1. Modi ki Bíblia ta pâpia di amor di verdadi?

 BÍBLIA ta pâpia di amor di verdadi di un manera txeu bunitu. El ta fla: ‘Xama di amor é sima un lumi ta kema, sima xama di Jeová. Ka ten agu ki ta pode paga lumi di amor, nen riu ki ta pode leba-l na se korenti.’ b (Cân. 8:6, 7) Kes palavra li ta da maridu ku mudjer sertéza ma es pode ten un amor fórti pa kunpanheru.

2. Kuzê ki un kazal debe faze pa ses amor pa kunpanheru ka fria?

² Maridu ku mudjer meste sforsa pa mostra amor pa kunpanheru timenti es sta bibu. Pur izénplu, un lumi ta kontinua ta kema timenti un algen sta ta poi lenha na el. Si ningen ka faze kel-li, lumi ta paga. Di mésmu manera, amor entri maridu ku mudjer pode kontinua fórti pa tudu ténpu, si es kontinua ta kuida di ses amor. Alvês, maridu ku mudjer pode xinti ma ses amor sta ta fria, prinsipalmenti óras ki es tene falta di dinheru, prublémas di saúdi ô preson pa kria fidjus. Nton si bo é kazadu, modi ki bu pode kontinua ku ‘xama di Jeová’ sendedu na bu kazamentu? Na kel studu li, nu ta ben odja três manera di kontinua ku nhos kazamentu fórti i filís. c

3. Modi ki un amizadi fórti ku Jeová ta djuda un kazal kontinua ku ses amor fórti pa kunpanheru? (Eclesiastes 4:12) (Odja dizenhu i fotu.)

³ Pa kontinua ku ‘xama di Jeová’ sendedu, maridu ku mudjer debe sforsa pa ten un amizadi fórti ku Jeová.  Modi ki faze kel-li ta djuda kazamentu? Óras ki un kazal ta da valor pa ses amizadi ku ses Pai na séu, es ta tene gana di sigi se konsedjus, i kel-li ta djuda-s ivita i vense prublémas ki pode poi ses amor pa kunpanheru ta fria. (Lé Eclesiastes 4:12.) Kes algen ki ten un amizadi fórti ku Jeová, tanbê ta faze ses midjór pa imita-l i dizenvolve kualidadis, sima bondadi, paxénxa i gana di púrdua. (Efé. 4:32–5:1) Óras ki un kazal ta mostra kes kualidadi li é más fásil ses amor pa kunpanheru bira más fórti. Un irman ki txoma Lena, ki dja ten más di 25 anu kazadu, fla: “É fásil ama i ruspeta un algen ki ten un amizadi fórti ku Jeová.”

4. Pamodi ki Jeová skodje Juzé ku Maria pa sérba pai ku mai di se Fidju ki ta ben sérba Misías?

⁴ Odja un izénplu di Bíblia. Kantu Jeová tevi ki skodje un kazal pa sérba pai ku mai di se Fidju ki ta ben biraba Misías, El skodje Juzé ku Maria na meiu di monti algen ki ben di família di Davidi. Pamodi ki el skodje-s? Pamodi es tudu dôs tinha un amizadi fórti ku Jeová i Jeová sabia ma es ta poba el na primeru lugar na ses kazamentu. Maridu ku mudjer, kuzê ki nhos pode prende ku Juzé i Maria?

5. Kuzê ki maridus pode prende ku Juzé?

⁵ Juzé sigi orientason di Jeová lógu i kel-li djuda-l bira un maridu midjór. El resebe orientason di Deus sobri se família peloménus três bês. Kada bês, el sigi-s lógu, sikrê éra difísil pa el. (Mat. 1:20, 24; 2:13-15, 19-21) Pamodi Juzé obi ku Deus, el proteje Maria, el djuda-l i el kuida di el. Pensa na modi ki kuzê ki Juzé faze pa Maria poi amor i ruspetu ki Maria tinha pa el ta bira más fórti! Maridus, nhos pode imita Juzé óras ki nhos ta djobe konsedjus ku bazi na Bíblia sobri modi ki nhos pode kuida di nhos família. d Óras ki nhos ta faze kel-li, sikrê nhos ten ki faze mudansas, nhos ta mostra ma nhos ta ama nhos mudjer i nhos ta bira nhos kazamentu más fórti. Un irman na Vanuatu, ki dja ten más di 20 anu kazadu, fla: “Óras ki nha maridu ta djobe i ta sigi orientason di Jeová, N ta ruspeta-l más txeu. N ta xinti suguru i N ten kunfiansa na disizons ki el ta toma.”

