1-2. Modi ki alguns algen xinti kantu es staba ta namora?

 NAMORU pode ser un ténpu sábi. Si bu sta ta namora, di serteza bu ta krê pa tudu kuza kóre dretu. Pa txeu kazal, namoru é un ténpu sábi. Un irman di Itiópia ki txoma Aila, a fla: “Un di kes ténpu más filís di nha vida foi kantu mi ku nha maridu nu ta namoraba. Nu ta papiaba sobri kuzas inportanti i nu ta riba txeu. N fika txeu kontenti kantu N da kónta ma dja N atxaba un algen ki N ta ama i ki ta amaba mi tanbê.”

² Má un irmon di Olanda ki txoma Alex, fla: “N fika txeu kontenti di konxe nha mudjer midjór kantu nu staba ta namora, má nos namoru tevi alguns prubléma.” Na kel studu li nu sta ben odja alguns prubléma i alguns prinsípiu di Bíblia ki pode djuda kazal ten un namoru ki ta onra Jeová. Tanbê, nu ta ben odja modi ki otus algen na kongregason pode djuda kes ki sta ta namora.

OBIJETIVU DI NAMORU

3. Kal ki é obijetivu di namoru? (Provérbios 20:25)

³ Enbóra namoru é un ténpu sábi, el é un kuza sériu pamodi el pode leba pa kazamentu. Na dia di ses kazamentu, kel kazal ta promete frenti Jeová ma es ta ba ama i ruspeta kunpanheru pa tudu ténpu di ses vida. Antis di faze kalker votu, nu meste analiza kel asuntu dretu. (Lé Provérbios 20:25.). Ta kontise mésmu kuza ku votu di kazamentu. Namoru ta djuda kazal konxe kunpanheru midjór i toma un bon disizon. Alvês kel disizon pode ser kazamentu  ô el pode ser fin di kel namoru. Si un kazal disidi tirmina namoru, kel-li ka krê fla ma es faze algun kuza mariadu. Má na verdadi, kel namoru kunpri se obijetivu ki é djuda-s sabe si es ta kaza ô nau.

4. Kuzê ki é inportanti nu lenbra di el?

⁴ É inportanti un algen solteru lenbra ma dôs algen ta namora pa sabe si es krê kaza ku kunpanheru ô nau. Kel-li krê fla ma el ka debe kumesa ta namora ku un algen ki dja el sabe ma el ka sta ba kaza ku el. É ka sô kes algen solteru ki debe pensa di kel manera li sobri namoru. Nos tudu nu debe lenbra di kal ki é obijetivu di namoru. Pur izénplu, alguns algen ta pensa ma si un kazal sta ta namora es ten ki kaza. Modi ki kel-li ta poi kes irmon ku irmans solteru ta xinti? Un irman soltera na Mérka ki txoma Melisa, fla: “Óras ki un irmon ku un irman ta namora, txeu irmons ta atxa ma es ten ki kaza. Pamodi kel-li, txeu kazal ta kontinua ta namora sikrê es é ka un bon par pa kunpanheru. I otus irmon ta disidi ka namora. Kes kuza li ta poi solterus ta fika ku txeu ansiadadi.”

NHOS KONXE KUNPANHERU DRETU

5-6. Kuzê ki un kazal di namoradu meste sabe sobri kunpanheru? (1 Pedru 3:4)

⁵ Si bu sta ta namora, kuzê ki ta djuda-u disidi si bu ta kaza ô nau? Tenta konxe kel otu algen dretu. Di serteza dja bu sabia alguns kuza sobri kel algen antis di bu kumesa ta namora. Má gósi bu ten oportunidadi di sábi kuzê ki “sta na [se] korason.” (Lé 1 Pedru 3:4.) Timenti bu sta ta namora bu pode sabe más sobri se amizadi ku Jeová, se manera di ser i se manera di pensa. Duránti kel ténpu bu debe responde kes pergunta li: ‘Kel algen li ta ser un bon algen pa N kaza ku el?’ (Pro. 31:26, 27, 30; Efé. 5:33; 1 Tim. 5:8) ‘N ta pode da-l amor i atenson ki el meste i el ta pode da-m amor i atenson ki N meste tanbê? Nu ta konsigi lida ku inperfeisons di kunpanheru?’ b (Rom. 3:23) Timenti nhos ta ba ta konxe kunpanheru, lenbra ma kuzê ki é más inportanti é ka si nhos é igual ku kunpanheru, má é si nhos ta konsigi lida ku kes diferénsa ki nhos ten.

