N nase na anu 1937 na un kolkhoz, ki é un lugar undi txeu algen ta trabadjaba djuntu na agrikultura. Kel kolkhoz ta fikaba pértu di Tokmok na Kirgiston. Nos família ta faze párti di povu Kirgis i nu ta pâpia língua Kirgis. Nha pai ku nha mai éra agrikultor i es ta trabadjaba na kolkhoz di palmanhan pa noti. Trabadjoris sénpri ta resebeba kumida pa dia-dia, má es ta resebeba dinheru sô un bês pa anu. Nha mai faze txeu sforsu pa toma kónta di mi ku nha irman más pikinoti. Dipôs di sinku anu ta bai skóla, N kumesa ta trabadja na kolkhoz di palmanhan pa noti.

Na undi ki N kria tinha txeu pobréza i algen ta trabadjaba txeu pa un pon di kada dia. Kantu mi éra jóven N ka ta preokupaba ku futuru. Nunka N ka ta pensaba ma kes verdadi sábi sobri Jeová i se vontadi pode mudaba nha vida. Modi ki verdadi txiga i spadja na Kirgiston é un stória sábi di konta. Tudu kumesa na lugar ki N kria na nórti di Kirgiston.

Verdadi sobri Jeová txiga na Kirgiston na anus 50. Má inxina verdadi sobri Jeová na Kirgiston éra difísil. Pamodi? Kirgiston éra párti di União das Repúblicas Socialistas Soviéticas (URSS). Tistimunhas di Jeová na URSS ka mete na pulítika. (João 18:36 ) Pur isu, es pirsigidu pamodi govérnu Kumunista ta atxaba ma es éra ses inimigu. Má nada ka konsigi inpidi  Palavra di Deus txiga na korason di kes algen sinséru. Un di kes kuza más inportanti ki N prende na nha vida interu, é ma pa Jeová ‘tudu kuza é posível.’ — Marcos 10:27.

Pirsigison di Tistimunhas di Jeová poi verdadi ta spadja na Kirgiston. Modi ki kel-li kontise? Sibéria ta fazeba párti di URSS, i é la ki kes inimigu di govérnu ta staba prézu. Kantu ki es tradu di kadiâ, txeu di es ben pa Kirgiston i alguns traze verdadi ku es. Un di kes ki staba prézu éra Emil Yantzen, ki naseba na Kirgiston na 1919. Emil mandadu prézu pa un lugar ki es tinha ki trabadjaba aforsa i la, el konxe Tistimunhas di Jeová. El seta verdadi i el volta pa Kirgiston na anu 1956. Emil bai mora pértu di Sokuluk, ki éra nha zóna. Primeru kongregason na Kirgiston formadu na 1958 na Sokuluk.

Más ô ménus un anu dipôs, Victor Vinter muda pa Sokuluk. El éra un irmon fiel ki pasa mal txeu bês. Dôs bês es da-l três anu di kadiâ, pamodi el ka ta meteba na pulítika nen na géra. Dipôs el pasa 10 anu na kadiâ i más sinku anu prézu na otu lugar. Má pirsigison ka inpidi adorason verdaderu di spadja.

Na 1963 tinha uns 160 Tistimunha di Jeová na Kirgiston i txeu di es éra di Alimanha, Ukránia i Rúsia. Un di kes Tistimunha éra Eduard Varter ki staba prézu i ki batiza na Alimanha na 1924. Na anus 40, Nazistas manda-l pa kanpu di konsentrason i alguns anu dipôs Kumunistas na URSS manda-l pa Sibéria. Na 1961 el mudadu pa sidadi di Kant ki ta fika pértu di sidadi undi ki N nase.

Elizabeth Fot ki tanbê éra un Tistimunha di Jeová lial ta moraba na Kant. El éra kusturera. Kómu el éra bon na koze alguns algen inportanti sima médikus i profesoris ta fazeba ropa na el. Un di kes algen éra un mudjer ki txomaba Aksamai Sultanalieva ki éra kazadu ku un funsionáriu di stadu. Aksamai bai kaza di Elizabeth pa faze ropa, má el faze monti pergunta sobri obijetivu di vida i kuzê ki ta kontise ku algen óras ki el móre. Elizabeth mostra-l respóstas na Bíblia. Aksamai bira ta prega notísias sábi ku zelu.

Más ô ménus na kel ténpu, Nikolai Chimpoesh di Moldávia, diziginadu kómu enkaregadu di grupu di kongregason i el kontinua na es sirvisu kuazi 30 anu. Nikolai ta vizitaba kongregasons, el ta kopiaba i el ta distribuiba publikasons. Autoridadis kumesa ta repara se trabadju. Nton Eduard Varter da Nikolai alguns konsedju pa nkoraja-l. El fla-l: ‘Óras ki autoridadis faze-u pergunta, fla-s klaru ma nos publikasons ta ben di sédi mundial na Mérka. Djobe kel funsionáriu di KGB déntu di odju. Bu ka meste xinti medu.’ — Mat. 10:19.

