1, 2. (a) Modi ki nu ta xinti óras ki nu ta odja irmons ka ta dizisti di ses pregason? (Odja fotu na komésu di studu.) (b) Kuzê ki Jizus fla sobri prega na se ‘própi téra’? (Odja nóta di rodapé.)

 SÉRJIU KU OLINDA é un kazal di pioneru ki ta mora na Mérka. Es ten más di 80 anu i es ta anda ku difikuldadi. Má simé, dja es ten txeu ténpu ki es ten ábitu di ba prega tudu dia 7 óra di palmanhan na un paraji di otokaru. Kel paraji ta fika na un lugar di sidadi undi txeu algen ta pasa. Es ta oferese publikasons pa kes algen. Maioria di algen nen ka ta liga-s, má kel kazal ta kontinua la i es ta ri ku kes algen ki djobe-s. Óras ki da meiu-dia es ta bai pa kaza ta anda divagar. Kel otu dia 7 óra es ta sta la na kel paraji otu bês. Es ta faze kel-li 6 dia pa simana, duránti anu interu.

² Txeu irmon ku irman fiel na mundu interu, é sima Sérjiu ku Olinda. Dja es ten txeu anu ta prega na mésmu tiritóriu ki pesoas ta mostra poku interesi. Si kel-li sta kontise ku bo, nu ta ilojia-u di korason pa sforsu ki bu sta faze  pa ka dizisti. a Bu sforsu ta nkoraja tudu nos, mésmu kes ki dja ten txeu ténpu ta sirbi Jeová. Repara kuzê ki alguns enkaregadu di grupu di kongregason fla: “Trabadja na pregason ku kes irmon i irman fiel ta da-m koraji.” “Óras ki N odja ses fé, N ta xinti vontadi di kontinua ta prega ku koraji.” “Ses izénplu ta toka nha korason.”

 3. Ki três pergunta nu sta ben responde i pamodi?

³ Pa djuda-nu ten koraji pa nu faze trabadju ki Jizus manda-nu, nu ta ben responde três pergunta: Pamodi ki alvês nu ta xinti dizanimadu? Modi ki nu pode da frutu? Kuzê ki ta djuda-nu kontinua ta da frutu sen dizisti?

 4. (a) Modi ki Polu xinti kantu judeus ka krê obiba el? (b) Pamodi ki Polu xinti si?

⁴ Si dja bu kustuma xinti dizanimadu na tiritóriu ki pesoas ta mostra poku interesi, nton bu xinti mésmu kuza ki apóstlu Polu. El pasa uns 30 anu na se trabadju di pregason i el djuda monti di algen bira disiplu di Kristu. (Atos 14:21 ; 2 Cor. 3:2, 3) Má simé, el ka konsigi djuda txeu judeu. Maioria di es nen ka krê obiba ku el i alguns ti maltrata-l. (Atos 14:19 ; 17:1, 4, 5, 13) Modi ki Polu xinti? El fla: ‘N sta fla verdadi na Kristu ma N sta txeu tristi i ku un dór ki ka ta kaba na korason.’ (Rom. 9:1-3) Pamodi ki Polu xinti si? Pamodi se korason staba na trabadju di pregason. El ta preokupaba ku kes judeu, pur isu el ta pregaba pa es. Má óras ki el ta odjaba ma es ka sta daba valor pa mizerikórdia di Deus, Polu ta xintiba dizanimadu.

 5. (a) Pamodi ki nu ta prega pa otus algen? (b) Pamodi ki alvês é normal nu xinti dizanimadu?

