1-2. (a) Kuzê ki Jeová ta pensa di kes algen ki faze un pekadu gravi i ki ka rapende? (b) Kuzê ki Jeová ta spera ma un algen ki peka ta faze?

 JEOVÁ ka ta seta tudu tipu di konportamentu, el ta ôdia pekadu. (Sal. 5:4-6) El ta spera ma nu ta obi ku se leis justu ki sta na Bíblia. É klaru ki Jeová ka ta spera perfeison di pesoas inperfeitu. (Sal. 130:3, 4) Má ô mésmu ténpu el ka ta seta kes ‘ómi ki ka ta ruspeta-l i ki ta bira se grandi bondadi na un diskulpa pa faze konportamentu diskaradu’. (Jud. 4) Alén di kel-li Bíblia ta pâpia di “distruison di kes algen mau.” — 2 Ped. 3:7; Apo. 16:16.

² Má, Jeová ka krê pa ningen ser distruídu. Sima nu odja na kes studu ki pasa, Bíblia ta mostra klaru ma “el krê pa tudu algen rapende.” (2 Ped. 3:9) Ansions ta imita Jeová óras ki es ta mostra paxénxa i es ta tenta djuda kes algen ki peka muda ses konportamentu i ganha aprovason di Jeová otu bês. Má alvês un algen ki peka pode ka rapende. (Isa. 6:9) Enbóra ansions ta tenta djuda un algen txeu bês, alguns algen ta kontinua ta faze kel ki é mariadu. Kuzê ki ansions debe faze na kes situason li?

“NHOS TRA KEL ALGEN MAU DI NHOS MEIU”

3. (a) Kuzê ki Bíblia ta fla ma debe fazedu ku un algen ki peka ma ki ka rapende? (b) Pamodi ki nu pode fla ma é kel algen ki peka ki skodje sai di kongregason?

³ Óras ki un algen ki peka ka rapende, ansions ten ki  sigi kel orientason ki sta na 1 Koríntius 5:13, ki ta fla: “Nhos tra kel algen mau di nhos meiu.” Kel algen ki peka sabe ma si el ka rapende el ta tradu di kongregason. Nton el sta ta kodje kuzê ki el símia. (Gál. 6:7) Pamodi ki nu pode fla kel-li? Pamodi kel algen ka muda sikrê kes ansion tenta djuda-l txeu bês. (2 Reis 17:12-15) El sta ta mostra através di kuzas ki el ta faze ma el ka krê obi ku leis di Jeová. — Deut. 30:19, 20.

4. Pamodi ki ta dadu un avizu óras ki un algen tradu di kongregason?

⁴ Óras ki un algen ki peka i ka rapende tradu di kongregason, ta dadu un avizu pa informa kongregason ma kel algen ka é más un Tistimunha di Jeová. a Obijetivu di kel avizu é ka umilha kel algen. Má é pa djuda irmons ku irmans obi ku kel órdi di Bíblia di “para di konvive” ku kel algen i ‘nen pa ka kume djuntu ku el.’ (1 Kor. 5:9-11) Jeová ten bons motivu pa da-nu kel órdi li. Apóstlu Paulu skrebe: “Un bokadinhu di fermentu ta fermenta un masa interu”. (1 Kor. 5:6) Si un algen ki peka i ka rapende ka tradu di kongregason, otus algen pode atxa ma es ka meste obi ku leis di Jeová. — Pro. 13:20; 1 Kor. 15:33.

5. Kuzê ki nu debe pensa di un irmon ô un irman ki tradu di kongregason, i pamodi?

⁵ Kuzê ki nu debe pensa di un irmon ô un irman ki tradu di kongregason? Enbóra nu ka ta konvive ku kel algen, nu ka debe perde speransa ku el, pamodi el é sima un ovelha ki perde. Un ovelha ki perde di ribanhu pode volta otu bês. Lenbra ma kel algen dja daba se vida pa Jeová. Infilismenti gósi el ka sta ta vive di akordu ku kel didikason ki el faze i el sta na un situason prigozu. (Eze. 18:31) Má timenti inda ten ténpu i Jeová sta ta mostra mizerikórdia, nu ten speransa ma kel algen ta volta. Nton, modi ki ansions pode djuda un algen ki peka i ki tradu di kongregason?

MODI KI ANSIONS TA DJUDA KES ALGEN KI TRADU DI KONGREGASON

6. Kuzê ki ansions ta faze pa djuda un algen ki tradu di kongregason?

⁶ Óras ki un algen ta tradu di kongregason, ansions ta para di tenta djuda-l volta pa Jeová? Klaru ki nau! Óras ki kel kumison di ansion ta fla kel algen ma el ta ba tradu di kongregason, es ta fla kel algen kuzê ki el debe faze pa el volta pa kongregason otu bês. Má ansions ta faze más di ki sô kel-li. Txeu bês es ta fla kel algen ki peka ma es ta gostaba di faze un runion ku el otu bês, alguns mês dipôs, pa djobe si dja el muda se atitudi. Si dipôs di alguns mês kel algen konkorda na faze un runion ku ansions otu bês, kes ansion ta insentiva-l pa el rapende i pa el volta. Sikrê na kel momentu inda kel algen ka muda di atitudi, kes ansion ta kontinua ta sforsa pa tenta pâpia ku el dipôs.

