1. Kuzê ki Jeová faze lógu dipôs ki Adon ku Eva peka? (Génesis 3:15)

 LÓGU dipôs ki Adon ku Eva peka, Jeová da speransa pa ses disendentis através di un profesia inportanti. Kuzê ki el fla sta na Génesis 3:15. — Lé.

2. Pamodi ki kel profesia di Génesis 3:15 é inportanti?

² Kel profesia li sta na primeru livru di Bíblia. Má tudu kes otu livru di Bíblia sta ligadu ku el di algun manera. Sima argóla di un kadérnu ta djunta tudu kes fódja, kes palavra ki sta na Génesis 3:15 ta djunta kada livru di Bíblia na un mensaji sô. Kel mensaji é ma Deus ta manda un Salvador pa distrui Satanás i tudu kes algen ki ta sigi-l. b Kel-li ta ben ser un benson pa tudu kes ki ta ama Jeová!

3. Kuzê ki nu ta ben odja na kel studu li?

³ Na es studu, nu sta ben responde kes pergunta li sobri profesia di Génesis 3:15: Kenha  ki é kes personájen di es profesia? Modi ki es profesia kunpri? I modi ki el sta ta djuda-nu?

4. Kenha ki é ‘kóbra’ i modi ki nu sabe kel-li?

⁴ Kes personájen di Génesis 3:14, 15 é ‘kóbra’, ‘disendenti’ di kóbra, ‘mudjer’ i ‘disendenti’ di mudjer. Bíblia ta djuda-nu sabe es é kenha. c Nu ben kumesa ku  ‘kóbra’. Un kóbra ka ta konsigi ntendeba kuzê ki Jeová fla na jardin di Éden. Pur isu, kenha ki Jeová staba ta pâpia ku el éra un kriatura intilijenti. Kel-li é kenha? Apocalipse 12:9 ta splika klaru kenha ki é kel kóbra. El ta fla ma kel ‘primeru kóbra’ é Satanás. Má kenha ki é disendenti di kóbra?

5. Kenha ki é disendenti di kóbra?

⁵ Alvês Bíblia ta uza palavra disendenti pa pâpia di un algen ki ta imita kel otu dretu ki el pode txomadu se fidju. Nton disendenti di kóbra é kes anju ki é ka fiel i kes algen ki, sima Satanás, é kóntra Jeová i se povu. Kel-li ta inklui kes anju ki bandona ses diziginason na Séu na ténpu di Nué i tanbê kes algen mau li na Téra ki ta konporta sima ses pai, ki é Satanás. — Gén. 6:1, 2; João 8:44; 1 João 5:19; Judas 6.

6. Pamodi ki kel ‘mudjer’ ka pode ser Eva?

⁶ Gósi, nu ben odja kenha ki é kel ‘mudjer.’ El ka pode ser Eva. Pamodi? Nu ben odja sô un motivu. Kel profesia ta fla ma disendenti di mudjer ta ben ‘pila’ kabésa di kóbra. Sima dja nu odja, kel kóbra é kel anju mau ki é Satanás i ninhun disendenti di Eva ka ta konsigi pila-l kabésa. Nton modi ki Satanás ta ben sérba distruídu?

7. Sima sta na Apocalipse 12:1, 2, 5 i 10, kenha ki é kel mudjer di Génesis 3:15?

⁷ Últimu livru di Bíblia ta fla-nu kenha ki é kel mudjer di Génesis 3:15. (Lé Apocalipse 12:1, 2, 5, 10.) Kel-li é ka un mudjer li na Téra. El ten lua dibaxu di se pé i un koroa di 12 stréla na se  kabésa. El ten un fidju ki é diferenti, ki é Reinu di Deus. Dja ki Reinu di Deus ta sta na Séu kel mudjer li tanbê ta sta la. El ta reprizenta kel párti di organizason di Jeová na Séu ki ta inklui kes anju fiel. — Gál. 4:26.

8. Kenha ki é disendenti prinsipal di mudjer i na ki ténpu ki kel-li kontise? (Génesis 22:15-18)

⁸ Palavra di Deus ta djuda-nu ntende tanbê kenha ki é kel disendenti prinsipal di mudjer. El ta sérba disendenti di Abraon. (Lé Génesis 22:15-18.) Sima profesia dja flaba, Jizus éra disendenti dirétu di Abraon. (Luc. 3:23, 34) Má kel disendenti tinha ki ten mutu más puder di ki un algen pamodi el tinha ki distrui Satanás. Kantu Jizus tinha uns 30 anu el skodjedu ku spritu santu. Kantu el skodjedu el bira kel párti prinsipal di disendenti di mudjer. (Gál. 3:16) Dipôs ki Jizus móre i resusitadu, Deus pô-l koroa di glória i ónra i da-l ‘tudu autoridadi na Séu i na Téra’ i kel-li ta inklui autoridadi pa ‘disfaze óbras di Diabu.’ — Heb. 2:7; Mat. 28:18; 1 João 3:8.

