1. Kuzê ki ta mostra ma Skrituras éra inportanti pa Jizus?

 IMAJINA modi ki ta sérba sábi obi Jizus ta inxina. Txeu bês óras ki el ta inxinaba el ta flaba kuzê ki staba na Skrituras i el tinha el dikoradu! Na verdadi, kes primeru kuza ki el fla dipôs di se batismu i kes últimu palavra ki el fla antis di el móre, sta na Skrituras. b (Deut. 8:3; Sal. 31:5; Luc. 4:4; 23:46) I duránti kes três anu i meiu di trabadju di pregason di Jizus li na téra, el pâpia i el splika na públiku kuzê ki staba na Skrituras. — Mat. 5:17, 18, 21, 22, 27, 28; Luc. 4:16-20.

2. Kantu Jizus staba ta kria, kuzê ki djuda-l konxe Skrituras dretu? (Odja dizenhus na kapa.)

² Alguns anu antis di Jizus kumesa se trabadju di pregason li na téra, el lé i el obi Palavra di Deus txeu bês. Di sertéza na kaza, Jizus obi Maria ku Juzé ta pâpia sobri Skrituras na ses konbérsu ki es ta tinha na família na dia-dia. c (Deut. 6:6, 7) Nu pode ten sertéza ma Jizus ta baba tudu sábadu ku se família pa sinagóga. (Luc. 4:16) Timenti el staba na sinagóga, el ta obiba Skrituras ku atenson. Ku ténpu, Jizus prende lé Skrituras el sô. Nton, Jizus pasa ta konxe Skrituras dretu. Tanbê el ta amaba Skrituras i el ta fazeba sima el prende. Pur izénplu,  lenbra di kuzê ki kontise na ténplu kantu Jizus tinha 12 anu. Kes instrutor, ki konxeba Lei di Muizés dretu, fika ‘dimiradu ku se ntendimentu i ku se respóstas.’ — Luc. 2:46, 47, 52.

3. Kuzê ki nu sta ben odja na kel studu li?

³ Nos tanbê nu pode konxe i ama Palavra di Deus si nu ta lé Skrituras sénpri. Má, modi ki nu pode tra pruvetu di kuzê ki nu ta lé? Nu pode prende txeu ku kuzê ki Jizus fla pa kes algen ki konxeba Lei dretu, sima kes instrutor di lei, kes farizeu i kes saduseu. Kes xéfi di relijion li ta leba Skrituras sénpri, má es ka ta traba pruvetu di kuzê ki es ta leba. Jizus fla três kuza ki kes ómi li debe fazeba pa es pode traba pruvetu di Skrituras. Kuzê ki Jizus fla-s ta djuda-nu midjora nos kapasidadi di (1) ntende kuzê ki nu ta lé, (2) atxa tizorus na Bíblia i (3) dexa pa Palavra di Deus muda nos manera di ser.

4. Kuzê ki Lucas 10:25-29 ta inxina-nu sobri lé Palavra di Deus?

⁴ Óras ki nu ta lé Bíblia nu ta krê ntende kuzê ki kes palavra krê fla. Si nu ka faze si, nu pode ka ntende dretu kuzê ki nu ta lé. Pur izénplu, repara kel konbérsu ki Jizus tevi ku ‘un ómi ki éra instrutor di lei’. (Lé Lucas 10:25-29.) Kantu kel ómi pergunta-l kuzê ki el meste fazeba pa el ganhaba vida pa tudu ténpu, Jizus djuda-l atxa respósta na Palavra di Deus. Jizus pergunta-l: ‘Kuzê ki sta skrebedu na Lei? Kuzê ki bu ta ntende?’ Kel ómi konsigi da respósta sértu kantu el fla kuzê ki Skrituras ta fla sobri ama Deus i ama prósimu. (Lev. 19:18; Deut. 6:5) Má repara kuzê ki kel ómi fla Jizus dipôs: ‘Kenha ki é nha prósimu?’ Kel ómi mostra ma el ka ntende dretu kuzê ki el lé. I pamodi kel-li, el ka sabia modi ki el ta sigiba kes testu di Skrituras na se vida.

