaregadu di grupu di kongregason pa skuadra. Dipôs ki es faze-nu alguns pergunta, es fla-nu pa nu volta pa skuadra otu dia. Nu xinti ma situason sta ba pioraba, nton nu disidi faze diskursu di batismu na kaza di un irmon i dipôs nu ba batiza kes algen sukundidu na un riu.

Alguns simana dipôs, govérnu kóre ku mi i kes otu 5 pioneru spesial di país. Es da-nu 48 óra pa nu sai di país i nu tevi ki djobe nos própi transpórti. Nu obi ku es i nu bai dirétu pa Betel di Nijéria i la nu resebe novus diziginason.

Na Nijéria N diziginadu pa zóna di Orisunbare. N gostaba di prega i di faze studus di Bíblia djuntu ku un grupu pikinoti di publikadoris ki moraba la. Má dipôs di 6 mês, filial konvida-m pa N volta pa Níjer mi sô. Na komésu, N fika dimiradu i preokupadu, má dipôs N staba ku gana di ba inkontra otu bês ku kes irmon na Níjer!

N volta pa Niamey. Un dia dipôs kantu N txiga, un ómi di nogósiu ki éra nijerianu odja ma mi é Tistimunha di Jeová i el kumesa ta faze-m perguntas sobri Bíblia. Nu studa Bíblia i dipôs el para di fuma i di bebe dimás i el batiza. Dipôs N tevi priviléjiu di prega ku irmons i irmans di txeu párti di Níjer i sima ténpu ba ta pasa N odja modi ki kes algen di la seta verdadi. Kantu N txiga tinha 31 Tistimunha di Jeová na kel país, kantu N sai es éra 69.

Na dizenbru di anu 1977, N volta pa Nijéria pa resebe trenamentu. Na fin di kel kursu di 3 simana, kordenador di Kumison di Filial, irmon Malcolm Vigo, pô-m ta lé un karta di filial  di Séra Lioa. Irmons di la staba ta djobe un pioneru ki tinha un bon saúdi i solteru, ki ta papiaba inglês i fransês pa sérba enkaregadu di grupu di kongregason na Giné. Irmon Malcolm fla-m ma kel trenamentu ki N resebe éra pa kel diziginason li. I el fla-m klaru ma ka éra un diziginason fásil. El fla: “Pensa dretu antis di séta es diziginason.” Lógu N fla-l: “Dja ki é Jeová ki sta ta manda-m, N ta bai.”

N panha avion pa Séra Lioa i N inkontra ku kes irmon di filial. Un irmon di Kumison di Filial fla-m: “Nu ka sabe txeu kuza sobri trabadju di pregason na Giné.” Enbóra filial éra responsável pa trabadju di pregason na Giné, es ka staba ta konsigi pâpia ku irmons di la pamodi situason di govérnu di la staba difísil. Es tenta manda algen bai vizita irmons na Giné txeu bês, má es ka konsigi. Pur isu, es pidi-m pa N viaja ti Konakri, ki é kapital di Giné i odja si N ta konsigiba pa govérnu dexa-m fika la.

Kantu N txiga na Konakri, N bai pa enbaixada di Nijéria pa bai pâpia ku enbaxador. N fla-l ma N krê pregaba na Giné. El fla-m pa N ka fika la pamodi N ta koreba risku di podu prézu ô algun kuza piór pode kontiseba ku mi. El fla-m: “Volta pa Nijéria i bai prega la.” Má N responde: “N sta disididu na fika li.” Nton, enbaxador skrebe un karta ta pidi un otu algen di govérnu pa bai djuda-m i kel algen resebe-m dretu.

Poku ténpu dipôs N volta pa filial di Séra Lioa i N fla irmons ma govérnu dexa-m fika na Giné. Es fika kontenti kantu es odja ma Jeová abênsua nha viajen. Govérnu di la dexa-m pa N fika na Giné!

