1-2. Ki speransa rei di sábi sérvus di Jeová ten?

TEN speransa é rei di inportanti. Alguns algen ten speransa di ten un kazamentu filís, kria fidjus ku bon saúdi ô rekupera di un duénsa gravi. Anos ki é kristons, tanbê nu krê kes kuza li. Má nu ten un speransa ki é mutu más di ki kel-li. Nu ten speransa di vive pa tudu ténpu i di torna sta djuntu ku nos famílias i amigus ki dja móre.

² Apóstlu Polu fla: ‘N ten speransa na Deus, ma ta ben ten resureison di algen justu i tanbê di algen injustu.’ (Atos 24:15 ) Polu ka éra kel primeru algen ki fla ma el ta kriditaba na resureison. Jó tanbê tinha kel speransa li. El tinha sertéza ma Deus ta lenbraba di el i ta daba el vida otu bês. — Jó 14:7-10, 12-15.

3. Pamodi ki é bon pa nos studa 1 Coríntios kapítlu 15?

³ ‘Resureison di mortus’ é kel ‘lisérsi,’ ô ‘dotrina prinsipal’ di tudu kes kuza ki kristons ta inxina. (Heb. 6:1, 2) Polu pâpia di resureison na 1 Coríntios kapítlu 15. Di sertéza kes kuza ki el skrebe da kes kriston di kel ténpu txeu koraji. I mésmu ki dja nu ten txeu ténpu ta kridita na resureison, kel kapítlu tanbê pode da-nu koraji i bira nos speransa na resureison más fórti.

4. Pamodi ki nu ten sertéza ma ta ben ten resureison?

⁴ Resureison di Jizus Kristu ta da-nu sertéza ma nu ta torna ben odja nos família ô amigu ki dja móre. Resureison di Jizus ta fazeba párti di kes ‘notísia sábi’ ki Polu flaba kes algen na Korintu. (1 Cor. 15:1, 2) Tanbê el fla  ma si un kriston ka ta kriditaba na resureison, se fé ka ta sirbiba pa nada. (1 Cor. 15:17) Pa nu ten sertéza ma ta ben ten resureison, nu meste kridita ma Jizus resusitadu.

5-6. Kuzê ki kes palavra ki sta na 1 Coríntios 15:3, 4 ta siginifika pa nos?

⁵ Kantu Polu kumesa ta skrebe sobri resureison, el fla três kuza: (1) ‘Kristu móre pa nos pekadus’. (2) El ‘nteradu’. (3) El ‘labantadu na tirseru dia, sima Skrituras dja flaba’. — Lé 1 Coríntios 15:3, 4.

⁶ Kuzê ki mórti, ntéru i resureison di Jizus ta siginifika pa nos? Proféta Izaías dja flaba ma Misías ta sérba ‘tradu di téra di algen bibu’ i ma el ta sérba ‘sipultadu na meiu di algen mau’. Má inda tinha otu kuza ki ta kontiseba. Izaías tanbê flaba ma Misías ta karegaba ‘pekadu di txeu algen’. Jizus faze kel-li kantu el da se vida pa salva-nu. (Isa. 53:8, 9, 12; Mat. 20:28; Rom. 5:8) Nton, mórti, ntéru i resureison di Jizus ta da-nu sertéza ma nu pode fika livri di pekadu ku mórti. Tanbê nu ta torna ben sta djuntu ku nos famílias i amigus ki dja móre.

7-8. Kuzê ki djuda kristons ten sertéza ma Jizus resusitadu?

⁷ Pa nu kridita ma resureison ta ben kontise, primeru nu meste kridita ma Jizus resusitadu. Pamodi ki nu pode ten sertéza ma Jeová da Jizus vida otu bês?