5. Modi ki faze orason i lé sen présa ta djuda-nu ntende midjór kuzê ki nu ta lé?

⁵ Nu pode ntende Palavra di Deus midjór si nu prende faze alguns kuza óras ki nu ta lé. Odja alguns ideia ki pode djuda-u. Faze orason antis di bu kumesa ta lé. Nu meste ajuda di Jeová pa ntende Skrituras. Nton, nu pode pidi se spritu santu pa djuda-nu konsentra na kuzê ki nu sta lé. Dipôs, lé sen présa. Kel-li ta djuda-u ntende kuzê ki bu sta lé. Talvês lé ku vós altu, ô timenti bu sta lé obi gravason di leitura di Bíblia pode djuda-u. Si bu obi gravason i bu odja kes palavra na papel, kel-li ta djuda-u ntende, lenbra i prende más di kuzê ki bu sta lé na Palavra di Deus. (Jos. 1:8) Óras ki bu tirmina di lé, faze orason otu bês pa agradese Jeová pamodi el da-u se Palavra i pidi-l pa el djuda-u faze sima bu lé.

6. Pamodi ki faze perguntas i skrebe alguns kuza ta djuda-u óras ki bu ta lé? (Odja fotus.)

⁶ Ten más dôs ideia ki pode djuda-u ntende Bíblia midjór. Faze perguntas sobri kuzê ki bu sta lé. Óras ki bu lé un stória na Bíblia, faze kes pergunta li: ‘Di kenha ki kel stória li ta pâpia más txeu? Ken ki sta ta pâpia? Ken ki el sta pâpia ku el i pamodi? Na undi i na ki ténpu ki kel-li kontise?’ Kes pergunta li ta  djuda-u pensa i sigi kes ideia prinsipal di kel párti ki bu sta lé. Tanbê, timenti bu ta lé skrebe alguns kuza. Óras ki bu ta skrebe kuzê ki bu lé, bu ta pensa na el más txeu i el ta djuda-u ntende-l midjór. Skrebe tanbê ta djuda-u lenbra di kuzê ki bu lé. Bu pode skrebe alguns pergunta, kes kuza ki bu atxa na piskiza ki bu faze, un rezumu di kes pontu prinsipal, modi ki bu ta uza kel ki bu lé ô kuzê ki bu ta xinti sobri kel ki bu lé. Bu pode diskubri ma skrebe kes kuza li ta djuda-u odja ma Palavra di Deus é se mensaji pa bo.

7. Kuzê ki nu debe faze óras ki nu ta lé i pamodi? (Mateus 24:15)

⁷ Jizus pâpia di un kuza inportanti ki nu meste faze pa nu pode ntende kuzê ki nu ta lé na Palavra di Deus. Nu debe pensa ku kuidadu pa nu ntende kuzê ki nu sta lé. (Lé Mateus 24:15.) Modi ki nu pode faze kel-li? Nu meste pensa ku kuidadu sobri modi ki un ideia sta ligadu ku kel otu i modi ki es é diferenti di kunpanheru, i odja kuzê ki ka sta mutu klaru. I sima Jizus mostra, nu meste pensa ku kuidadu pa ntende kuzê ki sta ta kontise gósi ki sta kunpri profesias di Bíblia. Tanbê, nu meste faze kel-li pa nu pode ntende dretu tudu kuza ki nu ta lé na Bíblia.