Di anu 1978 ti 1989 mi éra enkaregadu di grupu di kongregason na Giné i na Séra Lioa. I na Libéria N ta vizitaba kongregasons na lugar di enkaregadu di grupu di kongregason. Na komésu N ta fikaba duenti txeu bês. I alvês kel-li ta kontiseba kantu N staba lonji di otus algen. Má irmons ta fazeba di tudu pa lebaba mi pa ospital.

Un bês N fika txeu duenti pamodi N panha malária i N tinha otus prubléma di saúdi. Kantu ki N rekupera, N diskubri ma irmons staba ta disidi na undi ki es ta ba interaba mi! Mésmu ku kes difikuldadi li ki poi nha vida na prigu, nunka N ka pensa na bandona nhas diziginason. N ten serteza ma é sô Deus ki pode da-nu kel midjór suguransa, pamodi mésmu si nu móre el ta pode da-nu vida otu bês.

Na anu 1988, N konxe Dorcas, ki é un irman pionera ki ta ama Jeová txeu i ki é txeu umildi. Nu kaza i nu kontinua na nha diziginason di vizita kongregasons. Dorcas trabadja duru djuntu ku mi na nos diziginason i el staba prontu pa faze sakrifisius pa Jeová.  Alvês nu ta andaba uns 25 kilómetru di un kongregason pa kel otu ku nos maléta. Óras ki kes kongregason éra lonji, nu ta uzaba kalker transpórti ki nu ta atxaba. Kel-li ta involve viajaba na kes strada xeiu di lama i ku brakus.

Dorcas é txeu korajoza. Pur izénplu, alvês nu ta viajaba na kaminhus ki tinha txeu krokodilu. Un bês nu faze un viajen di 5 dia i nu tevi di trabesa riu na un kanoa pamodi ponti di madera staba kebradu. Kantu Dorcas labanta pa sai di kanoa el kai na riu i kel riu éra fundu. Nen mi nen el, nu ka sabia nadaba. I tinha krokodilu na kel riu. Filismenti alguns jóven odja-l, es kai na riu i es bai salva-l. Nos dôs nu sunha ku kel kuza li duránti algun ténpu, má nu kontinua na nos diziginason.

Na komésu di anu 1992, nu fika spantadu kantu nu fika ta sabe ma Dorcas staba grávida. Nu tinha ki disidiba si nu ta kontinuaba na nos sirvisu di pioneru spesial ô nau. Nu pensa: “Jeová da-nu un prezenti!” Pur isu, nu disidi txoma nos fidju-fémia di Jahgift. Kuatu anu dipôs ki Jahgift nase, se irmon Erik nase. Nos dôs fidju é un prezenti ki ben di Jeová. Jahgift tevi algun ténpu ta sirbi na skritóriu di traduson na Konakri i Erik é un ajudanti di kongregason.

Enbóra Dorcas tevi ki para sirvisu di pioneru spesial pa un ténpu, el kontinua na sirvisu di pioneru fíksu timenti el ta kriaba nos fidjus. Ku ajuda di Jeová, N kontinua na sirvisu spesial pa ténpu interu. Dipôs ki nos fidjus bira grandi, Dorcas konsigi ser pioneru spesial otu bês. Gósi nos é misionáriu na Konakri.

Sénpri N bai pa kalker lugar ki Jeová leba-m. Mi ku nha mudjer sénpri nu xinti se proteson i se benson. Pamodi nu kunfia na Jeová envês di na kuzas material, nu ivita txeu prubléma i txeu preokupason. Mi ku Dorcas, nu prende na kes spiriénsia ki nu pasa pa el, ma suguransa di verdadi ta ben di Jeová, ki é ‘Deus di nos salvason’. (1 Cró. 16:35) N ten tudu serteza ma vida di tudu kes ki ta kunfia na Jeová ‘ta sta ben guardadu na bólsa di vida djuntu ku Jeová’. — 1 Sam. 25:29.