Poku ténpu dipôs di es konbérsu, sedi di KGB na Kant manda txoma Nikolai. El konta kuzê ki kontise dipôs: ‘Kel funsionáriu pergunta-m di undi ki nos publikason ta ben. N fla-l ma ta ben  di sédi mundial na Mérka. El fika sen sabe kuzê ki el ta faze. El dexa-m bai i nunka más el ka torna txoma-m.’ Kes Tistimunha di Jeová ki tinha koraji sima Nikolay, kontinua ta prega notísias sábi ku kuidadu na nha zóna, na nórti di Kirgiston. Kantu ki verdadi sobri Jeová txiga na nha família na anus 80, nha mudjer Mairambubu é primeru ki obi.

Mairambubu é di un zóna ki txoma Naryn na Kirgiston. Un dia na agostu di 1974, el bai kaza di nha irman i foi la ki nu konxe. Lógu ki N odja-l N gosta di el. Nu kaza na kel mésmu dia.

Na janeru di 1981 Mairambubu staba na otokaru ta bai merkadu kantu el obi kel konbérsu ki sta na komésu di es artigu. Nha mudjer krê prendeba más, nton el pergunta kel mudjer kal ki é se nómi i undi ki el ta moraba. Kel mudjer fla-l ma se nómi é Apun. Má kómu trabadju di Tistimunhas di Jeová staba proibidu na anus 80, el ta tomaba txeu kuidadu. Envês di fla nha mudjer undi ki el ta moraba, el toma nderésu di nos kaza. Nha mudjer txiga kaza kontenti.

Mairambubu fla: ‘N obi uns kuza sábi. Un mudjer fla-m ma ka ta dura ningen ka ta móre más. Ti animal runhu ta bira mansu.’ Pa mi éra sima un stória. N fla-l: ‘Nu spéra ti ki kel mudjer ben li na kaza el ta splika-nu más midjór.’

Apun vizita-nu três mês dipôs. El kontinua ta vizita-nu djuntu ku otus irman. Asi, nu konxe alguns di kes primeru Tistimunha di Jeová di povu Kirgis. Kes irman mostra-nu verdadis inportanti sobri Jeová i se vontadi pa umanus. Es studa Bíblia ku nos na livru, Do Paraíso Perdido ao Paraíso Recuperado. a Dja ki tinha sô un livru na Tokmok nu kôpia un ku nos mô.

Un di kes primeru kuza ki nu prende é profesia di Génesis 3:15. Jizus ta ben kunpri kel profesia li kómu Rei di Reinu di Deus. Kel-li é un mensaji inportanti ki tudu algen meste obi! Kel-li é un di kes motivu prinsipal ki pô-nu ta partisipa na pregason. (Mat. 24:14) Na poku ténpu verdadi di Bíblia kumesa ta muda nos vida.

Un irmon na Tokmok konvida-nu pa un fésta di kazamentu. Mi ku nha mudjer nu repara lógu  ma Tistimunhas di Jeová ta konporta diferenti di otus algen. Ka tinha ninhun bebida alkóliku i tudu kuza staba organizadu. Kel fésta di kazamentu éra diferenti di tudu kes otu fésta di kazamentu ki dja N baba. Na kes otu fésta, konvidadus ta bebeba dimás, ta konportaba mariadu i ta uzaba maus palavra.

Tanbê nu sisti alguns runion na Tokmok. Si staba bon ténpu, es ta fazeba runion na florésta. Irmons ku irmans, sabia ma pulísia staba ku odju na nos, pur isu irmons ta poba un algen pa fikaba di guarda. Na ténpu di friu, nu ta fazeba runion na kaza di irmons. Alguns bês, pulísia bai na kel kaza ki nu staba ta faze runion i es krê sabeba kuzê ki nu staba ta faze la. Kantu N batiza mi ku nha mudjer Mairambubu na julhu di 1982, na riu Chüy, nu tinha ki tomaba txeu kuidadu. (Mat. 10:16) Irmons ba ta ben poku-poku i nu faze asenbleia na florésta. Nu kanta i nu obi diskursu di batismu.

Na 1987 un irmon pidi-m pa N bai vizita un algen ki mostra interesi ki ta moraba na sidadi di Balykchy. Di nos kaza pa kel sidadi ta duraba kuatu óra di viaji na konboiu. Dipôs di txeu ténpu ta prega na Balykchy, txeu algen mostra interesi. Kel-li éra un grandi oportunidadi pa nu faze más na pregason.

