1-3. (a) Kuzê ki nu debe xinti pa verdadis ki nu prende na Bíblia? Da un izénplu. (Odja dizenhus i fotu na komésu di studu.) (b) Ki perguntas nu ta ben responde na kel studu li?

 OJI é normal pesoas kunpra algun kuza na lója i dipôs es ta torna leba-l. Piskiza ta mostra ma na alguns país, pesoas ta torna leba uns 9 purséntu di kuzas ki es kunpra na lója. Más di 30 purséntu di kuzas ki ta kunpradu pa internet ta torna mandadu. Talvês kel kuza é ka sima es staba ta spéra ô pode ser ki el ka sta dretu. Pur isu, es ta disidi troka-l ô pidi ses dinheru.

² Nu pode faze kel-li ku kes kuza ki nu ta kunpra, má nu ka krê faze kel-li ku verdadis di Bíblia. Óras ki nu ‘kunpra’ ô prende verdadi, nunka nu ka krê ‘bende-l’ ô dizisti di kel ‘konhisimentu izatu di verdadi’. (Lé Provérbios 23:23; 1 Tim. 2:4) Sima dja nu odjaba na kel primeru studu, nu tevi ki tra ténpu pa nu ‘kunpra’ ô prende verdadi. Talvês, nu dizisti di un karera ki nu pode ganhaba txeu dinheru, nu faze mudansas na nos amizadi, na nos manera di pensa i di konporta. Tanbê nu dexa di sigi tradisons i kustumus ki ka  sta na Bíblia. Má, kel présu ki nu paga pa ‘kunpra verdadi’ ka ta konpara ku bensons ki dja nu resebe.

³ Jizus konta un stória, di un ómi di nogósiu ki ta viajaba pa djobe jóias di txeu valor. Kantu kel ómi atxa un di kes jóia el bende tudu kes kuza ki el tinha i el kunpra kel jóia. Kel jóia ta reprizenta verdadi sobri Reinu di Deus. Jizus uza kel stória pa mostra ma kes algen ki ta djobe verdadi, ta da-l txeu valor. (Mat. 13:45, 46) É si ki nu xinti kantu nu prende verdadi sobri Reinu di Deus pa primeru bês i tudu kes otu verdadi di Bíblia. Nu staba prontu pa dizisti di kalker kuza pamodi es. Si nu kontinua ta da kes verdadi di Bíblia valor, nunka nu ka ta ‘bende-l’ ô dizisti di el. Má é tristi di odja ma alguns sérvu di Jeová dexa di da valor pa verdadi ki es prende i es bende-l. Nunka nu ka krê faze un kuza di kel-li. Nu meste sigi konsedju di Bíblia ki ta fla pa nu ‘kontinua ta anda na verdadi.’ (Lé 3 João 2-4.) Kel-li siginifika ma nu ta poi verdadi na primeru lugar i nu ta vive sima nu prende. Má, pamodi i di ki manera un algen pode ‘bende’ verdadi? Modi ki nu pode ivita faze kel-li? Kuzê ki pode djuda-nu ‘kontinua ta anda na verdadi’?

 4. Kantu Jizus staba na Téra, pamodi ki alguns di se disiplus ‘bende’ verdadi?

⁴ Kantu Jizus staba na Téra, alguns di kes ki bira se disiplus dexa di sigi-l. Pur izénplu, kantu Jizus faze un milagri i el da txeu algen kumida, es sigi-l ti kel otu ladu di Mar di Galilea. Nton, Jizus fla un kuza ki es ka sta speraba. El fla: ‘Si nhos ka kume karni di Fidju di Ómi i bebe se sangi, nhos ka ten vida na nhos.’ Envês di es fla Jizus pa splika-s, es fika ofendidu i es fla: ‘Ken ki pode obi kel-li?’ Pur isu, ‘txeu di se disiplus, volta pa kes kuza ki es dexaba pa tras i es para di anda ku el.’ — João 6:53-66.

5, 6. (a) Oji pamodi ki alguns algen ta afasta di verdadi? (b) Modi ki un algen pode afasta di verdadi poku-poku?

