1. Ki prublémas ki sérvus di Jeová pode pasa pa el?

BU STA pasa pa algun prubléma? Talvês un irmon di kongregason faze un kuza ki magua-u. (Tia. 3:2) Ô pode ser ki bus koléga di trabadju ô di skóla sta faze-u trósa pamodi bo é un Tistimunha di Jeová. (1 Ped. 4:3, 4) Tanbê pode ser ki alguns algen di bu família sta tenta pô-u para di sisti runion i di prega. (Mat. 10:35, 36) Talvês un prubléma txeu difísil sta pô-u pensa na para di sirbi Jeová. Má bu pode ten sertéza ma ka ta nporta kal ki é prubléma ki bu sta pasa, Jeová ta da-u sabedoria pa bu lida ku kel prubléma i forsa pa bu aguenta firmi.

2. Sima sta na Romanos 15:4, modi ki leitura di Bíblia pode djuda-nu?

² Jeová ranja manera di poi na se Palavra kes stória ki ta mostra modi ki se sérvus lida ku prublémas. Pamodi ki el faze kel-li? Pa nu pode prende ku es. É pamodi kel-li ki Jeová orienta apóstlu Polu pa skrebe kel ki sta na Romanos 15:4. (Lé.) Lé kes stória di Bíblia li, pode konsola-nu i da-nu speransa. Má pa kes stória djuda-nu, nu meste faze más di ki sô lé Bíblia. Nu ten ki dexa Skrituras muda nos manera di pensa i toka nos korason. Si nu meste orientason pa lida ku un prubléma ki nu sta pasa pa el, kuzê ki nu pode faze? Nu pode faze kes kuza li: (1) Faze orason, (2) Imajina, (3) Midita, i (4) Faze sima bu prende. Na kel studu li, nu sta ben odja modi ki nu pode faze kada un di kes kuza li. * Dipôs, nu ta ben uza  kes manera di studa li pa nu prende ku kuzas ki kontise na vida di rei Davidi i apóstlu Polu.

3. Antis di kumesa lé Bíblia, kuzê ki bu debe faze i pamodi?

³ (1) Faze orason. Antis di bu kumesa lé Bíblia, pidi Jeová pa djuda-u odja modi ki bu pode prende más txeu di kuzê ki bu sta lé. Talvês bu sta djobe konsedjus sobri modi ki bu pode lida ku un prubléma. Nton faze orason pa Jeová ta pidi-l orientason pa bu atxa na se Palavra kes prinsípiu ki pode djuda-u sabe kuzê ki bu ta faze. — Fil. 4:6, 7; Tia. 1:5.

4. Kuzê ki pode djuda-u entra na kes stória di Bíblia?

⁴ (2) Imajina. Imajinason é un grandi kapasidadi ki Jeová da-nu. Pa bu entra na kes stória di Bíblia, tenta imajina kuzê ki sta kontise i poi na lugar di kel personájen prinsipal. Tenta odja kes kuza ki el odja i tenta xinti di mésmu manera ki el xinti.

5. Kuzê ki siginifika miditason i modi ki bu pode midita?

⁵ (3) Midita. Miditason siginifika pensa ku kuidadu na kuzê ki bu sta lé i na modi ki kel informason ta aplika na bo. El ta djuda-u odja modi ki informasons ta liga ku kunpanheru i ntende un asuntu más dretu. Lé Bíblia sen midita é sima si bu ranja tudu kuza pa faze un kumida, má bu ka faze-l. Midita é sima faze kumida ku kes kuza i xinti gostu sábi di kel kumida. Pa bu konsigi midita, bu meste faze kes pergunta li: ‘Kuzê ki kel algen faze pa el rezolve se prubléma? Modi ki Jeová djuda-l? Modi ki kuzê ki N prende pode djuda-m aguenta firmi?’