Mi ku Mairambubu nu viaja txeu bês pa Balykchy. Nu pasa txeu fin di simana la, nu bai pregason i nu faze runion. Txeu algen fika ta pidi nos publikason. Pur isu, nu ta karegaba publikasons di Tokmok pa Balykchy na un mishok, ki é un saku di karega batata. Tudu mês, nu ta lebaba dôs saku xeiu di publikason i ka ta txigaba simé. Mésmu na viaji na konboiu, nu ta daba tistimunhu.

Na 1995 formadu un kongregason na Balykchy. Kel-li kontise 8 anu dipôs ki nu vizita sidadi di Balykchy pa primeru bês. Nu gasta txeu dinheru duránti kes anu ki nu viaja di Tokmok pa Balykchy. Má nu tinha poku dinheru, nton modi ki nu konsigi? Un irmon sénpri ta djudaba nos ku dinheru ki ta daba pa nu paga nos dispéza. Jeová odja nos dizeju di faze más na pregason i el abri-nu ‘pórta di Séu’. (Mal. 3:10) N ka ten dúvida ma pa Jeová tudu kuza é posível!

Na 1992, N diziginadu ansion, mi éra primeru ansion di povu Kirgis na Kirgiston. Na kongregason na Tokmok, tinha txeu trabadju pa fazeba. Nu ta studaba Bíblia ku txeu jóven di povu Kirgis ki ta staba na skóla. Un di kes jóven ki nu studa ku el, gósi ta faze párti di Kumison di Filial i dôs di es é pioneru spesial. Tanbê nu konsigi djuda otus algen ki ta sistiba nos runion. Na komésu di anus 90, nos publikason i nos runion éra na língua rusu. Má, kes algen ki ta papiaba língua kirgis bira más txeu na kongregason. Pur isu N ta fazeba traduson na runion, pa djudaba es ntende verdadi más dretu.

 Mi ku Mairambubu nu ta staba txeu okupadu ta djuda nos fidjus. Nu ta lebaba es pa pregason i pa runion. Nos fidju-fémia Gulsayra ki tinha 12 anu, gostaba di pâpia sobri Bíblia ku algen ki ta pasaba na rua. Nos fidjus gostaba di dikora testus di Bíblia. Kel-li djuda nos fidjus i ku ténpu nos nétus partisipa txeu na atividadis di kongregason. Di kes 9 fidju i 11 nétu ki inda sta bibu, 16 ta sirbi Jeová ô ta sisti runion djuntu ku ses pai ku ses mai.

Kes irmon ku irman ki nu krê txeu i ki kumesa ta faze trabadju di Jeová na nos zóna na anus 50, ta fika dimiradu di odja mudansas ki kontise na Kirgiston. Pur izénplu, désdi anus 90, nu dadu más liberdadi pa faze pregason i pa faze asenbleias ku txeu algen.

Na 1991 mi ku nha mudjer nu sisti nos primeru kongrésu na Alma-Ata ki gósi é konxedu pa Almaty na Kazakiston. I na 1993 irmons na Kirgiston faze un kongrésu na stádiu di Spartak na sidadi di Bishkek pa primeru bês. Irmons tevi un simana ta linpa stádiu antis di kongrésu. Diretor fika dimiradu ki el da-nu stádiu di grasa.

Na 1994 kontise otu kuza inportanti. Pa primeru bês inprimidu publikason na língua kirgis. Gósi ten un ekipa di traduson na filial na Bishkek, ki ta traduzi publikasons na língua kirgis. Na 1998 govérnu di Kirgiston legaliza trabadju di Tistimunhas di Jeová. Publikadoris ba ta bira más txeu i gósi nos é más di 5 mil. Oji, nu ten 83 kongregason i 25 grupu na xinês, inglês, kirgis, rusu, língua jestual di Rúsia, turku, uigur i usbeki. Tudu kes irmon ku irman di rasa diferenti ta sirbi Jeová unidu. Jeová faze tudu kes grandi mudansa li bira posível.

Jeová tanbê muda nha vida. N kria na un família sinplis ki ta trabadjaba na agrikultura i N bai skóla sô sinku anu. Má Jeová uza-m kómu ansion i pa inxina verdadis inportanti di Bíblia pa algen ki tinha más skóla di ki mi. Na verdadi, Jeová faze kuzas ki nu ka sta speraba. Nha spiriénsa ta motiva-m kontinua ta sirbi Jeová ku lialdadi i ta da tistimunhu sobri el, pamodi pa el ‘tudu kuza é posível’. — Mat. 19:26.