1-2. (a) Ki kuzas un sérvu di Jeová debe pensa na el ku kuidadu antis di kumesa ta namora? (b) Kuzê ki é “namoru”? (Odja “Más splikason”.)

 BU TA gostaba di kaza? Enbóra nu ka meste sta kazadu pa nu ser filís, txeu irmon ku irmans solteru ki é jóvens ô ki dja sta más grandi, ta gostaba di atxa un algen pa es kaza ku el. É klaru ki antis di bu kumesa ta namora, bu debe ten un amizadi fórti ku Jeová, konxe bu kabésa dretu i sta priparadu pa kuida di kes nisisidadi material di bu família. a (1 Kor. 7:36) Kes kuza li pode djuda-u ten un kazamentu filís.

² Má nen sénpri é ka fásil atxa un algen sértu pa kaza ku el. (Pro. 31:10) I mésmu ki bu atxa un algen ki bu ta gostaba di konxe midjór, nen sénpri é ka fásil kumesa un namoru. b Na kel studu li, nu sta ben odja kuzê ki pode djuda un sérvu di Jeová solteru skodje dretu un algen pa kaza ku el i kumesa un namoru. Tanbê nu ta ben odja modi ki kes algen na kongregason pode djuda kes algen ki krê kaza.

MODI KI BU PODE ATXA UN ALGEN SÉRTU PA KAZA KU EL

3. Ki kuzas un sérvu di Jeová debe pensa na el óras ki el ta djobe un algen pa el kaza ku el?

³ Si bu krê kaza, é midjór bu sabe ki kualidadis bu ta gostaba  pa kel algen ki bu krê kaza ku el ten antis di bu kumesa ta namora. Sinon, bu pode ka da kónta ma un algen podia ser un maridu ô un mudjer sértu pa bo, ô bu pode kumesa ta namora ku un algen ki ka ta ba ser un maridu ô un mudjer sértu pa bo. É klaru ki un bon maridu ô un bon mudjer pa bo debe ser un sérvu di Jeová batizadu. (1 Kor. 7:39) Má é ka tudu algen batizadu ki pode ser un algen sértu pa bu kaza ku el. Pur isu, é bon faze kes pergunta li: ‘Kal ki é nhas obijetivu na vida? Ki kualidadis N ta atxa ma é inportanti pa un algen ki N krê kaza ku el ten? N sta ta ser ikilibradu na kes kuza ki N sta ta spera?’

4. Sobri kuzê ki alguns algen ta ora?

⁴ Si bu krê kaza, di serteza dja bu ora sobri kel-li. (Flp. 4:6) É klaru ki Jeová ka ta promete ningen ma el ta da-l un maridu ô un mudjer. Má, el ta preokupa ku kuzê ki bu meste i ku bus sentimentu, i el ta djuda-u timenti bu sta ta djobe un algen pa bu kaza ku el. Pur isu, kontinua ta dexa-l sabe di bus dizeju i bus sentimentu. (Sal. 62:8) Ora ta pidi paxénxa i sabedoria. (Tia. 1:5) Un irmon solteru di Mérka ki txoma Juan c splika kuzê ki el ta fla na se orasons: “N ta fla Jeová ki kualidadis N krê pa kel algen ten. N ta ora pa N atxa un oportunidadi di konxe kel algen sértu. Tanbê N ta pidi Jeová pa djuda-m dizenvolve kes kualidadi ki ta pô-m ta ser un bon maridu.” Un irman di Sri Lanka ki txoma Tánia fla: “Timenti N sta ta djobe un algen sértu pa N kaza ku el, N ta pidi Jeová pa djuda-m ser fiel, puzitivu i filís.” Sikrê bu ten ki spera más di ki kel ki bu ta gostaba pa bu atxa un algen sértu pa bu kaza ku el, Jeová promete ma el ta kontinua ta kuida di bo i ma el ta da-u  kel amor i atenson ki bu ta meste. — Sal. 55:22.

