1, 2. Pamodi ki é midjór obi ku Jeová óras ki nu ta toma disizons sobri nos futuru? (Odja fotus na komésu di studu.)

 SI BO é jóven, talvês dja bu dadu txeu konsedju sobri kuzê ki bu ta faze ku bu vida. Profesoris i otus algen ta insentiva-u faze kursu i ten un trabadju ki bu ta ganha txeu dinheru. Má Jeová, ta da-u un konsedju diferenti. É klaru ki el krê pa bu sforsa na skóla pa bu pode ten un trabadju pa bu sustenta. (Col. 3:23) Má, óras ki bu ta toma disizon inportanti sobri bu futuru, Jeová ta krê pa bu sigi se prinsípius. Kes prinsípiu ta mostra kuzê ki nu ten ki faze na es ténpu di fin. — Mat. 24:14.

² Ka bu skese ma Jeová sabe tudu kuza. El sabe kuzê ki ta ben kontise na futuru i ki ténpu ki fin ta ben. (Isa. 46:10; Mat. 24:3, 36) Jeová tanbê konxe-u, el sabe kuzê ki ta da-u filisidadi i kuzê ki ta traze-u prublémas ku tristéza. Konsedjus di algun algen pode parse dretu, má el ka ta ben di Palavra di Deus. Pur isu, el é ka midjór ki di Jeová. — Prov. 19:21.

3, 4. Modi ki obi mau konsedju prujudika Adon ku Eva i ses fidjus?

³ Maus konsedju dja dura ki ta izisti. Satanás é kel primeru ki da umanus mau konsedju. El fla Eva, ma el ku Adon, es ta sérba filís si es disidiba pa es mê modi ki es ta viveba. (Gén. 3:1-6) Satanás ta pensaba sô na se kabésa. El kreba pa Adon ku Eva i ses fidju obi i adoraba el envês di adora Jeová. Má, Satanás ka faze nada pa es. Tudu kuza ki es tinha éra Jeová ki daba es. El da Adon un mudjer i el da Eva un maridu i es tinha kapasidadi di amaba kunpanheru. Tanbê, el da-s un jardin bunitu ki es ta viveba na el i un korpu perfetu ki es ta podia viveba pa tudu ténpu.

⁴ Má é tristi sabe, ma Adon ku Eva ka obi ku Deus i es korta ses relason ku Jeová. Dja nu sabe kuzê ki kontise. Es fika bédju i es móre, sima un flor ki rinkadu di un planta. Tanbê ses fidjus sufri pamodi pekadu. (Rom. 5:12) Oji inda, kuazi tudu algen ta disidi ka obi ku Deus i es krê vive di ses manera. (Efé. 2:1-3) Kal ki é rezultadu? Bíblia ta fla ma ‘ka ten sabedoria ki ta fika kóntra Jeová.’ — Prov. 21:30.

 5. Kuzê ki Jeová sénpri sabe? I el tinha razon?

⁵ Jeová sénpri sabe ma ten alguns algen, ti mésmu jóvens ki krê konxe-l i sirbi-l. (Sal. 103:17, 18; 110:3) Jeová ta da jóvens txeu valor! Abo é jóven? Di sertéza bu sta kontenti ku txeu ‘kuza dretu’ ki Deus ta da-u i kel-la ta djuda-u ser más filís. (Lé Salmo 103:5; Prov. 10:22) Na kel studu li, nu sta ben pâpia di kes kuatu ‘kuza dretu’: kumida spritual, bons amigu, obijetivus ki bale péna i liberdadi di verdadi.

 6. Pamodi ki nu debe kuida di nos amizadi ku Jeová i modi ki Jeová ta djuda-nu?

⁶ Anos é diferenti di animal. Deus kria-nu pa nu ten un amizadi fórti ku el. (Mat. 4:4) Óras ki nu ta obi ku Deus, nu ta ten disirnimentu, sabedoria i filisidadi. Jizus fla: ‘Filís é kes ki ten konsénsia ma es ten nisisidadi spritual, pamodi Reinu di Séu é di ses.’ (Mat. 5:3) Jeová ta kuida di nos através di Bíblia i el ta uza ‘skravu fiel i prudenti’ pa da-nu publikasons ki ta djuda-nu ten un amizadi fórti ku el. (Mat. 24:45) Nu ta txoma kes publikason di kumida spritual, pamodi es ta djuda-nu bira nos fé i nos amizadi ku Jeová más fórti. Nu sta kontenti di ten txeu tipu di kumida spritual! — Isa. 65:13, 14.