9-10. (a) Kenha más ki ta faze párti di disendenti di mudjer i ki ténpu ki kel-li ta kontise? (b) Kuzê ki nu sta ben studa gósi?

⁹ Má tanbê ten otus algen ki ta faze párti di disendenti di mudjer. Apóstlu Polu fla kenha ki é kel párti li di disendenti kantu el pâpia ku kes kriston skodjedu ki éra judeu i otus ki ka éra judeu. El fla-s: ‘Si nhos é di Kristu, nhos é própi disendenti di Abraon, anhos é erderu pamodi un promésa ki fazedu.’ (Gál. 3:28, 29) Óras ki Jeová ta skodje un kriston ku spritu santu, kel algen ta bira ta faze párti di disendenti di mudjer. Nton Jizus i kes 144 mil algen ki ta ba governa ku el é disendenti di mudjer. (Apo. 14:1) I tudu es ta tenta pensa i aji sima ses Pai Jeová.

¹⁰ Gósi ki dja nu sabe kenha ki é kes personájen di Génesis 3:15, nu sta ben prende kuzê ki Jeová dja faze pa kunpri kel profesia li i modi ki el sta djuda-nu gósi.

11. Di ki manera ki es fri ‘kalkanhada’ di disendenti di mudjer?

¹¹ Sima profesia di Génesis 3:15 ta mostra, kóbra ta ben friba disendenti di mudjer ‘na kalkanhada.’ Kel-li kunpri kantu Satanás poi kes judeu i kes romanu ta mata Fidju di Deus. (Luc. 23:13, 20-24) Óras ki un algen da un pankada na kalkanhada el ka ta konsigi faze kuzas ki normalmenti el ta faze sen prubléma. Di mésmu manera, duránti kes três dia ki Jizus staba mortu el ka konsigi faze nada. — Mat. 16:21.

12. Modi i ki ténpu ki kabésa di kóbra ta ben piladu?

¹² Pa profesia di Génesis 3:15 kunpriba, Jizus ka pode kontinuaba mortu. Pamodi? Pamodi di akordu ku kel profesia li, kel disendenti ta pilaba kabésa di kóbra. Kel-li krê fla ma Jizus tinha ki sérba resusitadu. I é kel-li própi ki kontise! Na tirseru dia dipôs ki Jizus móre, el resusitadu pa ten un vida na Séu ki ka ta kaba. Na ténpu sértu di Deus, Jizus ta ben kaba ku Satanás. (Heb. 2:14) Jizus i kes ki ta ba governa  ku el ta ben distrui tudu kes inimigu di Deus na Téra, ki é disendenti di kóbra. — Apo. 17:14; 20:4, 10. d

13. Modi ki kel profesia li ki sta ta kunpri, sta ta djuda-nu?

¹³ Si bu ta sirbi Deus, kel profesia li ki sta ta kunpri, sta ta djuda-u. Kantu Jizus vive na Téra el imita kes kualidadi di se Pai di manera perfeitu. (João 14:9) Pur isu, óras ki nu ta prende sobri Jizus nu ta konxe i nu ta ama Jeová. Tanbê kes kuza ki Jizus inxina i manera ki el ta orienta kongregason oji ta djuda-nu. El inxina-nu modi ki nu ta vive di un manera ki ta agrada Jeová. I pamodi Jizus fridu na kalkanhada ô el móre, kel-li ta djuda nos tudu. Di ki manera? Kantu Jizus resusitadu, Jeová seta sangi di se Fidju pa ser un sakrifisiu perfeitu pa ‘linpa-nu di tudu pekadu.’ — 1 João 1:7.