6. Pamodi ki nu debe faze sima nu prende?

⁶ (4) Faze sima bu prende. Jizus fla ma un algen ki ka ta aplika kuzê ki el prende é sima un ómi ki faze se kaza na areia. El trabadja duru, má atoa. Pamodi? Pamodi si ben tenporal ku txeia, kel kaza ta ronba. (Mat. 7:24-27) Di mésmu manera, tudu kel sforsu ki nu ta faze pa nu ora, imajina i midita ta ser atoa si nu ka faze sima nu prende. Óras ki nu pasa pa kes próva di fé sima prublémas ô pirsigison, nos fé ka ta pode aguenta. Má óras ki nu faze sima nu prende na nos studu di Bíblia, nu ta konsigi toma bons disizon, nu ta ten pas i nos fé ta fika más fórti. (Isa. 48:17, 18) Gósi, nu sta ben studa kuzê ki kontise ku rei Davidi i odja modi ki nu pode aplika kes kuatu manera di studa.

7. Ki stória di Bíblia nu sta ben odja gósi?

⁷ Algun amigu ô un família dja kustuma trai-u bu kunfiansa? Si kel-li dja kontise ku bo, lenbra kuzê ki rei Davidi faze kantu ki se fidju, Absalon, trai-l i tenta fika rei na se lugar. — 2 Sam. 15:5-14, 31; 18:6-14.

8. Kuzê ki bu pode faze pa Jeová djuda-u?

⁸ (1) Faze orason. Sima nu prende na stória di vida di Davidi, konta Jeová modi ki bu sta xinti pamodi kuza ki es faze-u. (Sal. 6:6-9) Dipôs, pidi Jeová pa djuda-u atxa kes prinsípiu ki ta mostra-u kuzê ki bu pode faze pa lida ku kel situason.

9. Kuzê ki kontise entri Davidi i Absalon?

⁹ (2) Imajina. Pensa na tudu kuza ki kontise na kel stória i imajina modi ki  kel-li afeta rei Davidi. Primeru, Absalon, fidju di Davidi, pasa alguns anu ta faze di tudu pa povu bira ta gosta di el. (2 Sam. 15:7) Dipôs, kantu txiga óra sértu, el manda spions pa tudu kantu di Israel pa poi povu ta seta-l sima rei. I ti el konsigi konvense un grandi amigu i konsedjeru di Davidi, ki txomaba Aitofel, pa djunta ku el na kel rebelion. Absalon fla ma gósi el ki éra rei i el tenta pega i mata Davidi, ki talvês staba txeu duenti. (Sal. 41:1-9) Davidi da kónta di kel planu di Absalon i el fuji di Jiruzalen. Dipôs, kes trópa di Absalon ba géra kóntra trópas di Davidi. Absalon perde géra i el móre.

10. Kuzê ki rei Davidi podia fazeba?

¹⁰ Dipôs, imajina modi ki Davidi xinti ku tudu kel ki kontise. El ta amaba Absalon i el ta kunfiaba na Aitofel. Má kes algen li, ki el gostaba txeu di el, trai-l, magua-l txeu i ti es tenta mata-l. Davidi podia perdeba tudu kunfiansa na kes otu algen ki éra se amigu pamodi el pode pensaba ma es staba djuntadu ku Absalon tanbê. El podia pensaba sô na se kabésa i tenta fujiba el sô. Ô el podia fikaba dizusperadu. Má Davidi ka faze ninhun di kes kuza li. Envês di kel-li, el konsigi vense kel situason difísil na se vida. Pamodi ki Davidi konsigi faze kel-li?

11. Kuzê ki Davidi faze na kel situason difísil?

¹¹ (3) Midita. Kuzê ki bu pode prende ku kel stória li sobri vida di Davidi? Responde kel pergunta li: “Kuzê ki Davidi faze pa rezolve se prubléma?” Davidi ka fika dizorientadu i nen el ka aji sen pensa. El aji ku sabedoria. El ka fika paradu sen faze nada i dexa medu toma kónta di el. Má el faze orason i el pidi Jeová pa djuda-l. Tanbê, el pidi se amigus pa djuda-l. I el aji faxi di akordu ku kes disizon ki el toma. Sikrê el fika ku txeu mágua, Davidi ka perde kunfiansa na otus algen i nen el ka fika xeiu di ódiu. El kontinua ta kunfia na Jeová i na se amigus.

