1. Pamodi ki Jeová ka ta konpara-nu ku otus algen?

 JEOVÁ gosta di kuzas diferenti. Nu sabe kel-li pamodi el faze txeu tipu di kuzas diferenti sima plantas, animal i ti mésmu algen. Ka ten ningen ki é sima bo. Pur isu, Jeová ka ta konpara-u ku otus algen. El konxe bu korason, ô kel algen ki bo é di pa déntu. (1 Sam. 16:7) Tanbê el sabe kuzê ki bu sabe faze dretu, kuzê ki bu ka sabe faze dretu i modi ki bu kriadu. I el ka ta pidi-u pa bu faze kel ki bu ka ta pode. Nu meste prende odja nos kabésa sima Jeová ta odja-nu. Di kel manera li, nu ta ten ‘bon juís’, ô nu ka ta atxa ma nos é más midjór nen más piór di ki ningen. — Rom. 12:3.

2. Pamodi ki é ka bon nu konpara nos kabésa ku otus?

² É ka mariadu nu presta atenson na kes bon izénplu di otus algen. Pur izénplu, talvês bu konxe un irmon ô un irman ki é bon na prega. (Heb. 13:7) Nu pode prende ku es sobri modi ki nu pode midjora nos manera di prega. (Fil. 3:17) Má ten un diferénsa grandi entri imita un algen i konpara bu kabésa ku kel algen. Si nu konpara nos kabésa ku otus, nu pode xinti invéja, fika dizanimadu ô ti mésmu xinti ma nu ka ten valor. Má sima nu prende na kel studu ki pasa, si nu tenta konpiti ku otus algen, nu ta poi nos amizadi ku Jeová na prigu. É pur isu ki Jeová ta da-nu kel konsedju li ku amor: ‘Má kada un debe djobe pa kel ki el ta faze, asi el ta ten motivu di fika kontenti sô ku se kabésa, sen konpara ku otus algen.’ — Gál. 6:4.

3. Ki prugrésu dja bu faze ki dexa-u kontenti?

³ Jeová krê pa bu fika kontenti ku bu prugrésu spritual.  Pur izénplu, si bo é batizadu, bu debe fika kontenti pamodi bu alkansa kel obijetivu li! Bu toma kel disizon li di bo pa bo. É bu amor pa Deus ki pô-u ta faze kel-li. Pensa na kes prugrésu ki dja bu faze désdi ki bu batiza. Pur izénplu, bu ta xinti ma bu sta gosta más txeu di faze leitura di Bíblia i studu pesoal? Bu ta atxa ma bu sta abri bu korason más txeu na bus orason? (Sal. 141:2) Bu sta xinti más avontádi na pregason? I dja bu prende uza más dretu kes feraménta pa inxina? Si bu ten família, bu ta atxa ma Jeová dja djuda-u bira un maridu ô un mudjer, un pai ô un mai midjór? Bu pode fika txeu kontenti si dja bu faze prugrésu na kes ária li.

4. Kuzê ki nu sta ben odja na kel studu li?

⁴ Nu pode djuda otus irmon fika kontenti ku ses própi prugrésu spritual. Tanbê nu pode djuda-s ka konpara ses kabésa ku otus. Na kel studu li, nu sta ben odja modi ki pai ku mai pode djuda ses fidju, modi ki kes ki é kazadu pode djuda kunpanheru i modi ki ansions pode djuda irmons ku irmans na kongregason. Dipôs, nu ta ben odja alguns prinsípiu di Bíblia ki ta djuda-nu poi métas ki nu ta konsigi alkansa di akordu ku nos kapasidadi i situason.

5. Sima sta na Efésios 6:4, kuzê ki pai ku mai ka debe faze?

⁵ Pai ku mai debe toma kuidadu pa es ka konpara un fidju ku kel otu ô pa es ka pidi un fidju pa faze un kuza ki el ka ta konsigi. Kes kuza li pode dizanima un fidju. (Lé Efésios 6:4.) Un irman ki txoma Sachiko b fla: “Nhas profesor ta speraba ma N ta sérba midjór di ki nhas koléga di turma. Tanbê, nha mai krê pa N tinha bons nóta, asi pa daba un bon tistimunhu pa nha profesor i pa nha pai ki ka éra Tistimunha di Jeová. Na verdadi, el krê pa N tinha sô 20 na nhas próva, má kel-li éra inposível. Nbóra dja ten txeu anu ki N tirmina skóla, ti oji N ta fika ta pergunta si N sta faze nha midjór pa Jeová.”