5. Ki oportunidadis sérvus di Jeová solteru ten di konxe un algen ki ta ama Jeová? (1 Koríntius 15:58) (Odja fotus.)

⁵ Bíblia ta insentiva-nu pa nu “sta sénpri okupadu na óbra di Sinhor”. (Lé 1 Koríntius 15:58.) Si bu mante okupadu na bu sirvisu pa Jeová i bu tra ténpu pa sta ku irmons i ku irmans diferenti, bu ta fika kontenti di pasa momentus sábi djuntu ku es. Tanbê, bu ta konxe otus irmon ku irmans ki é solteru i ki sima bo sta konsentradu na ses sirvisu pa Jeová. I timenti bu sta ta faze bu midjór pa poi Jeová ta fika kontenti, bu ta xinti alegria di verdadi.

6. Óras ki un sérvu di Jeová krê djobe un algen pa kaza ku el, di kuzê ki el debe lenbra?

⁶ Má toma kuidadu pa bu ka dexa kel dizeju di atxa un algen pa bu kaza ku el bira kel kuza más inportanti na bu vida. (Flp. 1:10) Filisidadi di verdadi ka ta dipende si bu sta kazadu ô nau, má ta dipende di bu amizadi ku Jeová. (Mat. 5:3) I timenti bu sta solteru bu ten más xansi di faze más na pregason. (1 Kor. 7:32, 33) Uza kel ténpu li di midjór manera ki bu ta pode. Un irman di Mérka ki txoma Jésika, ki kaza ku kuazi 40 anu, fla: “Antis di N kaza, N staba okupadu na pregason, i kel-li djuda-m kontinua kontenti enbóra N krê kazaba.”

TRA TÉNPU PA SABE KUZAS SOBRI KEL ALGEN

7. Pamodi ki bu ta mostra sabedoria si bu tenta sabe alguns kuza di kel algen antis di bu fla-l ma bu sta interesadu na el? (Provérbios 13:16)

⁷ I si bu ta atxa ma un algen ta ser un bon maridu ô un bon mudjer pa bo? Bu debe fla kel algen lógu kuzê ki bu sta xinti? Bíblia ta fla ma un algen ki ten sabedoria ta pensa antis di aji. (Lé Provérbios 13:16.) Bu ta mostra sabedoria si pa un ténpu bu tenta sabe alguns kuza sobri kel algen, sen el da kónta, antis di bu fla-l kuzê ki bu sta xinti. Un irmon di Irlanda ki txoma Adilson fla: “Sentimentus pode dizenvolve faxi, má tanbê el pode kaba faxi. Nton, si bu tra ténpu pa bu sabe alguns kuza di kel algen, bu ka ta kumesa un namoru sô pamodi sentimentus ki pode kaba faxi.” Alén di kel-li, sima bu ta ba ta sabe alguns kuza di kel algen, bu pode da kónta ma el é ka un algen sértu pa bo.

8. Modi ki un algen solteru pode sabe alguns kuza di un algen ki pode ser un maridu ô mudjer sértu pa el?

⁸ Modi ki bu pode sabe alguns kuza di kel algen sen el da kónta? Na runion i na konvíviu, bu pode repara kuzas sobri kel algen, sima se amizadi ku Jeová, se manera di ser i se konportamentu. Kenha ki é se amigus, i di kuzê ki el ta pâpia? (Luk. 6:45) El ten mésmu méta ki bo? Bu pode pâpia ku ansions di se kongregason ô ku un otu sérvu di Jeová maduru ki konxe-l dretu. (Pro. 20:18) Pergunta-s kuzê ki otus algen ta pensa di el i sobri se kualidadis. (Rute 2:11) Timenti bu sta tenta sabe sobri kel algen, ka bu pô-l ta fika sen jetu. Ruspeta se sentimentus i ka bu fika tudu óra se tras ta tenta sabe tudu kuza sobri el.