⁸ Txeu algen odja Jizus dipôs ki el resusitadu i es konta otus algen. (1 Cor. 15:5-7) Kel primeru tistimunha ki Polu pâpia di el éra apóstlu Pedru, ki tanbê éra konxedu pa Séfas. Un grupu di disiplus tanbê fla ma Pedru odja Jizus dipôs ki el resusitadu. (Luc. 24:33, 34) Tanbê, kes 12 apóstlu odja Jizus dipôs ki el labantadu. Dipôs di kel-li, Kristu ‘parse pa más di 500 irmon sô di un bês’. Talvês kel-li kontise na kel runion sábi, na Galilea, ki sta na Mateus 28:16-20. Jizus tanbê ‘parse pa Tiagu’, ki éra se irmon sô pa ladu mai, ki antis ka ta kriditaba ma el éra Misías. (João 7:5 ) Dipôs ki Tiagu odja Jizus, el fika ku sertéza di kel-la. É interesanti odja ma kantu Polu skrebe es karta pa vólta di anu 55 D.J., txeu algen ki odja Jizus dipôs ki el resusitadu inda staba bibu. Pur isu, kalker algen ki tinha dúvida podia perguntaba kes tistimunha.

9. Sima sta na Atos 9:3-5, ki otu próva Polu podia daba ma Jizus resusitadu?

⁹ Más tardi, Jizus parse pa Polu. (1 Cor. 15:8) Kantu Polu, ki antis éra konxedu pa Saulu, staba na kaminhu pa Damasku, el obi vós di Jizus i el odja-l na se glória na Séu. (Lé Atos 9:3-5.) Kuzê ki kontise ku Polu é más un próva ma resureison di Jizus ka éra un stória inventadu. — Atos 26:12-15.

10. Kuzê ki Polu faze pamodi el tinha sertéza ma Jizus resusitadu?

¹⁰ Alguns algen podia staba txeu interesadu na kuzê ki Polu fla, pamodi antis el ta pirsigiba kristons. Má kantu el fika ku sertéza ma Jizus resusitadu, Polu sforsa txeu pa konvense otus di kel verdadi li. Tanbê ti el sotadu, el podu prézu i barku inkadja kantu el staba ta pâpia ku otus ma Jizus móre i ma el torna vive otu bês. (1 Cor. 15:9-11; 2 Cor. 11:23-27) Polu tinha tudu sertéza ma Jizus resusitadu ki el staba dispostu na móre pa difende kel verdadi li. Kes tistimunhu di kes kriston na ténpu di apóstlus ta  bira nos kunfiansa más fórti ma Jizus resusitadu i ta djuda-nu ten más fé na resureison.

11. Pamodi ki talvês alguns na Korintu ta pensaba mariadu sobri resureison?

¹¹ Alguns na sidadi di Korintu ta pensaba mariadu sobri resureison. Ti es ta flaba ‘ma algen mortu ka ta resusita.’ Pamodi? (1 Cor. 15:12) Alguns filózofu di Atenas, ki é un otu sidadi di Grésia, ta fazeba trósa di kel ideia ma Jizus resusitadu. Kel manera di pensa li talvês afeta alguns algen na Korintu. (Atos 17:18, 31, 32 ) Otus tanbê ta atxaba ma resureison ka éra rial. Es ta flaba ma un algen staba ‘mortu’ antis pamodi pekadu, i ma óras ki el biraba un kriston el ta fikaba ‘bibu otu bês’ pamodi se pekadus ta purduadu. Ka ta nporta kal ki éra motivu, ses fé ta fikaba sen valor si es ka kriditaba na resureison. Si Deus ka resusitaba Jizus, nu ta kontinuaba na pekadu i nos pekadu ka ta sérba purduadu. Asi, tudu kes ki ka ta kridita na resureison ka ta tinha ninhun speransa sértu. — 1 Cor. 15:13-19; Heb. 9:12, 14.