6. Kuzê ki pai ku mai pode prende na Salmo 131:1, 2?

⁶ Pai ku mai pode prende un bon lison  ki sta na Salmo 131:1, 2. (Lé.) Rei Davidi fla ma el ka staba ‘ta djobe kuzas grandi dimás’, nen kes kuza ki el ka ta konsigi alkansaba. Dja ki el éra umildi i el ta rekonheseba se limitasons, el konsigi mante ‘kalmu i trankilu’. Kuzê ki pai ku mai ta prende ku palavras di Davidi? Pai ku mai, nhos ser umildi i nhos seta nhos limitasons, ka sô na kel ki nhos ta spéra di nhos kabésa, má tanbê na kel ki nhos ta spéra di nhos fidjus. Nhos tenta sabe kes kuza ki nhos fidjus é bon na faze i kes kuza ki es ka sabe faze dretu, i nhos djuda-s poi kes méta ki es ta konsigi alkansa. Asi, nhos fidjus ta xinti ma es ten valor. Un irman ki txoma Marina fla: “Nha mai nunka ka ta konparaba mi ku nhas irmon ô ku fidjus di otus algen. Sénpri el inxina-m ma tudu algen ten kapasidadi diferenti i ma kada un di nos ten txeu valor pa Jeová. É pamodi el ki kuazi nunka N ka ta konpara nha kabésa ku otus algen.”

7-8. Modi ki un maridu pode da se mudjer ónra?

⁷ Un maridu ki ta sirbi Deus debe da se mudjer ónra. (1 Ped. 3:7) Da ónra krê fla ruspeta otus i da-s un atenson spesial. Pur izénplu, un maridu ta onra se mudjer óras ki el ta trata-l sima un algen inportanti. I el ka ta pidi-l pa el faze más di ki kel ki el ta pode. I nunka el ka ta konpara-l ku otus mudjer. I si el faze kel-li modi ki se mudjer pode xinti? Odja izénplu di Roza. Se maridu, ki é ka Tistimunha di Jeová, ta konpara-l txeu bês ku otus mudjer. Kes palavra duru ki se maridu ta fla-l, ta pô-l ku dúvida si el ten valor i ku poku kunfiansa na se kabésa. Roza fla: “Sénpri N ta meste pa algen fla-m ma Jeová ta da-m valor.” É pur isu ki un maridu ki ta sirbi Jeová debe da se mudjer ónra. El sabe ma kel-li ta djuda-s ten un kazamentu filís i ten un bon amizadi ku Jeová. c

⁸ Un maridu ki ta ama se mudjer sénpri ta pâpia ben di el pa otus algen, ta fla-l ma el ta ama-l i el ta ilojia-l. (Pro. 31:28) É kel-li ki maridu di Katerina, ki dja nu papiaba di el antis, faze pa djuda-l vense kes sentimentu negativu. Kantu Katerina éra mininu, se mai ta kritikaba el i sénpri ta konparaba el ku otus minina, sima se amigas. Pamodi kel-li Katerina kumesa ta konpara se kabésa ku otus mésmu dipôs ki el bira un Tistimunha di Jeová. Má se maridu, ki é un sérvu di Jeová, djuda-l luta kóntra kel tendénsia li i pensa di un manera más ikilibradu sobri se kabésa. Katerina fla: “El ta ama-m, el ta ilojia-m pa kes kuza dretu ki N ta faze i el ta ora pa mi. Tanbê el ta lenbra-m di kes kualidadi bunitu di Jeová i el ta djuda-m koriji nhas pensamentu negativu.”

9-10. Modi ki ansions amorozu djuda un irman vense tendénsia di konpara ku otus?

⁹ Modi ki ansions pode djuda kes irmon ki ten tendénsia di konpara ses kabésa ku otus? Odja izénplu di un irman ki txoma Hanuni. Kantu el éra mininu, kuazi el ka ta resebeba ilojiu. El fla: “Ami éra tímida i N ta atxaba ma otus mininu éra midjór di ki mi. N kumesa ta konpara nha kabésa ku otus désdi kantu mi éra pikinoti.” Mésmu dipôs ki Hanuni bira Tistimunha di Jeová, el kontinua ta konpara se kabésa ku otus algen. Pur isu, el ta atxaba ma el ka éra inportanti pa kongregason.  Má oji el é un pionera filís. Kuzê ki djuda-l muda se manera di pensa?