8. Kuzê ki ta djuda-u pensa ku kuidadu na kuzê ki bu ta lé?

⁸ Jeová ta djuda se sérvus pensa dretu pa ntende kuzê ki es ta lé. Nton, faze orason i pidi-l pa el djuda-u pensa ku kuidadu pa bu pode ntende. (Pro. 2:6) Modi ki bu pode aji di akordu ku bu orason? Analiza ku kuidadu kuzê ki bu lé i repara modi ki el sta ligadu ku otus kuza ki bu sabe. Uza nos feraméntas pa studa Bíblia ta djuda-u faze kel-li. Pur izénplu,  bu pode uza Publikason pa djuda Tistimunhas di Jeová faze piskiza. Kes feraménta li ta djuda-u ntende kuzê ki un párti di Bíblia krê fla i odja di ki maneras ki bu pode faze sima bu prende. (Heb. 5:14) Óras ki bu ta pensa ku kuidadu pa ntende kuzê ki bu lé, bu ta ntende Skrituras midjór.

9. Ki verdadi inportanti di Skrituras kes saduseu ka seta?

⁹ Kes saduseu konxeba dretu kes primeru sinku livru di Skrituras Ebraiku. Má es ka seta verdadis inportanti ki kes livru li ten. Pur izénplu, odja modi ki Jizus responde kes saduseu kantu es faze-l pergunta sobri resureison. El pergunta-s: “Nhos ka lé na livru di Muizés, na kel stória sobri kel pé di spinhu, ma Deus fla-l: ‘Ami é Deus di Abraon, Deus di Izaki i Deus di Jakó’?” (Mar. 12:18, 26) Nbóra di sertéza saduseus dja leba kel stória li txeu bês, kel pergunta ki Jizus faze-s mostra ma es ka seta un verdadi inportanti di Skrituras, ki é resureison. — Mar. 12:27; Luc. 20:38. d

10. Na kuzê ki nu debe presta atenson óras ki nu ta lé?

¹⁰ Kuzê ki nu ta prende? Óras ki nu ta lé, nu krê presta atenson na tudu kuza ki un versíklu ô un stória di Bíblia pode inxina-nu. Nu ka krê ntende sô kes kuza sinplis, má tanbê prinsípius ki ten txeu valor i otus verdadi ki é ka fásil di atxa.

11. Sima sta na 2 Timóteo 3:16, 17, modi ki bu pode atxa tizorus na Bíblia?

¹¹ Modi ki bu pode atxa tizorus óras ki bu ta lé Bíblia? Odja kuzê ki 2 Timóteo 3:16, 17 ta fla. (Lé.) Repara ma ‘tudu ki sta na Skrituras ta sirbi’ pa (1) inxina, (2) koriji, (3) poi kuzas na kaminhu i (4) disiplina. Ti kes livru di Bíblia ki bu ka ta uza txeu pode djuda-u di kes kuatu manera li. Analiza kes stória pa bu odja kuzê ki es ta inxina-u sobri Jeová, se vontadi ô se prinsípius. Repara modi ki el ta sirbi pa koriji. Bu ta faze kel-li, óras ki bu ta presta atenson na modi ki kes versíklu ta djuda-u odja i tra kes tendénsia ô atitudi mariadu i kontinua lial pa Jeová. Odja modi ki bu pode uza un párti di Bíblia pa poi kuzas na kaminhu, ô pa konpo un manera di pensa mariadu, talvês di un algen ki bu atxa na pregason. I djobe kalker disiplina ki kes versíklu pode da ki pode trena-u pa bu pensa sima Jeová. Óras ki bu ta pensa na kes kuatu manera li ki Bíblia pode djuda-u, bu ta atxa tizorus ki pode midjora bu leitura di Bíblia.

12. Pamodi ki Jizus pergunta farizeu: “Nhos ka lé?”

¹² Jizus tanbê pergunta “Nhos ka lé?” pa mostra ma kes farizeu tinha un ideia mariadu sobri Skrituras. (Mat. 12:1-7) e Un bês kes farizeu fla ma disiplus di Jizus viola sábadu. Kantu Jizus responde-s, el pâpia di dôs izénplu ki sta na Skrituras i di un versíklu ki sta na Oseias pa mostra ma kes farizeu ka ntende pamodi ki dadu lei di sábadu i ma es fadja na mostra mizerikórdia. Pamodi ki kes ómi li ka muda ses manera di ser nbóra es ta leba Palavra di Deus? Pamodi es ta leba el ku obijetivu di kritika i atxa fadjas na otus algen. Ses atitudi ka dexa-s ntende kuzê ki es lé. — Mat. 23:23; João 5:39, 40.

