TIMENTI barku staba ta entra na portu di Belfast Lough, un grupu pikinoti di pasajeru staba sakédu na barku, ta odja pa montis verdi i lus di sól ta límia lógu sédu palmanhan. Éra maiu di 1910. Pa un ómi ki staba na ses meiu, Charles T. Russell, kel-li éra kintu bês ki el staba ta viaja pa Irlanda. Irmon Russell, odja dôs barku grandi ta fazedu, Titanic i Olympic. a Alén di kes algen ki staba ta trabadja na faze i konpo barku, staba más 12 Studanti di Bíblia na kais ta spéra irmon Russell txiga.

Uns 20 anu antis, irmon Russell staba ta pensa kal ki éra midjór manera di spadja notísias sábi na mundu interu. Nton el disidi viaja pa txeu lugar fóra di Mérka. El kumesa se primeru viaji pa Irlanda na julhu di 1891. Na barku City of Chicago, el odja sól ta kanba kantu es staba pértu di kósta di sidadi di Queenstown, talvês el lenbra di kuza ki se pai ku se mai ta flaba el sobri ses téra. Timenti irmon Russell i se kunpanherus di viaji ta pasa na sidadis ben organizadu i paizaji bunitu fóra di sidadi, es repara ma kanpu staba ‘prontu i ta spéra kodjéta’.

Na primeru viaji ki irmon Russell faze pa Irlanda, txeu algen fika ku interesi na verdadi. Pur isu, na kes otu bês ki el viaja pa la, senténas i alvês milharis di algen bai obi se diskursus. Irmon Russell bai Irlanda 7 bês. Na se sugundu viaji, na maiu di 1903, dadu avizus na jornal ki irmon Russell sta ba fazeba diskursus na sidadis di Belfast i Dublin. Irmon Russell konta ma “kes algen ki sisti, presta txeu atenson” na diskursu ku téma “Promésa ki fazedu ku juramentu”. Kel diskursu ta papiaba sobri fé di Abraon i di bensons ki umanus ta ben resebe na futuru.

Dja ki txeu algen na Irlanda mostra interesi, irmon Russell disidi vizita Irlanda na se tirseru viaji pa Europa. Sinku irmon mandadu pa bai nkontra ku el na kais di Belfast na un palmanhan di abril, di 1908. Téma di diskursu pa públiku, “Kéda di govérnu di Satanás” dja saíba na jornal i uns 300 algen ba sisti kel diskursu. Na kel noti, staba un ómi ki éra kóntra, má el muda dipôs ki el odja irmon Russell ta splika Bíblia dretu. Na Dublin un ómi ki txomaba O’Connor staba kóntra Studantis di Bíblia. El éra sekretáriu di un asosiason di relijion i el tenta poi más di mil algen kóntra Studantis di Bíblia. Kuzê ki kontise?

Nu ben tenta imajina kuzê ki talvês kontise na kel dia. Un ómi ki tinha interesi na prende verdadis di Bíblia, rezolve bai sisti diskursu pa públiku ki avizadu na jornal di se sidadi. Foi difísil atxa un lugar di xinta pamodi lugar staba tudu xeiu. El staba ku atenson na un ómi di kabélu branku, barbudu i ku un kazaku prétu kunpridu ta faze diskursu.  Sima el ta faze diskursu, el ta andaba na palku ta bai ta ben, ta faze jéstu i ta uza txeu testu di Bíblia pa djuda kes algen ntende verdadis di Bíblia. Mésmu sen mikrofóni tudu algen ki staba la konsigi obi se vós duránti un óra i meia. Dipôs, na párti di perguntas ku respósta ki O’Connor i se amigus dizâfia irmon Russell, el difende verdadis di Bíblia dretu. Kes otu algen ki staba ta sisti da palmu, pa mostra ma es ntendeba se splikason. Kantu lugar fika más kalmu, kel ómi ki tinha interesi, ba pâpia ku irmons pa el prende más. Pa kel ki tistimunhas ta konta, txeu algen prende verdadi di kel manera li.

Na maiu di 1909, irmon Russell sai di sidadi di Nova York na barku Mauretania, pa se kuartu vizita. El leba irmon Huntsinger ki ta skrebeba faxi, asi el ta pruvetaba ténpu pa ditaba artigu di Sentinéla pa kel irmon skrebe. Irmon Russell faze un diskursu na Belfast i 450 algen bai sisti, má 100 fika sakédu pamodi ka tinha lugar di xinta.

Na kel kintu viaji kontise mésmu kuza. Dipôs di diskursu na Dublin, O’Connor leba un tiólogu pa ba faze irmon Russell pergunta. Kes algen ki sisti fika kontenti ku respóstas ki irmon Russell da ku bazi na Bíblia. Na kel otu dia es panha un barku i es bai pa sidadi di Liverpool i di la es nbarka na Lusitânia pa Nova York. b

Kes diskursu di irmon Russell ki avizadu na jornal, fazedu na se sestu i sétimu viaji na 1911. Na ténpu di primavéra, na Belfast, 20 Studanti di Bíblia resebe 2 mil algen ki bai obi diskursu ku téma “Dipôs di mórti”. O’Connor leba pa Dublin un otu pastor ki ba faze irmon Russell más pergunta, má kes algen ki staba ta sisti da palmu pa respóstas ki irmon Russell da ku bazi na Bíblia. Na otonu di kel mésmu anu, el vizita otus sidadi ki tinha txeu algen ta sisti. O’Connor bai ku más 100 algen pa tenta kaba ku runion na Dublin más un bês. Má kes algen ki staba ta sisti apoia irmon Russell.

Nbóra éra irmon Russell ki más ta fazeba diskursu pa públiku kel bês, el rekonhise ma Jeová pode uza kalker algen pamodi “kel-li é ka trabadju di ómi, é trabadju di Deus.” Kes avizu pa diskursus pa públiku foi un bon manera di spadja verdadis di Bíblia. Kes diskursu foi un izénplu pa runion pa públiku ki nu ta faze oji. Kal ki foi rezultadu? Diskursus pa públiku djuda spadja notísias sábi i formadu novus kongregason na txeu sidadi di Irlanda. — Tradu di dukumentus di Nos stória na Inglatéra.