Na verdadi, é ka kel-li ki es versíklu krê fla. Má, el sta ta pâpia di un algen ki ta kai na sentidu di pasa pa txeu tipu di prubléma i el ta labanta na sentidu di rekupera ô aguenta kes prubléma.

Nu ben odja kes versíklu antis i dipôs di kel testu li: ‘Ka bu fika sukundidu pértu di kaza di un algen justu pa faze-l mal, sima un ómi mau; ka bu distrui se lugar di diskansu. Pamodi, sikrê justu kai 7 bês, el ta torna labanta otu bês; má kes mau ta tropesa pamodi disgrasa. Óras ki bu inimigu kai, ka bu fika kontenti; i óras ki el tropesa, ka bu dexa bu korason fika kontenti’. — Pro. 24:15-17.

Alguns ta pensa ma versíklu 16 sta ta pâpia di un algen ki peka, má ki dipôs ta rekupera se amizadi ku Deus. Dôs xéfi di relijion di Inglatéra skrebe ma kes “pregador, di ténpu antigu i kes di nos ténpu ta splika kel testu li” sima sta splikadu na komésu. Tanbê kes xéfi di relijion ta fla ma kel tipu di splikason li ta siginifikaba ma ‘un ómi pode kai na pekadus gravi txeu bês, má si el rapende, el pode labanta, i el ta kontinua ta ama Deus i Deus ta fika kontenti ku el.’ Kes algen ki ka krê sforsa pa ka faze kuza mariadu pode fika kontenti ku kel ideia li. Talvês el ta imajina ma sikrê el peka txeu bês, Deus sénpri ta purdua-l.

Má é ka kel-la ki versíklu 16 krê fla.

Kel palavra ebraiku ki traduzidu pa ‘kai’ na versíklus 16 i 17, pode uzadu di txeu manera. El pode siginifika kai, sima óras ki un boi ta kai na strada, un algen ta kai di un terasu ô un pédra ta kai na txon. (Deut. 22:4, 8; Amós 9:9 ) Tanbê kel palavra pode uzadu na otu sentidu sima na kel versíklu li: ‘Óras ki Jeová sta kontenti ku kaminhu di ómi, El ta gia-l se pasus na kel kaminhu. Sikrê el kai, el ka ta fika na txon, pamodi Jeová ta pega-l na mô.’ — Sal. 37:23, 24; Pro. 11:5; 13:17; 17:20.

Má repara kuzê ki Edward Plumptre, profesor di un universidadi fla: “Kel palavra ebraiku pa [‘kai’] nunka ka ta uzadu pa pâpia di un algen ki kai na pekadu.” É pur isu ki un otu profesor splika versíklu 16 di kel manera li: ‘Ka bale péna maltrata povu di Deus, pamodi es ta salva. Má algen mau ka ta salva!’

Nton, tudu kel-li ta mostra ma Provérbios 24:16 ka sta pâpia di ‘kai’ na pekadu. Má el sta pâpia di pasa pa prublémas ô difikuldadis sikrê txeu bês. Na es mundu mau ki nu sta vive, un algen justu pode pasa pa prublémas di saúdi ô otus prubléma. El pode ti sufri pirsigison di govérnu pamodi se fé. Má el pode ten sertéza ma Deus ta apoia-l i ta djuda-l lida ku kel situason i ten bons rezultadu. Pergunta bu kabésa: ‘Kantu bês ki dja N odja kuzas ta kóre dretu ku sérvus di Jeová?’ Pamodi ki kel-li ta kontise? Pamodi nu ten sertéza ma ‘Jeová ta djuda tudu kes ki sta ta kai. I el ta labanta tudu kes ki sta nbaxadu.’ — Sal. 41:1-3; 145:14-19.

‘Kes algen justu’ ka ta fika kontenti óras ki otus sta ku prublémas. Má, es ta fika kontenti di sabe ma ‘tudu ta fika dretu pa kes ki ta ruspeta Deus verdaderu, pamodi es ten grandi ruspetu pa el.’ — Ecl. 8:11-13; Jó 31:3-6; Sal. 27:5, 6.