14. Modi ki nu sabe ma kel profesia ki Jeová fla na jardin di Éden ka pode kunpriba na kel ténpu?

¹⁴ Kuzê ki Jeová fla na kel profesia na jardin di Éden mostra ma el ka pode kunpriba na kel ténpu. Kel profesia ta mostra ma mudjer ta ben tinha un disendenti, ma Satanás ta ben djuntaba se sigidoris i ma kes dôs grupu li ta ben sérba inimigu (ô ta odiaba) kunpanheru. Pa tudu kes kuza li kontiseba tinha ki pasaba algun ténpu. Ntende kel profesia li ta djuda-nu pamodi é un avizu ma kel mundu li, ki Satanás sta ta kontrola, ta ben ôdia kes algen ki ta adora Jeová. I é kel avizu li ki Jizus ben da se disiplus dipôs. (Mar. 13:13; João 17:14) Di sertéza nu sta ta odja kel párti li di es profesia ta kunpri, prinsipalmenti duránti kes últimu 100 anu. Modi?

15. Pamodi ki mundu sta ta odia-nu más txeu, má pamodi ki nu ka ten motivu pa xinti medu di Satanás?

¹⁵ Poku dipôs ki Jizus bira Rei na 1914, Satanás tradu di Séu. Gósi Satanás sta li na Téra ta spéra pa el distruídu. (Apo. 12:9, 12) Má el ka sta xintadu ta spéra. Satanás sta dizusperadu ku raiba i ta diskonta se raiba na povu di Deus. (Apo. 12:13, 17) É pamodi kel-li ki mundu di Satanás sta ta odia-nu kada bês más. Má nu ka ten motivu pa xinti medu di Satanás i di kes algen ki ta sigi-l. Envês di kel-li, nu pode ten kel mésmu sertéza di apóstlu Polu, ki fla: ‘Si Deus sta ku nos, ken ki ta fika kóntra nos?’ (Rom. 8:31) Nu pode ten tudu kunfiansa na Jeová pamodi sima dja nu odja, maior párti di kel profesia ki sta na Génesis 3:15 dja kunpri.

16-18. Modi ki ntende Génesis 3:15 djuda Curtis, Ursula, i Jésika?

¹⁶ Promésa di Jeová na Génesis 3:15 pode djuda-nu lida ku kalker prubléma ki nu pode pasa pa el. Curtis, ki é misionáriu na Guan, fla: “Kontise alguns kuza na nha vida, ki pa mi kontinua lial pa Jeová bira más difísil. Má midita na profesia di Génesis 3:15 djuda-m kunfia na nha Pai na Séu.” Curtis tene gana pa txiga kel dia ki  Jeová ta ben kaba ku tudu nos prubléma.

¹⁷ Un irman na Bavaria, ki txoma Ursula, fla ma ntende Génesis 3:15 djuda-l ten sertéza ma Bíblia é Palavra di Deus. El odja modi ki tudu kes otu profesia sta ligadu ku profesia di Génesis 3:15 i kel-li dexa-l dimiradu. El fla: “Kantu ki N prende ma Jeová faze algun kuza lógu pa da-nu speransa kel-li poi nha amor pa el ta bira más txeu.”

¹⁸ Jésika, di Mikronézia, fla: “Inda N ta lenbra modi ki N xinti kantu ki N da kónta ma dja N atxa verdadi. Kel profesia di Génesis 3:15 staba ta kunpri. El djuda-m lenbra ma Jeová ka kreba pa nu pasa pa kes kuza ki nu sta sufri gósi. Kel profesia li da-m más sertéza ma sirbi Jeová é midjór manera di vive gósi i ma na futuru N pode ben ten un vida mutu más midjór.”

19. Pamodi ki nu pode ten sertéza ma últimu párti di es profesia ta ben kunpri?

¹⁹ Sima dja nu odja, Génesis 3:15 sta ta kunpri gósi. Dja fika klaru kenha ki é disendenti di mudjer i kenha ki é disendenti di kóbra. Jizus, ki é kel párti prinsipal di disendenti di mudjer, dja rekupera di kel frida na kalkanhada i gósi el é un Rei poderozu ki ka ta móre. Jeová dja skodje kuazi tudu kes algen ki ta ba governa ku se Fidju na Séu. Pamodi kel primeru párti di es profesia dja kunpri, nu ten tudu motivu pa kunfia ma kel últimu párti, ki é pila kabésa di kóbra, tanbê ta ben kunpri. Kes sérvu di Deus ta ben fika kontenti óras ki Satanás distruídu! Timenti kel dia ka txiga, ka nu dizisti. Nos Deus é di kunfiansa. Através di disendenti di mudjer el ta ben faze txeu kuza sábi pa ‘tudu nasons na Téra’. — Gén. 22:18.