6. Kuzê ki mudjeris pode prende ku Maria?

⁶ Maria tinha se amizadi ku Jeová. Se fé ka ta dipendeba di kuzê ki Juzé ta fazeba. El konxeba Srituras dretu. (Luk. 1:46.) Tanbê el ta traba ténpu pa midita. (Luk. 2:19, 51) Di sertéza, amizadi ki Maria tinha ku Jeová pô-l ta bira un bon mudjer. Oji, txeu mudjer ta sforsa pa  faze sima Maria. Pur izénplu, un irman ki txoma Emiku, fla: “Antis di N kaza, N ta fazeba orason, N ta studaba i N ta miditaba mi sô. Má dipôs ki N kaza, nha maridu ta fazeba orason pa nos i el ta fazeba adorason na família. Pur isu, N da kónta ma N kumesa ta dipende di kes kuza ki el ta fazeba pa mi. Dipôs, N odja ma N meste kontinuaba ku nha amizadi fórti ku Jeová di mi pa mi. Nton, gósi N ta tra ténpu pa N sta ku nha Deus, pa N ora, pa N lé Bíblia i pa N midita na kuzê ki el ta fla.” (Gál. 6:5) Mudjeris, óras ki nhos kontinua ta bira nhos amizadi ku Jeová más fórti, nhos maridu ta ten más motivu inda pa ilojia i ama nhos. — Pro. 31:30.

7. Kuzê ki un kazal pode prende ku Juzé i Maria sobri adora Jeová djuntu?

⁷ Juzé ku Maria tanbê faze kuzas djuntu pa kontinua ku ses amizadi ku Jeová fórti. Es sabia ma éra inportanti adora Jeová djuntu na família. (Luk. 2:22-24, 41; 4:16) Talvês foi difísil es faze kel-li prinsipalmenti kantu es tevi más fidjus. Má es konsigi faze-l. Kel-li é un bon izénplu pa kes ki é kazadu oji! Si nhos ten fidjus, sima Juzé ku Maria, pode ser difísil sisti runion ô tra ténpu pa faze adorason na família. Pode ser más difísil inda nhos ranja ténpu pa studa ô faze orason djuntu ku kunpanheru. Má, nhos lenbra ma óras ki nhos ta adora Jeová djuntu, nhos pode bira más se amigu i más amigu di kunpanheru. Pur isu, nhos poi adorason pa Jeová na primeru lugar.

8. Kuzê ki un kazal ki tene prubléma na kazamentu pode faze pa tra más pruvetu di adorason na família?

⁸ Kuzê ki bu pode faze si bu tene prubléma na kazamentu? Talvês nen nhos ka ten gana más di faze adorason na família djuntu. Na kel situason li, nhos kumesa ta analiza algun kuza kurtu i ki nhos gosta, algun kuza ki nhos tudu ta konkorda pa pâpia di el. Kel-li pode djuda nhos ama kunpanheru más txeu i krê adora Jeová djuntu.

9. Pamodi ki maridu ku mudjer debe pasa ténpu ku kunpanheru?

⁹ Maridu ku mudjer, tanbê nhos pode kontinua ku nhos amor fórti óras ki nhos ta pasa ténpu djuntu. Faze kel-li ta djuda nhos sta sienti na kuzê ki kada un di nhos ta pensa i ta xinti. (Gén. 2:24) Repara kuzê ki Lilia i Ruslan, ki dja ten más di 15 anu kazadu da kónta lógu dipôs ki es kaza. Lilia fla: “Nu da kónta ma nu pode ka pasaba txeu ténpu djuntu sima nu ta pensaba antis. Nu ta staba txeu okupadu ku trabadju, kuida di kaza i dipôs di nos fidjus. Nu odja ma si nu ka traba ténpu pa nos, nu pode afastaba di kunpanheru.”

10. Modi ki maridu ku mudjer pode aplika kel konsedju ki sta na Efésios 5:15, 16?

¹⁰ Kuzê ki maridu ku mudjer pode faze pa pasa ténpu djuntu? Nhos pode faze planu pa pasa ténpu ku kunpanheru. (Lé Efésios 5:15, 16.) Un irmon na Nijéria, ki txoma Uzondu, fla: “Óras ki N ta faze planu pa kes kuza ki N ten ki faze, tanbê N ta faze planu pa pasa ténpu djuntu ku nha mudjer, i pa mi kel-la é un di kes kuza más inportanti.” (Fil. 1:10) Odja modi ki Anastasia, ki é mudjer di un enkaregadu di grupu di kongregason na Moldávia, ta uza se ténpu di midjór manera. El fla: “N ta tenta  faze kuzas ki N meste timenti nha maridu sta okupadu ku se responsabilidadis. Asi dipôs, nu ta pode pasa ténpu djuntu ku kunpanheru.” Má i si nhos sta txeu okupadu i é difísil atxa ténpu pa fika djuntu?