⁵ Oji tanbê é tristi di odja ma alguns afasta di verdadi. Alguns tropesa pamodi mudansas na ntendimentu di un asuntu di Bíblia ô pamodi algun kuza ki un irmon ki ten txeu responsabilidadi na organizason fla ô faze. Otus fika maguadu pamodi konsedju di Bíblia ki es dadu ô pamodi algun prubléma ku otu irmon. Tanbê pode ser ki otus sigi ensinus falsu di kes algen ki éra Tistimunha di Jeová i ki fika ta pâpia mal di organizason ô di otus algen ki é kóntra verdadi. Pur isu, alguns disidi ‘afasta’ di Jeová i di kongregason. (Heb. 3:12-14) Éra mutu más midjór si es imitaba izénplu di apóstlu Pedru! Kantu Jizus pergunta se apóstlus si es krê bai tanbê, Pedru fla: ‘Sinhor pa kenha ki nu ta bai? Abo bu ten palavras ki ta da vida pa tudu ténpu.’ — João 6:67-69.

⁶ Talvês, otus ba ta afasta di verdadi poku-poku, pamodi es ka da kónta di kuzê ki staba ta kontise. Es é sima un barku ki ba ta perde rumu poku-poku. Bíblia ta fla ma nu debe toma kuidadu ‘pa nunka nu ka disvia.’ (Heb. 2:1) Un algen pode afasta di verdadi pamodi el ki krê, má ten otus ki ta disvia pamodi es ka toma kuidadu. Es dexa ses amizadi ku Jeová ba ta bira fraku ti ki kaba.  Kuzê ki nu pode faze pa kel-li nunka ka kontise ku nos?

 7. Kuzê ki ta djuda-nu ivita ‘bende verdadi’?

⁷ Pa nu kontinua ta anda na verdadi, nu ten ki seta i sigi tudu kel ki Jeová ta fla. Nu ten ki poi verdadi na primeru lugar na nos vida i vive di akordu ku prinsípius di Bíblia. Na un orason, Davidi promete Jeová: ‘N ta anda na bu verdadi.’ (Sal. 86:11) Davidi dja tomaba se disizon. Nos tanbê nu debe sta disididu na kontinua ta anda na verdadi, asi nunka nu ka ta bende-l. Si nu ka toma kel disizon li, nu pode kumesa ta pensa na kuzas ki nu dizisti di el pa nu kunpra verdadi i talvês nu pode fika ku gana di volta pa kes kuza. Nu ka pode skodje ki verdadi di Bíblia nu ta seta i kal ki nu ka ta seta. Nu ten ki anda na ‘tudu verdadi’. (João 16:13 ) Na kel primeru studu, nu pâpia di sinku kuza ki talvês nu tevi ki dexa pa nu pode kunpra verdadi. Gósi, nu sta ben odja sinku kuza ki nu meste faze pa nu ka ‘bende verdadi’ ô volta pa kes kuza ki nu dexa pa tras. — Mat. 6:19.

 8. Modi ki un algen pode afasta di verdadi si el ka uza se ténpu dretu? Da un izénplu.

⁸ Ténpu. Pa nu ka afasta di verdadi, nu meste uza nos ténpu dretu. Si nu ka toma kuidadu, nu pode kumesa ta gasta txeu ténpu na diverson, na internet ô na odja tilivizon. É ka mariadu faze kes kuza li, má nu pode uzaba kel ténpu pa faze nos studu pesoal i na nos sirvisu pa Jeová. Repara kuzê ki kontise ku un irman ki txoma Emma. a Désdi pikinoti, el gostaba txeu di kabalu i el ta montaba sénpri ki el tinha ténpu. Dipôs, el kumesa ta xinti konsénsia pizadu pamodi el sta gastaba txeu ténpu ku se diverson. Nton, el kumesa ta faze mudansas. Tanbê el odja spiriénsa di irman Cory Wells ki éra bon na monta kabalu i el prende txeu ku se izénplu. b Gósi Emma sta gasta más ténpu na sirvisu di Jeová i el tene más ténpu di sta djuntu ku se famílias i amigus ki tanbê ta sirbi Jeová. El sta xinti ma se amizadi ku Jeová sta más fórti i se konsénsia sta trankilu, pamodi el sabe ma el sta uza se ténpu di midjór manera.