9. Antis di bu pâpia ku un algen ki pode ser un maridu ô mudjer sértu pa bo, di kuzê ki bu debe ten serteza?

⁹ Kantu ténpu ki bu meste pa sabe alguns kuza di kel algen antis di bu fla-l ma bu sta interesadu na el? Si bu pâpia ku kel algen sédu dimás, el pode pensa ma bu ka pensa dretu antis di bu toma kel disizon. (Pro. 29:20) Má si kel algen da kónta ma  bu sta interesadu na el i bu leba txeu ténpu pa bu fla-l, el pode pensa ma bu ka sabe kuzê ki bu krê. (Ecl. 11:4) Lenbra ma antis di bu pâpia ku kel algen, bu ka meste ten serteza ma bu sta ba kaza ku el. Má, bu debe ten serteza ma bu sta priparadu pa bu kaza i ma kel algen pode ser un maridu ô un mudjer sértu pa bo.

10. Kuzê ki bu debe faze si bu da kónta ma un algen sta interesadu na bo, má bu ka sta interesadu na el?

¹⁰ Kuzê ki bu debe faze si bu da kónta ma un algen krê konxe-u midjór? Si bu ka sta interesadu na kel algen, tenta dexa kel-li klaru através di bu konportamentu. Ta sérba falta di amor poi un algen ta pensa ma talvês bu krê namora ku el si kel-la é ka bu intenson. — 1 Kor. 10:24; Efé. 4:25.

11. Si bu sta ba ranja un algen pa namora ô pa kaza ku un algen ki bu konxe, kuzê ki bu debe pensa na el?

¹¹ Na alguns país, pai ku mai ô otus algen na família talvês ta skodje un maridu ô un mudjer pa un algen di ses família ki é solteru. Na otus país, famílias ô amigus ta djobe un algen ki pode ser un bon maridu ô un bon mudjer pa un algen solteru i dipôs es ta ranja manera pa kel ómi ku mudjer inkontra, asi pa es odja si es krê namora. Si un algen pidi-u pa bu ranja-l un algen pa el namora ô kaza ku el, djobe kuzê ki kada un di kes algen krê i meste. Si bu atxa un algen ki pode interesa-l, tenta sabe tudu kel ki bu ta pode sobri kel algen, sima se manera di ser, se kualidadis i más inportanti inda, se amizadi ku Jeová. Un amizadi fórti ku Jeová é más inportanti di ki dinheru, ten bon skóla ô un bon puzison na sosiadadi. Má lenbra ma é kel irmon i kel irman ki debe disidi si es ta kaza ô nau. — Gál. 6:5.

MODI KI BU PODE KUMESA UN NAMORU

12. Modi ki bu pode fla un algen ma bu ta gostaba di namora ku el?

¹² Si bu ta gostaba di kumesa un namoru ku un algen, modi ki bu pode fla-l ma bu sta interesadu na el? d Bu pode marka pa pâpia ku kel algen na un lugar públiku  ô pa tilifóni. Fla kel algen klaru ma bu sta interesadu na el i ma bu ta gostaba di konxe-l midjór. (1 Kor. 14:9) Si meste, da kel algen ténpu pa el pensa na modi ki el ta responde. (Pro. 15:28) I si kel algen ka sta interesadu na kumesa un namoru, ruspeta se disizon.