¹⁰ Hanuni fla ma el resebe ajuda di ansions amorozu. Es fla-l ma el tinha txeu valor pa kongregason i es ilojia-l pa se bon izénplu. Hanuni skrebe: “Alvês ansions ta pidiba mi pa N nkorajaba kes irman ki mesteba ajuda. Kel diziginason li pô-m ta xinti ma N ten valor. N ta lenbra kantu kes ansion agradese-m pa nkorajamentu ki N staba ta da alguns jóven. Es lé pa mi 1 Tessalonicenses 1:2, 3. Kel-la toka nha korason! É pamodi kes bon pastor li ki oji N ta da txeu valor pa nha lugar na organizason di Jeová.”

11. Modi ki nu pode djuda kes ki sta ‘maltratadu i ki ten spritu umildi’, ki Isaías 57:15 ta pâpia di el?

¹¹ Lé Isaías 57:15. Jeová ta preokupa txeu ku ‘kes ki sta maltratadu i ki ten spritu umildi’. É ka sô ansions ki debe nkoraja-s. Nos tudu nu pode faze txeu kuza pa nkoraja kes irmon ku irman li ki nu krê txeu. Un manera di nu faze kel-li, é óras ki nu ta mostra ma nu ta preokupa ku es di verdadi. Jeová krê pa nu djuda kes irmon ku irmans li xinti kel amor ki el ten pa se ovelhas ki el ta da txeu valor. (Pro. 19:17) Tanbê nu pode djuda nos irmons óras ki nos é umildi i nu ta rekonhese nos limitason. Nu ka krê txoma atenson pa nos kabésa, pamodi kel-li pode poi otus ku invéja. Envês di kel-li, nu debe uza nos kapasidadi i nos konhisimentu pa nkoraja otus algen. — 1 Ped. 4:10, 11.

12. Pamodi ki kes algen umildi gostaba di sta djuntu ku Jizus? (Odja dizenhu na kapa.)

¹² Nu pode prende txeu kuza sobri modi ki nu ta trata otus na manera ki Jizus ta trataba se sigidoris. Jizus é kel midjór ómi ki dja vive. Má simé el éra ‘mansu i umildi di korason’. (Mat. 11:28-30) El éra rei di intilijenti i el tinha txeu konhisimentu, má el ka ta fikaba ta izibi. Óras ki el ta inxinaba, el ta papiaba di manera sinplis i el ta uzaba ilustrasons ki ta tokaba korason di kes algen umildi. (Luc. 10:21) Kes xéfi di relijion na ténpu di Jizus, éra orgulhozu i es ta poba pesoas ta pensaba ma es ka tinha ninhun valor pa Deus. (João 6:37) Má é ka éra si ki Jizus ta ajiba. El ta ruspetaba kes algen ki pesoas ta atxaba ma ka éra inportanti.

13. Modi ki Jizus mostra amor i bondadi na manera ki el ta lidaba ku se disiplus?

¹³ Jizus mostra amor i bondadi na manera ki el ta lidaba ku se disiplus. El sabia ma kada un di es tinha kapasidadi i situason diferenti. Pur isu, nen tudu es ka resebe mésmu responsabilidadi i nen tudu es ka podia fazeba mésmu kuza na pregason. Má simé, Jizus ta daba txeu valor pa sforsu ki kada un di es ta fazeba. Na kel ilustrason sobri taléntus, Jizus mostra ma el ta ntendeba dretu situason i kapasidadi di se disiplus. Na kel ilustrason li, kel sinhor da kada skravu trabadju ‘di akordu ku se kapasidadi’. Un di kes skravu ki trabadja dretu konsigi ganha más di ki kel otu. Má kel sinhor ilôjia es tudu dôs ku kes mésmu palavra: ‘Bu faze dretu, skravu bon i fiel!’ — Mat. 25:14-23.

14. Modi ki nu pode imita Jizus na manera ki nu ta trata otus?

¹⁴ Jizus sénpri trata-nu ku bondadi i amor. El sabe ma nos kapasidadi i situason é diferenti i el ta fika kontenti óras ki nu ta faze nos midjór. Nu debe imita Jizus. Pode ser ki alguns di nos irmons ka ta konsigi faze txeu sima otus. Má simé, nunka nu ka debe fla-s un kuza ki ta  pô-s xinti vergónha ô sen valor. Envês di kel-li, nu debe ilojia-s pamodi es sta ta faze ses midjór pa Jeová.

15-16. Pamodi ki foi bon pa un irman poi métas ki el ta konsigi alkansaba?