 7. Modi ki kumida spritual ta proteje-u?

⁷ Kumida spritual ta djuda-nu ten sabedoria i el ta djuda-nu pensa di un manera ki ta proteje-nu di un monti kuza. (Lé Provérbios 2:10-14.) Pur izénplu, kes kualidadi ta djuda-nu sabe óras ki un kuza é mintira, sima óras ki es ta inxina ma ka ten un Kriador. Tanbê el ta proteje-nu di mintira ki es ta fla ma dinheru i kuzas material ta da-nu filisidadi. Kes kualidadi ta djuda-nu ivita dizejus ô konportamentu ki pode prujudika-nu. Pur isu, faze di tudu pa bu ten sabedoria i pensa di un manera ki ta proteje-u. Asi bu ta odja ma Jeová ta ama-u i el krê midjór pa bo. — Sal. 34:8; Isa. 48:17, 18.

 8. Pamodi ki ser amigu di Jeová gósi ta ben djuda-nu na futuru?

 ⁸ Ka ta dura, mundu di Satanás ta ben ser distruídu. É sô Jeová ki ta pode proteje-nu i da-nu kel ki nu meste, ti mésmu kumida ki nu meste más lógu. (Hab. 3:2, 12-19) Pur isu, gósi é óra pa bu ser más amigu di Jeová i kúnfia más na el. (2 Ped. 2:9) Si bu faze si, ka ta nporta kuzê ki kontise na bu vólta, bu ta xinti sima Davidi ki fla: ‘N ta mante Jeová sénpri nha dianti. Nunka N ka ta kai, pamodi el sta na nha direita.’ — Sal. 16:8.

 9. (a) Di akordu ku João 6:44 , kuzê ki Jeová ta faze? (b) Pamodi ki é diferenti óras ki nu ta konxe un algen ki ta sirbi Jeová?

⁹ É Jeová ki ta skodje kes algen ki ta faze párti di se família spritual. El ta atrai kes algen ki ten bon korason pa se organizason. (Lé João 6:44.) Óras ki bu ta konxe un algen ki ka ta adora Jeová, kuzê ki bu sabe sobri el? Talvês bu sabe sô se nómi ô modi ki el é. I kel-li é poku. Má kel-li ka ta kontise óras ki bu atxa un algen ki konxe i ta ama Jeová. Sikrê kel algen é di país, tribu ô kultura diferenti, dja bu sabe txeu sobri el i dja el sabe txeu kuza sobri bo.

10, 11. Kuzê ki povu di Jeová ten ki é igual i modi ki kel-li ta djuda-nu?

¹⁰ Lógu ki bu konxe un irmon, dja bu sabe ma nhos ten txeu kuza igual. Sikrê nhos ka ta pâpia mésmu língua, má nhos ta pâpia ‘língua puru’ di verdadi. (Sof. 3:9) Kel-li krê fla ma nhos ta kridita na Deus, nhos ta vive di akordu ku se leis i nhos ten mésmu speransa pa futuru. Kes kuza li ta djuda nhos kúnfia na kunpanheru i pa nhos ten un amizadi ki ta dura pa tudu ténpu.

¹¹ Óras ki bu ta adora Jeová, bu pode fla ku tudu sertéza ma bu ten kes midjór amigu. Bu ten amigus na mundu interu, mésmu ki inda bu ka konxe-s! Kel-li ta kontise sô na povu di Jeová!