⁶ Ki otus kuza bu debe sabe sobri kel algen duránti kel ténpu ki nhos sta ta namora? Antis di bus sentimentu pa kel algen fika más fórti, nhos debe pâpia sobri alguns asuntu inportanti, sima métas ki kada un di nhos ten pa futuru. Tanbê, nhos debe pâpia sobri kuzas di nhos vida,  sima prublémas di saúdi ô kuzas ki kontise ku nhos na pasadu ki ta afeta nhos sentimentus i konportamentu. Nhos ka meste pâpia sobri tudu asuntu na komésu di namoru. (Konpara ku Juan 16:12.) Si bu ta atxa ma inda sta sédu dimás pa bu pâpia sobri alguns kuza di bu vida, dexa kel algen sabe di kel-li. Má, ku ténpu kel algen ki bu sta pensa kaza ku el meste sabe alguns kuza sobri bu vida, asi pa el pode toma un bon disizon. Óras ki bu ta faze kel-li bu meste ser sinseru ku kel algen.

7. Modi ki un kazal di namoradu pode konxe kunpanheru midjór? (Odja kuadru “ Óras ki bu sta namora ku un algen ki ta mora lonji di bo”.) (Odja fotus.)

⁷ Modi ki nu pode sabe kenha ki kel algen é di verdadi? Un di kes midjór manera di sabe kel-li é faze perguntas i obi kunpanheru. Nhos meste pâpia modi ki nhos ta xinti di verdadi i ser onéstu na nhos respósta. (Pro. 20:5; Tia. 1:19). Talvês nhos pode skodje faze alguns kuza djuntu, sima kume, pâsia na lugaris públiku i prega, asi pa nhos pode pâpia. Tanbê nhos pode sabe más sobri kunpanheru óras ki nhos ta pasa ténpu ku amigus i família. Alén di kel-li, nhos pode faze kuzas ki ta da kel otu algen xansi di mostra modi ki el ta konporta na situasons diferenti i ku pesoas diferenti. Odja kuzê ki un irmon di Olanda ki txoma Anderson tenta faze. El fla kel-li sobri se namoru ku Alísia: “Nu ta fazeba kuzas ki ta djudaba nos konxe kunpanheru. Alvês éra kuzas sinplis, sima faze un kumida djuntu ô otus trabadju. Timenti nu ta fazeba kes kuza li, nu ta odjaba kualidadis i inperfeisons di kunpanheru.”

8. Modi ki studa djuntu pode djuda un kazal di namoradu?

⁸ Tanbê, nhos pode konxe kunpanheru midjór óras ki nhos ta studa asuntus spritual djuntu. Si nhos kaza, nhos ta meste tra ténpu pa faze adorason na família, asi pa Deus ser kel párti prinsipal di nhos kazamentu. (Ecl. 4:12) Nton, talvês nhos pode tra ténpu pa studa djuntu timenti nhos sta ta namoru. É klaru ki un kazal di namoradu inda é ka un família, i inda kel irmon é ka kabésa di kel irman. Má óras ki nhos ta studa djuntu, bu ta pode odja modi ki é amizadi di kel algen ku Jeová. Un kazal di Mérka ki txoma Markus i Laísa, fla  otu manera ki studa djuntu djuda-s. Markus fla: “Lógu na komésu di nos namoru, nu kumesa ta studa publikasons sobri asuntu di namoru, kazamentu i vida na família. Kes publikason li da-nu xansi di pâpia sobri otus asuntu inportanti ki di otu manera nu ka ta konsigi papiaba sobri es.”

OTUS KUZAS PA PENSA NA EL

9. Ki kuzas un kazal di namoradu debe pensa na el óras ki es ta disidi kenha ki es ta fla sobri ses namoru?

⁹ Kenha ki nhos debe fla sobri nhos namoru? Kel-la é un disizon ki nhos ta toma djuntu. Lógu na komésu di nhos namoru, nhos pode disidi fla sô alguns algen. (Pro. 17:27) Óras ki nhos ta faze si, nhos ta ivita txeu perguntas sobri nhos namoru i preson pa nhos toma un disizon. Má si nhos ka konta ningen, nhos pode fika nhos sô, pamodi medu pa otus algen ka diskubri. Kel-li pode ser prigozu. Nton, nhos ta mostra sabedoria si peloménus nhos fla alguns algen ki pode da nhos bons konsedju i djuda nhos di otus manera. (Pro. 15:22) Pur izénplu, nhos pode fla alguns algen di família, amigus maduru ô ansions di kongregason.