 9. Modi ki kuzas material pode fika txeu inportanti pa nos?

⁹ Kuzas material. Si nu krê kontinua ta anda na verdadi, nu ten ki poi kuzas material na ses lugar. Kantu nu prende verdadi nu poi nos amizadi ku Jeová na primeru lugar i nu poi kuzas material na sugundu lugar. Nu sta kontenti pamodi sakrifisius ki nu faze pa nu anda na verdadi. Má alvês, nu pode odja otus ta kunpra kes últimu telemóvel, tablet ô otus kuza ki dinheru pode kunpra. Nu pode atxa ma nu sta perde algun kuza. Si nu ka sta kontenti ku kes kuza ki nu tene, nu ta kumesa ta npenha pa kes kuza li más di ki faze vontadi di Jeová. Kel-li ta lenbra-nu di kuzê ki kontise ku Demas. El ta amaba ‘es mundu’ dimás ki el bandona diziginason ki el tinha djuntu ku apóstlu Polu. (2 Tim. 4:10) Pamodi ki Demas bandona Polu? Bíblia ka ta fla. Talvês, el ta amaba kuzas material más di ki se sirvisu pa Jeová ô el  ka krê fazeba sakrifisius pa el sirbiba djuntu ku Polu. Kuzê ki nu ta prende? Talvês na pasadu nu gostaba txeu di kuzas material. Si nu ka toma kuidadu, kel amor li pode kumesa ta kria na nos otu bês i el pode fika más fórti ki nos amor pa verdadi.

10. Pa nu kontinua ta anda na verdadi, di kuzê ki nu ka debe xinti medu?

¹⁰ Amizadi ku famílias i amigus. Pa nu kontinua ta anda na verdadi, nu ka debe xinti medu di kes algen ki ka ta sirbi Jeová. Kantu nu kumesa ta anda na verdadi nu muda nos amizadi ku kes algen ki ka ta sirbi Jeová i ku nos família. Alguns talvês ta ruspeta nos krénsa, má otus ta fika kóntra nos. (1 Ped. 4:4) É klaru ki nu ta sforsa pa nu ten un bon amizadi ku nos família i trata-s ku amor. Má simé, nu meste toma kuidadu pa nu ka dexa di sigi leis di Jeová sô pa nu pode agrada-s. Sima nu prende na 1 Coríntios 15:33, nos midjór amigu debe ser kes algen ki ta ama Jeová.

11. Kuzê ki ta djuda-nu ivita pensamentus i konportamentu mariadu?

¹¹ Pensamentus i konportamentu mariadu. Tudu ken ki ta anda na verdadi ten ki ser santu. (Isa. 35:8; lé 1 Pedro 1:14-16.) Kantu nu prende verdadi, nu tevi ki faze mudansas pa nu pode vive sima Bíblia ta fla. Alguns tevi ki faze mudansas más txeu. Má simé, nu meste sforsa pa nu kontinua linpu i toma kuidadu pa nu ka torna faze kes kuza mariadu di mundu. Tanbê nu debe toma kuidadu pa nu ka kai na tentason di faze konportamentu seksual mariadu. Kuzê ki pode djuda-nu? Pensa na présu ki Jeová paga ku sangi di se Fidju Jizus Kristu pa nu pode bira santu. (1 Ped. 1:18, 19) Pa nu ser linpu sima Jeová ta krê, nu meste kontinua ta da valor pa sakrifisiu di Jizus.

12, 13. (a) Pamodi ki é inportanti nu sabe kuzê ki Jeová ta pensa sobri dias feriadu? (b) Kuzê ki nu ta ben odja gósi?

¹² Kustumus i tradisons ki ka sta na Bíblia. Talvês nos família, nos amigus, nos kolégas di trabadju i nos kolégas di skóla pode konvida-nu pa nu partisipa ku es na algun komemorason, sima fésta di aniversáriu ô dias feriadu. Kuzê ki pode djuda-nu ka partisipa na kes kustumu i feriadus ki Jeová ka gosta? Nu meste sabe dretu kuzê ki Jeová ta pensa ô ta atxa di kes kuza li. Tanbê nu pode faze piskiza na nos publikason ki ta splika pamodi ki ta fazedu kes feriadu. Óras ki nu lenbra kuzê ki Bíblia ta fla sobri kes feriadu i pamodi ki nu ka debe partisipa na es, nu ta ten sertéza ma nu sta ta anda sima Jeová ta krê. (Efé. 5:10) Si nu kúnfia na Jeová i na se Palavra, nu ka ta fika ku medu di kuzê ki otus algen pode pensa. — Prov. 29:25.

¹³ Anda na verdadi é un manera di vive. É ka un kuza ki nu ta faze sô un bês na vida. É un kuza ki nu krê kontinua ta faze pa tudu ténpu. Kuzê ki pode djuda-nu ka dizisti di anda na verdadi? Nu ben odja três kuza.