12. Kuzê ki Jeová faze pa djuda Davidi?

¹² Modi ki Jeová djuda Davidi? Si bu faze un poku di piskiza, bu ta odja ma Jeová da Davidi forsa ki el mesteba pa el aguenta firmi. (Sal. 3:1-8; djobe kes informason pa riba di kel Salmo li.) Jeová abênsua kes disizon di Davidi. Tanbê, el apoia kes amigu lial di Davidi kantu es luta pa proteje ses rei.

13. Si algen magua-u, modi ki bu pode imita Davidi? (Mateus 18:15-17 )

¹³ (4) Faze sima bu prende. Pergunta bu kabésa: ‘Modi ki N pode imita Davidi?’ Aji faxi pa rezolve bu prubléma. Na alguns situason, bu pode sigi kes orientason di Jizus sima sta na Mateus kapítlu 18. Na otus situason bu pode sigi sô kel prinsípiu ki sta la. (Lé Mateus 18:15-17.) Ka bu toma disizon sen pensa i nen óras ki bu sta xatiadu. Pidi Jeová na orason pa kalma bu korason i pa da-u sabedoria pa lida ku kel prubléma. Ka bu perde kunfiansa na bus amigu. Envês di kel-li, seta ses ajuda. (Pro. 17:17) I más inportanti inda, sigi kes konsedju di Jeová ki sta na Bíblia. — Pro. 3:5, 6.

14. Na ki situason ki testu di 2 Timóteo 1:12-16; 4:6-11, 17-22, pode anima-u?

¹⁴ Bus família sta kóntra bo pamodi bu ta sirbi Jeová? Bu ta vive na un país undi nos óbra sta proibidu? Si kel-li é bu situason, kes testu di 2 Timóteo 1:12-16 i  4:6-11, 17-22, pode anima-u. * Polu skrebe kes versíklu li kantu el staba prézu.

15. Kuzê ki bu pode pidi Jeová?

¹⁵ (1) Faze orason. Antis di lé kes testu li, fla Jeová kal ki é bu prubléma i modi ki bu sta ta xinti. Dipôs, pidi Jeová pa djuda-u atxa na es stória di vida di Polu kes prinsípiu ki ta djuda-u sabe kuzê ki bu ta faze.

16. Kuzê ki kontise ku Polu?

¹⁶ (2) Imajina. Tenta poi na lugar di Polu. El sta prézu na Roma i prendedu na korenti. Dja el staba prézu antis, má di es bês el ten sertéza ma el ta matadu. Alguns di se amigus bandona-l i el sta txeu kansadu. — 2 Tim. 1:15.

17. Kuzê ki Polu podia fazeba?

¹⁷ Polu podia fikaba konsentradu na pasadu ta pensa: ‘Si N ka biraba un kriston zelozu talvês N ka staba prézu.’ El podia fikaba ku raiba di kes ómi na tiritóriu di Ázia, ki bandona-l, i el podia ka kunfiaba más na kes otu algen ki éra se amigu. Má Polu ka faze ninhun di kes kuza li. Kuzê ki djuda-l kontinua ta kunfia na se amigus i na ajuda di Jeová?

18. Kuzê ki Polu faze pa lida ku se prublémas?

¹⁸ (3) Midita. Responde kel pergunta li: ‘Kuzê ki Polu faze pa rezolve se prublémas?’ Mésmu kantu Polu sabia ma es sta ba mataba el, el ka skese di kuzê ki é más inportanti: da glória pa Jeová. El kontinua ta pensa na modi ki el ta nkorajaba otus algen. El mostra ma el ta kunfiaba na Jeová pamodi el ta fazeba orason sénpri. (2 Tim. 1:3) Polu ka fika tudu óra ta pensa na kes irmon ki bandona-l. Envês di kel-li, el fla ma el tinha txeu gratidon pa manera ki se amigus djuda-l ku amor. Tanbê, Polu kontinua ta studa Palavra di Deus. (2 Tim. 3:16, 17; 4:13) I más inportanti inda, el tinha tudu sertéza ma Jeová ku Jizus ta amaba el. Es ka bandona-l i es ta ben rekonpensaba el pa se sirvisu fiel.