10. Kuzê ki un kazal debe faze pa ses namoru kontinua ta da ónra pa Jeová? (Provérbios 22:3)

¹⁰ Modi ki nhos pode mante un namoru ki ta onra Jeová? Sima ténpu ta ba ta pasa, nhos sentimentu pa kunpanheru ta ba ta fika más fórti. Modi ki nhos pode ivita faze algun kuza ki ta dizagrada Jeová? (1 Kor. 6:18) Nhos ivita pâpia sobri séksu, fika nhos sô i bebe dimás. (Efé. 5:3) Kes kuza li pode poi nhos dizeju di faze séksu ta fika más fórti, i ta fika más difísil faze kel ki é dretu. Nhos ta mostra sabedoria si sénpri nhos pâpia sobri modi ki nhos pode mostra ruspetu pa kunpanheru i pa leis di Jeová. (Lé Provérbios 22:3.) Odja kuzê ki djuda Davidi i Ánjila di Itiópia. Es fla: “Nu ta pasaba ténpu djuntu na lugaris ki tinha txeu algen, ô djuntu ku nos amigus. Nunka nu ka ta fikaba nos sô na karu ô na kaza. Di kel manera li, nu ta ivitaba situasons ki pode poba nos ta kai na tentason.”

11. Ki kuzas un kazal di namoradu debe pensa na el óras ki es ta disidi si es ta mostra karinhu pa kunpanheru?

¹¹ Un kazal di namoradu debe mostra karinhu pa kunpanheru? Sima nhos amor pa kunpanheru ta ba ta fika más fórti, ku ruspetu talvês nhos pode disidi mostra algun karinhu pa kunpanheru. Má si nhos dizeju seksual bira fórti, ta ser más difísil nhos toma un bon disizon. (Cân. 1:2; 2:6) Tanbê óras ki nhos ta mostra karinhu, nhos pode ka konsigi kontrola nhos kabésa i nhos pode faze algun kuza ki ta dizagrada Jeová. (Pro. 6:27) Pur isu, na komésu di namoru, nhos debe pâpia sobri leis di Jeová i ki tipu di karinhu nhos ta mostra i nhos ka debe mostra pa kunpanheru. c (1 Tes. 4:3-7) Nhos pâpia sobri kes pergunta li: ‘Kuzê ki pesoas ta ba atxa di manera ki nu ta mostra karinhu pa kunpanheru? Manera ki nhos ta mostra karinhu pa kunpanheru ta poi un di nhos ta ten dizeju seksual?’

12. Kuzê ki un kazal di namoradu debe lenbra di el óras ki es ta lida ku dizentendimentu?

¹² Modi ki nhos pode lida ku dizentendimentu? Si di vês en kuandu nhos ka ta konkorda ku kunpanheru, kel-li krê fla ma nhos é ka algen sértu pa kunpanheru? Nau. Tudu kazal di vês en kuandu  ka ta konkorda ku kunpanheru. Pa un kazamentu ser fórti kes dôs algen ten ki ruspeta kunpanheru i sta dispostu na seta kuzê ki kel otu algen gosta. Nton, manera ki nhos ta rezolve nhos prubléma gósi ta mostra si nhos ta ben ten un bon kazamentu. Nhos pâpia sobri kes pergunta li: ‘Nu ta konsigi pâpia sobri un asuntu di manera kalmu i ku ruspetu? Nu ta seta nos fadja i nu ta tenta midjora? Nu sta prontu pa púrdua, pidi diskulpa i skese?’ (Efé. 4:31, 32) Má, si sénpri nhos ka ta konkorda ku kunpanheru ô si sénpri nhos ta sta ta diskuti na nhos namoru, talvês situason ka ta ba midjora dipôs ki nhos kaza. Si bu da kónta ma kel algen é ka un algen sértu pa bo, midjór disizon ki nhos dôs pode toma é tirmina kel namoru. d

13. Kuzê ki pode djuda un kazal disidi kantu ténpu ki ses namoru debe dura?

¹³ Kantu ténpu ki nhos namoru debe dura? Óras ki nu ka ta pensa dretu antis di toma un disizon, txeu bês nu ta ten maus rezultadu. (Pro. 21:5) Pur isu, nhos namoru debe dura kel ténpu ki ta da pa nhos konxe kunpanheru dretu, má el ka debe dura más di ki kel ténpu ki meste. Bíblia ta fla: ‘Un speransa ki dimora pa realiza, ta poi korason ta fika duenti’. (Pro. 13:12) Alén di kel-li, kantu más ténpu nhos pasa djuntu más difísil ta fika pa nhos ivita dizejus seksual. (1 Kor. 7:9) Envês di konsentra na kantu ténpu ki dja nhos pasa ta namora, kada un di nhos pode pensa na kel pergunta li: ‘Kuzê más ki N meste prende sobri kel algen li pa N konsigi toma un bon disizon?’