⁵ Sima Polu, nu ta prega pamodi nu ta preokupa ku otus algen. (Mat. 22:39; 1 Cor. 11:1) Nu sabe ma sta txeu kuza guardadu pa kes algen ki disidi sirbi Jeová. Óras ki nu ta pensa na kes algen na nos tiritóriu, nu ta fla nos kabésa: ‘Es ka sabe kuzê ki es sta ta perde! N ta gostaba di djudaba es!’ Má simé, nu ta kontinua ta bai i ta insentiva-s pa es prende verdadi sobri Jeová i kuzê ki el ta ben faze na futuru. É sima ki nu sta fla-s: ‘N traze-u un prezenti bunitu. Favor toma-m el!’ I óras ki pesoas ta nega es prezenti, nu ta xinti sima apóstlu Polu, un ‘dór na [nos] korason’. Má kel-li krê fla ma nu ka ten fé? Nau. El ta mostra ma nos korason sta na pregason. Pur isu, sikrê alvês nu xinti dizanimadu nu ka ta dizisti. Elena, ki é pionera dja ten más di 25 anu, fla kuzê ki txeu di nos ta pensa: “Pregason é ka un trabadju faxi di faze. Má N ka ta troka-l ku ninhun otu trabadju.”

 6. Ki pergunta nu sta ben responde i modi ki nu sta ben faze-l?

⁶ Pamodi ki nu pode ten sertéza ma ka ta nporta undi ki nu ta prega, nos pregason ta dexa Jeová kontenti? Pa responde es pergunta inportanti, nu ben odja dôs ilustrason ki Jizus konta  kantu el pâpia sobri ‘da frutu’. (Mat. 13:23) Na kel primeru ilustrason el pâpia sobri un pé di uva.

 7. (a) Ken ki ta reprizenta kel ‘agrikultor’, kel ‘pé di uva’ i ‘kes ramu’? (b) Respósta di ki pergunta nu krê atxa?

⁷ Lé João 15:1-5, 8. Repara kuzê ki Jizus fla se apóstlus: ‘Kel-li ta da glória pa nha Pai: pa nhos kontinua ta da txeu frutu i nhos mostra ma nhos é nha disiplus.’ Jizus fla ma Jeová é ‘agrikultor’. El é ‘kel pé di uva di verdadi’ i se disiplus é ‘kes ramu’. b I kuzê ki é kel frutu? Na kel ilustrason, Jizus ka fla klaru kuzê ki é kel frutu, má el fla un kuza inportanti pa djuda-nu atxa respósta.

 8. (a) Na kel ilustrason ki Jizus konta, modi ki nu sabe ma kel frutu é ka un novu disiplu? (b) Kuzê ki Jeová nunka ka ta pidi se sérvus?

⁸ Repara kuzê ki Jizus fla sobri se Pai: ‘El ta tra tudu kes ramu ki sta na mi, ki ka ta da frutu’. Kel-li ta mostra ma Jeová ta atxa ma nos é se sérvus sô si nu ta da frutu. (Mat. 13:23; 21:43) Nu ka debe pensa ma kel frutu ki nu debe da é un algen ki nu djuda bira un disiplu. (Mat. 28:19) Pamodi ki nu pode fla kel-li? Pensa na kes irmon fiel ki dja ten txeu ténpu ta prega na tiritóriu ki maioria di algen ka ta mostra interesi. Txeu di kes irmon nunka ka konsigi djuda un algen bira disiplu. Má nu debe pensa ma es é ramu ki ka ta da frutu? Klaru ki nau. Pamodi? Pamodi nu ka pode obriga ningen bira un disiplu. Tanbê Jeová é un Deus di amor. Nunka el ka ta nega se sérvus sô pamodi es ka sta konsigi faze un kuza ki ka sta na ses mô. Jeová ka ta pidi se sérvus un kuza ki es ka ta pode faze. — Deut. 30:11-14.

 9. (a) Na ki trabadju nu ta da frutu? (b) Ki ilustrason nu sta ben odja i pamodi?

⁹ Nton, kuzê ki é kel frutu ki nu debe da? Dja nu odja ma kel frutu é un kuza ki nos tudu ta pode faze. Na ki trabadju nu ta konsigi da frutu? Na pregason di notísias sábi di Reinu di Deus. c (Mat. 24:14) Pa nu ten sertéza di kel-li, nu ben odja kel sugundu ilustrason ki Jizus konta sobri kel ómi ki símia.