13. Ku ki atitudi nu debe lé Bíblia i pamodi?

¹³ Kuzê ki Jizus fla ta inxina-nu ma nu meste lé Bíblia ku atitudi sértu. Nu ka krê ser sima kes farizeu, nu debe ser umildi i ten gana di prende. Nu debe ‘seta ku brandura kel palavra ki plantadu na nos’. (Tia. 1:21) Si nos é brandu, nu ta dexa Palavra di Deus muda nos manera di ser. É sô si nu ivita tendénsia pa kritika ô orgulhu, ki kes lison di Bíblia sobri mizerikórdia, konpaxon ô amor ta muda nos manera di ser.

14. Modi ki nu pode sabe si nu sta ta dexa Palavra di Deus muda nos manera di ser?(Odja fotus.)

¹⁴ Manera ki nu ta trata otus algen pode mostra si nu sta ta dexa Palavra di Deus muda nos manera di ser. Kes farizeu ka dexa Palavra di Deus muda ses  atitudi, pur isu es ta “kondenaba kes inosenti.” (Mat. 12:7) Di mésmu manera, kuzê ki nu ta atxa di otus i modi ki nu ta trata-s, ta mostra si nu sta ta dexa Palavra di Deus muda nos manera di ser. Pur izénplu, nu ta kustuma pâpia di kes kuza dretu ki nu ta odja na otus algen? Ô nu ta pâpia más txeu sobri ses fadjas? Nos é mizerikordiozu i nu sta prontu pa púrdua, ô nu ta kritika otus i nu ta kontinua xatiadu ku es óras ki es faze-nu algun kuza ki nu ka gosta? Respósta di kes pergunta li pode mostra si nu sta ta dexa kel ki nu ta lé muda nos manera di pensa, kuzê ki nu ta xinti i kuzê ki nu ta faze. — 1 Tim. 4:12, 15; Heb. 4:12.

15. Kuzê ki Jizus ta xintiba pa Skrituras?

¹⁵ Jizus ta amaba Skrituras, i kuzê ki el ta xintiba sta na kel profesia na Salmo 40:8: ‘Faze bu vontadi, ó nha Deus, é kel ki N gosta, i bu lei sta déntu nha korason.’ Pur isu, el éra filís i el kontinua ta sirbi Jeová. Nos tanbê nu pode ser filís i ten bons rezultadu si nu lé Palavra di Deus i nu prende ama-l. — Sal. 1:1-3.

16. Kuzê ki bu ta faze pa tra más pruvetu di leitura di Palavra di Deus? (Odja kuadru “ Palavras di Jizus ta djuda-u ntende kuzê ki bu ta lé”.)

¹⁶ Pa nu sigi izénplu di Jizus i kuzê ki el fla, nu debe midjora nos kapasidadi di lé Bíblia. Nu pode midjora nos manera di ntende Bíblia óras ki nu ta faze orason, nu ta lé sen présa, nu ta faze perguntas i nu ta skrebe alguns kuza. Si nu analiza ku kuidadu kuzê ki nu ta lé ku ajuda di nos publikasons ki ten bazi na Bíblia, nu pode ntende-l midjór. Óras ki nu ta djobe kes tizoru ki sta na Bíblia, nu pode midjora nos manera di uza Bíblia, ti kes párti ki nu ka konxe mutu dretu. I nu pode dexa Palavra di Deus muda nos manera di ser óras ki nu ta tenta kontinua ta lé ku atitudi sértu. Óras ki nu ta sforsa pa faze kes kuza li, nu ta tra más pruvetu di leitura di Bíblia i nu ta bira más amigu di Jeová. — Sal. 119:17, 18; Tia. 4:8.