MODI KI OTUS ALGEN PODE DJUDA KES KI STA TA NAMORA?

14. Di ki maneras ki otus algen pode djuda un kazal di namoradu? (Odja fotu.)

¹⁴ Si nu konxe un kazal ki sta ta namora, modi ki nu pode djuda-s? Nu pode konvida-s pa kume ku nos, pa nos adorason na família ô pa algun diverson. (Rom. 12:13) Duránti kes momentu li, es pode konxe kunpanheru midjór. Bu pode oferese pa pâsia ku es, da-s buleia ô konvida-s pa bu kaza, asi pa es pode pâpia es dôs, má pa es ka fika es sô. (Gál. 6:10) Alísia, ki dja nu papiaba di el antis, ta lenbra modi ki el ku Anderson resebe ajuda di irmons. El fla: “Nu ta fikaba txeu kontenti óras ki alguns  irmon ta flaba nos ma nu pode vizitaba es si nu mesteba di un lugar pa nu fikaba djuntu, má ka nos sô.” Si un kazal di namoradu pidi-u pa bu pasa ténpu djuntu ku es, kel-li é un bon manera di djuda bus amigu. Toma kuidadu pa bu ka dexa kel kazal konpletamenti es sô, má da-s kel oportunidadi ki es meste pa es pâpia es sô. — Flp. 2:4.

15. Ki otus kuza amigus pode faze pa djuda un kazal di namoradu? (Provérbios 12:18)

¹⁵ Tanbê nu pode djuda un kazal di namoradu através di kuzas ki nu ta fla i ki nu ka ta fla. Alvês nu meste kontrola nos kabésa. (Lé Provérbios 12:18.) Pur izénplu, nu pode xinti vontadi di fla otus algen ma un kazal dja kumesa ta namora. Má kel kazal pode krê da kel notísia li aes. Nu ka debe fika ta pâpia na vida di kel kazal ô ta kritika ses disizon. (Pro. 20:19; Rom. 14:10; 1 Tes. 4:11) Tanbê, nu ka debe fla nada ô faze perguntas ki pode poi kel kazal ta xinti preson pa kaza. Un irman ki txoma Eliza i se maridu ta lenbra: “Nu ta xintiba vergónha óras ki otus algen ta perguntaba nos sobri nos planu di kazamentu, dja ki inda nu ka papiaba sobri kel asuntu li.”

16. Kuzê ki nu debe faze si un kazal tirmina ses namoru?

¹⁶ I si un kazal disidi tirmina ses namoru? Nu debe ivita fika ta faze perguntas ô tenta sabe kenha ki é kulpadu. (1 Ped. 4:15) Un irman ki txoma Lea fla: “N obi ma alguns irmon staba ta tenta sabe pamodi ki mi ku un irmon nu tirmina namoru. N fika txeu maguadu.” Sima dja nu flaba antis, si un namoru tirmina, kel-li ka krê fla ma kel kazal toma un mau disizon. Na verdadi, kel-li krê fla ma kel namoru alkansa se obijetivu, ki é djudaba kel kazal toma un bon disizon. Má simé, kel disizon li ka foi fásil i talvês pô-s ta xinti tristi i es sô. Pur isu, nu debe djobe maneras di djuda-s. — Pro. 17:17.

17. Kuzê ki un kazal di namoradu debe kontinua ta faze?

¹⁷ Sima dja nu odja, namoru pode ten se difikuldadis, má tanbê pode ser un ténpu sábi. Jésika fla: “Pa fla verdadi, namoru ta da txeu trabadju. Má bale péna tudu kel ténpu i sforsu ki nu faze pa konxe kunpanheru dretu.” Si bu sta ta namora, kontinua ta sforsa pa nhos konxe kunpanheru dretu. Si nhos faze si, nhos namoru ta djuda nhos toma un bon disizon.