12. Modi ki bu pode faze más pa Jeová?

¹² Lé Eclesiastes 11:9–12:1. Bu krê faze más pa Jeová? Talvês bu sta tenta lé un párti di Bíblia tudu dia, bu sta tenta midjora bus komentáriu ô diziginasons na runion. Tanbê, bu sta tenta midjora bu manera di inxina na pregason. Modi ki bu ta xinti, si bu repara ma bu sta konsigi faze más pa Jeová ô óras ki otus ta ilojia-u pa bu sforsu? Di sertéza bu ta fika kontenti i bu ten motivu pa kel-la. Pamodi? Pamodi bu sta faze kel ki Jeová krê, sima Jizus faze. — Sal. 40:8; Prov. 27:11.

13. Pamodi ki faze más pa Jeová é midjór ki buska obijetivus na mundu?

¹³ Óras ki bu ta konsentra na bu sirvisu pa Jeová, bu sta faze un trabadju ki ta da-u alegria i obijetivu na vida. Apóstlu Polu skrebe: ‘Nhos mante firmi, fíksu, i nhos ten sénpri txeu pa faze na óbra di Sinhor, nhos sabe ma nhos trabadju duru pa Sinhor é ka atoa.’ (1 Cor. 15:58) Má, óras ki un algen buska obijetivus di es mundu, sima ganha txeu dinheru ô bira famozu, el ka ta ser filís. Mésmu ki el konsigi ten kel ki el krê, el ta xinti un vaziu déntu di el. (Luc. 9:25) Nu ta prende kel-li di kuza ki kontise ku Rei Salumon. — Rom. 15:4.

14. Kuzê ki nu ta prende di kuza ki kontise ku Salumon?

¹⁴ Salumon éra un ómi riku dimás i el tinha puder más ki tudu algen na se ténpu. El fla: ‘N ta sprimenta ku alegria pa N odja kuzê ki N ta ganha ku kel-li.’ (Ecl. 2:1-10) Salumon faze un kaza di luxu, el faze jardins ku parkis bunitu i el faze tudu kel ki el kreba. Má dipôs, modi ki el xinti? El staba kontenti ku tudu kuza ki el tinha? El fla: ‘Kantu N pensa na tudu trabadju ki nha própi mô dja fazeba, N odja ma éra atoa; ka tinha nada di valor’. (Ecl. 2:11) Kel-li é un grandi lison pa nos. Nu debe lenbra sénpri di kuzê ki kontise ku Salumon.

15. Pamodi ki nu meste ten fé i kuzê ki nu ta prende di Salmo 32:8 ?

¹⁵ Alguns algen ta prende un lison inportanti na ses vida, sô dipôs ki es da kabésa na pédra. Má, Jeová ka krê pa kel-la kontise ku nos. El krê pa nu obi ku el i sigi se konsedju. Pa kel-li, nu ten ki ten fé. Má nunka bu ka ta rapende di disizons ki bu ta toma na bu vida pamodi bu fé. I Jeová nunka ka ta skese di ‘amor ki bu mostra pa se nómi’. (Heb. 6:10) Pur isu, sforsa pa bu bira bu fé más fórti. Asi bu ta toma bons disizon na vida i bu ta odja ma bu Pai na Séu krê midjór pa bo. — Lé Salmo 32:8.

16. Pamodi ki nu debe da nos liberdadi valor i uza-l dretu?

¹⁶ Apóstlu Polu skrebe: ‘Undi spritu di Jeová sta, la ten liberdadi.’ (2 Cor. 3:17) Jeová gosta di liberdadi i el faze-u di un manera pa bu gosta di liberdadi tanbê. Má, el krê pa bu uza bu liberdadi dretu di un manera ki el ta proteje-u. Pur izénplu, alguns jóven ki bu konxe gosta di odja pornografia ô ten konportamentu seksual mariadu, faze disportu ki ta poi ses vida na prigu, uza dróga ô bebe dimás. Na komésu, kes kuza pode parse sábi, má bu ta  paga karu. Bu pode panha duénsa, fika visiadu ô ti móre. (Gál. 6:7, 8) Kes jóven ki ta faze kes kuza la pode pensa ma es é livri, má dipôs es ta odja ma tudu é un iluzon. — Tito 3:3.