12. Sima sta na 1 Pedro 3:18, 22, pamodi ki resureison di Jizus é diferenti di kes ki dja kontiseba antis?

¹² Polu sabia ma ‘Kristu dja labantadu na meiu di mortus’. Resureison di Jizus foi mutu más di ki kes otu resureison ki dja kontiseba antis; pamodi kes algen ki resusitadu torna móre otu bês. Polu fla ma Jizus é ‘primeru di kes ki durmi na mórti.’ Di ki manera? El é kel primeru algen li na Téra ki resusitadu ku korpu spritual i kel primeru ki bai pa Séu. — 1 Cor. 15:20; Atos 26:23 ; lé 1 Pedro 3:18, 22.

13. Ki diferénsa Polu fla ma tinha entri Adon ku Jizus?

¹³ Modi ki mórti di un ómi pode da vida pa milhons di algen? Polu ta da un respósta klaru pa kel pergunta li. El splika diferénsa entri kuzê ki Adon faze i kuzê ki Jizus faze pa nos. Polu skrebe sobri Adon: ‘Mórti ben através di un ómi’. Kantu Adon peka, el traze mórti pa se kabésa i pa se disendentis. Ti inda nu ta kontinua ta sufri kes mau rezultadu pamodi el ka obi ku Deus. Má kantu Deus resusita se Fidju, nu pasa ta ten un speransa rei di sábi pa futuru! Polu splika: ‘Resureison di algen mortu tanbê ta ben através di un ómi’, Jizus. Tanbê el fla: ‘Pamodi, sima tudu algen ta móre na Adon, tanbê tudu algen ta ben resebe vida’. — 1 Cor. 15:21, 22.

14. Adon ta ben ser resusitadu? Splika.

¹⁴ Kuzê ki Polu krê flaba ku kel frazi li: ‘Tudu algen ta móre na Adon’? Polu staba ta pensa na disendentis di Adon. Dja ki es erda pekadu i inperfeson di Adon, es tinha ki moreba. (Rom. 5:12) Adon ka ta faze párti di kes ki ta ben ‘resebe vida’. Resgati di Kristu ka ta púrdua se pekadu, pamodi Adon éra un ómi perfetu i di livri vontadi el disidi ka obi ku Deus. Kuzê ki kontise ku Adon é mésmu kuza ki ta ben kontise ku kes ki ‘Fidju di Ómi’ ta ben julga sima ‘kabritus’. Kel-li krê fla ma es ta ben ser ‘distruídu pa tudu ténpu’. — Mat. 25:31-33, 46; Heb. 5:9.

15. Ken ki é ‘tudu’ kes ki ta ben ‘resebe vida’?

¹⁵ Repara kuzê ki Polu fla: ‘Tudu algen ta ben resebe vida na Kristu.’ (1 Cor. 15:22) Polu skrebe se karta pa kristons skodjedu ku spritu santu na Korintu, ki  ta sérba resusitadu pa vive na Séu. Kes kriston li ‘santifikadu djuntu ku Kristu Jizus, ki txomadu pa ser santu’. Tanbê, Polu pâpia di ‘kes ki sta ta durmi na mórti unidu ku Kristu’. (1 Cor. 1:2; 15:18; 2 Cor. 5:17) Na otu karta, Polu skrebe ma kes ki sta ‘unidu ku [Jizus] na un mórti sima di sel,’ ta ben ‘ser unidu ku el sima na se resureison.’ (Rom. 6:3-5) Jizus resusitadu ku korpu spritual i el bai pa Séu. Nton é kel-li ki ta ben kontise ku tudu kes ki sta ‘unidu ku Kristu’, ki é tudu kes kriston skodjedu ku spritu santu.

16. Kuzê ki Polu krê flaba kantu el txoma Jizus di ‘primeru’?

¹⁶ Polu skrebe ma Kristu ta sérba resusitadu ‘sima primeru di kes ki dja durmi na mórti.’ É verdadi ki otus, sima Lázaru, resusitadu pa vive na Téra. Má Jizus é kel primeru ki resusitadu ku korpu spritual i el resebe vida pa tudu ténpu. El pode konparadu ku kes primeru fruta di kodjéta ki israelitas ta ofereseba Deus. Tanbê, kantu Polu txoma Jizus di ‘primeru’, el krê flaba ma otus algen dipôs di Jizus tanbê ta sérba resusitadu pa vive na Séu. Kes apóstlu i otus algen ‘unidu ku Kristu’ tanbê ta sérba resusitadu pa vive na Séu, sima kontise ku Jizus.