11. Kuzê ki Ákila ku Prisila ta fazeba djuntu?

¹¹ Maridu ku mudjer pode prende ku izénplu di Ákila i Prisila, ki éra un kazal ki txeu algen gostaba di es na ténpu di apóstlus. (Rom. 16:3, 4) Enbóra Bíblia ka ta pâpia txeu sobri ses kazamentu, el ta mostra ma es ta trabadjaba, es ta pregaba i es ta djudaba otus algen. I es ta fazeba tudu kel-li djuntu. (Atus 18:2, 3, 24-26) Na verdadi, sénpri ki Bíblia ta pâpia di Ákila ku Prisila, el ta pâpia di es djuntu.

12. Kuzê ki maridu ku mudjer debe faze pa pasa más ténpu ku kunpanheru? (Odja dizenhu i fotu.)

¹² Modi ki maridu ku mudjer pode imita Ákila ku Prisila? Pensa na kes txeu kuza ki abo i bu maridu ô bu mudjer meste faze. Nhos ta pode faze alguns di kes kuza li djuntu ku kunpanheru, envês di kada kenha faze di sel? Pur izénplu, Ákila ku Prisila ta baba pregason djuntu. Nhos ta faze planu sénpri pa faze mésmu kuza? Ákila ku Prisila tanbê ta trabadjaba djuntu. Talvês bo ku bu maridu ô bu mudjer nhos ka ten mésmu trabadju. Má nhos ta pode faze kes trabadju di kaza djuntu? (Ecl. 4:9) Óras ki nhos ta djuda kunpanheru faze un trabadju, nhos ta xinti sima un ekipa i nhos ta ten oportunidadi di pâpia ku kunpanheru. Robertu ku Linda dja ten más di 50 anu kazadu. Robertu fla: “Pa ser sinseru, nu ka ten txeu ténpu pa divirti ku kunpanheru. Má óras ki N ta laba losa i nha mudjer ta seka, ô óras ki N sta ta kuida di jardin i el ta ben djuda-m, N ta fika txeu kontenti. Faze kuzas djuntu ta pô-nu más unidu. Nos amor ta kontinua ta bira más fórti.”

13. Pa maridu ku mudjer sta unidu di verdadi, kuzê ki es debe faze?

¹³ Má lenbra ma pasa ténpu djuntu ku kunpanheru nen sénpri ka krê fla ma maridu ku mudjer ta bira más unidu. Un mudjer kazadu na Brazil, fla: “Gósi ten txeu kuza ki ta distrai-nu ki é fásil pensa ma nu ta pasa ténpu djuntu ku kunpanheru sô pamodi nu ta mora na mésmu kaza. N prende ma bu meste faze más di ki sô sta djuntu ku kunpanheru. Tanbê, N meste da nha maridu kel atenson ki el meste.” Repara modi ki Brunu i se mudjer, Taís, ta sforsa pa da kunpanheru atenson. Brunu fla: “Duránti nos ténpu livri, nu ta poi nos telemóvel pa la i nu ta pasa ténpu djuntu.”

14. Si un kazal ka gosta di pasa ténpu djuntu, kuzê ki es pode faze?

 ¹⁴ Má, i si bo i bu maridu nhos ka gosta di pasa ténpu djuntu? Talvês nhos ka gosta di mésmu kuza, ô talvês nhos ta irita kunpanheru. Kuzê ki nhos pode faze? Pensa na kel izénplu di lumi ki dja nu papiaba di el antis. Lumi ka ta bira grandi lógu ki el sendedu. Bu meste pô-l lenha pa el bira más grandi. Di mésmu manera, pamodi ki nhos ka ta kumesa ta pasa poku ténpu ku kunpanheru tudu dia? Nhos djobe manera di faze algun kuza ki nhos tudu gosta, envês di un kuza ki ta poi un di nhos ku raiba. (Tia. 3:18) Si nhos kumesa ku kuzas pikinoti, nhos amor pode bira fórti otu bês.

