Txeu algen ka ta krê sirbi Deus pamodi es ta atxa ma é el ki é kulpadu pa sufrimentu.

Di manera dirétu ô indirétu, txeu xéfi di relijion ta inxina ma Deus é kulpadu pa nos sufrimentu. Pur izénplu, alguns di es ta fla ma:

• Dizastris na naturéza é kastigu di Deus.

• Kriansas ta móre pamodi Deus ta meste más un anju na Séu.

• Deus ta toma párti na géras, ki é un kuza ki ta traze txeu sufrimentu.

Má kuzas ki xéfis di relijion ta inxina sobri Deus é verdadi? Nu pode kunfia na es?

Deus é ka kulpadu pa nos sufrimentu.

Kulpa ka pode ser di sel pamodi kes bon kualidadi ki el ten. Pur izénplu, Bíblia ta fla ma:

‘Tudu se kaminhus é justisa. El é justu i rétu.’ — DEUTERONÓMIO 32:4.

‘Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu!’ — JÓ 34:10.

‘Kel Tudu-Poderozu ka ta faze justisa mariadu.’ — JÓ 34:12.

Deus ka ta seta kes relijion ki ta inxina mintiras sobri el.

Kel-li ta inklui kes relijion ki ta inxina ma Deus é kulpadu pa nos sufrimentu i tanbê kes ki ta nvolve na géra i violénsia.

‘Profétas sta ta profetiza mintiras na nha nómi. N ka manda-s i nen N ka da-s ninhun órdi, nen N ka pâpia ku es. Es sta ta profetiza un vizon falsu pa nhos, un dibinhason ki ka ten valor i mintira di ses própi korason.’ — JEREMIAS 14:14.

Jizus kondena finjimentu di relijions.

‘É ka tudu algen ki ta fla-m: “Sinhor, Sinhor”, ki ta entra na Reinu di Séu, má é sô kel ki faze vontadi di nha Pai ki sta na Séu. Txeu algen ta ba fla-m na kel dia: “Sinhor, Sinhor, nu ka faze profesias na bu nómi, nu ka tra dimónis na bu nómi i nu ka faze txeu kuza grandi na bu nómi?” Má, nton, N ta ba fla-s: “Nunka N ka konxe nhos! Nhos bai fika lonji di mi, nhos ki ta faze kuzas ki é kóntra lei!”’ — MATEUS 7:21-23.