Bu lé tudu artigus di Sentinéla di kel anu li? Nton, tenta responde kes pergunta li:

Kuzê ki ta kontise si nu uza nos ténpu pa pâpia, obi i midita na Jeová?

Nu ta konsigi toma bons disizon, nu ta bira bons instrutor, nos fé ta fika más fórti i nos amor pa Jeová ta fika más fórti. — w22.01, pp. 30-31.

Modi ki prende kunfia na Jeová i na kes ómi ki el skodje pa kuida di nos ta djuda-nu?

Gósi é ténpu di prende kunfia na manera ki Jeová ta faze kuzas óras ki nu ta sigi kes orientason ki nu ta resebe di organizason i di ansions. Óras ki grandi tribulason kumesa, nu ta sta prontu pa obi sikrê un orientason pode parse stranhu ô difísil di sigi. — w22.02, pp. 4-6.

Kuzê ki kel anju krê flaba Zakarias kantu el pâpia di kel ‘prumu na mô di [governanti] Zorobabel’? (Zac. 4:8-10)

Kel vizon li mostra povu di Deus ma nbóra kel ténplu ka éra más bunitu di ki kel ténplu di Salumon, es ta konsigi tirminaba el i Jeová ta fikaba kontenti ku el. — w22.03, pp. 16-17.

Modi ki nu pode ‘bira un izénplu na manera di pâpia’? (1 Tim. 4:12)

Nu ta pâpia ku bondadi i ruspetu na pregason, nu ta kanta di tudu korason i nu ta da komentárius na tudu runion, nu ta pâpia verdadi i di manera ki ta anima otus algen i nu ta ivita uza palavras ki ta ofende algen. — w22.04, pp. 6-9.

Pamodi ki kes kuza ki ten na kes kuatu féra ki Daniel kapítlu 7 ta pâpia di el sta sô na un féra ki Apocalipse 13:1, 2 ta pâpia di el?

Kel féra di Apocalipse kapítlu 13 ka ta reprizenta sô un govérnu ki ta manda na mundu interu, sima Roma. Má kel féra li ta reprizenta tudu kes govérnu ki dja governa mundu ti gósi. — w22.05, p. 9.

Kal ki é un manera inportanti di mostra ma nu ta kunfia na justisa di Jeová?

Si un algen magua-nu, ofende-nu ô peka kóntra nos, nu ka ta guarda rankor i nu ta dexa kuzas na mô di Jeová. El ta ben kaba ku tudu kuza mariadu ki pekadu faze. — w22.06, pp. 10-11.

Di kuzê ki un irmon ki sta faze orason na un runion debe lenbra di el?

Orason ka debe uzadu pa da kongregason konsedju ô pa faze avizus. Prinsipalmenti na komésu di runion el ka meste uza ‘txeu palavra’. (Mat. 6:7) — w22.07, pp. 24-25.

Di ki manera ‘kes ki faze kuzas mariadu’ ta ben ten ‘un resureison di julgamentu’? (João 5:29)

Es ka ta ben fazedu un julgamentu negativu pa kuzas ki es faze antis di es móre. Jizus ta ben faze-s un testi ô odja modi ki es ta reaji dipôs ki es resusitadu. — w22.09, p. 18.

Kuzê ki irmon Joseph Rutherford fla Studantis di Bíblia pa faze na un kongrésu na setenbru di 1922?

Na un kongrésu na Cedar Point, Ohio, na Mérka, el fla: “Rei dja sta ta governa! Nhos skodjedu pa fla tudu algen kel-li. Nton, nhos da avizu, nhos da avizu, nhos da avizu sobri Rei i se Reinu!” — w22.10, pp. 3-5.

Kal ki é kes três manera ki Jeová ta djuda-nu aguenta nos prubléma ku alegria ki Isaías kapítlu 30 ta distaka?

Kel kapítlu li ta mostra ma (1) el ta obi ku atenson i el ta responde nos orason, (2) el ta da-nu orientason i (3) el ta abensua-nu gósi i na futuru. — w22.11, p. 9.

Pamodi ki nu pode ntende ma Salmo 37:10, 11, 29 kunpri na pasadu i ma el ta ben kunpri na futuru?

Kes palavra di Davidi ta mostra dretu modi ki israelitas tinha un vida sábi na govérnu di Salumon. Jizus pâpia di un paraízu i el fla kel ki sta na versíklu 11. (Mat. 5:5; Luc. 23:43) — w22.12, pp. 8-10, 14.