10. (a) Na kel ilustrason, kuzê ki ta reprizenta kel simenti i kel txon? (b) Ki tipu di frutu un pé di trigu ta da?

¹⁰ Lé Lucas 8:5-8, 11-15. Na ilustrason di kel ómi ki ta símia, simenti ta reprizenta ‘palavra di Deus’ ki é mensaji di Reinu. Kel txon ta reprizenta korason di algen. Nu imajina ma simenti kai na un bon txon i el da un pé di trigu. Kel pé di trigu ta da ‘frutu 100 bês más’. Má ki tipu di frutu kel pé di trigu ta da? El ta da un otu pé di trigu? Nau, el ta da novu simenti, ki pode bira un otu pé di trigu. Na kel ilustrason, un simenti konsigi da 100 bês más. Má kuzê ki kel-li ten aver ku trabadju di pregason?

11. (a) Kuzê ki ilustrason di kel ómi ki símia ten aver ku nos trabadju di pregason? (b) Modi ki nu ta da novu simentis?

¹¹ Nu ben faze un konparason. Imajina ma uns anu atras, alguns Tistimunha di Jeová ô nos pai ku nos mai pâpia ku nos sobri notísias sábi. Nu pode  fla ma es símia un simenti na nos korason. Kantu nu seta notísias sábi, kel simenti kria raís, nase i bira un pé di trigu prontu pa da frutu. Má lenbra ma pé di trigu ka ta da un otu pé di trigu, má el ta da novu simentis. Di mésmu manera, frutu ki nu ta da é ka un novu disiplu, é novu simentis di ‘palavra di Deus’. d Modi ki nu ta da novu simentis? É óras ki nu ta prega notísias sábi di Reinu. Nton, sénpri ki nu pâpia di notísias sábi ku un algen, nu sta spadja kel simenti ki simiadu na nos korason. (Lucas 6:45 ; 8:1 ) Kel ilustrason ta inxina-nu ma sima nu ta kontinua ta prega sobri Reinu di Deus, nu sta ta ‘da frutu sen dizisti’.

12. (a) Kuzê ki nu ta prende na ilustrasons di pé di uva i di kel ómi ki símia? (b) Modi ki bu ta xinti di sabe kel-li?

¹² Kuzê ki nu ta prende na ilustrasons di pé di uva i di kel ómi ki símia? Es ta mostra ma ‘da frutu’ ka ta dipende si algen seta mensaji di Reinu, má el ta dipende di nu kontinua ta prega. Polu mostra kel-li, kantu el fla: ‘Kada un ta resebe se própi rekonpénsa, di akordu ku se própi trabadju.’ (1 Cor. 3:8) Repara ma rekonpénsa é ka di akordu ku rezultadu di trabadju, má é di akordu ku trabadju. Matilda, ki é pionera dja ten más di 20 anu, fla: “N ta fika kontenti di sabe ma Jeová ta rekonpensa nos sforsu.”

13, 14. Di akordu ku Romanos 10:1, 2, kuzê ki djuda Polu ka dizisti?

¹³ Kuzê ki pode djuda-nu kontinua ta da frutu sen dizisti? Na komésu di studu, nu odja ma Polu xinti dizanimadu kantu judeus ka krê setaba notísias sábi. Má simé el ka dizisti. Repara kuzê ki Polu ta xintiba pa kes judeu, el fla: ‘Kuzê ki N krê di korason i ki N ta pidi Deus, é pa es ser salvu. Pur isu, N da  tistimunhu ma es ten zelu pa Deus, má es ka ten konhisimentu izatu.’ (Rom. 10:1, 2) Kuzê ki djuda Polu ka dizisti di prega?