¹⁵ Ten méta na nos sirvisu pa Jeová ta djuda-nu ten obijetivu na vida. Má segredu é poi métas ki sta di akordu ku nos kapasidadi i situason. Nu ka ten ki ten mésmu méta ki otus algen. Si nu poi métas ki nu ka ta konsigi alkansa, nu pode fika diziludidu i dizanimadu. (Luc. 14:28) Odja izénplu di un pionera ki txoma Midori.

¹⁶ Kantu Midori éra mininu, txeu bês se pai, ki ka éra Tistimunha di Jeová, ta rabaxaba el. Sénpri el ta konparaba el ku se irmons i ku se kolégas di skóla. Midori fla: “N ta xintiba sen valor.” Má sima el ba ta kria, Midori ganha kunfiansa na se kabésa. El fla: “Lé Bíblia tudu dia djuda-m ten pas na korason i xinti ma Jeová ta ama-m.” Tanbê Midori poi métas ki el ta konsigi alkansaba i el pidi Jeová na orason pa djuda-l alkansa-s. Kel-li djuda Midori fika kontenti ku se própi prugrésu spritual.

17. Modi ki nu pode ‘kontinua ta bira nos manera di pensa más novu’ i kal ki ta ser rezultadu?

¹⁷ Sentimentus i pensamentus negativu, ka ta dizaparse di un óra pa kel otu. É pur isu ki Jeová ta fla-nu: ‘Nhos kontinua ta bira nhos manera di pensa más novu’. (Efé. 4:23, 24) Pa nu konsigi kel-li, nu meste faze orason, studa Bíblia i pensa na kuzê ki nu studa. Nton sforsa pa bu faze kes kuza li i pidi Jeová sénpri pa da-u forsa. Se spritu santu ta djuda-u vense kalker tendénsia di konpara bu kabésa ku otus algen. Si invéja ô orgulhu kumesa ta kria na bu korason, Jeová  ta djuda-u da kónta di kel-li i rinka kel sentimentu li di bu korason.

18. Modi ki kes palavra ki sta na 2 Crónicas 6:29, 30, pode konsola-u?

¹⁸ Lé 2 Crónicas 6:29, 30. Jeová konxe nos korason. Tanbê el sabe ma nu sta ta luta kóntra spritu di mundu i kóntra nos própi inperfesons. Má óras ki Jeová ta odja-nu ta sforsa txeu kóntra kes influénsia mariadu, se amor pa nos ta bira más txeu.

19. Ki izénplu Jeová uza pa djuda-nu ntende se própi amor pa nos?

¹⁹ Jeová uza izénplu di amor ki un mai ten pa se bebé pa mostra kel amor ki el ta xinti pa nos. (Isa. 49:15) Odja kuzê ki kontise ku un mai ki txoma Rakel. El skrebe: “Nha fidju-fémia, ki txoma Stephanie, nase antis di ténpu. Kantu N odja-l pa primeru bês, el éra pikinotinha i frájil. Na kel primeru mês ki el fika na ospital, dotor ta dexaba mi karega-l tudu dia. Kes momentu la pô-nu ta fika más pegadu na kunpanheru. Oji Stephanie tene 6 anu i el é más pikinoti ki kes otu mininu di se idadi. Má simé, N ta ama-l txeu pamodi el luta pa sobrivive i el traze txeu alegria na nha vida!” Nu ta fika kontenti di sabe ma Jeová ta xinti kel mésmu tipu di amor pa nos óras ki el ta odja-nu ta luta pa sirbi-l di tudu korason!

20. Si abo é un sérvu di Jeová, pamodi ki bu debe fika kontenti?

²⁰ Si bo é un sérvu di Jeová, abo é úniku i bu ta faze párti di un família na mundu interu ki ten txeu algen diferenti. Jeová ka atrai-u pa el pamodi bo é midjór di ki otus. El atrai-u pa el pamodi el odja bu korason i el odja ma bo é un algen umildi ki sta dispostu pa prende. (Sal. 25:9) Bu pode ten sertéza ma Jeová ta da txeu valor pa tudu kel ki bu ta faze na se sirvisu pamodi bu sta ta aguenta firmi i bu sta ta mostra lialdadi. Bu sta prova ma bu ten un korason ‘sinseru i bon’. (Luc. 8:15) Pur isu, kontinua ta da Jeová bu midjór. Asi bu ta ten bons motivu di fika kontenti ‘sô ku bu kabésa’.