14. (a) Kuzê ki pode djuda-nu kontinua ta anda na verdadi i nunka pensa na bende-l? (b) Pamodi ki nu meste ntendimentu, sabedoria i disiplina?

¹⁴ Kuzê ki nu pode faze pa nu ka dizisti di anda na verdadi? Primeru, nu meste kontinua ta studa Bíblia i pensa na kuzê ki nu prende. Nu meste  organiza nos ténpu pa nu faze kel-li sénpri. Kada bês ki nu studa nos amor pa verdadi ta fika más fórti i nunka nu ka ta pensa na bende-l ô dizisti di el. Tanbê Provérbios 23:23 ta fla pa nu kunpra ‘sabedoria, disiplina i ntendimentu.’ Sô konhisimentu ka ta txiga, nu meste faze sima nu prende. Ntendimentu ta djuda-nu konpara kel ki dja nu sabe ku kel ki nu prende, asi nu ta odja ma tudu kel ki Jeová ta fla sta tudu ligadu. Sabedoria ta insentiva-nu faze kel ki nu sabe. I sima ténpu ta ba ta pasa, verdadi ta disiplina-nu ô el ta mostra-nu ki mudansas nu meste faze. Nu debe seta lógu kes disiplina, pamodi Bíblia ta fla ma es bale más di ki prata. — Prov. 8:10.

15. Modi ki sintu di verdadi ta proteje-nu?

¹⁵ Sugundu, nu debe kontinua ta faze sima nu prende. Bíblia ta konpara verdadi ku un sintu ki trópa ta uzaba. (Efé. 6:14) Na ténpu ki Bíblia skrebedu, kel sintu ta protejeba trópa na géra. Má kel sintu tinha ki staba ben pertadu na el. Si el staba froxu, el ka ta protejeba el. Modi ki sintu di verdadi ta proteje-nu? Si nu tene-l ben pertadu na nos sima un sintu, verdadi ta proteje-nu di pensamentus mariadu i el ta djuda-nu toma bons disizon. Óras ki nu sta pasa pa prublémas difísil ô tentason di faze algun kuza mariadu, verdadis di Bíblia ta djuda-nu faze kel ki é dretu. Sima un trópa nunka ka ta pensa na bai géra sen sintu, nos tanbê nu debe sforsa pa nunka nu ka froxa nen tra nos sintu di verdadi. Envês di kel-li, nu krê faze tudu kel ki nu pode pa nu tene-l ben pertadu na nos korpu. Kel-li krê fla ma nu debe vive di akordu ku verdadi. Kel sintu di verdadi tanbê ta sirbiba pa trópa prindaba se spada na el. Nu ben odja modi ki nu pode faze mésmu kuza ku verdadi.

16. Modi ki inxina verdadi ta djuda-nu kontinua ta anda na verdadi?

¹⁶ Tirseru, faze tudu kel ki bu pode pa bu inxina verdadi pa otus algen. Bíblia ta konparadu ku spada. Sima un bon trópa ta tinha se spada sénpri na ladu prindadu na sintu, nos tanbê nu debe sta pegadu na verdadi di ‘Palavra di Deus.’ (Efé. 6:17) Nos tudu nu krê sforsa pa nu midjora nos manera di inxina i ‘uza palavra di verdadi dretu.’ (2 Tim. 2:15) Óras ki nu ta uza Bíblia pa djuda otus algen kunpra verdadi, nu ta bira ta konxe i ama verdadi inda más txeu. Tanbê nu ta kontinua más disididu na anda na verdadi.

17. Pamodi ki bu ta da txeu valor pa verdadi?

¹⁷ Verdadi é un prezenti di txeu valor. É el ki ta djuda-nu ten amizadi fórti ku nos Pai na Séu. Kel-li é kuza más inportanti ki nu ten. Jeová dja inxina-nu txeu kuza, má kel-li é sô komésu inda! El promete ma el ta kontinua ta inxina-nu pa tudu ténpu. Nton, kontinua ta da verdadi valor sima un bon jóia. Kontinua ta ‘kunpra verdadi i nunka ka bu bende-l’. Asi, sima Davidi, bu ta konsigi kunpri kel ki bu promete Jeová: ‘N ta anda na bu verdadi.’ — Sal. 86:11.