7. Óras ki un algen tradu di kongregason modi ki ansions pode imita konpaxon di Jeová? (Jeremias 3:12)

⁷ Ansions ta imita konpaxon di Jeová na manera ki es ta lida ku kes algen ki tradu di kongregason. Pur izénplu, na pasadu Jeová ka spera pa  kes israelita rapendeba antis di el tenta djudaba es. Envês di kel-li, el ta sforsaba pa djudaba es, antis di es mostraba kalker sinal di rapendimentu. Kel sugundu studu di kel grupu di artigu li splika modi ki Jeová fla Ozeias pa púrdua se mudjer i pa leba-l ku el, sikrê inda el staba ta faze un pekadu gravi. Di kel manera li, Jeová inxina se povu ma el ten txeu konpaxon. (Ose. 3:1; Mal. 3:7) Sima Jeová, ansions krê pa un algen ki peka rapende i volta pa kongregason, i es ka ta kria-l ninhun difikuldadi na kel-li. — Lé Jeremias 3:12.

8. Modi ki kel ilustrason ki Jizus konta di kel fidju ki perde ta djuda-nu intende midjór kuzê ki Jeová ta xinti pa kes algen ki tradu di kongregason? (Lukas 15:7)

⁸ Lenbra modi ki kel pai reaji na kel ilustrason di kel fidju ki perde. Lógu ki kel pai odja se fidju “el kóre, el brasa-l i el da-l beju.” (Luk. 15:20) Repara ma kel pai ka spera pa se fidju inplora pa el purdua-l. Envês di kel-li, kel pai kóre pa se fidju pamodi el ta amaba el. É si ki Jeová ta xinti pa kes algen ki para di sirbi-l. Ansions tanbê ta faze tudu kel ki es ta pode pa imita Jeová. Es krê pa kes algen ki para di sirbi Jeová volta pa el. (Luk. 15:22-24, 32) Óras ki un pekador rapende i el volta, ta ten alegria na séu i na téra tanbê! — Lé Lukas 15:7.

9. Kuzê ki Jeová ta insentiva kes algen ki peka pa faze?

⁹ Dja nu odja ma Jeová ka ta dexa kes algen ki ka krê rapende di ses pekadu kontinua na kongregason. Má Jeová ka ta bandona-s i el krê pa es volta pa el. Oseias 14:4 ta fla kuzê ki Jeová ta xinti pa un algen ki rapende. La ta fla: ‘N ta ben kura-s pamodi es ka foi fiel. N ta ben ama-s di mi pa mi, pamodi nha raiba dja fika lonji’. Sabe modi ki Jeová ta xinti ta poi ansions ta djobe kalker mudansa ki ta mostra ma kel algen dja kumesa ta rapende. Kes palavra li debe da kalker algen ki dexa di sirbi Jeová serteza ma el ta ama-l i ma el krê pa el volta pa el.

10-11. Kuzê ki ansions ta tenta faze pa djuda kes algen ki dja ten txeu anu ki tradu di kongregason?

¹⁰ Kuzê ki ansions ta tenta faze pa djuda kes algen ki talvês dja ten txeu anu ki es tradu di kongregason? Kes algen talvês dja para di faze kel pekadu ki pô-s ta tradu di kongregason. Na kes situason li, talvês alguns di es nen ka ta lenbra pamodi ki es tradu di kongregason. Ka ta inporta kantu ténpu kes algen dja ten fóra di kongregason, ansions ta tenta djobe-s i vizita-s. Duránti kes vizita ansions ta ora ku es i es ta insentiva-s ku amor pa es volta pa kongregason. É klaru ki si un algen dja ten txeu anu fóra di kongregason, di serteza el ta sta txeu fraku na sentidu spritual. Má si el fla ma el krê volta pa kongregason, ansions pode ranja un algen pa studa Bíblia ku el sikrê inda el ka readimitidu. Na tudu situason é ansions ki debe organiza kel studu di Bíblia.

¹¹ Ansions ta tenta imita konpaxon di Jeová, pur isu es ta djobe tudu kes algen ki dexa di sirbi Jeová i es ta insentiva-s pa es volta pa el. Óras ki un pekador mostra ma el muda se manera di pensa i se konportamentu, el pode readimitidu lógu. — 2 Kor. 2:6-8.

12. (a) Na ki situasons ansions meste ten txeu kuidadu? (b) Pamodi ki nu ka debe atxa ma Jeová nunka ka ta mostra mizerikórdia pa kes algen ki faze alguns tipu di pekadu? (Odja nóta di rodapé.)