17. Ki ténpu ki kes ki sta ‘unidu ku Kristu’ ta sérba resusitadu pa vive na Séu?

¹⁷ Kantu Polu skrebe pa kristons na Korintu, inda ka kontiseba resureison di kes ki staba ‘unidu ku Kristu’. Polu mostra ma kel-li ta kontiseba na futuru. El fla: ‘Kada un na se própi órdi: Kristu é primeru; dipôs é kes ki é di Kristu, duránti se prezénsa.’ (1 Cor. 15:23; 1 Tes. 4:15, 16) Oji nu sta ta vive na ténpu ki ta txomadu ‘prezénsa’ di Kristu. Kes apóstlu i otus kriston skodjedu ku spritu santu ki móre, tevi ki spéra ti prezénsa di Kristu pa ser resusitadu pa vive na Séu i sta ‘unidu ku [Jizus] sima na se resureison.’

18. (a) Pamodi ki nu pode fla ma ten otu resureison alén di kes ki ta ba vive na Séu? (b) Sima sta na 1 Coríntios 15:24-26, kuzê ki ta ba kontise na Séu?

¹⁸ Má i tudu kes kriston ki é lial ki ka ten speransa di ba vive na Séu djuntu ku Kristu? Es tanbê es ten speransa di resureison. Bíblia ta fla ma Polu i otus ki ta bai pa Séu ta partisipa di kel ‘resureison  di mortus ki ta ben kontise más sédu.’ (Fil. 3:11) Kel-li krê fla ma ta ben ten otu resureison ki ta ben kontiseba más tardi. Kel-li sta di akordu ku kel ki Jó fla sobri se futuru. (Jó 14:15) ‘Kes ki é di Kristu, duránti se prezénsa’ ta ba sta djuntu ku Jizus na Séu óras ki el kaba ku tudu govérnu, autoridadi i puder. Ti ‘mórti ki é kel últimu inimigu’ ta ben kabadu ku el. Tudu kes ki resusitadu pa vive na Séu ka ta móre nunka más. Má i kes otu? — Lé 1 Coríntios 15:24-26.

19. Ki speransa kes ki ta ben vive na Téra ta ben ten?

¹⁹ Ki speransa kes ki ta ben vive na Téra ta ben ten? Es pode spéra kel ki apóstlu Polu skrebe: ‘N ten speransa, ma ta ben ten resureison di algen justu i tanbê di algen injustu.’ (Atos 24:15 ) Dja ki na Séu ka ta entra ningen ki é injustu, kes palavra li ta mostra ma ta ben ten un resureison na futuru pa ben vive na Téra.

20. Modi ki kel studu li bira bu speransa más fórti?

²⁰ Nu ka ten dúvida ‘ma ta ben ten resureison’! Kes ki resusitadu pa vive na Téra ta ben ten xansi di vive pa tudu ténpu. Bu pode kunfia na kel promésa li. Kel speransa pode konsola-u óras ki bu pensa na bus família i amigus ki dja móre. Es pode resusitadu na ténpu ki Kristu i kes otu ‘ta ben governa duránti kes mil anu.’ (Apo. 20:6) Abo tanbê bu pode ten un speransa sértu ma, si bu móre antis di Govérnu di mil anu kumesa, bu ta ser resusitadu. Kel ‘speransa li ka ta diziludi-nu’. (Rom. 5:5) El ta djuda-u bira fórti gósi i el ta da-u más alegria na bu sirvisu pa Deus. Má nu pode prende más di 1 Coríntios kapítlu 15. É kel-li ki nu sta ben odja na kel otu studu.