17, 18. (a) Pamodi ki obi ku Deus ta da-nu liberdadi di verdadi? (b) Di ki manera Adon ku Eva na komésu tinha más liberdadi ki nos oji?

¹⁷ Má, kantu algen ki bu konxe ki fika duenti pamodi es ka sigi leis di Deus? Nu ka ten dúvida ma obi ku Jeová é bon pa nos. É bon pa nos saúdi i el ta da-nu liberdadi di verdadi. (Sal. 19:7-11) I óras ki bu ta uza bu liberdadi dretu, ki é skodje obi ku leis i prinsípius di Deus, bu sta mostra Deus i bu pai ku bu mai, ma bo é un algen responsável. Bu pai ku bu mai ta kúnfia más na bo i es ta da-u más liberdadi. I Jeová promete ma el ta da tudu se sérvus fiel kel liberdadi perfetu, ki Bíblia ta txoma di ‘liberdadi ku glória di fidjus di Deus.’ — Rom. 8:21.

¹⁸ Adon ku Eva tevi xansi di xinti kel liberdadi li. Na jardin di Éden tinha sô un kuza ki Deus fla-s ma es ka debe fazeba. Es ka podia kumeba fruta di un arvi. (Gén. 2:9, 17) Bu ta atxa ma kel órdi ki Deus da-s éra difísil dimás i injustu? Klaru ki nau! Pensa na txeu lei ki umanus faze i ki nu ten ki sigi. Má, Jeová da Adon sô un lei.

19. Modi ki Jeová ku Jizus sta inxina-nu ser livri?

¹⁹ Jeová ta trata-nu ku sabedoria. Envês di el da-nu txeu lei, ku paxénxa el ta inxina-nu sigi lei di amor. El ta inxina-nu sigi se prinsípius i pa nu ôdia kes kuza ki é mau. (Rom. 12:9) Na diskursu ki Jizus faze na monti, el mostra pamodi ki un algen ta faze kuza mariadu. (Mat. 5:27, 28) I na kel mundu novu, Jizus é Rei di Reinu di Deus, el ta kontinua ta inxina-nu odja kuzas dretu i mariadu sima el ta odja. (Heb. 1:9) Tanbê, el ta ben poi nos menti ku nos korpu bira perfetu. Imajina modi ki nu ta ben xinti! Nu ka ta ben xinti más tentadu pa faze kuzas mariadu i nen nu ka ta ben sufri pamodi pekadu. Ti ki enfin, nu ta fika kontenti di ten ‘liberdadi ku glória’ ki Jeová promete-nu.

20. (a) Modi ki Jeová ta uza se liberdadi? (b) Modi ki nu pode imita-l?

²⁰ Mésmu na kel mundu novu, nos liberdadi ta ba ten limiti. Kuza ki ta bai orienta-nu é amor pa Deus i pa otus algen. Óras ki nu faze si, nu sta imita Jeová. Liberdadi di Jeová ka ten limiti, má simé el ta uza se amor pa orienta tudu kuza ki el ta faze, ti na maneras ki el ta trata-nu. (1 João 4:7, 8 ) Kel-li siginifika ma nu pode ser livri di verdadi sô óras ki nu ta imita Jeová i nu ta dexa se amor orienta-nu.

21. (a) Kuzê ki Davidi xinti pa Jeová? (b) Kuzê ki nu ta ben prende na kel otu studu?

²¹ Bu sta kontenti ku tudu kes ‘kuza dretu’ ki Jeová da-u? El da-u kumida spritual, bons amigu, obijetivus ki bale péna i speransa di ten liberdadi perfetu na futuru i txeu otu prezenti bunitu. (Sal. 103:5) Talvês bu ta xinti sima Davidi kantu el ora i el fla kes palavra ki sta na Salmo 16:11 : ‘Bu ta faze-m konxe kaminhu di vida. Na bu prezénsa ten txeu alegria; na bu direita, sta filisidadi ki ka ta kaba.’ Na kel otu studu, nu ta ben pâpia di alguns jóia ki sta na Salmo 16. Es ta ben djuda-nu odja modi ki nu pode ten kel midjór vida ki ten.