19. Modi ki Jeová djuda Polu?

¹⁹ Jeová dja avizaba Polu ma el ta sérba pirsigidu pamodi el bira kriston. (Atos 21:11-13 ) Má modi ki Jeová djuda-l? Jeová responde kes orason di Polu i el kontinua ta da-l forsa. (2 Tim. 4:17) Jeová da-l sertéza ma el ta rekonpensaba el pa tudu se trabadju duru. Tanbê, Jeová uza alguns amigu lial di Polu pa djuda-l di txeu manera.

20. Sima sta na Romanos 8:38, 39, modi ki nu pode imita fé di Polu?

²⁰ (4) Faze sima bu prende. Pergunta bu kabésa: ‘Modi ki N pode imita izénplu di Polu?’ Sima Polu, nu debe spéra ma nu ta pirsigidu pamodi nos fé. (Mar. 10:29, 30) Pa nu kontinua fiel pa Jeová mésmu óras ki nu ta pasa pa prubléma, nu meste kontinua ta faze orason i ta studa se Palavra sénpri. I nunka nu ka debe skese ma kuza más inportanti é da glória pa Jeová. Nu pode ten sertéza ma Jeová nunka ka ta bandona-nu i ma nada ki otus algen pode faze ka ta kaba ku amor ki Jeová ten pa nos. — Lé Romanos 8:38, 39; Heb. 13:5, 6.

21. Kuzê ki djuda Aya i Hector vense kes dizafiu ki es pasa pa el?

²¹ Ka ta nporta ki prublémas nu ta pasa pa el, izénplus di Bíblia pode da-nu forsa.  Pur izénplu, Aya, un pionera na Japon, konta ma stória di Jonas djuda-l vense medu di partisipa na tistimunhu pa públiku. Hector, un jóven na Indonézia ki se mai ku se pai é ka Tistimunhas di Jeová, fla ma izénplu di Ruti insentiva-l pa el prende más sobri Jeová i sirbi-l.

22. Modi ki bu pode prende más txeu di kes vídiu ku bazi na stórias di Bíblia i di kes artigu “Imita ses fé”?

²² Undi ki bu pode atxa izénplus di Bíblia ki pode djuda bu fé bira más fórti? Nos vídius, dramas tradu di Bíblia pa obi, leituras di Bíblia dramatizadu i kes grupu di artigu “Imita ses fé” ta djuda-nu entra na kes stória di Bíblia. * Fazedu txeu piskiza pa faze kes publikason li. Pur isu, antis di uza-s na bu studu pesoal, pidi Jeová pa djuda-u atxa lisons inportanti ki bu pode aplika na bu vida. Tenta poi na lugar di kel personájen prinsipal. Midita na kuzê ki kes sérvu di Jeová faze i na modi ki Jeová djuda-s vense kes dizafiu. Dipôs, faze sima bu prende. Agradese Jeová pa ajuda ki el sta ta da-u. I djobe oportunidadi pa nkoraja i apoia otus algen. Asi bu ta mostra ma bu ta da valor pa kel ajuda ki Jeová sta da-u.

23. Sima sta na Isaías 41:10, 13, kuzê ki Jeová promete ma el ta faze pa nos?

²³ Vive na es mundu kontroladu pa Satanás pode ser difísil. Alvês nu ka sabe kuzê ki nu ta faze. (2 Tim. 3:1) Má nu ka meste fika preokupadu dimás nen ku medu. Jeová sabe kuzê ki nu sta pasa. Si nu kai, el promete ma el ta pega-nu ku se mô direita di justisa. (Lé Isaías 41:10, 13.) Nu ten sertéza ma Jeová ta djuda-nu i ma Bíblia ta da-nu forsa ki nu meste pa nu lida ku kalker prubléma.