Profétas ta inxina-nu sobri Deus
Na ténpu antigu, Deus uza se profétas pa skrebe mensaji inportanti pa tudu algen. Má, kes mensaji pode mostra-nu modi ki nu ta resebe kes benson di Deus? Sin, es pode. Nu ben odja kuzê ki três proféta fiel ta inxina-nu sobri Deus.
ABRAON
Deus é justu i el krê abênsua tudu algen.
Deus promete proféta Abraon: ‘Tudu família di Téra di sertéza ta abensuadu através di bo.’ — Génesis 12:3.
Kuzê ki nu ta prende? Deus krê abênsua tudu famílias i el gosta txeu di tudu algen ki ta obi ku el, ka ta nporta si é ómi, mudjer ô mininu.
MUIZÉS
Deus ten mizerikórdia i el ta abênsua kes algen ki ta sforsa pa konxe-l.
Deus ki é Tudu-Poderozu da proféta Muizés puder pa faze milagris grandi. Má simé, Muizés ora: ‘Pô-m ta konxe bu kaminhus, pa N pode konxe-u i pa N pode kontinua ta tene bu agradu.’ (Êxodo 33:13 ) Deus fika kontenti kantu Muizés pidi-l kel-li, i el abensua-l ku más konhisimentu i sabedoria sobri Se kaminhus i kualidadis. Asi, Muizés prende ma Kriador é un ‘Deus di mizerikórdia i konpaxon’. — Êxodo 34:6, 7.
Kuzê ki nu ta prende? Deus krê abênsua tudu kes algen ki ta sforsa pa konxe-l midjór, ka ta nporta si é ómi, mudjer ô mininu. Na Skrituras Sagradu, Deus ta mostra-nu kuzê ki nu meste faze pa adora-l. Tanbê, el ta dexa-nu klaru ma el tene gana di abensua-nu.
JIZUS
Jizus trata pesoas ku konpaxon i el kura tudu tipu di duénsa
Nu pode ten kes benson di Deus pa tudu ténpu si nu prende kes kuza ki Jizus faze i inxina.
Palavra di Deus ta fla-nu txeu kuza sobri vida di Jizus i kes kuza ki el inxina. Deus da Jizus puder pa faze txeu milagri. El kura kes algen ségu, surdu i manku. I ti el resusita kes algen mortu. Di kel manera li, Jizus mostra alguns benson ki Deus ta ben da tudu algen na futuru. Jizus splika kuzê ki kada un di nos meste faze pa ten kes benson di Deus. El fla: ‘Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ — João 17:3.
Jizus tinha konpaxon, amor i bondadi. Pur isu, tudu tipu di algen, ómis, mudjeris, jóvens ku algen grandi, ta krê fikaba djuntu ku Jizus i ta setaba se konviti: ‘Nhos prende ku mi, pamodi mi é mansu i umildi di korason, i nhos ta atxa konsolu pa nhos.’ (Mateus 11:29 ) Alguns algen di kel ténpu ta maltrataba mudjeris. Má, Jizus sénpri ta trataba mudjeris ku txeu bondadi i ruspetu.
Kuzê ki nu ta prende? Jizus mostra grandi amor pa pesoas, i el dexa un bon izénplu di modi ki nu debe trata kunpanheru.
JIZUS É KA DEUS
Skrituras Sagradu ta inxina ma ‘ten sô un Deus’ i ma Jizus Kristu éra sô un mensajeru di Deus. (1 Coríntios 8:6 ) Jizus fla klaru ma Deus é más grandi di ki el i ma é Deus ki manda-l pa Téra. — João 11:41, 42; 14:28. *