15. Pamodi ki ruspetu é inportanti pa maridu ku mudjer kontinua ku ses amor sendedu?

¹⁵ Ruspetu é inportanti na kazamentu. El é sima ar ki ta djuda lumi sende. Sen ar, lumi ta paga faxi. Di mésmu manera, si un maridu ku mudjer ka ten ruspetu pa kunpanheru, ses amor pode fria faxi. Má, si maridu ku mudjer ta sforsa pa mostra ruspetu pa kunpanheru, es sta ta trabadja pa ses amor kontinua sendedu. Má lenbra ma, é ka si bu ta atxa ma bu sta ta mostra ruspetu, má é si ken ki bu sta kazadu ku el ta xinti ma bu sta ruspeta-l. Peni ku Aret, dja ten más di 25 anu kazadu. Peni fla: “Pamodi nu ta ruspeta kunpanheru, nos kaza é un lugar xeiu di amor. Nu ta xinti avontádi pa fla kuzê ki nu ta atxa pamodi nu sabe ma nu ta da valor pa opinion di kunpanheru.” Nton, kuzê ki bu pode faze pa djuda bu maridu ô bu mudjer xinti ma bu ta ruspeta-l di korason? Odja izénplu di Abraon ku Sara.

16. Kuzê ki maridus pode prende ku izénplu di Abraon? (1 Pedro 3:7) (Odja dizenhu i fotu.)

¹⁶ Abraon trata Sara ku ruspetu. El obi opinion di Sara i el ruspeta kuzê ki el staba ta xinti. Un bês, Sara staba disgostadu i el fla Abraon modi ki el staba ku raiba i ti el poi kulpa na Abraon. Má Abraon fika xatiadu i el fla algun kuza ki magua-l? Nau. El sabia ma Sara ta obiba ku el i ma el ta apoiaba disizons ki el ta tomaba. Abraon obi-l i el tenta rezolve kel prubléma. (Gén. 16:5, 6) Kuzê ki nu pode prende? Maridus, nhos ten autoridadi pa toma disizons pa nhos família. (1 Cor. 11:3) Má, un kuza ki nhos pode faze ku amor é obi opinion di nhos mudjer antis di toma un disizon, prinsipalmenti si kel disizon ta afeta nhos mudjer. (1 Cor. 13:4, 5) Alvês, nhos mudjer pode sta preokupadu i es pode meste  pâpia sobri kuzê ki es sta ta xinti. Bu ta obi-l ku atenson pa mostra ma bu ta ruspeta kuzê ki el sta xinti? (Lé 1 Pedro 3:7.) Ánjila ku Dmitri dja ten kuazi 30 anu kazadu. Ánjila fla modi ki se maridu ta mostra ma el ta ruspeta-l. El fla: “Dmitri ta sta sénpri prontu pa obi-m óras ki N sta xatiadu ô óras ki N krê pâpia. El ta mostra paxénxa ku mi, sikrê óras ki N ka ta pâpia kalmu.”

17. Kuzê ki mudjeris pode prende ku izénplu di Sara? (1 Pedro 3:5, 6)

¹⁷ Sara ruspeta Abraon kantu el apoia disizons ki el toma. (Gén. 12:5) Un bês, Abraon disidi resebe uns algen ki es ka staba ta spéra. El pidi Sara pa para kuzê ki el staba ta faze i pa el faze txeu pon. (Gén. 18:6) Sara aji lógu i el apoia disizon di Abraon. Mudjeris, nhos pode imita Sara óras ki nhos ta apoia disizons ki nhos maridu ta toma. Óras ki nhos ta faze kel-li, nhos ta bira nhos kazamentu más fórti. (Lé 1 Pedro 3:5, 6.) Dmitri, ki nu papiaba di el na parágrafu 16, splika modi ki se mudjer ta mostra ruspetu pa el. El fla: “N ta da valor pa sforsu ki Ánjila ta faze pa apoia disizons ki N ta toma, sikrê el ka ta konkorda ku mi. Si kuzas ka da dretu, el ka ta kritika-m.” É fásil ama un algen ki ta ruspeta-u!

18. Ki bons rezultadu maridu ku mudjer ta ten óras ki es ta sforsa pa ses amor kontinua sendedu?

¹⁸ Gósi, Satanás krê kaba ku amor ki ten na kazamentu di kes algen ki ta sirbi Deus. El sabe ma si un kazal perde amor ki es ten pa kunpanheru, es pode kumesa ta afasta di Jeová. Má, amor di verdadi ka pode kabadu ku el! Pur isu, amor ki ten na bu kazamentu debe ser sima kel ki Cântico de Salomão ta pâpia di el. Nhos debe sta disididu na poi Jeová na primeru lugar na nhos kazamentu. Nhos tra ténpu pa kunpanheru i nhos mostra ruspetu pa kuzê ki kada un di nhos ta xinti i ta meste. Si nhos faze kel-li, nhos kazamentu ta da ónra pa Fonti di amor di verdadi, ki é Jeová. I sima un lumi ki ta podu lenha, nhos amor ta kontinua sendedu pa ténpu ki nhos vive.