13. Kuzê ki bu pode faze si un algen fla ma el sta interesadu na bo? (Kolosensis 4:6)

¹³ I si un algen fla-u ma el sta interesadu na bo? Talvês kel algen mesteba koraji pa ba pâpia ku bo, pur isu trata-l ku bondadi i ruspetu. (Lé Kolosensis 4:6.) Si bu meste ténpu pa bu pensa si bu ta konkorda na kumesa un namoru ô nau, dexa-l sabe kel-li. Má, tenta da-l un respósta más rápidu ki bu ta pode. (Pro. 13:12) Si bu ka sta interesadu na namoru ku el, fla-l klaru má ku bondadi. Odja kuzê ki un irmon di Áustria ki txoma Robertu fla un irman ki fla-l ma el staba interesadu na el: “N fla-l nha disizon ku jetu, má di manera klaru. N faze kel-li lógu pamodi N ka krê pa el pensaba ma N staba interesadu na namoru ku el. Pamodi kel-li, N fika ta toma kuidadu pa N ka fla nen faze nada ki ta pô-l ta pensa ma N muda di ideia.” Má, si bu krê konxe kel algen midjór, dexa-l sabe di kel-li i dipôs nhos pâpia sobri kes kuza ki nhos krê pa kontise duránti nhos namoru. Kuzê ki bu ta spera di un namoru pode ser diferenti di kuzê ki kel otu algen ta spera. Kel-li ta dipende di nhos kultura i tanbê di otus kuza.

MODI KI OTUS ALGEN PODE DJUDA KES IRMON KU IRMANS SOLTERU?

14. Modi ki nu pode djuda kes irmon ku irmans solteru?

¹⁴ Modi ki nos tudu nu pode djuda kes irmon ku irmans ki krê kaza? Un di kes manera é toma kuidadu ku kuzê ki nu ta fla. (Efé. 4:29) Nu pode pensa na kes pergunta li: ‘N ta fla kes solteru kuzas na brinkadera, má ki pode magua-s ô pô-s preson pa es kaza? Óras ki N odja un irmon ô un irman solteru ta pâpia, N ta pensa lógu ma es ten interesi na kunpanheru?’ (1 Tim. 5:13) Tanbê, nunka nu ka debe faze kuzas ki ta poi kes algen solteru ta xinti ma ten algun kuza mariadu ku es pamodi es é ka kazadu. Robertu, ki dja nu papiaba di el antis, fla: “Alguns irmon ta fla: ‘Pamodi ki bu ka ta kaza? Bu ka sta jóven más.’ Kes tipu di komentáriu li ta poi kes irmon ku irmans solteru ta xinti sen valor i ta pô-s ku más preson pa es  xinti ma es ten ki kaza.” É mutu más midjór djobe oportunidadis pa ilojia kes irmon ku irmans solteru! — 1 Tes. 5:11.

15. (a) Kuzê ki nu debe pensa na el antis di nu djuda un algen atxa un maridu ô un mudjer? (Romanus 15:2) (Odja fotu.) (b) Ki lisons inportanti bu prende na vídiu?

¹⁵ I si bu ta atxa ma un irmon ku un irman ta faze un bon kazal? Bíblia ta fla ma nu debe preokupa ku sentimentus di otus algen. (Lé Romanus 15:2.) Txeu irmon ku irmans ka krê ajuda pa atxa un algen pa es kaza ku el, i nu debe ruspeta ses disizon. (2 Tes. 3:11) Otus solteru pode krê algun ajuda, má nu ka debe mete na kel asuntu li si es ka pidi-nu. e (Pro. 3:27) Alguns irmon ku irmans solteru krê pa nu djuda-s má ka di un manera dirétu. Un irman di Alimanha ki txoma Lídia, fla: “Bu pode inklui un irmon ku un irman na un grupu grandi. Basta bu kria un oportunidadi pa es inkontra, i kel otu bu ta dexa na ses mô.”

16. Di kuzê ki un irmon ô un irman solteru debe lenbra di el?

¹⁶ Nos tudu, solteru ô kazadu, nu pode ten un vida sábi i filís! (Sal. 128:1) Nton, si bu krê kaza i inda bu ka atxa un algen, kontinua konsentradu na bu sirvisu pa Jeová. Un irman di Makau ki txoma Síntia, fla: “Konparadu ku kel ténpu ki bu ta ben pasa ku bu maridu ô bu mudjer na Paraízu, kel ténpu ki bu sta solteru é poku. Apruveita kel ténpu li i uza-l dretu.” Má i si bu atxa un algen ki pode ser un maridu ô mudjer sértu pa bo i dja nhos kumesa ta namora? Na kel otu studu nu ta ben odja modi ki bu pode ten un namoru ki ta djuda-u toma un bon disizon.