 ¹² Na alguns situason ansions meste toma txeu kuidadu antis di readimiti un algen. Pur izénplu, si un algen é kulpadu di abuzu di menór, si el fika kóntra organizason ô si el tenta kaba ku un kazamentu, ansions debe ten serteza ma dja el rapende di verdadi. (Mal. 2:14; 2 Tim. 3:6) Ansions meste proteje irmons ku irmans na kongregason. Omésmu ténpu nu meste rekonhese  ma Jeová ta seta di vólta kalker algen ki peka, ki mostra ma dja el rapende di verdadi i para di faze kuzas mariadu. Enbóra ansions debe ten txeu kuidadu ku kes algen ki faze kes tipu di pekadu li, es ka debe pensa ma kes algen nunka ka ta resebe mizerikórdia di Jeová. b — 1 Ped. 2:10.

KUZÊ KI KONGREGASON PODE FAZE

13. Kal ki é diferénsa na manera ki nu ta trata un algen ki ansions reprende i na manera ki nu ta trata un algen ki tradu di kongregason?

¹³ Sima nu odja na studu ki pasa, alvês ta dadu un avizu ma un algen reprendedu. Na kel situason li, nu pode kontinua ta konvive ku el pamodi el rapende i el para di faze kel kuza mariadu. (1 Tim. 5:20) Inda el ta faze párti di kongregason i el meste di kel koraji ki nu ta xinti di sta djuntu ku nos irmons ku irmans. (Ebr. 10:24, 25) Má situason di un algen ki tradu di kongregason é txeu diferenti. Nu ta “para di konvive” ku kel algen i nen nu “ka debe kume djuntu ku” el. — 1 Kor. 5:11.

14. Modi ki un sérvu di Jeová pode uza se konsénsia trenadu pa Bíblia óras ki el ta lida ku un algen ki tradu di kongregason? (Odja fotus.)

¹⁴ Kel orientason ki sta na 1 Koríntius 5:11 krê fla ma nu ka pode konvida un algen ki tradu di kongregason pa sisti un runion na kongregason ô nu ka pode kunprimenta-l si el ba sisti runion? Nau. É klaru ki nu ka ta pasa ténpu ku el. Má un sérvu di Jeová pode uza se konsénsia trenadu pa Bíblia pa disidi si el ta konvida un algen ki tradu di kongregason pa sisti runion. Talvês kel algen pode ser se família ô un amigu. I si kel algen ba sisti? Antis nu ka ta kunprimentaba kel algen, má na kes situason li kada sérvu di Jeová debe uza se konsénsia trenadu pa Bíblia pa disidi kuzê ki el ta faze. Alguns algen talvês ta xinti avontádi pa kunprimenta-l ô pa resebe-l na runion. Má nu ka debe  ten txeu ténpu ta pâpia ku el ô pasa ténpu ku el ta faze otus kuza.

15. Ki tipus di pekadu 2 Juan 9-11 ta pâpia di el? (Odja kuadru “ Apóstlu Juan i apóstlu Paulu staba ta pâpia di mésmu tipu di pekadu?”.)

¹⁵ Alguns algen pode pergunta: ‘Bíblia ka ta fla ma un irmon ki fla mantenha pa un algen ki faze un pekadu gravi sta ta partisipa na se óbras mariadu?’ (Lé 2 Juan 9-11.) Kes versíklu ki sta antis i dipôs ta mostra ma kel testu li sta ta pâpia di kes algen ki fika kóntra organizason i ki ta insentiva konportamentu mariadu. (Apo. 2:20) Má si un algen ta spadja informasons falsu kóntra organizason ô si el ta insentiva otus algen pa ten algun tipu di konportamentu mariadu, ansions ka ta organiza pa ba vizita-l. É klaru ki nu ten speransa ma un dia kel algen pode ben na el i rapende. Má timenti kel-la ka kontise, nunka nu ka debe kunprimenta kes algen li i nen konvida-s pa sisti runion.

IMITA KONPAXON I MIZERIKÓRDIA DI JEOVÁ

16-17. (a) Kuzê ki Jeová krê pa kes algen ki peka faze? (Ezequiel 18:32) (b) Modi ki ansions pode trabadja djuntu ku Jeová óras ki es ta tenta djuda un algen ki faze un pekadu?

¹⁶ Kuzê ki nu prende na kes sinku studu na kel Sentinéla li? Jeová ka krê pa ningen distruídu! (Lé Ezequiel 18:32.) El krê pa tudu kes algen ki peka volta pa el. (2 Kor. 5:20) É pamodi kel-li ki Jeová sénpri insentiva se sérvus ki bandona-l pa rapende i volta pa el. Ansions na kongregason ta trabadja djuntu ku Jeová pa djuda kes algen ki faze pekadus gravi. — Rom. 2:4; 1 Kor. 3:9.

¹⁷ Imajina alegria ki ta ten na séu óras ki un pekador rapende. Nos Pai Jeová ki sta na séu, ta xinti kel alegria li tudu bês ki un di se ovelhas ki staba perdedu volta pa kongregason. Nos amor pa Jeová ta kontinua ta omenta timenti nu ta midita na se konpaxon, mizerikórdia i se grandi bondadi. — Luk. 1:78.