¹⁴ Primeru, Polu fla pamodi ki el krê kontinuaba ta prega pa judeus. El fla: ‘N krê di korason pa es ser salvu.’ Polu tinha vontadi pa peloménus alguns judeu salva. (Rom. 11:13, 14) Sugundu, Polu fla ma el ta ‘pidiba Deus pa es’.  El ta pidiba Deus na orason pa kes judeu setaba notísias sábi. Tirseru, Polu fla ma kes judeu ‘tinha zelu pa Deus’. El ta odjaba kuza dretu ki es tinha na es i el ta rekonhiseba ma es tinha zelu. Polu sabia ma kes judeu podia biraba disiplu di Kristu, sima kontise ku el.

15. Modi ki nu pode imita Polu? Da izénplus.

¹⁵ Modi ki nu pode imita Polu? Primeru, nu ten ki kria dizeju na korason di djuda kes ki ten ‘tendénsia pa vida pa tudu ténpu’. Sugundu, nu ten ki pidi Jeová pa abri korason di kes algen sinseru. (Atos 13:48 ; 16:14 ) Silvana ki dja ten kuazi 30 anu di pioneru, fla: “Antis di N konku na un kaza, N ta pidi Jeová na orason pa el djuda-m ten un bon atitudi.” Nos tanbê nu debe pidi Deus pa uza se anjus pa djuda-nu atxa kes algen ki krê obi mensaji. (Mat. 10:11-13; Apo. 14:6) Repara kuzê ki Robertu ki dja ten más di 30 anu di pioneru fla: “Anjus sabe kuzê ki ta kontise na vida di kes algen na tiritóriu. Trabadja ku es ta da-nu txeu alegria!” Tirseru, nu debe odja kuza dretu ki kes algen ten. Carl, un ansion ki dja ten más di 50 anu batizadu fla: “N ta djobe kalker sinal di interesi ki un algen mostra. Pode ser ki el djobe-nu kontenti, ri ku nos ô faze-nu un pergunta sinseru.” Sima kes izénplu li ta mostra, nu pode da frutu sen dizisti.

16, 17. (a) Kuzê ki Eclesiastes 11:6 ta inxina-nu? (b) Da un izénplu ki ta mostra modi ki nos trabadju di símia pode mexe ku kes algen ki sta odja-nu.

¹⁶ Alvês nu pode atxa ma ningen ka krê obi mensaji di Reinu ki nu ta prega. Má ka nu skese di rezultadu ki nos trabadju di símia pode ten. (Lé Eclesiastes 11:6.) Sikrê txeu algen ka obi-nu, má es ta odja-nu. Es ta repara nos sorizu na róstu, ma nos é idukadu i ma nu ta bisti dretu. Ku ténpu, nos manera di konporta pode djuda alguns di es odja, ma nos é ka kes tipu di algen ki es ta pensaba. Sérjiu ku Olinda, ki nu papiaba di es antis, repara kes mudansa li.

¹⁷ Sérjiu fla: “Pamodi nos saúdi nu fika sen bai da tistimunhu pa públiku. Kantu nu torna bai, alguns algen ki staba ta pasa pergunta-nu: ‘Kuzê ki kontise? Nu xinti sodadi nhos!’” Ta ri Olinda fla: “Kondutoris di otokaru ta sanaba nos i otus ti ta gritaba di déntu otokaru: ‘Nhos sta faze bon trabadju!’ I ti es ta pidiba nos revistas.” Un dia ki es staba ta trabadja ku karinhu, un ómi para, da-s flor i agradise-s pa ses trabadju.

18. Pamodi ki nu debe sta disididu na ‘da frutu sen dizisti’?

¹⁸ Nos tudu nu debe sta disididu na ka ‘diskansa [nos] mô’ di kontinua ta símia simenti di Reinu. Faze si, ta da-nu xansi di faze un trabadju inportanti ki é da ‘tistimunhu na tudu nason’. (Mat. 24:14) Más inportanti é ki nu ta ten alegria di sabe ma Jeová ta fika kontenti ku nos i ma el ta ama tudu kes ki ta kontinua ta ‘da frutu sen dizisti’!